Luke 1
1
1အောင်းနယ့်ဟောက် သော်ဖိလုစောင့်။ ရာခနောဝ်ကြားဟော အောင်းပေးမား အောင်းခနီးအမ်းလေ 2မေအစပွန့်နော့် ဟောန်ဟင်းမားဆီ အောင်းနှုတ်ကပတ်တော်စောင့်ဖလားလေ နောင်ကွန်းစောင့်ဟေစောင်းမ်လေ တန့်မားညော့ ကွန်းလေန တင့်မ်ဟင်းမား။ 3ကောပ့်နယ့်ညော့ ကောကော့် ကာအောင်းပေးမားလေတောင်းလုန် ဟေအလေးဆီ စုံစမ်းမားရောင့်ဝ် ရာမဆူ ချန်းချန်းလန်းလန်း ဟောင်ပေါတင့်မ်ကော်လော့် နီးဆီ ထန်။ 4နောင်နယ့်ဟောန်ဝါမှ အောင်းမဆူနယ့်ဆောန်မား အကြောင်းဟိုင့်လေ စော်ဝါလ ဟပေါဟု နောင်နယ့်ဆီ နယ့်တင့်မ်လိကော်ရာမဆူလ။ 5အောင်းမှိန်းယုဒ မေအချီန်စောင့်ခွန်ဟော်ခမ်းဟေရုဒ်အုပ်ချုပ်န ဇာခရိဆီအောင်းစေ ဂျူးပုရောဟိတ်ပါးနိမ်လ ပေးရာခနောဝ်မွတ်ပုရောဟိတ်အဘိယcဝိုက်။ ပရမွန်းဧလိရှဗက်ကော့် အာရုန်ဆီအောင်းစေ ဆီမေအမျိုးပုရောဟိတ်လုန်းမားဝိုက်။ 6မနော်ဆောင်န်ကော့်လ အောင်းပညတ်တော်စောင့်ဖလားလေ အောင်းဖစ်တော်ပေါမရောင်း ဟေစောင်းမ်ဟင်းမားညော့ ခနာ့စောင့်ဖလား ပေးကွန်းနီးeလေဝိုက်။ 7ဧလိရှဗက်န ပေးကော့်ယဉ်းအောင်းမောန်ညော့ လအောင်မနွိုက်ဆီ မနော်ဆောင်န်ကော့်ကော့် အဆတ်အရွယ် ထောင့်ဝ်ဟင်းမားကော်ဝိုက်။ 8ဝမ်းနိမ်လော့် မွတ်ဇာခရိဟော်လ တာမနော်ညားကော်ညော့ ရာဗိမာန်တော် ရာခနာ့စောင့်ဖလား အနေပုရောဟိတ်ကော်နိမ် အောင်းတနယ့်ဟေ လောင်လေ တကြားဟေလော့် 9နောင်ထွုံးစံပုရောဟိတ်လေညော့ ရာခနောဝ်ဗိမာန်တော်စောင့်ဖလား အမွှေးတိုင်လေစပ်ဆီ ဟပေါနယ့်ကပ် စုပ်ဝ်မဲဆီ လိတ်ဟင်းကော်လော့် တာဇာခရိ ညားကော်ဝိုက်။ 10ကောပ့်နယ့်ညော့ တောင်းအမွှေးတိုင်လေတောင်း မေဇာခရိကပ်န ကွန်းလေကော့် ခနောဝ်ဝမ်းဗိမာန်တော်ဟောန့် ရောန်းဆုဟင်းဝိုက်။ 11နောက်လောင်နော့် ဖီဒေဝါအောင်းစောင့်ဖလားပွယ်မားပါးနိမ်လ တောင်းအမွှေးတိုင်လေတောင်း စပ်ဆီ အောင်းနယ့်ကပ် တောင်းပါ့ကမ့်ခွာပလန် မားပြားတိုးအောင်းဇာခရိဆီ အောင်းစိန်ဆီအူလ 12ဇာခရိဟောန်ကော်လော့် အိုက်နီးကိုးကော်ဝိုက်။ 13မေနယ့်လော့် ဖီဒေဝါလ အောင်းမွန်း “ပီကိုးဇာခရိ အောင်းဆိန်မောရောန်းဆုလ စောင့်ဖလားဟု။ ပရမောဧလိရှဗက်လ အောင်းစမော လုစိုင်းကော်နိမ် တလိမ့်ဟောင့်ဝ်။ မောလ အောင်းစမွန်း ယောဟန်ဆီ နာမယ်တနယ့်ဟောင့်ဝ်။ 14မေလိမ့်လုစိုင်းဟောန့်လ နောင်မဆူနယ့်စွုမ်းလုန်စွုမ်းလန်ညော့ ကွန်းတန်းတီလေကော့် တနယ့်စွုမ်းဟင်း။ 15မွန်းန ခနာ့စောင့်ဖလား တပေးကွန်းမြတ်။ မွန်းန မေနော်ကော့် ဝိုင်အစ်တောင်း လောင့်ဝ်လေကမ်းလေ အောင်းတဆို့မစော်။ မေမွန်းမလိမ့်အွန်ပွန့် မွန်းန ခတောင့်ဝ်ဉာဏ်အလင်းတော်ပြားတန်းညော့ ရောင်း။ 16ယောဟန်န အောင်းကွန်းအစ္စရေးလေတောင်းလုန် အောင်းပေးစောင့်မနော် တောင်းပါ့စောင့်ဖလား တဟလှည့်ပေါက်။ 17နောင်ပရောဖက်ဧလိယညော့ ယောဟန်လ အခွင့်အာဏာတောင်း အစွမ်းလေရောင်းဆီ တပေးအောင်းကွာထ ခနာ့စောင့်ယေရှု။ မွန်းန အောင်းပေါ်မယ်လေတောင်း အောင်းလအောင်လေ ဟခေါက်စောဝ်တော်ဟင်းဆီ အောင်းကွန်းမစောင်းမ်ဟေလေကော့် ဉာဏ်ပညာကွန်းနီးလေ တဆောန်ပြား။ နောက်လောင် ကွန်းလေန စောင့်ယေရှုပေါကြွမား အဆင်သင့်တပေးထဟင်း” ဆီ ဝါကော်ဝိုက်။ 18နောက်လောင်နော့် ဇာခရိကော့် အောင်းဖီဒေဝါဟောန့် “အဖြစ်ပျက်ဟိုက် တပေးမားဝါလ ကောနောင်နူးတဟုပဲ့။ ဟောပူရာဆောင်န်ကော့်လ အိုက်ထောင့်ဝ်မားကော်” ဆီ ဝါပေါက်ကော်ဝိုက်။ 19ဖီဒေဝါဟောန့်ဝါပေါက်အောင်းမွန်းကော်လ “ကောလ ဖီဒေဝါအောင်းနယ့်ဟေလောင်ခနာ့စောင့်ဖလား ဂါဗြေလဆဲ။ အောင်းမော အောင်းသတင်းနီးဟိုင့်လေ ဟပေါနယ့်ဟောပြား စောင့်ဖလားလ ပွယ်မားအောင်းကော။ 20ကောပ့်နယ့်ညော့ အချီန်ဟောန့်ပေါထီန်မား တပေးမား။ အောင်းကောဝါ မောမယွန်မ်ညော့ တော်ဝမ်းလအောင်ဟောန့်လိမ့်ပွန့် မောလ ခွမ်းမတန့်ပဲ့ဆီ တအာကော့်” ဆီ ဝါကော်ဝိုက်။ 21ဇာခရိတောင်းဖီဒေဝါန ခနောဝ်ဗိမာန်တော် တကြားတန့်ခွမ်းဟင်းန ခနောဝ်ဝမ်းဗိမာန်တော်ဟောန့် ကွန်းလေထအောင်းဇာခရိဟင်းဝိုက်။ မနော်လေန ခနောဝ်ဗိမာန်တော်ဟောန့် ဇာခရိဟေဟောင်းဆီဟူဝါလ အမ်းဆီအူဟင်းဝိုက်။ 22မေဇာခရိအောက်မားခနောက်လော့် မွန်းန အောင်းစမနော် ခွမ်းမတန့်ပဲ့ကော့်ညော့ မေအူခနောဝ်ဗိမာန်တော် ဆီမေဖီဒေဝါလဆင့်နိမ် အောင်းစောင့်ဖလားပြား အောင်းခနီးအမ်းလေ နယ့်ဟောန်မားဝါလ ကွန်းလေ ဟုဟင်းကော်ဝိုက်။ မွန်းကော့် ခွမ်းမတန့်ပဲ့ဆီ တောင်းမေးတောင်းတဉ်းတောင်းဟော် ပြားပဲ့ဟောဝိုက်။ 23နောက်လောင်နော့် ဇာခရိလ ရာဗိမာန်တော် ပုရောဟိတ်ကော်နိမ် လောင်အောင်းတနယ့်ဟေလေ ဟေရောင့်ဝ်ကော်လော့် ပေါက်ဟုန်းမွန်းကော်ဝိုက်။ 24အချီန်စောန်နိန်ဟူမားကော်လော့် ရာပရဇာခရိ ဧလိရှဗက်လ တောင့်ရောင်းမားကော်ဝိုက်။ မွန်းန တော်ဟာ့နိန်းဟူပွန့် ရာခနောဝ်ကွန်းလေ မကွာကော့်ဝိုက်။ 25ဧလိရှဗက်န “စောင့်ဖလားလ အောင်းကော တောင့်ဟပေါနွိုက် အစွမ်းမွန်းစောင့်တောင်း ခွင့်ဟောင့်ဝ်မားကော်။ အလိုမွန်းတောင်း အောင်းကွန်းလေအထန်ဆေး ဖယ်ဝေကော်” ဆီ ဝါကော်ဝိုက်။ 26ဧလိရှဗက်ပါးတောင့်ဆီ ဟုတ်နိန်းရောင်းကော်လော့် စောင့်ဖလားလ အောင်းဖီဒေဝါဂါဗြေလ ရာမှိန်းဂါလိလဲ ပွယ်ကော်ရာမှိန်းနာဇရက်ကော်ဆီ 27မာရိဆီအောင်းစေ ရာဖဆောင်ဝ်ကော်နိမ် ကွာဆီ ဟကွာတန့်ခွမ်းသတင်းကော်ဝိုက်။ မွန်းန ဆီမေအမျိုးစောင့်ခွန်ဟော်ခမ်းဒါဝိဒ် အောင်းလုန်းမား တောင်းယောသပ်တောင်း စေ့စပ်ဝိုင့်ဝိုက်။ 28ဖီဒေဝါလ အောင်းမာရိ နှုတ်ဆက်ဆီ “စောင့်ဖလားလ တောင်းမောတောင်းရောင်းဆီ ဆာဆီကော့်ယဉ်းတန်းတီလေတောင်းလုန် ကရုဏာလုန် ဆာဆီပြားမားကော်” ဆီ ဝါကော်ဝိုက်။ 29တော်နယ်ကော့် မာရိလ နယ့်ဟဉ်းအောင်းခွမ်းဟောန့်ကော်လော့် စောဝ်အိုက်ယွန့်ကော်ဆီ အောင်းဖီဒေဝါတန့်လေန ခဝါအဟောင်းဝါလ မွန်းစဉ်းစားကော်ဝိုက်။ 30မေနယ့်လော့် ဖီဒေဝါလ အောင်းစမာရိ “ပီကိုး မာရိ။ စောင့်ဖလားလ အောင်းစမော ဟောင့်ဝ်နာ့မားကော်။ 31မောလ ပါးတောင့်ဆီ လုစိုင်းကော်နိမ်တလိမ့်။ အောင်းနာမယ်မွန်း ယေရှုဆီ တနယ့်ဟောင့်ဝ်။ 32မွန်းန တပေးကွန်းအောင်းမြတ်ကော်နိမ်ဆီ လုစိုင်းစောင့်ဖလားအောင်းချဉ်းမြတ်ဆီ အောင်းစေ တနယ့်ခမ်။ စောင့်ဖလားလ အောင်းစမွန်း ပလန်ပူလဉ်ရာလဉ်မွန်း စောင့်ခွန်ဟော်ခမ်းဒါဝိဒ်လ တဟောင့်ဝ်။ 33မွန်းန အောင်းကွန်းအစ္စရေးလေတောင်းလုန် အနေစောင့်ခွန်ဟော်ခမ်းတောင်း ထာဝရအုပ်စိုးဆီ ကာမွန်းအုပ်ချုပ်လ မှိန်းမွန်းလ မေနော်ကော့် အောင်းတပျတ်မစော်” ဆီ ဝါကော်ဝိုက်။ 34မေနယ့်လော့် မာရိလ “ကော