If you would like a copy of this version please contact info@davaraudiobibles.org

Lahuali New Testament, CC-BY-SA-4.0, The Love Fellowship. Lahuali New Testament Audio Bible, CC-BY-SA-4.0, Davar Partners International, The Love Fellowship, 2022.

Lahuali New Testament

Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.

दी गप्पो थल यीशु ज़ि ऐनाह बि गलील झीलो मुखरिङ चेला तु टोईच़ी यच़ाह प्रगट लहरी। शमौन पतरस ए थोमा अतिंङ दिदुमुस ला कुट्री तोईरे, दंङ गलील प्रदेशो काना नगरो नतनएल ए जब्दीऊ योह, दंङ यीशु ऊ चेला तु बिचंङ च़ि झुह्ट ऊई मीहरे ठ्रोहका तोईरे। शमौन पतरसे दोतंङ साते कुतोह, “गेह मच्छ चुम्ज़ी य्वातग।” दोच़ी दोरंङ साते कुतोह, “ञेंहरे ला करंङ साते योंई।” दिऊ थल्जी दोरे हुंच़ा किशतीऊ टोईच़ी इलिर, पर दुह राता रिंङ दोतिंङ छले मा खोकसिरी।
ऊईरग मुंजे सरके यीशु झीलो मुखारिंङ खड़े तोहई; तांला चेलाज़ि दुह माह सेहतिर कि दुह यीशु शुह। दंङ यीशु ज़ि दोतंङ साते कुंई, “हे गिऊ प्यारे मीहरे, छि केहतु दोर्तिंङ छा ज़ेइमी थल्जी तोह आ?” दोच़ी जुबाब रेंईर, “माह।”
यीशु ज़ि दोतंङ साते कुंई, “किशतीऊ सुचंङ हासी जाल केंईन ता केतिंङ खोकसोतो।” दंङ दोच़ी जाल केहरिर, दंङ महस मह्छ़ खोकसिमी रंङ साते दोच़ी दुह जाल नुअंड्री मरतिरे। दिऊ थल्जी दुह चेलाज़ि अतंङ साते यीशु दाह लह्ज़ते, पतरस रंङ साते कुतोह, “दीह ता प्रभु शुह!” शमौन पतरस दीह रेड्रा कि दुह प्रभु शुह, उमरिंङ छ़िर छ़ुहचे च़रति, अंऊ दोई कम लहज़िमी टेमा रिंङ छ़ुह्च़ी तारेह, दंङ दोई झीलो अंद्रेग छ्वाह रे च़रति। पर ऊई चेलार मह्छ़ रंङ साते पिंङषे जाल नुअंड्रा किशती रिंङ अतिर, दोरे झीलो मुखंङ च़ि महस ओईतार माह तोईरे सिर्फ सो मीटरो लगभग ओईतार तोईर।
अंऊ मुका दोरे झीलो मुखंङ तक्सिरे, ता दोच़ी क्रोऊ मेह, दंङ दोऊ टोईच़ी मह्छ़ केहषी ए रोटी तंङरीर।
यीशु ज़ि दोतंङ साते कुंई, “अंऊ मह्छ़ा रे केहच़ी च़ुमसी तातन, दोतु बिचङ च़ि थोड़े अरे लेन्ज़ा हतांई।” दंङ शमौन पतरसे किशतीऊ टोईच़ी इलजे राओ टोईच़ी निन्जो शशुहम मोह्ड़े मह्छ़ा रे च़ि पिंङषे जाल मुखंङ नुअंड्रीरी, दंङ धोंण मह्छ़ारे शुहचंङ ला दुह जाल माह ध्वाक्सिरी। यीशु ज़ि दोतंङ साते कुंई, “अतंई बगत ज़ेईन।” दंङ चेला तु बिचंङ च़ि अतुला दिह हिम्मत माह शुई कि दोबि रुहक्पोर, “कि कांह अरी शुनाह?” छना कुचे दोरे ञेंहच़ातोर कि दुह प्रभु शुह। यीशु ज़ि तुंखा इलजे रोटी लेहप्ती दंङ दोतिंङ रेंई, दंङ ध्वांए मह्छ़ ला रेंई। दीह षुमु फेरा शुई कि यीशु सिमी दोरच़ी श्रींङे थल चेला तु बिचंङ प्रगट शुई।

