Génesis 7
7
Opariantacari antearo incani incajaretanaque
1Impoiji icantiri Tasorentsi NoÉ: “Picarajeivetari pishanincapee, apaniro avinti pantapinitaquero nocoacaaquempiri. Irotaque nocoacantaquempiri avinti pintetea pitotsiqui aisati maaroni pishanincasanoripee. 2Aisati pintejeiteri iriori poshiniripee, cameetsayetatsiri yoyeetari incarayetaque 7 shirampari aisati 7 tsinane. Irintiquea yora caari yoyeeta, pinteyetaque aparo shirampari aisati aparo tsinane. 3Aisati pinquempejeitaqueri maaroni vanquiyetachari, pinteyeteri iriori incarayetaque 7 shirampari aisati 7 tsinane, eiro itsoncajeitantatsi. 4Ariorica oncaratapaaque 7 quitaiteri, irosati novariantearo incani. Osamani ompariaque oncarate 40 quitaiteri aisati 40 tsiteniri. Nocoaque nontsoncajeitajeri maaroni quipatsiquiniri novetsicajeivetacari.” 5Ari imataquero NoÉ maaroni icantaqueriri Tasorentsi.
6Ooncantacari quipatsiqui, ocaratanaque 600 irosarentsite NoÉ. 7Ari iqueanaque NoÉ pitotsiqui icarajeitaqueri itomipee, ijina jero ijinapee iriori, eiro aajeitantaritsi incajare. 8Aisati iriori iqueajeitanaque poshiniripee cameetsayetatsiri yoyeetari aisati caari yoyeeta, vanquiyetachari jeri noshicayetachari, eiro aajeitantaritsi incajare. 9Icarayetaque queajeitanaintsiri apitepee inashiyetaca: shirampari jero tsinane. Imataquero NoÉ icantaqueriri Tasorentsi.
10Ari ocaratapaaque 7 quitaiteri, intantanacari ooncanaca quipatsiqui. 11Caratanaji 17 iitaiterite cashiri apitetanajantsiri, aitaque imoncarataquero NoÉ 600 irosarentsite. Irotaque quitaiteri intantanacari otoncanaque antearoite incajare isaviquiniri, aisati opariasanotanaque incani oshequi catsini inquitequi. 12Irosati opariantanaca incani quipatsiqui, ocarataque 40 quitaiteri aisati 40 tsiteniri. 13Ari iqueanaque NoÉ pitotsiqui, ijina, itomipee jero iraniropee. 14Aisati iqueajeitanaque maaroni inashiyetaca poshiniripee, coquiyetatsiri, virantsipee aisati inashiyetaca maaroni noshicayetachari jeri vanquiyetachari. 15-16Yora iteyetaqueri icarayetaque apitepee: shirampari aisati tsinane. Imoncarataquero icantaqueriri Tasorentsi; irosati yashitantacaro Tasorentsi pitotsi.
17Ari osamanitaque ocarataque 40 quitaiteri opariaque incani. Ooncanaca quipatsiqui, irosati oancantanaca pitotsi. 18Aiquero ojatatii oonca aisati pitotsi aiquero ojatatii iroori oancanaca jenoqui. 19-20Ari ooncasanotanaca catsini, anaayetanaquero antearoyevetachari otishipee. Avishimaataquero ocarati 7 metro jenoqui. 21Aitaque icantacari itsoncajeitaca icamajeitaque atiripee aisati iriori vanquiyetachari, poshiniripee ivirayeetari, coquiyetatsiri aisati noshicayetachari. 22Maaroni timantajeivetaroniri quipatsi icamajeitaque, tecatsi aneajeitanajantsine. 23Irintiquea NoÉ avisacojeitajantsi, te incamajeiteji aisati poshiniripee icarajeitaqueri iqueajeitanaque pitotsiqui. Maaroni itsipapee itsoncajeitanaca. 24Ari otimaajatapaaque incajare osamani, ocarataque 150 quitaiteri.
सध्या निवडलेले:
Génesis 7: cni
ठळक
सामायिक करा
कॉपी करा
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fmr.png&w=128&q=75)
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.