Tavaꞌu 11
11
Tani Veveeni ne Vavelu
1Tei, la ta mitema ane mimauli no lia no xalexalee tuatuala 'o ne, vaikalai'a vilesisi. Vaivaikala maumautunu ane ane'i ivivikala no anu ne vilesisi kalumo. 2Mixixaoxao no xalexalee lia mulai loxo no xalee ane aso uxali utelo no anu, la sou milai mixali no latia vile ne Vaviloni sou mixolu ane. 3Xe miavuti la mivikalane'i ngato'o aloxo 'o, “Laixe nenge taulaluumenge pilika maumautunu ka ta'elaxu mo sou uxali pekia'u loxo lavo'o.” La sou ane'i mino'u pilika maumautunu loxo ulaluu ia pekia'u sou mitulusou tani no anu. Miteitei koluta sou mutetelisou pekia'u. 4Ioxe, ane'i miavuti la mivikala aloxo 'o, “Vaimomo, 'o nenge ta 'iliisinge tuala vile tatila mo tatulusou tani vile veveeni utelai utalo teiteixi no loxotolo mo sou nenge ualasinge utelai. Mo nenge taxolu tapita vilesisi ano 'osi, ia tapaxele mo talai taxolu va'axu no xalexalee tuatuala se'i la uasi.”
5Xe ili'i, la IAUE Lataua mulu'e sou mumaisou tuala ilou tani e ta mitema mitulusou ne, 6la muvikala aloxo 'o, “Ta mitema ano 'o ne, ane'i ta mitema vilesisi mo vaikalai'a vilesisi. Ane'i a misokou 'o sou imasaxa lexe imulinu masaxa noxi'a sou lexe ixotataone'i. Ili'i xe ane'i ie'isou la, xe imasaxa lexe i'oxonu mii vile la, la ane'i i'oxonusi. 7Laixe nenge talu'elai mo ta'inanu vaikalai'a no anu vaivaikala piena mo sou mamu ane'i ivivikala no anu vaikala vilesisi.” 8IAUE Lataua muavuti la mukalipala'ane'i sou milai mixolu va'ava'axu no xalexalee tuatuala mole tuala ilou tani e mitutulusou ne musu'a. 9Tuala ne milemolu ualasou lexe Vavelu xo IAUE Lataua mu'inanu vaikalai'a xe mukalipala'ane'i sou milai mixolu va'ava'axu ane.
10Ioxe, nanasi'a ta mitema ane Semu muxalixa'a aloxo 'o. Tauu ie tamei mukalu ili'i no anu, lexa mu'unanu xalexalee tuatuala, la Semu tauu iexu mulai muxali loxo itemaxu ta'uve (100), la anu mupalaanu 'olu vile ualasou lexe Apasata. 11Xe ili'i la anu mumaulixu tauu ie loxo itemaxu mavulovexa tamei mo itemaxu ta'uve (500) la. No nano no tauutauu ie ane ne, la anu mupalaane'i ta 'olu se'i la, ka musoli.
12Xe Apasata tauu iexu mulai muxali loxo mavulovexa tatalu mo ta'uve, la mupalaanu 'olu vile ualasou lexe Sela. 13Anu muxolu mumaulixu tauutauu se'i la. Xe tauu iexu mulai muxali loxo itemaxu mavulovexa tamei mo tatalu (403), la anu mupalaane'i ta 'olu se'i la, ka musoli.
14Xe Sela tauu iexu mulai muxali loxo mavulovexa tatalu, la mupalaanu 'olu vile ualasou lexe Eve. 15Xe ili'i, la mupalaane'i ta 'olu se'i la. Xe tauu iexu mulai muxali loxo itemaxu mavulovexa tamei mo tatalu (403), la sou anu musoli.
16Xe Eve tauu iexu mulai muxali loxo mavulovexa tatalu mo tami'a, la mupalaanu 'olu vile ualasou lexe Pelexi. 17Xe ili'i la, la mupalaane'i ta 'olu se'i la. Xe tauu iexu mulai muxali loxo itemaxu mavulovexa tamei mo mavulovexa tatalu (430), la sou anu musoli.
18Xe Pelexi tauutauu iexu mulai muxali loxo mavulovexa tatalu, la sou anu mupalaanu 'olu laposalaxu ualasou lexe Leu. 19Xe ili'i, la mupalaane'i ta 'olu se'i la. Xe tauu iexu mulai muxali loxo itemaxu mavulovexa tamei mo muxatele tami'a (209), la sou anu musoli.
20Xe Leu tauu iexu mulai muxali loxo mavulovexa tatalu mo tamei, la sou mupalaanu 'olu laposalaxu ualasou lexe Seluxu. 21Xe ili'i, la mupalaane'i ta 'olu se'i la, xe tauu iexu mulai muxali loxo itemaxu mavulovexa vile mo muxatele tamei (207), la sou anu musoli.
22Xe Seluxu tauu iexu mulai muxali loxo mavulovexa tatalu, la mupalaanu 'olu laposalaxu ualasou lexe Naola. 23Xe ili'i, la mupalaane'i ta 'olu se'i la. Xe tauu iexu mulai muxali loxo itemaxu mavulovexa vile (200), la sou anu musoli.
24Xe Naola tauu iexu mulai muxali loxo itemaxu vile mo muxatele tami'a, la sou mupalaanu 'olu laposalaxu ualasou lexe Tela. 25Xe ili'i, la mupalaane'i ta 'olu se'i la. Xe tauu iexu mulai muxali loxo itemaxu ta'uve mo muvaxa simi tami'a (119), la sou anu musoli.
26Xe Tela tauu iexu mulai muxali loxo mavulovexa muxatele tamei (70), la sou anu mupalaane'i Avalamu ilou Naola mo Alani.
27Ioxe, nanasi'a ane'i ta mitema ane Tela muxalixa'a ano 'o. Tela mupalaane'i Avalamu ilou Naola mo Alani. Xe Alani, la mupalaanu eiae Loto. 28Xe ili'i, la sou musoli no tualasou ne Ulu no nano no xalee lia tila ne Vaviloni. Alani musoli, ia momu Tela ne usoli palea uasi, anu muxoxoolu 'o. 29Xe ili'i, la sou Avalamu mu'uluxe Salai, xe Naola mu'uluxe Milika, Alani 'olu sema mo 'olu mulu vile kalumo ualasou lexe Isika. 30Ia Avalamu semau Salai ne ipalaa uasi.
31Tela mukasi noxou 'olu Avalamu xe xasou Loto eiae Alani 'olu, xe ua'anu Salai, Avalamu semau, la ilo'a mivulasou tualasi'a ne Ulu no nano no xalee tila ne Vaviloni sou ilai ixolu ne Kanani. Milai mixali no tuala ne Alani la mixolu ane, 32la sou Tela, Avalamu momu tauu iexu mulai muxali loxo itemaxu mavulovexa vile mo ta'uve (205), la sou musoli.
सध्या निवडलेले:
Tavaꞌu 11: ataNTpo
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2013, Wycliffe Bible Translators, Inc. All rights reserved.