Nengeulaula 1
1
1Minahal he suled ku he Teofilo:
Diyà te nehuna he kegug̵uzi ku kenikew, insurat ku is langun he mibeelan wey is langun he impenurù ni Jesus egenat dà dutun te aney en sikandin mebpenurù 2,3taman en te kebetuna kandin te Megbevayà pehendiyà te langit. Hein midhimetayan si Jesus ne nevanhew, mezakel is paag̵i te kebpaahaa zin te menge epustul te timaan he nevanhew en sikandin. Su seled te kepatan he andew zutun, layun sikandin ebpaahà kandan. Impenurù din kandan is kedhadì te Megbevayà. Ne te wazè pa sikandin betuna pehendiyà te langit, impenurù din daan pinaag̵i te g̵ehem te Wag̵as he Mulin-ulin is ebpeveelan din kandan te menge epustul he zaan he nepilì din. 4Ne sengeandew te netig̵um dan, migkag̵i zin kandan he, “Kenè kew med-awà dini te inged he Hiruselim, kekenà, medtag̵ad kew taman te kenè pa ibeg̵ey keniyu kes impenaad te Amey tew he Megbevayà. Nekag̵i ku en heini keniyu he zaan. 5Te timpu pa ni Juan, wahig is imbewtismu zin te menge etew. Iyan, mekepira zà guntaan iyan kebewtismuwi keniyu is: edlumunan is kada sevaha keniyu te Wag̵as he Mulin-ulin.”
Is Kegkevatun ni Jesus Diyà te Langit
6Ne zuen timpu he nengetig̵um dan en maan. Ne mid-insaan dan si Jesus, ke sikandan te, “Nengazen, iyan en be heini sikan is timpu te kedtevangi nu kenami te menge kevuwazan ni Israyil su wey iulì dini te kenami he inged he Israyil kes daan he keg̵ehem dey he edhedian key te keugelingen dey he hadì?” 7Ne midtavak si Jesus te, “Iyan dà is Amey tew he Megbevayà duen din keg̵ehem te kegketau ke keenu he timpu egketuman is ebeelan din, ne wazà itug̵ut keniyu is kegketueni kayi. 8Iyan,” ke si Jesus, “ebeg̵ayan kew zin te g̵ehem emun egkelumunan kew en te Wag̵as he Mulin-ulin, ne is tudtul te keag̵i ku, idsangyew niw zini te Hiruselim wey id-eneb niw zini te prubinsya he Hudiya wey ziyà daan te prubinsya he Semarya wey minsan hendei zini te egketemanan te kelibutan.” 9Ne te nekag̵i ni Jesus haazà, nevatun sikandin pehendiyà te langit. Ne te kemulu zan pa edlingahà su ed-ahaan dan is kegkevatun din, neelangan si Jesus te g̵apun ne naawà sikandin diyà te ked-ehè dan.
10Ne te kemulu pa sikandan dutun edlingahà diyà te langit, mibpaahà kandan diyà te uvey zan is dezuwa he maama he ebpenganlag is ugelingen dan. 11Ne migkag̵i heini is dezuwa te, “Sikiyu is menge tigGeliliya, maan is kemulu kew pa edlingahà diyà te langit? Heini si Jesus he neehè niw he nevatun pehendiyà te langit, keuzemè en edlikù dini te tanà, ne is kedlikù din, ne iring ded daan te kegkevatun din.”
Is Kebpilia te Id-ilis ki Hudas
12Ne zutun mid-awà is menge epustul ziyà te vuvungan he egngezanan te Ulivuwan, ne mid-ulì dan diyà te inged he Hiruselim. (Haazà is buvungan, uvey zà te Hiruselim; sengekilumitru zà buwa is keziyù din.) 13Ne hein nekeuma zan diyà te Hiruselim, mid-ulì dan diyà te rug̵u he zivavew ziyà te valey he dus endanas he ubpeey zan. Iyan heini ensi Pedro, si Juan, si Santiago, si Andres, si Felipe, si Tomas, si Bartolome, si Mateo, si Santiago he anak ni Alfeo, si Simon Siluti, wey si Hudas he anak ni Santiago. 14Is langun kandan, nesevaha is gehinawa zan te ked-ampù diyà te Megbevayà ne midtampu zaan is menge vahi. Elin dutun si Maria sikan is iney ni Jesus wey is menge hazi ni Jesus.
15Ne nekepira zutun, nengetig̵um is menge tumutuu, menge nenggatus wey keluwaan sikandan is mibpetemtempuwà dutun; ne midhitindeg si Pedro is egkag̵i te, 16“Menge suled, kenà egkehimu he kenà egketuman kes netagnà he insurat he Lalag te Megbevayà. Dengan mid-ulinan si David te Wag̵as he Mulin-ulin ne netagnè din si Hudas kes mibpalad ki Jesus diyà te edakep kandin. 17Si Hudas, duma tew he epustul, su insarig daan diyà te kandin is ebpeveelan kenitew te Nengazen,” ke si Pedro.
18(Ne si Hudas, impemasa zin te tanà kes insuhul kandin tenged te kelelalung din ne neulug sikandin ne nekelangkeb ne mibetu is getek din ne nekepeyapat is bituka zin. 19Ne hein netuenan heini te menge tigHiruselim, migngezanan dan haazà is tanà te Ekildama he ke và dà egkeg̵iya, tanà he nepemasa te selapì he imbayad te kedhimetayi te etew.)
20Ne ke si Pedro te, “Insurat dengan kes netagnà diyà te libru te menge Salmu he edhenduen te,
‘Ewai niw is ed-ubpaan din;
kinahanglan he wazè en ed-ubpà dutun.’
Duen daan insurat he lalag he edhenduen te,
‘Sikan is ebpeveelan kandin,
ipeveeli niw te zuma.’
21,22Ne tenged dutun,” ke si Pedro, “kinahanglan he ebpilien is sevaha he ebpekeuman kenitew te sepulù wey sevaha he epustul. Kinahanglan he zuma tew zengan dutun te kebpekiduma tew te Nengazen tew he si Jesus, puun pa te kebpemewtismu ni Juan taman en te kebetuna ki Jesus pehendiyà te langit, su kinahanglan he ebpeketampu kenitew te kebpenistig̵us te kegkevanhew ni Jesus,” ke si Pedro. 23Ne mibpilian dan is dezuwa he maama, si Jose Hustu wey si Matias. (Is sevaha he ngazan kayi te si Jose ne si Bersabas.) 24Ne zutun in-ampù sikandan eni Pedro ke sikandan te, “Nengazen, iyan ka nesayud ke hengkey is diyà te g̵ehinawa te minsan hentei. Ne g̵untaan ipeehè nu kenami ke hendei zapit kayi te zezuwa is nepilì nu 25he mehimu he epustul he id-ilis ki Hudas. Su si Hudas, mid-engkezan din kes mibpeveelan kandin ne midhendiyè en te hustu he ed-ulian din.” 26Ne hein nepasad dan te ed-ampù midripa zan haazà is dezuwa ne iyan neripahan si Matias, ne nehimu sikandin he sevaha te menge epustul iring dutun te sepulù wey sevaha.
Terpilih Sekarang Ini:
Nengeulaula 1: mbbNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2001, Wycliffe Bible Translators, Inc., All rights reserved.