Nengeulaula 13
13
Is Kebpilia ki Seulu wey ki Bernabe
1Ne zuen menge tumutuu ziyà te inged he Entiyukya he menge menunudlù wey ebpemeneuven te Megbevayà. Dutun si Bernabe, si Simeon he migeraran daan te Meitem. Dutun daan si Lucio he tigSirini wey si Menain he ziyè en medekelà te turug̵an su impeelukuy ki Gubirnedur Hirudis hein batè pa. Ne zutun daan si Seulu. 2Ne zutun te ked-azap dan te Nengazen wey kedsalang dan te egkaan su ed-ampù dan, duen impesavut te Wag̵as he Mulin-ulin kandan. Ke sikandin te, “Ipeveyveyai niw kedì si Bernabe wey si Seulu su wey zan meveeli is ibpeveelan ku kandan.” 3Ne mid-uman dan medsalang te egkaan ne mid-ampù dan diyà te Megbevayà, ne zutun indepenet dan is belad dan ki Bernabe wey ki Seulu ne impeg̵enat dan sikandan.
Hein Diyà si Bernabe wey si Seulu te Sipru
4Ne haazà is dezuwa, geina te midsug̵ù sikandan te Wag̵as he Mulin-ulin, midlazas dan pehendiyà te inged he Silusya ne zutun mid-untud dan te barku su edhendiyè dan te pulu te zag̵at he egngezanan te Sipru. 5Ne hein nekezunggù dan diyà te inged he Selemina, impesavut dan dutun is Lalag te Megbevayà diyà te menge simbahan te menge Hudiyu. Iyan duma zan he edtavang kandan si Juan, kes ed-umawen ki Marcos.
6Ne mid-abley zan haazà is pulu ne nekeuma zan diyà te inged he Pepus. Ne zutun neuma zan is selemengkiru he egngezanan ki Berhisus. Hudiyu haazà he mibpetuu he ebpeneuven sikandin te Megbevayà. 7Emig̵u sikandin ni Sergio Peulu, te gubirnedur zutun te pulu. Ne uluwanen he etew haazà si Sergio. Impetawag din si Bernabe wey si Seulu su egkesuat he ebpemineg te Lalag te Megbevayà. 8Ne haazà is selemengkiru, ne egngezanan daan ki Ilimas, ne egkuntedahan din ensi Seulu ne midhimu zin is taman te egkehimu zin wey kenà meketuu ki Jesus haazà is gubirnedur. 9Ne si Seulu he egngezanan daan ki Pablo, nepurung sikandin ulini te Wag̵as he Mulin-ulin. Midtengtengan din haazà is selemengkiru 10ne migkeg̵iyan din te, “Iring ka ki Setanas he ebpenlimbung. Utew ka lalung ne kuntada ka te minsan hengkey he meupiya. Su is Lalag te Nengazen he utew hustu, egkeg̵iyen nu he tarù. 11Ne g̵untaan,” ke si Pablo, “edsilutan ka te Nengazen. Egkelakap ka, ne egkeug̵et ka egkeulii ne kenè ka ebpekeahà.” Ne zutundutun mibmerusirem is ked-ahà ni Ilimas. Ne nekekawàkawà su ebpetavang te menge etew he mekeag̵ak kandin. 12Ne zutun neketuu haazà is gubirnedur geina te neehè din haazà is neulaula, su utew sikandin neinuinu te impesavut kandin he keag̵i te Nengazen.
Hein Diyà si Pablo te Entiyukya he Sakup te Pisidya
13Ne si Pablo wey is menge zuma zin, mid-awè dan dutun te inged he Pepus ne mid-untud dan te barku. Ne midhendiyè dan te prubinsya he Pempilya, diyà te inged he Pirga. Ne si Juan mulà, mid-ewaan din sikandan ne mid-ulì diyà te Hiruselim.
14Ne mid-awè dan diyà te Pirga ne midlaus dan diyà te inged he Entiyukya, sikan is Entiyukya he ziyà te prubinsya he Pisidya. Ne te andew he Sebadu midseled dan diyà te simbahan te menge Hudiyu ne mibpinuu zan dutun. 15Ne zuen mibasa ziyà te insurat he kesug̵uan wey ziyà te menge surat te ebpemeneuven dengan. Ne hein neipus haazà, mibpeinsaan ensi Pablo te menge egalen dutun te simbahan te, “Menge suled, ke zuen niw ibpesavut he ibmelig-en te kedtuu kayi te nengetig̵um he etew, ebpemineg̵en dey.” 16Ne midhitindeg si Pablo ne imbayew zin is belad din su wey zan metueni he zuen egkeg̵iyen din ne migkag̵i te, “Menge zuma ku he kevuwazan ni Israyil wey sikiyu is langun he ed-azap daan te Megbevayà, pemineg̵a niw is egkeg̵iyen ku. 17Is Megbevayè tew te menge Hudiyu, nepilì din dengan is menge kepuun tew. Ne midtuvazan din sikandan te meupiya. Ne tenged dutun utew mibmezakel is kevuwazan dan te kemulu zan pa ed-ubpà diyà te tanà he Ihiptu he kenà kandan he inged. Ne is Megbevayà, pinaag̵i te zekelà he g̵ehem din, midtevangan din is menge kepuun tew wey zan mekeawà diyà te Ihiptu. 18Ne seled te kepatan he tuig te kemulu zan pa zutun te tanà he kenà ed-ubpaan te etew, naantus te Megbevayà is kedsukul zan kandin. 19Is menge meg̵inged dutun te pitu he g̵inhedian diyà te tanà he Kenaan, nengezaag sikandan te Megbevayà ne impaangken din is tanè dan te menge kepuun tew. Is ked-ul-ulaha te Megbevayà dutun te langun, ne seled te heepat he g̵atus wey kelimahan he tuig. 20Ne hein netapus haazà, menge zatù en is impezumala zin kandan taman te timpu ni Samuel, te ebpeneuven dengan.