बगत ज़ेह थल यीशु ज़ि शमौन पतरस रंङ साते कुतोह, “हे शमौन, यूहन्ना ओ योह, छि केई हेले ए दोतिंङ बे महस दा गेरंङ साते लहज़ातन आ?” दोई यीशु बि जुबाब रेंई, “वेई प्रभु; केई ता ञेंहच़ातन कि गेह करंङ साते दाह लहज़ातग।” यीशु ज़ि दोऊ हखा कुंई, “गिऊ थल जोज़ा दोतु झांह ठ्रोह देखभाल लोहू छना कुरच़ो रखवाली लेही।”
यीशु ज़ि यच़ाह दोरंङ साते कुतोह, “हे शमौन, यूहन्ना ओ योह, छि केई गेरंङ साते दाह लहज़ातन आ?” दोई कुतोह, “वेई प्रभु, केई ता ञेंहच़ातन कि गेह करंङ साते दाह लहज़ातग।” दंङ यीशु ज़ि कुंई, “गिऊ त्रैंईतु रखवाली लोहू।”
यीशु ज़ि तीसरा बार दोरंङ साते कुतोह, “हे शमौन, यूहन्ना ओ योह, छि केई गेरंङ साते दाह लहज़ातन आ?” पतरस दुखी शुई कि यीशु ज़ि तीसरा बार झांह कुहतो, “कि छि केई गेरंङ साते दाह लहज़ातन आ?” दंङ दोरंङ कुंई, “हे प्रभु, केई ता भत्ते धिर ञेंहच़ातन: कि गेह करंङ साते दाह लह्ज़ातग।” यीशु ज़ि दोबि कुंई, “गिऊ त्रैंईरे रुआक्तु। गेह करंङ साते हेले कुट्रातग, अपेहल कांह जवान तोईन ता केनोह उम छ़ुचा अंऊर हिटी तोहई दोखा य्वातेन; पर अपेहल कांह यंङदे शॉन ता गुहड़ फेलाएपोन, दंङ ऊई मीहरे कांह उम छुचातोर दंङ कनिंङ दोर्तिंङ रेंज़ा शोहर, अंऊर केई इपि माह जुंज़ातन।” यीशु ज़ि दिह, कंड्रिमी थल्जी कुंई कि पतरस छना सीओतो दंङ परमेश्वरो महिमा लोहतो; दंङ दिह कुट्रा थल, दोऊ हखा कुहतो, “गिऊ चेला शुहचे तोह।”

पतरस ए किरज़ा दुह चेला बि थलका अपि तंङतो, अच़ि यीशु दाह लहज़ाते, दंङ अच़ि बगत ज़ेइमी मुका यीशु काऊ हखा कोंङा शुहचे दी रूह्कते, “हे प्रभु, कनिङ च़ुम्ज़ाड़ अरी शुह?” दोबि खांई पतरसे यीशु हखा कुंई, “हे प्रभु, दिऊ छि हाल शोतो?”
यीशु ज़ि दोरंङ साते कुंई, “अगर गेह ज़ुफोंग कि दुह गिऊ यच़ाह अबिमी तचेक श्रींङे बंङज़ोतो, ता कनिंङ छि तोह? कांह गिऊ चेला शुहचे तोह।” दिऊ थल्जी ऊई साथी चेला तु बिचंङ दीह गप्पा फेलेके इलि, कि दुह अई चेला माह सीओतो; पर यीशु ज़ि दोरंङ साते दिह माह कुहते कि दुह माह सीओतो, पर दीह कुहते, “कि अगर गेह ज़ुफोंग कि दुह गिऊ यच़ाह अबिमी तचेक श्रींङे बंङज़ोतो, ता कनिङ दिरंङ छि तोह?”

अंऊ चेलाज़ि दिह भत्ते धिर खांई दोई गवाई रेंई, कि केहरे ला यीशु ऊ टोहकठे विशवास लोहनी। दंङ दोऊ गवाही हेले शुह। दोबि पता तोह कि दोई सच्चाई रंङ साते कुट्रा। ऊई ला महसे कम तोतोर, अंऊ यीशु ज़ि लहते; अगर दोरे भत्ते कम च़ेहसी शुंईयां, ता गेह ञेंहच़ातग, कि पुरा संसारा रिंङ दोरे कताबर केट्रिमी थल्जी धोंण ठाहर ला शुहबी माह तोहई।

Dengar यहून्नो 21