If you have would like a copy of this version please contact info@davarpartners.org

Text: Dhimal New Testament, CC-BY-SA-4.0, The Love Fellowship. Audio: Dhimal New Testament Audio Bible, CC-BY-SA-4.0, Davar Partners International, The Love Fellowship, 2022

Dhimal New Testament

Dhimal New Testament, by The Love Fellowship is licensed under Creative Commons Attribution-ShareAlike 4.0 License.

आइताबारको दिना ह्रिमाको माचाल-मुचुमलाउ मग्दल देराको मरियम तोमता लोहि, कालाउ इङको उन्ठुइ तोमको फिनुसो लाअ्पान्हाका तिङहि। कालाउ उङको सिमोन पतरुस कालाउ येसु मेनाङ मायारु पाका भेनेङ चात्याकोता धाअ्तेङसा हानिहि, कालाउ इम्बालाइहेङ दोअ्हि, “ओबालाइ प्रभु सिका जिउ तोमसो बाहार चुम्पुका हि, कालाउ वासेहेङ हिसो ताअ्का हि, इङको केलाइ मागिनाखे।”
कालाउ पतरुस कालाउ इङको भेनेङ चात्या बाहार ओल्लेतेङ तोमभारि हानिहि। उङको न्हेमि चात्या दोफाङ धाअ्पुहि, कालाउ भेनेङ चात्या चाहि मामार्फा धाअ्तेङ पतरुस खान्तेङ लाम्फा तोमता थुकाहि। कालाउ वा तोम लिता तुघुरतेङ खाङलाउ, इङको लुन्धाइका धाबागेलाइ खिनिङ इन्ता तिङहि, कालाउ वा तोम लिता मादुल्हि।
कालाउ सिमोन पतरुस उङकोको न्हु-न्हु लोहि, कालाउ तोम लिता दुल्हि, कालाउ इङको लुन्धाइका धाबागेलाइ खिनिङ एन्साङ हिका तिङहि। कालाउ इङको धाबा जेदोङ येसुको ह्राइता लुन्धाइका हिघाहि, आरु लुन्धाइका धाबागेलाइ दोफा मान्थुघाहि भरु इङको भेनेङ थामेता धेम्तेङ ताअ्का हिघाहि। कालाउ तोमता लाम्फा लोका भेनेङ चात्या बुङ लिता दुल्हि, वा खाङहि कालाउ खाङधुरि पाहि कि येसु सिकासो सिन्चाल्का हि। हाइपालिपानु इम्बालाइ येसु सिकासो सिन्हुतेङ ल्होकाङ दोअ्का धर्मसास्तरता लेखेको बचन एला थेकापा बुझेका मान्थुघाहि। इङको न्हुसो चात्यागेलाइ ता-ताइको साअ् भारि घुरेहि।


कालाउ मग्दल देराको मरियम तोम बाहार खारकाताङ जाअ्तेङ हिका हिघाहि। उङको खार्तेङ तोमभारि तुघुरतेङ खाङहि, कालाउ मरियम जे:का धाबा लागाइका न्हेमि स्वर्गदुतगेलाइहेङ तिङहि। इम्बालाइ जेता येसुको सिका जिउ ताअ्का हिघाहि। इन्ता एमि येसुको खिम्सु भारि कालाउ भेनेङ चाहि येसुको खोकोइ भारि योम्तेङ हिघाहि।
इम्बालाइ मरियमहेङ दोअ्हि, बेबाल नाअ् हाइ पालि, खारखेना? मरियम इम्बालाइहेङ दोअ्हि, इम्बालाइ काङको प्रभुको सिका जिउहेङ चुम्पुहि, कालाउ वासेहेङ हिसो ताअ्का हि, कासेहेङ थाहा मान्थु। इदोइ काथा दोअ्तेङ वा पासा भारि घुरिहि कालाउ येसुहेङ जाअ्तेङ हिका तिङहि, कालाउ येसु दोङ बे माको दोअ्तेङ नाल्लि मादोहि।
येसु मरियमहेङ दोअ्हि, ओइ बेबाल नाअ् हाइ पालि खारदोङखेना? नाअ् हासुहेङ भोखेना? उङको वासेहेङ मालिबे दोअ्तेङ दोअ्हि, नेउ नाअ् येसुको सिका जिउहेङ इतासो चुम्पुकानु हिसो ताअ्का हिना कासेहेङ दोअ्पि, कालाउ का वाको सिका जिउहेङ चुम्पाङका।
येसु वासेहेङ दोअ्हि, ओइ मरियम! उङको घुरितेङ वासेहेङ ताइको हिब्रु भासाता दोअ्हि, रब्बोनि, माकुनु हे गुरु ज्यु।
येसु मरियमहेङ दोअ्हि, काङको खोकोइता चातेङ कासेहेङ मारोके, हाइपालिपानु का एला थेकापा ताइको आबाकोता हानिका मान्थुघा। कालाउ काङको ओनेगेलाइकोता हानितेङ दोअ्पि, काङको आबा कालाउ नेलाइको आबा, कालाउ काङको परमेस्वर कालाउ नेलाइको परमेस्वरकोता का हानिदोङखा।
कालाउ मग्दल देराको मरियम हानिहि, कालाउ चात्यागेलाइहेङ हिङपाहि, कि का दोङ प्रभुहेङ तिङघा, का प्रभुहेङ तिङघा कालाउ वा दोङ कासेहेङ गोताङ काथा दोअ्पिहि।


