Ngiemboon - 2007 Edition (NT)

Ngiemboon - 2007 - BSCAM NT Drama

Nouveau Testament en Ngienboum © Alliance Biblique du Cameroun, 2007.

Yěsô piŋ ńkẅɛɛ ndá lyɛ̌’o, ńgʉa ńnéŋe ngʉ́ŋe letʉŋ. Menùɔ lá’ cú’tè lejʉ́ŋ yé tà ńgyɔ́ɔn tɛ’, tà á kúu tsɛ̀ɛ kanú’, ńnéŋe. Menùɔ lá’ tyé ngʉ̀ŋe ntse. Á lɔg mesagá nò éshwóŋó wɔ́b menò tà é gyɔ́ɔn gyɔ̌ɔn, ńgɔɔn né pɔ́b ngie: Tsɔ̌ nyìŋ lǎ’ ńgʉa ḿmá’ mbyè mmó, ńtóo ḿma’á, tsɔ́ memvòm gwe mánzsè, meshʉ́ŋ tó ńdagte ḿpfɛ́. Etsɔ́ memvòm gwe ná jʉ’e metóon, á jʉ’ gie tsetsá’ té wó tɛ’ wɔ́, ńtɔ́g sá’, ńtí nue é la zébe zebé. Nèm gÿo ńtʉ́a mboŋó, ńtuɔ é júm ńtí nue menŋaŋ la tè lyɛɛ ssé wɔ́. Etsɔ́ memvòm gwe tsɛ̀ɛ legǐ tepòŋ, legǐ tepóŋ gÿo ńdu sse éfóme mɛ̌. Etsɔ́ memvòm gwe ná jʉ’e tsetsá’ mbòŋo, ésá’ ńgú’, ńzém. Etsɔ́ letsiŋe gwɔ́ ná mvòm nkÿo, etsɔ́ ná mvòm móm ntɔgɔ́, setsɔ́ ná mvòm móm ntá. Nyìŋ lɔɔn ńgẅiin metuŋó lélɔg ńjú’u nò á jú’.


*Ngàŋa kwò Yěsô tóo lejʉ́ŋ yé ńzɛ́te yé ngie: Mélà’a kɔ́ ɔ̀ lɔg pɔ́ sagá nò ńgɔɔn nò mbwó lá’? Yěsô tsɔ́’ɔ mbwó pɔ́b ngie: E Ssé lá gÿó ngie pi pɛ zɔ zsé nó nénʉ́ na lefùɔ sé sie ée lelyěen, ńgʉa nà petsɔ́ pʉ̀a à tè gÿo ngie pɔ́ zsé wɔ́. Nyìŋ lɔɔn ńgẅiin mmó, mbà mé ge kẅi’i tsɔ́ né yé à lɔg ńgẅiin tà á gyɔ́ɔn. Tá ńké ńgʉ́a ná nyìŋ gẅie à tè mmó gẅiin, mbà mé ge kẅé méjʉ’ gẅie à zɔɔn ńgẅiin Áa mmó gie á gÿo tá mèŋ n dɔg pɔ́ sagá nò ńgɔɔn nò né pɔ́b, mélà’mie pɔ́ líe jʉ’, ńké tè gyá, ńjú’ jʉ’ ńké tè jú’ tà ńjú’ wɔ́. Á lɔgɔ ḿbumte pá’ *ntsẅì nkʉ̀ Ssé Esǎya la gɔɔn ngie:
«Pi ge gÿo ne jú’u jʉ’ é ké le jú’ tà ńjú’ wɔ́,
ńne líe jʉ’ é ké le mmó gyá
Á nue ntʉ́m pà lá’ pɛ̂ leen shÿɔg
pɔ́ leen ńziŋe metuŋó mɔ́b,
ńkábte menÿɔ́g mɔ́b,
ńdɔgɔ tě ńkwoŋo lélɔg menÿɔ́g mɔ́b ńgyá jʉ’ wɔ́,
lélɔg metuŋó mɔ́b ńjú’u nò wɔ́,
lélɔg legye sɔ́b ńkwaŋa nò wɔ́.
Pɔ́ té kwoŋo lékube mà wɔ́b gwɔ́,
ńdɔgɔ tě ńkwoŋo ngie n gÿo pɔ́ zeŋe wɔ́».
Tá á gʉa ná pi, mbà pi ee pàshÿó mbòŋo, á nue nÿɔ́g mí ne ńgyá jʉ’, metuŋó mí ne ńjú’u jʉ’. Tà mèŋ n ké shwóŋó gẅí, kwà’ nénʉ́, pà*ntsẅì nkʉ̀ Ssé tà ńgyɔ́ɔn, mbàa pàkú’te *lepʉ̌ la tsɔ́ɔn légyá menò mie pi gyá lɛ̂ tɛ’, pɔ́ té gyá, ńtsɔ́ɔn lé jú’ menò mie pi jú’u lɛ̂, pɔ́ té jú’