ပေးဖဆောင်ဝ်ကော်နိမ်ဆီ မနယ့်လတ်ဆတ်အွန်ညော့ အောင်းအကြောင်းဟိုင့်လ နောင်နူးတပေးပဲ့” ဆီ အောင်းစဖီဒေဝါ ဝါကော်ဝိုက်။ 35ဖီဒေဝါကော့် “ဉာဏ်အလင်းတော်န ထီန်မားရာမောဆီ အစွမ်းစောင့်ဖလားလ တလွှမ်းမိုးအောင်းစမော။ ကောပ့်နယ့်ညော့ လအောင်အောင်းမောလိမ့်လ တသန့်ရှင်းတမြတ်ဆီ အောင်းစမွန်း လုစိုင်းစောင့်ဖလားအောင်းချဉ်းမြတ်ဆီ တစေဟင်း။ 36အောင်းပေးပီနောင့်မဆူ ဧလိရှဗက်လ ထောင့်ဝ်ညော့ လအောင်မလိမ့်ပဲ့ကော့်ဆီ ကွန်းလေထန်ဟင်းမေကော့် မွန်းပါးတောင့်ဆီအူလ ဟုတ်နိန်းရောင်းကော့်။ 37အောင်းစောင့်ဖလားမဟေပဲ့ဝါလ မရောင်း” ဆီ ဝါကော်ဝိုက်။ 38မေနယ့်လော့် မာရိလ “ကောလ ပေးခစောင့်ဖလားစောင့်။ နောင်ခွမ်းမောတန့်အောင်းကောဆီ ဟပေးအီ့အွန်” ဆီ ဝါကော်ဝိုက်။ နောက်လောင်နော့် ဖီဒေဝါကော့် ဆီမေမာရိ အောက်ကွာကော်ဝိုက်။ 39ဝမ်းစောင်နိန်ဟူမားကော်လော့် မာရိလ အဆင်သင့် မဲဆီ ရာဇာခရိအူ ရာမှိန်းယုဒ ရာမှိန်းနေနွဲမှိန်းနိမ် ကွာကျန်ကျန်ကော်ဝိုက်။ 40မွန်းန ထီန်ရာတီဟောန့်ကော်လော့် ခေါင့်ဝ်ဟုန်းဇာခရိဟော်ကော်ဆီ နှုတ်ဆက်အောင်းစဧလိရှဗက်ကော်ဝိုက်။ 41အောင်းဆိန်မာရိနှုတ်ဆက် ဧလိရှဗက်နယ့်ဟဉ်းကော်နွေ့ဆတ် လအောင်အောင်းခနောဝ်တောင့်မွန်းလ ယိန်းယန်မားကော်ညော့ ဧလိရှဗက်ကော့် အောင်းဉာဏ်အလင်းတော်ပြားတန်း နယ့်ခမ်ကော်ဆီ 42ဧလိရှဗက်လ အောင်းစမာရိ “စောင့်ဖလားလ ဆာဆီကော့်ယဉ်းတန်းတီလေမကား အောင်းစမော ဆာဆီဟကမ်နီးကော် လအောင်အောင်းမောတလိမ့်မားကော့် ကမ်နီး။ 43ဟေဟောင်းဆီ မယ် စောင့်ယေရှုလ နယ့်ကြွမားရာကောလ။ နောင်နူးဆီ အောင်းအခွင့်နောင်နယ့် ကောနယ့်ခံစားလ။ 44ခွမ်းမောနှုတ်ဆက် နယ့်ဟဉ်းကော်နွေ့ဆတ် လအောင်အောင်းခနောဝ်တောင့်ကောလ စွုမ်းဆီ ယွန်းယန်မားကော်။ 45နှုတ်ကပတ်တော်စောင့်ဖလားလ တပေးမားအောင်းတဲ့တဲ့ဆီ မောယွန်မ်ညော့ မောလ ကမ်နီးကော်” ဆီ တောင်းဆိန်ကြမ်းကြမ်းတောင်း ဝါကော်ဝိုက်။ 46နောက်လောင်နော့် မာရိကော့် “ဆီမေခနောဝ်စောဝ်ကော အောင်းစောင့်ဖလား ချီးမွမ်းစောင့်။ 47စောဝ်ကောလ အောင်းပေးစောင့်ကယ် ရာစောင့်ဖလား နယ့်စွုမ်းစောင့်။ 