ओदोङ आइताबारको दिलिमा, गोताङ चात्यागेलाइ ए थामेता जोम्हि कालाउ यहुदि आगुवागेलाइहेङ थितेङ फिनु गितेङ योम्तेङ हिघाहि। येसु लोतेङ इम्बालाइको माझाता जाअ्तेङ दोअ्हि, “नेलाइहेङ सान्ति ज्याको! इदोइ झोको दोअ्तेङ येसु इम्बालाइहेङ ताइको खुर कालाउ केङखेनेको पेचारा तिङपाहि। कालाउ प्रभुहेङ तिङतेङ चात्यागेलाइ ओसारापाङ लेङचाहि।
कालाउ येसु आरोङ इम्बालाइहेङ दोअ्हि, नेलाइहेङ सान्ति ज्याको! जेसाङ काङको आबा कासेहेङ इदोइ सुमिङता दिङगिल्हि, एन्साङ का बुङ नेलाइहेङ इदोइ सुमिङता दिङगिल्दोङखा।” कालाउ इदोइ दोअ्तेङ येसु इम्बालाइ ह्रुता ताइको हुसि सितेङ दोअ्हि, पबित्तरो आत्मा ह्रुसु। जाइको पाप नेलाइ स्यामा पास्वाना, इम्बालाइको पाप स्यामा जेङखे, कालाउ जाइको पाप नेलाइ स्यामा मापास्वाना इम्बालाइको पाप स्यामा माजेनाङ।

कालाउ येसु लोलाउ तेन्हे चात्या मध्येसो एमि, दिदुमस (जाउरिया) दोअ्का थोमाचाहि, इम्बालाइ दोफा मान्थुघाहि। ओदोङ भाअ्सिङ आरु चात्यागेलाइ थोमाहेङ दोअ्हि, केलाइ प्रभुहेङ तिङन्हाहि। कालाउ थोमा इम्बालाइहेङ जोबाफ दोअ्हि, जेलाउ थेकापा का वाको खुरको पेचारा मातिनाङका कालाउ पेचाराता काङको आङगुलि मायुकाङका, कालाउ वाको केङखेनेता काङको खुरहोइ मासाइयाङका, एन्सालाउ थेकापा का खाङधुरि मापाङका कि वा सितेङ सिन्चाल्का हि।
ए आथार न्हुसो येसुको चात्यागेलाइ आरोङ साअ् लिता हिघाहि। थोमा बुङ इम्बालाइ दोफा हिघाहि। कालाउ फिनुगेलाइ गिअ्का हिघाहि, कालाउ येसु लिता दुल्हि कालाउ माझाता जाअ्तेङ दोअ्हि, नेलाइहेङ सान्ति ज्याको! कालाउ येसु थोमाहेङ ताइको खुर तिङपातेङ दोअ्हि, इता खाङ नाङको आङगुलिहोइ, काङको खुरको पेचाराता युकाइ कालाउ नाङको खुरहोइ काङको केङखेनेता साइ। साङखा मापा, कालाउ खाङधुरि पाअ्‌, कि का सिन्चाल्का हिघा।
इदोइ काथा हिङतेङ थोमा येसुहेङ उत्तारा पिहि, काङको प्रभु कालाउ काङको परमेस्वर!
येसु थोमाहेङ दोअ्हि, हाइपालिपानु नाअ् कासेहेङ तिङका हिना ओदोङ भाअ्सिङ नाअ् कासेहेङ खाङधुरि पाखेना। कालाउ धन्य इम्बालाइ जाइ कासेहेङ मातिङसिङ बुङ खाङधुरि पाखे।

येसु आरु हेन्जाङ भारभुसाइका चिन्हगेलाइ चात्यागेलाइको आगाता पाहि, जेदोङ चाहि इदोइ कितापता लेखेका मान्थु। कालाउ इदोइ कारनहोइ लेखेका हि कि, नेलाइ खाङधुरि पासु कि। येसु दोङ परमेस्वरको चान ख्रिस्ट हि कालाउ वाकोता खाङधुरि पातेङ आनान्त जिबन निङसु।

Dengar युहान्‍ना 20