Simuluho 6
6
Bumaswe bwa batu
1 #
Job 1.6; 2.1 Ka yona nako yeo, ne ku se ku na ni batu ba bañata mwa lifasi kamukana, mi ni basizana ne ba pepiwa. 2Bana ba Mulimu ba bañwi ba bona kuli basali bao n'e li ba bande hahulu. Cwale ba nyala be ne ba latile. 3Cwale Muñ'a Bupilo a bulela, a li, “Ha ni na ku lumelela batu ku pila kuya kuile. Ki batu feela mi ba lukela ku shwa. Ku zwa fa, ha ba sa na ku pila lilimo ze fitelela mwanda u li muñwi ni mashumi a mabeli.” 4#Litu 16.7; Bar 3.26; Lipa 13.33 Ku ona mazazi ao, ni a kwamulaho, ne ku na ni batu ba batelele ba bakima mwa lifasi, ili bana ba ba pepilwe ki basali ni bana ba Mulimu bani. Kale ne li bona lindume ba ba ne ba tumile.
5 #
Mat 24.37; Luk 17.26; 1 Pit 3.20 Muñ'a Bupilo a bona kuli batu se ba li ba ba maswe hahulu kai ni kai, ni minahano ya bona kamita ne i tezi mihupulo ye maswe. 6A swaba ni ku inyaza h'a hupula kuli n'a ezize batu ni ku ba beya mwa lifasi. 7Kih'a li, “Ni ta felisa batu kamukana be ni bupile, kai ni kai ko ba li teñi. Ni ta sinya cwalo lifolofolo ni linyunywani kaufela, kakuli na inyaza ha ni li ezize.” 8Kono Muñ'a Bupilo a tabiswa ki Nuwe.
9 #
Litu 44.17-18;
2 Pit 2.5
Nuwe ne li mutu ya lukile, ili yena feela a nosi ya n'a lumbiwa ki Muñ'a Bupilo ka nako yeo, a sebeleza Mulimu cwalo mwa bupilo bwa hae kaufela. 10Lo, ki lona lusika lwa Nuwe. N'a na ni bashimani ba balalu, ili bo Sema, Kama ni Jafeta 11Kono haili batu ba bañwi kamukana, ne li ba ba maswe fapil'a Mulimu, mi bumaswe bwa bona ne bu se bu hasanezi mwa lifasi kamukana. 12Mulimu a talima lifasi, mi a bona kuli li sinyehile, kakuli batu ne ba se ba li ba ba maswe ka ku fitisisa.
Nuwe u panga sisepe sa hae
13Mulimu kih'a li ku Nuwe, “Ni se ni hupuzi ku felisa batu kaufela. Ni ta ba feza mbuu, kakuli lifasi kamukana li se li tezi bumaswe bwa likezo za sibi sa bona. 14Wena u ikezeze Aleka, ili sisepe se situna sa kota ye nde ya gofele. U pumake mizuzu mwa sisepe seo, mi u si lile mwahali ni kwande ka tala. 15Butelele bwa sona i be mapeka a mwanda ni mashumi a ketalizoho, mwa mba i be mapeka a mashumi a mabeli ni a ketalizoho, mi ku ya mwahalimu i be mapeka a lishumi ka a ketalizoho. 16U si beye situwa, mi u siye sibaka sa lihaulo le linyinyani feela le li likana ni licika la lipeka fa limota ku ya kwa situwa. Mizuzu ya sona i lundatamane halalu, mi u siye munyako kwa tuko. 17Ni ta tisa muunda o mutuna mwa lifasi ku t'o sinya ze pila kaufela. Lika kamukana ze mwa lifasi li ta shwa. 18Kono ni ta iswala bulikani ni wena. U kene mwa sisepe, wena ni musal'a hao, hamohocwalo ni bana ba hao ni basali ba bona. 19U nge kwa mifuta kaufela ya lifolofolo, ya poho ni ye sihali, kuli li pile. 20Kwa mishobo kamukana ya linyunywani, mifuta ya lifolofo kaufela, ni libupiwa kamukana ze zamaya ka mba, u nge ze peli ili ya munna ni ya musali, li ta kena mwa sisepe kuli li pile. 21U nge ni mifuta ya lico kaufela, za hao ni za zona.” 22#Maheb 11.7 Mi Nuwe a eza sina mw'a n'a laelezwi ki Mulimu.
सध्या निवडलेले:
Simuluho 6: Lozi09
ठळक
सामायिक करा
कॉपी करा
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fmr.png&w=128&q=75)
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.