Pi zẅí’te nò gie sagá nò ná nyìŋ gẅie à pye mmó lɔgɔ ńgɔɔn: Ngʉ̀ŋe mánzsè gẅie tsɔ́ memvòm gwě wó, ée pʉ̀a pie pɔ́ jú’u nò *lefùɔ Ssé, pɔ́ té jú’ tà ńjú’ wɔ́. Sátà tó, éfó tsɛ̀ɛ ntʉ́m wɔ́b ńkẅile. Àjʉ’e metóon ée pʉ̀a pie pɔ́ jú’u nò Ssé, ésẅɛte ńzẅíŋ nê lekág, tá pɔ́ té nyé á lyɛ menŋaŋ ntʉ́m pɔ́b wɔ́, á nue pɔ́ gwɔ́ pɔ́ pʉ̀a lyɛ’ɛ́ lá’. Mé gwɔ́ tà ńzye lékʉ́e wɔ́b, ńnyɛɛ wɔ́b ngɔ́’ mélà’ nò Ssé pɔ́ gwóon ńgwá’. Mbyè mmó gie e gwě tsɛ̀ɛ megǐ tepòŋ, lɔgɔ ńgwɔ́ pʉ̀a pie é jú’u shwóŋò Ssé, ńgÿo ńzye lémÿɔg menò njÿó, ńzye lézáb ntʉ́m wɔ́b nà nkáb. Sɛ̌ shúm gÿo shwóŋò Ssé maga ntʉ́m pɔ́b té zém ntɔ̌ɔn. Mbyè mmó gie gwě nà tsetsá’a mbòŋo lɔgɔ ńgwɔ́ pʉ̀a pie pɔ́ jú’u shwóŋò Ssé tà nkwà’ ńjú’. Pɔ́ ée pá’ metsìŋe shúm mie setsɔ́ gwɔ́ ná memvòm nkÿo, setsɔ́ ná móm ntɔgɔ́, setsɔ́ ná móm ntá.

Yěsô gíŋe shwóŋó wɔ́b tsɔ́ sagá nò ngie: Nò *lefùɔ Ssé gwá’a nò nyìŋ gẅie á la pye mbyè mmó mbòŋo nká’ yé. Tá’ mé gwɔ́ tà ńdyé, ngàŋ mbù we tó ḿbye legǐ tepòŋ gẅie à sẅé mmó mbòŋo yá, ńgʉa. Shúm gÿo sá’, ńgú’ tà ńná metsɔ̀’. Mé gyá mmó tepòŋ gwɔ́ tsetsolo. Megàŋa fà’ ngàŋ nká’ wá tó ńgɔɔn né yé ngie: Ànde, ɔ̀ la tè pye pɔ́ mbyè mmó mbòŋo tsɛ̀ɛ nká’ gù wɔ́ lê? Legǐ tepòŋ piŋe fóo nzɔ̌ wɔ́? Á tsɔ́’ɔ mbwó pɔ́b ngie: Áa fà’a tsɔ́ ngàŋ mbù. Megàŋa fà’ pé zɛ́te yé ngie: Tà ɔ̀ zẅǐŋ ngie peg gʉa ńtsɔ́’ɔ mmó tepòŋ ŋwɛ́? Á yé ngǎŋ, ńgwɔ́ pi tóo ńtsɔ́’ɔ mmó tepòŋ ŋwɛ́, ḿbú ńtsɔ́’ wɔ́b lâ shùm mbòŋo. Pi nyé pâ shúm mbòŋo pú ngú’ tà ńkú fʉ̀’e lelag shúm. Á gwɔ́ fʉ̀’ó mèŋ n tsẅii mbwó pàlag shúm ngie pɔ́ vɔg ńtsɔ́’ɔ mmó tepòŋ, ńkwɛ́te meka’á meka’á pá’ mé ge tuɔ mmɔ̌g, ńgʉa nà shúm mbòŋo pɔ́ lag ńnéŋe tsɛ̀ɛ nkìŋ yɔ̀ɔn.