21Ne zutun midhangyù dan diyà te Megbevayà he pilia zin is hadì he iyan edumala kandan. Ne si Seulu, he anak ni Kis he kevuwazan ni Benjamin, nepilì te Megbevayà he iyan hadì dan. Ne midhadì si Seulu seled te kepatan he tuig. 22Ne zutun in-awà te Megbevayà si Seulu zutun te kedhadì din, ne si David maan is impehadì din kandan. Ne migkag̵i is Megbevayà te, ‘Heini si David, is anak ni Isai, neehè ku he utew metinumanen te ebpeveelan ku kandin; utew ku egkesuati is menge ulaula zin.’ 23Na,” ke si Pablo, “si Jesus, is sevaha he kevuwazan ni Hadì David, iyan impenaad te Megbevayà he edlibri kenitew te kevuwazan ni Israyil wey kiw kenà mesiluti. 24Ne zutun te wazè pa mebpuun mebpenurù si Jesus, impesavut ni Juan Megbebewtismu ziyà te langun he menge kevuwazan ni Israyil he kinahanglan he mebpebewtismu zan he tuus te mid-iniyug̵an dan is memezaat he ulaula. 25Ne zutun te meg̵aan en egkepasad ni Juan is ebpeveelan kandin te Megbevayà, migkeg̵iyan din is menge etew te, ‘Kunaan niw vuwa ke iyan a sikan is ebpeebuten niw he hadì, iyan, kenà a iyan. Ebpekesunud sikandin kediey ne lavew sikandin kedì su minsan te kedhekaza zà te hiket te sepatus din kenè e pa zait.’
26Ne menge suled,” ke si Pablo, “sikiyu is menge zuma ku he kevuwazan ni Israyil wey kevuwazan ni Abraham, wey sikiyu zaan is kenà Hudiyu he ed-azap daan te Megbevayà, iyan kiw kes mibpeuwitan te Megbevayà te Meupiya he Tudtulanen wey kiw melibri te kedsiluti kenitew. 27Is menge Hudiyu he menge meg̵inged diyà te Hiruselim wey is menge egalen dan, wazè dan mesavut he iyan si Jesus sikan is edlibri kenitew. Ne wazè dan daan mesavut is insurat he tagnà te ebpemeneuven dengan te Megbevayà. Minsan ke egkezineg dan is kebesaha kayi kada Sebadu ziyà te menge simbahan dan, nengetuman dan gihapun kes nengetagnà pinaag̵i te kegkag̵i zan he zait si Jesus he edhimetayan. 28Ne minsan pa zutun te wazè dan naahà he salà he zait he idhimetayi kandin, midhangyù dan si Gubirnedur Pilatu he pehimetayi zin si Jesus. 29Ne hein nengeulaula en te menge tigHiruselim kes langun he netagnà dengan he ibpeulaula zan kandin, in-awè dan is lawa zin dutun te krus he midrensangan dan kandin ne inleveng dan. 30Ne mibanhew sikandin te Megbevayà. 31Ne hein nevanhew en si Jesus, seled te mezakel he menge andew is layun din kebpaahà te menge etew he iyan menge zuma zin hein mid-awà sikandin diyà te prubinsya he Geliliya ne midhendiyà te inged he Hiruselim. Ne sikandan guntaan, ibpenudtul zan si Jesus diyà te menge zuma tew he kevuwazan ni Israyil. 32Ne sikami zaan,” ke si Pablo, “dini key g̵untaan su ibpesavut dey keniyu is Meupiya he Tudtulanen. Duen ed-ul-ulahan te Megbevayà he impenaad din dengan te menge kepuun tew. 33Ne sikitew is menge kevuwazan dan, midhimu zin dini te kenitew is impenaad din kandan ne mibanhew zin si Jesus. Su zuen migkag̵i te Megbevayà dutun te libru te menge Salmo he insurat dengan dutun te ikezuwa he Salmo he edhenduen te,
‘Iyan ka Anak ku ne g̵untaan ibpeehè ku he Amey a kenikew.’
