Lucas 15
15
Pone'ẽrebâ isimanizém na romnhimiré
Mateus 18.10-14
1Tawamhã Zezusihi u ma tô aihutu, uburé danhib'apito ma rob'uiprazé arĩ ubumroi'wa norĩ hã duré ta norĩ ne, dawasété na 're idanomro mono norĩ zama, te te siwi wapari da. 2Tane nherẽ, farizeu norĩ hã duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ zama ma tô ãma siwi wẽ'õ. Tahawa ma tô tãma nharĩ za'ra, ãne:
— Ã hã aibâ hã wasété na 're inomro mono norĩ hã te te 're awaibui wẽ. Te duré isiré 're sa za'ra.
3Tahawa, Zezusi hã ma tô romnhimiré'é na tãma rowasu'u za'ra, ãne:
4— 100 na pone'ẽrebâ, aima hâimana za'ra wa'aba wamhã, tane nherẽ, misi 'manhimini wa'aba wamhã, e za sô 're airĩtĩ wa'aba mono ã bâ. Tawamhã 99 na hã te za a'â irẽme 'wa, pone'ẽrebâ isimani zô roptehutu wa, sô 're airĩtĩ wa'aba mono da, apâ isõpẽtẽ aba zéb u. 5Tawamhã apâ sõpẽtẽ aba wamhã, atoi uptabi aba di za. Tahawa te za asõihi na iduri 'wa. 6Asõrõwa u ãwisi aba wamhã, asiwaihu'u norĩ zô te za aihârâ 'wa, duré asababa 're isi'ubumroi mono norĩ zô zama. Tawamhã ta norĩ ma, te za inharĩ 'wa, ãne: “Ma'ãpé, ĩsiré asima rowẽ za'ra wa'aba, ĩte pone'ẽrebâ isimani hã te sõpẽtẽ wẽ te apâ.”
7— Tô sena wa za aima waihu'u za'ra wa'wa, ãne: Tane te za rowẽ za'ẽtẽ uptabi na 're romhâimana hâiwa ãma hã, wasété na 're imorĩ hã tiwasété na sisãmri wa, 'Re ihâimana u'âsi mono u isipi'rai u'âbâmhã, 99 na i'uwaibaba na 're ihâimana za'ra mono norĩ ãma rowẽ nhipai u, tiwasété na sisãmri za'ra da, isimnhasi za'ra õ norĩ ãma hã.
Rob'uiprazé isapotore isimanizém na romnhimiré
8Tawamhã Zezusi hã ma duré ãma uzusi, romnhimiré'é na rowasu'u na, ãne:
— Pi'õi ma, 10 na rob'uiprazé isapotore ẽtẽ waipo prã prata 'manharĩ hã tãma hâimana za'ra nherẽ, misi tiwi simani wamhã, e za sô 're rĩtĩ mono ã bâ. Te za sô 're rĩtĩ. Rob'uiwẽzé hã te za ro'o. 'Ri 'remhã te za duré sô wamro. Te za sô tirĩtĩ wẽ pese, apâ te te i'ârizéb u. 9Tawamhã apâ te te sõpẽtẽ wamhã, tisiwaihu'u sipi'õ norĩ zô te za hâ, duré pi'õ norĩ isababa 're isi'ubumroi mono norĩ zô zama. Tawamhã ta norĩ ma, te za nharĩ za'ra, ãne: “Ma'ãpé, ĩsiré asima rowẽ za'ra wa'aba, ĩte rob'uiprazé isapotore ĩwi isimani hã te sõpẽtẽ wẽ te apâ.”
10— Tô sena wa za aima waihu'u za'ra wa'wa, ãne: Ãne te za duré rowẽ za'ẽtẽ uptabi na 're romhâimana, hâiwa hawi 'Re ihâimana u'âsi mono ma romhuri'wa norĩ nho'remhã, ni'wa tiwasété na sisãmri wa, 'Re ihâimana u'âsi mono u sipi'rai wamhã.
Iprédupté, timama te te irẽmezém na romnhimiré
11Tawamhã Zezusi hã ma duré ãma uzusi, ãne:
— Aibâ ma, te i'ra si'aibâ norĩ hã maparane 're hâimana zahuré. 12Tawamhã nimahã bâtâ na, ino hã ma tô timama ma tinha, ãne: “Ĩmama, wa ĩsima wẽ, ãhã na ĩma sõmri da, asibro asipara aré ĩma irẽme da hã.”
— Tahawa, imama hã tinhibrom na ma tô ãma tãma aipo'o zahuré. 13Taha na ãma ronomro prãi wi, aibâ 'ra ino hã, ma tô tinhibro hã sima ubumro. Ma tô mo, ti'ai wa'õtõ nho'u romhâ na uptabi 're ihâimana mono u. Tame ma tô uburé tinhibro hã taré uprosi, hâimana wasété za'ẽtẽ na siwa'ru 're ihâimana mono zéb u'âbâ.
