N'KANGULU WUMOONË

Fë ntonunu fabë Libuungu i Libuungu lyabë yimunë Nzaambi i lyaawu lyabë Nzaambi. Lyaawu lyabë yimunë Nzaambi fë ntonunu. Nzaambi wuvaangë byakë byooso mu lyaawu. Cin'velë ve cikaambu kuvangëninë mu lyaawu. Cinë civangunu cyabë luziingu mu lyaawu. Luziingu be loolo lwabë cyeseesë ci baatu. Cyeseesë cilesikë ku citoombi, kasi citoombi cisye n'tambulë ko. Nzaambi wufilë cipayi cyaandi, muutu bën'teelë Za. Naandi wuyisë dedë mweekë mbaanji yi cyeseesë, mu kuleesi cimbaanji ci cyeseesë, bwiinji bakë booso bëta maanë mu naandi. Naandi wusye ba cyeseesë ko, kasi wabë mbaanji yi cyeseesë. Libuungu lyabë cyeseesë cicyelikë, ciyisë mu buloongo i cin'cyenisi baatu bakë booso.
Libuungu lyabë mu buloongo. Nzaambi wuvaangë buloongo mu lyaawu, kasi buloongo busye m'bakulë ko. Naandi wuyisë mu si yaandi, kasi mboongwaandi sye n'tambulë ko. Kasi, bakë booso bëtambulë lyaawu, bëta maanë mu lizinë lyaandi yi wusë bëvaanë n'swa wu kubeelë baanë bë Nzaambi. Baawu bëkeeli ko baanë bëbutukë mu meengë, kaambofo yaaku mu n'vwiilu n'sunyi, kasi bëfuminë ke Nzaambi.
Libuungu lyacitukë n'sunyi i lyaawu lizingilë fë meeyiitu, beeso tumonë bumpumu bwaandi, bumpumu bu Mwanaandi viingu ke Taatë, lyaawu liwaalë muulë i bucyelikë. Za wun'teelë cimbaanji, wulosukë : « Mu naandi mwa yitubilë ti, wo wun'kwisë ku mbusaami, mwiinji n'ciinzë cibilë naandi wabë ntetë yi miinu. » Besubooso tutambulë cikuuku mu businë bwaandi bunenë, muulë fë yilu muulë. Nzaambi wutuvaanë n'kaakë ke Moyiizë, kasi muulë i cyelikë byakwisilë mu Yeesu Kliistu. Muutu ve wumonë Nzaambi. Kasi Mwanaandi viingu, wunë wuke Nzaambi i wun'zingilaangë fë likumë li Taatë, wo naandi vwiili wun'zabikini.


Tala cimbaanji civaanë Za bunë mikwa-lwaangu Sizwiifë si Yelusaleemë bëfilë singangë-Nzaambi i sileviitë mu kun'yufulë : « Njeeyi nani wukeelye? » Naandi wusye maangë ko mu kuvutulë cyuufu, kasi naandi wuviisi fë ciyalëlë fë ntwaalë bakë booso : « Miinu yikeeli Kliistu ko. » Baawu bisë kun'yufulë : « Njeeyi nani wukeelye? Njeeyi Eli? » Za wuvutulë : « Miinu ko. » Oboobo, baawu bisë bweelooso kun'kufulë : « Njeeyi M'bicye? » Za wuvutulë : « Miinu ko. » Mu lyaawu, baawu bisë n'kaambë : « Njeeyi nani wukeelye? Cibilë beeso tufwenikini ke vutulë mbeembu ke bo batutumë. Njeeyi mbici wake n'tubë mu njeveekë? » Za wubëvutulë mbeembu mu maambu mu Ezayi m'bici :
« Miinu, mati mbeembu yilë mu kutendukë mu ntaandu ciyumi :
“Beeno lufwenikini kusunjikë nzilë yi Fumu!” »
Mu bipayi bëfilë ke Za, mwabë Sifalisyaanu, baawu bisë n'yufulooso : « Ningë njeeyi wukeeli Kliistu ko, keti Eli, kaambofo M'bici, cibilë-mbici wulë mu kubatizyaalë? » Za wusë vutulë : « Miinu yilë mu kulëbatizyaalë mu masi, kasi fë meeyiinu fëke wun'viipë wo beeno lukaambusu kuzaabë. Naandi wun'kwisë ku mbusaami, kasi miinu yisye fwanëkënë ko mu kukutulë misiingë sisapaatu syaandi. » Makë mooso omo mëlëvyokilaangë ku Betani lisimu li mwiilë wu Yulëdaanu, kwaawu kwa Za wulëbatizyalaangë.