34Ne impenaad daan dengan te Megbevayà is kebenhawa zin ki Jesus wey is kenè din kebmehimuwa he meredak is lawa ni Jesus su ke sikandin te,
‘Kes menge tuvad he impenaad ku ki David,
siguradu idtuvad ku keniyu.’
35Ne zuen pa netagnà ni David he menge lalag ni Jesus he edhenduen te,
‘Siak is metinumanen he sulug̵uen nu,
kenè nu ebmehimuwen he meredak is lawa ku
ziyà te leveng.’
36Ne netuenan ta, menge suled,” ke si Pablo, “he neug̵et en si David. Midtuman din is mibpeveelan kandin te Megbevayà ne hein neumuran sikandin ne minatey. Inleveng uvey te menge lukes din ne neredak is lawa zin. 37Iyan, si Jesus mulà, he mibanhew te Megbevayà, ne wazà mulà meredak is lawa zin. 38Kinahanglan, menge suled, he sevuta niw he tenged ki Jesus, ibpesavut dey en keniyu he ebpeseyluwen kiw te Megbevayà te memezaat he ulaula. 39Kenè kiw egkelibri te menge salè tew pinaag̵i te kedtumana tew te kesug̵uan ni Moises, iyan, is minsan hentei he edtuu ki Jesus, egkelibri mulà sikandin. 40Purungi niw isipa heini su wey kenà mehitavù diyà te keniyu is netagnà dengan he Lalag te Megbevayà he insurat te ebpemeneuven he ke sikandin te,
41‘Sikiyu is edsumpalit,
utew kew egkeinuinu te ebeelan ku.
Ne ebpatey kew su zuen ebeelan ku
he egkeehè niw, iyan,
kenè niw edtuuwan minsan duen edseysey keniyu.’ ”
42Ne hein miguwà si Pablo wey si Bernabe zutun te simbahan, migkeg̵iyan sikandan te menge etew he medlikù dan te ed-ilis he Sebadu wey zan iuman ipesavut haazà is midseysey ni Pablo. 43Ne zutun te ked-awè dan puun te simbahan, mezakel is menge etew he nemenduma ki Pablo wey ki Bernabe. Elin dutun is menge Hudiyu wey kenà menge Hudiyu he edsimba zuma te menge Hudiyu. Mibpekibitiyara kandan ensi Pablo. Ne midsembag̵an dan sikandan he kenè dan engkezi is kedsarig dan te g̵ag̵ew te Megbevayà.
44Ne zutun te mid-ilis he Sebadu hapit langun te tivuuk he menge meg̵inged dutun te Entiyukya is nengetig̵um dutun te simbahan su ebpemineg dan te Lalag te Nengazen. 45Iyan, hein nengeahà te menge Hudiyu is mezakel he menge etew, nengesina zan engki Pablo ne midsumpalit dan is impenurù ni Pablo ne mibpenulè dan sikandin. 46Ne minsan pa zutun wazà mahandek si Pablo wey si Bernabe su ke sikandan dutun te menge Hudiyu te, “Kinahanglan he edhunaan dey sikiyu is menge Hudiyu edtudtuli te ibpesavut te Megbevayà, iyan, geina te kenè niw edewaten, ibpeehè niw he kenè kew zait he ebeg̵ayan te untung he wazà pidtemanan. Ne tenged dutun kenè dey en maan ibpesavut is Meupiya he Tudtulanen diyan te keniyu, kekenà, edhendiyè key te kenà menge Hudiyu. 47Iyan heini ebpeveelan kenami te Nengazen su zuen insurat he lalag din he edhenduen te,
‘Midhimu ku sikew he sulù he ebpeketayew te menge etew he kenà menge Hudiyu wey mesangyew ziyà te egketemanan te kelibutan is kedlibriya ku te menge etew wey zan kenà mesiluti.’ ”
48Ne hein nezineg haazà te menge etew zutun he kenà menge Hudiyu, nengelipey zan utew ne mibpeselematan dan is impesavut kandan te Nengazen. Ne is langun he menge etew he imbanglis kandan te Megbevayà is untung he wazà pidtemanan, nemeketuu.
49Ne nekeeneb is Lalag te Nengazen diyà te langun he menge siringan dutun he menge inged. 50Ne is menge punuan dutun te inged he Entiyukya wey is menge vai he ed-azap te Megbevayà, midhimu sikandan te menge Hudiyu he mengepauk dan ki Pablo wey ki Bernabe. Ne midsegseg dan haazà is dezuwa zutun te inged. 51Ne zutun te ked-awà ni Pablo wey si Bernabe, in-awè dan is tanà diyà te parapara zan wey metueni te menge etew he kuntada sikandan te Megbevayà. Ne midlaus dan diyà te inged he Ikunya. 52Ne is menge sumusundan ni Jesus he netag̵ak diyà te inged he Entiyukya, mid-ulinan te Wag̵as he Mulin-ulin ne utew zekelà is kelipey zan.
Terpilih Sekarang Ini:
Nengeulaula 13: mbbNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2001, Wycliffe Bible Translators, Inc., All rights reserved.