Yěsô gíŋe ńgɔɔn tsɔ̌ sagá nò mbwó pɔ́b ngie: Ànò *lefùɔ Ssé leen ńgwá’a tsɔ̌ ntí lesɔ́ɔn sésɔg sie nyìŋ la pí ḿbye nká’ yé. Yɛ̌ ntí lesɔ́ɔn sésɔg é pú ńkɔ́g ńcʉa memvòm shúm ntsèm, tá’ é la gÿo sá’, ńgú’, ńgʉa tÿǒ ńcʉa shúm léjÿó sie ée nká’ ntsèm, ńcʉ́’ʉ tÿǒ, ńtɔ́g mbwó, meshʉ́ŋ tó ḿbá’ menkʉ̀a mɔ́b tsɛ̀ɛ wó.
Yěsô gíŋe ńgɔɔn yɔɔn sagá nò ngie: Ànò *lefùɔ Ssé gwɔ́ pɔ́ pá’ méjʉ’ʉ *mvòŋ gẅie manzwě lɔg ḿvoŋo faline gie à fʉ̌’ ngʉ̀a sétá ńtsab, ḿbú ḿbú’ pú’ tà méjʉ’ʉ *mvòŋ ŋwɛ́ gÿo, faline ye ntsab ŋwɛ́ pú ńkwɔ́’.


Yěsô ké ńdɔg pɔ́ sagá nò ńgɔɔn mɔɔn menò mbwó lá’. Á lɔ̌ɔn tě ńgɔɔn tsɔ́ nò lê pɔ̌b té sagá nò ńcʉa mǒ wɔ́. Á lɔ̌ɔn ńgÿo pú’u, légwɔ́ gie nò yɔɔn gie *ntsẅì nkʉ̀ Ssé la gɔɔn lɔɔn ge pumte. À la gɔɔn ngie:
«Mèŋ n ge gÿo lɔg mesagá nò éshwóŋó wɔ́b nò.
Mèŋ n ge gÿo shwóŋó wɔ́b menò mie ée lelyěen tà fó fʉ̀’ gie mé la nyɛte njÿó».

Yěsô leen ńké ńnyé lá’ ńkúu ndá, *ngàŋa kwò yé kẅɛ́te yé, ńzɛ́te yé ngie: À kyagte sagá nò ná mbyè mmó ye tepòŋ yá éshwóŋó wɔ́b. Á gɔɔn né pɔ́b ngie: Nyìŋ gẅie à pye mmó mbòŋo aa *Míŋ Nyìŋ. Nká’ é gwɔ́ njÿó, mbyè mmó mbòŋo é gwɔ́ pʉ̀a pie e Ssé zɔ sá’a wɔ́b, mbyè mmó ye tepòŋ gwɔ́ pʉ̀a pie Sátà ne sá’a wɔ́b. Ngàŋ mbù gẅie à pye mbyè mmó ye tepòŋ, á gwɔ́ Sátà. Lelag shúm á gwɔ́ lyɛ̌’ɛ nzsònzèm, Megàŋa fà’ gwɔ́ *mecÿɔ́’ Ssé. Ndʉŋ ndʉŋ pá’ mé tsɔ́’ shúm tepòŋ ńtúɔ mmɔ̌g lá, á ge là’ gíŋe gwɔ́ pɔ́ pú’u, ná nzsònzèm lyɛ’ɛ́ lá’. *Míŋ Nyìŋ ge lá’ túm mecÿɔ́’ pé, pɔ́ fó nùɔ pʉ̀a pé ńkẅile ngàŋ nkwà’te mbɔɔ pʉ̀a tepòŋ, é ma’a wɔ́b tsɛ̀ɛ máamáa mmɔ̌g, pɔ́ gwɔ́ jʉ’ó ne ńdʉa, melóŋ pɔ́b ne ffó. Á gwɔ gwɔ́ pú’u, pʉ̀a pie é kú’te *lepʉ̌ Ssé gwɔ́ tsɛ̀ɛ ngwòŋ gẅie Tá wɔ́b Ssé sá’a, ńně ńŋwʉŋe pá’ nèm la. Nyìŋ lɔɔn ńgẅiin metuŋó lélɔg ńjú’u nò á jú’.