Cilumbu cilandëkënë, Za wutalilë Yeesu wulëkwisë ke naandi, i wutubë : « Talaanu mwaanë limemë li Nzaambi lim'botulaangë lisumu li baatu booso. Mu naandi, mwaawu yitubilë : “Muutu wun'kwisë ku mbusaami, mwiinji bunaangë yi miinu. Mu cibilë ocyo, naandi wabë ntetë yi miinu kubutu.” Miinu sye zaabaangë kuve nani kukeeli, kasi yiyisë mu kubatizyaalë baatu mu masi i mu kun'zabikini ke mboongu baatu yi Islayeelë. »
Za wusë tubooso: « Miinu yamonë Ciluunzi ci Nzaambi cyafuminë ku yilu, cyaawu cyakulumukë dedë mweekë libeembi i cyabeetë fë yilwaandi. Miinu yisye n'zaabaangë ko nani kukeeli, kasi Nzaambi, wukun'filë mu kubatizyaalë baatu mu masi, naandi wukun'kaambë : “Njeeyi wum'monë Ciluunzi cin'kulumukë i cim'beetë mu muutu. Naandyoowo na wum'batizyaalë baatu mu Ciluunzi ci Saantu.” Miinu yamonë lyaliili, bwatubë Za i miinu yilë mu kuviisi ti muutu awu wuli Mwaanë Nzaambi. »

Cilumbu cilandëkënë, Za wabë yivaandi faawu yimunë bilaanzi byaandi byooli. Bunë kumonë Yeesu wulëvyookë, naandi wusë tubë : « Talaanu mwaanë limemë li Nzaambi! » Bilaanzi bi byooli bi Za, bëyuwu mëbuungu be moomo i bisë kulaandë Yeesu. Yeesu wusë balukë, kumonë ti baawu bëlë ke n'laandaangë i wusë bëyufulë : « Beeno, mbici luke toombaangë? » Baawu bisë kun'vutulilë : « Njeeyi kuni wun'kalilaangë, A Labi? » — Labi dedë muutu wun'tubë: N'loonji. — Yeesu wubëkaambë: « Yisaanu i monaanu. » Baawu bisë kweendë i kumonë fo naandi wulë kalilaangë. Baawu bëkalë yaandi fë cimweekë cilumbu be cyoocyo, tee fë zoolë na yi bukulu-bwiisi.
Wumweekë mu bilaanzi bi byooli wunë wuyuwu mëbuungu më Za i wulaandë Yeesu, wabë Andëlee nkoombë Simu li Pyeelë. Muutu wun'tetë wunë Andëlee kudyengënë wabë mwanaandi nguli Simu, naandi wukun'kaambë: « Beeso twamonë Mësiya. » – Nkuumbu be yooyo yin'tubë ti « Kliistu ». – Naandi wunatë Simu ke Yeesu. Yeesu kun'talë i wusë tubë : « Njeeyi Simu mwaanë Za. Mba bëkuteelë Sefaasë. » – Lizinë be lyooli lin'tubë « Pyeelë ». –

Cilumbu cilandëkënë, Yeesu wuyendë ku Ngalilee. Naandi wudyengënë Filiipë keti wukun'kaambë : « N'daandi! » – Filiipë wabë muutu wu Betesayiidë, libweeti li Andëlee i Pyeelë – Fë mbusë, Filiipë wudyengënë Natanayeelë i wusë n'kaambë : « Beeso twamonë muutu wo Moyiizë wutubilë mu Mikaakë i mibici yivaandi bëtubilë: Yeesu naandi mwaanë Zozeefë wu libweeti li Nazaleetë. » Natanayeelë wusë n'kaambë : « Ku Nazaleetë kupodi kubasikilë lyaambu libotye? » Filiipë wuvutulë : « Yisë i ndjeeyi wum'monë. »
Yeesu abu kwamoni Natanayeelë wulëkwisë ke naandi, wutubë mu cibilë cyaandi : « Talaanu, muutu wucyelikë ku Islayeelë. Mu naandi lyaambu li lupuutu voo. » Natanayeelë wuyufulë Yeesu : « Njeeyi buni be kun'zabilë? » Yeesu kun'vutulilë : « Ntetë Filiipë kukutelë, miinu yikumonë ntaangu wabë fë sinë n'ti n'ngengë. » Faawu, Natanayeelë wusë tubë : « A Labi, njeeyi mati Mwaanë Nzaambi! Njeeyi yivaandi Fumu Islayeelë! » Yeesu wusë n'vutulilë : « Bwaawu njeeyi wakun'telë maanë cibilë miinu yakukaambë yikumonë wukalë fë sinë n'ti n'ngengë. Njeeyi wum'monë mpaapë maambu kuvyokilë maawu ama. » Naandi wusë bweelooso: « Licyelikë miinu yilukaambë : beeno lum'monë liyilu lin'zibukë, siyaanzi sim'makë, sin'tuukë fë yilu Mwaanë muutu. »

Dengar Za 1