48ဟေဟောင်းဆီပေါဝါလော့် စောင့်ဖလားလ အောင်းခမွန်းနှိမ့်ကျလ ဆတိနွိုက်မားကော်။ ဆီမေအစောင်စဆီ ဆီမေမျိုးဆတ်ကွန်းတောင်းလုန်န ကွန်းလေန အောင်းစကော ကွန်းကမ်နီးဆီ တဟောင့်ဟင်း။ 49ဟေဟောင်းဆီပေါဝါလော့် အစွမ်းလုန်စောင့်ဖလားလ ခနေကော အောင်းချဉ်းသန့်ရှင်း၊ အောင်းမြင့်မြတ်လေ ဟထီန်မားကော်စောင့်။ နာမယ်မွန်းစောင့်န သန့်ရှင်းစောင့်။ 50ခေတ်အဆတ်ဆတ် စောင့်ဖလားန အောင်းစမွန်း အောင်းကွန်းကပ်၊ အောင်းကွန်းဝိုင်ယ်လေတောင်းလုန် မေတ္တာကရုဏာလေ ပြားဟောင့်ဝ်မားကော်။ 51စောင့်ဖလားလ အောင်းကွန်းမာနရောင်းလေတောင်းလုန် တောင်းအစွမ်းမွန်းစောင့်တောင်း ဟပေါစန်နှိမ်ချ တဟေ။ 52မွန်းန အောင်းကွန်းအုပ်စိုးလေတောင်းလုန် ဆီမေနေပလန်မနော် ဖယ်ဝေဆီ အောင်းကွန်းစမ်နှိမ်ချလေတောင်းလုန်ကော့် တဟပေးကွန်းအရေးပါလေဝိုက်။ 53မွန်းန အောင်းကွန်းတောင့်မိုက်လေတောင်းလုန် အောင်းနီးအောင်းငမ်းလေ လိမ့်ဟောင့်ဝ်မေကော့် အောင်းကွန်းရောင်းကျဉ်းလေပေါဝါလော့် အဟောင်းကော့်မဟောင့်ဝ်ဆီ တပွယ်ပေါက်ဝိုက်။ 54စောင့်ဖလားလ အောင်းပူလဉ်ရာလဉ်ဟော အာဗြဟံတောင်း ခနေမျိုးဆတ်မွန်း ထာဝရ မဟာကရုဏာမေတ္တာတော် တဝိုက်ဆီ ဝိုက်ကတိမား။ 55အစောင် စောင့်ဖလားလ အောင်းကတိမွန်း ဆတိနွိုက်မားကော့်ညော့ မွန်းန အောင်းဟောတောင်း အောင်းကွန်းစောင့်ဟေလာင်စောင့်ဖလား အောင်းကွန်းအစ္စရေးလေတောင်းလုန် စွယ်ဟောင့်ဝ်မားကော်” ဆီ အောင်းစောင့်ဖလား ချီးမွမ်းဟင်းကော်ဝိုက်။ 56နောက်လောင်နော့် မာရိန တောင်းဧလိရှဗက်တောင်း တော်ဆမ်နိန်းပွန့် အူနွေ့ဟင်းမားဆီ မွန်းန ပေါက်ဟုန်းကွာကော်ဝိုက်။ 57နောက်လောင်နော့် ဧလိရှဗက်န အချီန်လိမ့်လအောင် ထီန်မားကော်လော့်၊ မွန်းန အောင်းလုစိုင်းကော်နိမ် လိမ့်ကော်ဝိုက်။ 58ဟုန်းကောင့်ဝ်တောင့်ဝ်ဖိုင် ဧလိရှဗက်လေတောင်း ပီနောင့်လေန ခနေမွန်း မေတ္တာတော်စောင့်ဖလား အိုက်ရောင်ဝ်ဝါလ ဟုဝိုက်ဟင်းညော့ တောင်းမွန်းတောင်း နယ့်စွုမ်းဟင်းကော်ဝိုက်။ 59လအောင်အင်လိမ့်ရောင့်ဝ် ပက်ဝမ်းထိန့်ကော်လော့် နောင်အရေဖျားလှီးမင်္ဂလာညော့ အောင်းခနီးခဟေလေ ဟပေါနယ့်ဟေဆီ ကွန်းလေထီန်မားကော်လော့် မနော်လေန နာမယ်လအောင်အင်လ နာမယ်ပေါ်မွန်း အောင်းဝ်ဆီ ဇာခရိဆီ ခဟောင့်ဝ်ဟင်းဝိုက်။ 60တော်နယ်ကော့် မယ်လအောင်ဟိုက် ဧလိရှဗက်လ “နာမယ်ဟိုက်မစော်။ နာမယ်မွန်း ယောဟန်ဆီ တနယ့်စေ” ဆီ ဝါကော်ဝိုက်။ 61ကွန်းတောင်းလုန်န အောင်းစဧလိရှဗက် “ရာခနောဝ်နာမယ်အမျိုးမော နာမယ်နောင်နယ့် ကော့်နိမ်ကော့်မရောင်း” ဆီ ဝါဟင်းကော်ဝိုက်။ 62ကောပ့်နယ့်ညော့ မနော်လေန အောင်းပေးပေါ်လအောင်ဟိုက် အောင်းဇာခရိ ခဟောင့်ဝ်နာမယ်နောင်နူးဝါလ ပြားတဉ်းပြားမေးဆီ ထန်မ်ဟင်းကော်ဝိုက်။ 63ဇာခရိလ စန်ပုန်းချက်ပ်နိမ် ရောန်းဆီ နာမယ်လုစိုင်းမွန်းလ ပေးယောဟန်ဆီ တင့်မ်ကော်လော့် ကွန်းနယ့်ဟောန်တောင်းလုန်ကော့် အမ်းဟင်းကော်ဝိုက်။ 64ချရှ်ချန်း ဇာခရိလ ခွမ်းတန့်ပဲ့မားကော်ဆီ အောင်းစောင့်ဖလား စဆီချီးမွမ်းကော်ဝိုက်။ 65ကွန်းရောင်းရာခန့်မွန်းလေကော့် အောင်းအဖြစ်ပျက်ဟိုင့် ဟောန်ကော်လော့် နီးကိုးဟင်းကော်ဝိုက်။ ကွန်းတောင်းလုန်န အောင်းသတင်းဟောန့် ရာမှိန်းယုဒ အောင်းရောင်းရာအွန်းနေနွဲ ရာတီတောင်းလုန် တန့်ဟင်းကော်ဝိုက်။ 66အောင်းသတင်းဟိုင့် ကွန်းနယ့်ဟဉ်းလေတောင်းလုန်န “လအောင်ဟိုင့်ဟောင်ပေါရောင်ဝ်မား တပေးမားနောင်နူးကျေ့” ဆီ ဆောင်ဝ်စောဝ်ဆီ ရိန်းစမ့်စမ့် တန့်ဟင်းကော်ဝိုက်။ အစွမ်းစောင့်ဖလားလေကော့် တောင်းလအောင်အင်တောင်း ရောင်းနွေ့ဟင်းဝိုက်။ 67နောက်လောင်နော့် အောင်းပေးပေါ်ယောဟန် ဇာခရိန အောင်းဉာဏ်အလင်းတော်ပြားတန်း နယ့်ခမ်ကော်ဆီ အောင်းစောင့်ဖလားခဟတန့်လေ အောင်းဟောန 68“အောင်းပေးစောင့်ကွန်းအစ္စရေးလေတောင်းလုန် အောင်းစောင့်ဖလား ချီးမွမ်းစောင့်။ ဟေဟောင်းဆီပေါဝါလော့် မွန်းန အောင်းကွန်းတောင်းလုန် ဟပေါနယ့်ကယ် ကြွမားကော်။ 69စောင့်ဖလားန ဆီမေခမွန်း ဆီမေအမျိုးဒါဝိဒ် အောင်းလုန်းမား ကွန်းအစွမ်းလုန်ရောင်း အောင်းစောင့်ကယ်အောင်းဟောတောင်းလုန် ဟောင့်ဝ်မားရောင့်ဝ်ကော်။ 70မေတန်ဟာ စောင့်ဖလားန ဆီမေပရောဖက်အောင်းမြတ်လေနဆင့်နိမ် နောင်တန့်မားညော့ 71ကွန်းအစွမ်းလုန်ရောင်း