Maatiyu 28

Ummaaki Yeesu Daga Mayde

(Markus 16.1‑10; Luka 24.1‑12; Yahaya 20.1‑10)

1Too, gaɗa Nyalnde Siwtaare, nyalnde Alal subaka, sey Maryaama ƴiwoyɗo Magadala e Maryaama go'oto on ɓe njahi ngam ɓe ngi'a yenaande nden. 2Ɗon e ɗon ɗum waɗi wongol dimbol leydi mangol, ngam goɗɗo malaa'ikaajo Joomiraawo wari daga dow, o talliti kaaƴa ngan daga dammugal yenaande nden, o jooɗii dow maaga. 3E mo ɗelkitoo bo maƴƴere, kolte maako boo e ranni tar bo hottollo. 4Nde sooji'en reenooɓe yenaande nden ngi'imo, kulol mangol nangiɓe haa ɓe ndiwni, ɓe njani, ɓe ngarti bo mayɓe.

5Ammaa malaa'ikaajo on wi'i rewɓe ɓen, “To' on kulu. E mi andi Yeesu ɗaɓɓitoton, baraaɗo dow gaafaangal. 6O walaa ɗo'o. Ɗum umminiimo daga mayde. Ngaree ngi'on to ɗum fukkinnoomo. 7Njahee nder yawɗaare mbi'on tokkuɓemo, ‘O ummake daga mayde. Raɗɗum, o artay'on yaaki leydi Galiili. Ton ngi'otonmo.’ Kanjum woni habaru ɗum ngaddanmi'on.”

8Sey rewɓe ɓen ali yenaande nden jawɗum nder kulol, ammaa e welwelo mango. Ɓe ndoggi ɓe njahi ngam ɓe mbi'aka tokkuɓe Yeesu.

9Sey Yeesu hawri e maɓɓe, wi'i, “Aku mooɗon!” Ɓe ɓattiimo, ɓe ndiccii, ɓe njogii koyɗe maako, ɓe mawninimo. 10Sey Yeesu wi'iɓe, “To' on kulu. Njahee mbi'on bandiraaɓe am njaha leydi Galiili. Ton ɓe ngi'atayam.”

Habaru Ɗum Reenooɓe Yenaande Ngaddi

11Rewɓe ɓen e dow laawol, sey woɓɓe nder sooji'en reenooɓe yenaande nden njahi gariiri ɗiiwiti mawɓe ardiiɓe diina fuu ko waɗi. 12Nde mawɓe ardiiɓe diina e mawɓe yimɓe kawriti, ɓe ndarwi dabare. Ɓe kokki sooji'en ɓen ceede ɗuɗɗe, 13ɓe mbi'iɓe, “Mbi'ee yimɓe, ‘Tokkuɓemo ngari jemma e min ɗaanii ɓe ngujjimo.’ 14To Gomnaajo nanii ɗu'um habaru, min estaymo min curana'on nattuki torra.”

15Sey sooji'en ɓen njaɓi ceede ɗen, ɓe ngaɗi non no ɗum wi'iɓe ɓe ngaɗa. Habaru ɗum sankitaama nder Yahuudanko'en, e ɓe kokka habaru ɗu'um haa hande.

Kuugal Ngal Yeesu Hokki Tokkuɓemo

(Markus 16.14‑18; Luka 24.36‑49; Yahaya 20.19‑23; Kuuɗe Lilaaɓe 1.6‑8)

16Sey tokkuɓemo sappo e go'o ɓen ndilli leydi Galiili to hocceere nde Yeesu wi'iɓe ɓe njaha.#Maat 26.32; Mar 14.28. 17Nde ɓe ngi'imo, sey ɓe mawninimo, ammaa woɓɓe ngaɗi seko nder ɓerɗe maɓɓe. 18Sey Yeesu ɓaddii haade maɓɓe, wi'iɓe, “Ɗum hokkiiyam fuu laamu dow e ley. 19Ngam non, njahee ngartiron fuu lenyi duuniyaaru tokkuɓeyam, ngaɗanonɓe baptisma nder inde Allah Nyaako Mo Dow, e Ɓiɗɗo, e Ruuhu Allah,#KL 1.8. 20on ekkitinaɓe ɓe tokka koo ɗume ko mbiimi'on ngaɗon. Raɗɗum, e mi wondi e mooɗon koo ndeye haa re'uki duuniyaaru.”

Terpilih Sekarang Ini:

Maatiyu 28: fuv

Highlight

Kongsi

Salin