14— Tawamhã iprédupté hã uburé tinhibro te te uprosi parimhã, tame ti'ai wa'õtõ nho'õmo 're, mrab zépata za'ẽtẽ uptabi hã hâimana wa, ma tô dasiré mrab zépata na sãna'rata. 15Tahawa, tame ti'ai wa'õtõ nho'õmo 're, 're idasi'ubumroi mono norĩ u, ma tô romhuri zô sima rĩni, ãma 'masime da. Ta hã ma tô satõ tiburu u, uhâbâ te te tãma 're a'madâ'â mono da. 16Tame mrap te, ma tô aré te te sima 're wẽ, uhâbâ sa te te 're 'masi mono da. Tane nherẽ, ni'wa hã te te tãma 're ai mono õ di. 17Tawamhã rosa'rada oto ãma wisi wamhã, ma tô ãne sima tinha: “Ĩmama ma romhuri'wa norĩ hã ahâ uptabi nherẽ, te dasa hã 're si'azahâri, tiwi za'ra. E niha wa tane nherẽ mra sépata, ãme. 18Apâ wa za ĩsina siri, ĩmama u. Tawamhã ãne wa za tãma tinha za: ‘Ĩmama, wa tô ĩwasété, 'Re ihâimana u'âsi mono wi, duré aiwi zama. 19Tahawa, sadai õ di oto, ai'ra na 're ĩ'mahârâ mono da hã. Ma'ãpé ĩ'âri wẽ na, aima romhuri'wa na oto aima 're ĩhâimana mono da.’ ” 20Tawamhã iprédupté hã ma to watobro. Timama nhorõwa u ma tô apâ mo.
— Tawamhã iprédupté hã zahadu romhâ ré, ma tô imama hã tisã. Ipẽ hã te te ãma wĩrĩ pese wa, ma tô imama hã itẽme wara. Tinho'utu ma tô ti'â. Tob'rata hârâ na ma duré sawi. 21Tawamhã iprédupté hã te timama ma tinha, ãne: “Ĩmama, wa tô ĩwasété, 'Re ihâimana u'âsi mono wi duré aiwi zama. Tahawa sadai õ di oto, ai'ra na 're ĩ'mahârâ mono da hã.”
22— Tane nherẽ, imama hã ma tô tite romhuri'wa norĩ hã 'mahârâ za'ra, ãne: “Ĩ'uza danhipai u ihâi wẽ uptabi hã waptu na we asiwi 'mai'âri aba, ãma asiwi uza wa'aba da. Danhiptõmohi tétézé tãma 'manherẽ aba, duré ipara uza zama. 23Ma'ãpé duré powawẽ zapu ihâipe hã asiwi 'mai'âri wa'aba, asiwi wĩrĩ aba da. Oto dato hã wa te wasiwi 'manharĩ, wa te wasima ãma romhu'u za'ra da. 24E marĩ wa. Ã hã ĩ'ra hã dâ'â na te aré tihâiba. Tane nherẽ, te apâ hâiba ré tihâiba. Ma tô aré aimani. Tane nherẽ, apâ wa tô sõpẽtẽ.”
— Tawamhã ma tô ãma sãna'rata za'ra oto, sima romhu'u na hã.
25— Taha ré hã, i'ra idub'rada rom na te tihâiba. Apâ 'ri u morĩ wa, te te oto rob'umhutu wamhã, ma tô rowamreme hã wapa, duré dasipese za'ra wa, dapara hâ'rasi zama. 26Tahawa ma tô 'mazadanha, romhuri'wa hã ãne: “E marĩ te tihâiba.”
27— “Ano hã apâ ma wi. Tahawa aimama hã ma tô ti'ru, powawẽ zapu ihâipe hã wa te wasiwi 'maiwĩrĩ da, rowẽ na apâ wisi wa, hâiba ré.”
28— Tawamhã i'ra idub'rada hã ma tô tizahi. Te te sima wẽ õ di, 'ri para u isébré da hã. Tahawa imama hã rob u ma tô itẽme watobro. Ma tô tãma tizadahutu'õ, sébré da, 'ri para u. 29Tane nherẽ, ma tô timama ma tinha, ãne: “Wahub ahâ na wa tô te aima 're romhuri, wada'uri zarina titede'wai ma romhuri'wa ne. Duré niwa asimiroti hã te rẽme õ di. Tane nherẽ, niwa pone'ẽrebâ zéré uzé surure nherẽ, ĩma 'manhomri õ di, te ãma ĩsima rowẽ da, dato hã te 'manharĩ da, ĩsiwaihu'u norĩ ma hã. 30Tazahã, ã hã ai'ra, pi'õ siwa'âbâ zô 're isi'ru za'ra mono norĩ ãma uburé asibro te te i'upro hã apâ wei wisi wamhã, ma tô i'ru, powawẽ zapu ihâipe hã aima romhuri'wa norĩ te te siwi 'maiwĩrĩ da, tãma.”
31— Tawamhã imama hã ma tô sada'â, ãne: “Ĩ'ra, ĩ'rata te 're asãmra u'âsi mo. Tahawa uburé marĩ ĩte hã, ate hã duré. 32Tane nherẽ, tô dato hã wa te wasiwi i'manharĩ hã iwẽ, wa te wasima rowẽ za'ra da, asisãnawã apâ we iwisizém na hã. Dâ'â nherẽ, apâ te ãhã na hã hâiba ré tihâiba. Simani nherẽ, apâ wa sõpẽtẽ.”
सध्या निवडलेले:
Lucas 15: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