စောင့်ကယ်ဟိုင့်န အောင်းစဟော ဆီမေမေးရန်ဆူဟောလေကော့်ခရောင့်ဝ်၊ ဆီမေကွန်းစောန်းအောင်းဟောလေကော့်ခရောင့်ဝ် တကယ်။ 72စောင့်ဖလားနယ့်ဟေနောင်နယ့်လ အောင်းပူလဉ်ရာလဉ်ဟောလေ ကရုဏာတော်မွန်းစောင့်လေ ဟပေါနယ့်ပြားတောင်း တောင်းမနော်တောင်း အောင်းဟေမား အောင်းသဘောတူဝိုက်အောင်းမြတ်တ ဟပေါစော်ညော့ဝိုက်။ 73စောင့်ဖလားလ အောင်းပေးပူလဉ်ရာလဉ်ဟော အောင်းအာဗြဟံ နောင်ဟောင့်ဝ်ကတိဝိုက်ညော့ 74အောင်းစဟော ဆီမေကွန်းစောန်းအောင်းဟော တကယ်ဆီ ဟောလေကော့် ကာအဆတ်ရောင်းလ ခနာ့စောင့်ဖာလားအောင်းမြင့်မြတ်၊ အောင်းစော်လေ ရောင်းဆီ 75အောင်းနီးကိုးလေမရောင်းဆီ အောင်းစောင့်ဖလား တနယ့်ကပ်တနယ့်ဝိုင်ယ်ဟင်းပဲ့” ဆီ ပေးဝိုက်။ 76နောက်လောင်နော့် ဇာခရိန အောင်းစလုစိုင်းမွန်း “လုစိုင်း၊ အောင်းစမော ရာမှိန်းခမ်းlဟောန့် ပရောဖက်အောင်းချဉ်းမြတ်စောင့်ဖလားဆီ တဟောင့်ဟင်းဆီ တပေးကွန်းကွာထ ခနာ့စောင့်ဆီ တပေးကွန်းမဲထ အောင်းခွန်တန်းစောင့်။ 77စောင့်ဖလားလ အောင်းအပြစ်ကွန်းလေ ခွင့်လွှတ်ဆီ မောလ အောင်းကွန်းလေ အကြောင်းတဟောင့်ဝ်အခွင့်အောင်းကယ် တနယ့်ဟောပြား။ 78မဟာကရုဏာမေတ္တာတော်စောင့်ဖလားန ခနေဟော ရောင်ဝ်ညော့ အောင်းကွန်းအမျိုးမွန်းလေ တကယ်။ 79ဝမ်းအောင်းအောက် ကမ်းနောဝ်စောင့်စောင့်လ နောင်ဟောင့်ဝ်အောင်းလိန်းလေညော့ ဆီမေစောင့်ဖလားအောင်းမား မေရှိယကော့် အောင်းကွန်းမဟုအောင်းဖလားတလားတောင်း အောင်းကွန်းနီးကိုးအောင်းတနယ့်သိုင်းလေ ဟပေါနယ့်စွယ်ဟောင့်ဝ် တကြွမားဆီ မွန်းန အောင်းကွန်းတောင်းလုန် တောင်းပါ့ခွန်တန်းအောင်းငြိမ်းချမ်းသာယာ ဦးဆောင်ဆီ တပြားတန်းဟောင့်ဝ်” ဆီ ဝါကော်ဝိုက်။ 80အချီန်အစောင်လော့် ယောဟန်လ နောင်အဆတ်မွန်းရောင်ဝ်ညော့ တိုးမွန်းကော့် ရောင်ဝ်မားကော်ဆီ ဉာဏ်ပညာမွန်းကော့် စွန်မားကော်ဝိုက်။ စောင့်ဖလားန အောင်းစမွန်း ရာခနာ့ကွန်းအစ္စရေးလေ တော်ဝမ်းစဆီဟဟေလောင်မထီန်ခွေတ်ပွန့် ရာတီတောင်းကွန်းလေတောင်းကိုင်း နယ့်အူဝိုက်။
सध्या निवडलेले:
Luke 1: ttpv-rv
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