Yěsô gíŋe ńgɔɔn ngie: Ànò *lefùɔ Ssé gíŋe ńgwɔ́ pɔ́ pá’ tsɔ́ mmó tʉ̀ nzẅìŋ gie á lyeen tsɛ̀ɛ tsɔ́ nká’, nyìŋ gwɔ́ tá ńgyá, ńgíŋe ńde’e, ńdɔgɔ lékág ńkÿote ńgʉa sẅiŋ shúm sé ntsèm, ńdɔg nkáb ńtó njú wɛ̌ nká’.
Ànò *lefùɔ Ssé gíŋe ńgwɔ́ pɔ́ pá’ nò ntàŋ metʉ̌a gẅie à fa’a tɔgɔ́ tsye mbòŋo. À gwɔ̌ tà ńgyá tsɔ́ tɔgɔ́ tsye gie á jÿó nkáb tɛ’, ńgʉa sẅiŋ shúm sé ntsèm ntsèm, ńdɔg nkáb ńtó ńjúu yɛ̌ ŋwɛ́.

Yěsô gíŋe ngie: Àno *lefùɔ Ssé gíŋe ńgwɔ́ pɔ́ pà’ nò lekÿo sie mé ma’a tsɛ̀ɛ letʉŋ, messó kúu tsɛ̀ɛ wó ntí ntí. Lekÿo gwɔ́ tà ńdúe, mé shwoŋ ńdɔg ńgee ngʉ̀ŋe ntse, ḿbʉ́le ńnéŋe ssé, ńtyɛ́te messó me mbòŋo, ńnéŋe tsɛ̀ɛ metúŋ, ńgwá’ metsɔ́ mie ńgwɔ́ é le kẅéte. Á ge lá’ gwɔ́ pɔ́ pú’u, ná nzsònzèm lyɛ’ɛ́ lá’. *Mecÿɔ́’ Ssé ge lá’ tó, éfó nùɔ ngàŋa nò nénʉ́, éfag pʉ̀a tepòŋ, é ma’a wɔ́b tsɛ̀ɛ mejʉŋ mmɔ̌g. Pɔ́ gwɔ́ jʉ’ó ne ńdʉa, melóŋ pɔ́b ne ffó.

Yěsô zɛ́te *ngàŋa kwò yé ngie: Tà pi jǔ’ mɔɔn menò ntsèm? Pɔ́ tsɔ́’ ngie: Oon, peg jǔ’. Á gɔɔn ngie: Pi ké ńzsé ngie nkyàgte *lepʉ̌ Mǒsé gẅie à zẅiŋé nò *lefùɔ Ssé à gwá’a tsɔ̌ ndÿò gẅie eshúm ngù’ lâ se ngù’ɔɔn ée tsɛ̀ɛ ntaŋ yé. À néŋe tà mbùm ye poŋ, á gʉa mǒ ńkẅile ntí gie à kwǒŋ.


Yěsô lɔg mesagá nò ńgɔɔn nò mbwó pʉ̀a tà ńtsẅé jʉ’, éfó jʉ’ó ńgʉa né lá’ pɔb, ńkúu wó, ńně ńzí’i pʉ̀a nò Ssé tsɛ̀ɛ *ndá cú’tè pà Yuda. Pʉ̀a pie ée wó jú’u shwóŋò yé, ḿmɔɔn ńgɔɔn ngie: À lɔgɔ sɛ̂ legye lê metʉ̀ lɔg ńgÿo menò mmɔɔn mmɔɔn fóo nzɔ̌? À tè gwɔ́ pɔ́ míŋ kápíndɔ́ɔn wɔ́ lê? Lezíŋ má we té lê Malîɛ wɔ́ lê? À tè fɛ́ Jâg, lê Yesyɛ̂b, mbɔɔ Símo lê Jẅide wɔ́ lê? Mefɛ́ pé pe pànzwě metsèm té gwɔ́ pɔ́ tsetsɛ̀ɛ pege wɔ́ lê? À lɔgɔ yɔɔn ntí menò fóo pɔ́ nzɔ̌? Pɔ́ gɔɔn pá’ɔɔn, ńdʉ’ʉ lé jú’u nò yé. Yěsô leen ńké ńgɔɔn né pɔ́b ngie: Mé ná mekù’ *ntsẅì nkʉ̀ Ssé jʉ’ ntsèm, tà é cʉ́’ ndà’ lá’ pɔ́b, ńgÿo pʉ̀a tsìŋe ndá yɔ́b Yěsô gɔɔn pú’u, à tè gÿo menò mmɔɔn mmɔɔn wó tà é gyɔ́ɔn wɔ́, mélà’mie pɔ́ la tè záb ntʉ́m ná yé wɔ́.

Dengar Matio 13