Mariko 7
7
Yesu áteta era luulu se'myanya ye'kabutwa
(Mat 15:1-9)
1eBafarisayo* na bakangirisi bauma be'Mwaso* bátengeraa eYerusalemu na báchilunda era muhondo sa Yesu. 2Bera kulola kwa bauma mwa banafunzi* bai bálya ne'mino sa sìri kwe'singa, kukuteta mbu bàtôwaa kwa mino kukulikana ne'myanya ye'tini* lyabo. 3Bátetaa bacha, bushi eBafarisayo* ne'banji Bayuta boshi batúla bàtunjire emyanya ya bahokulu babo. Ei myanya, itatúla yèmerere mbu emundu éndaa álya busira kwôwa kwa mino ngo'kwa byěmire. 4Kanji, mango bénde bába bátenga mwe'soko, bàtangalya busira kuchikomya* tanga. Bénde bákulikira na inji myanya inene, nga'kuno ekulonga engumbu, ne'mareya, ne'nyungu sa sikúnganyisibwe mwa miringa.
5Bushi no'ku, abu Bafarisayo* ne'bakangirisi be'Mwaso*, bera kubusa Yesu mbu: «Chi chitúmire ebanafunzi* bao beke bàtatunda emyanya ya bahokulu betu? Bushi bénjire bálya ne'mino sa sìri kwe'singa!»
6Yesu nai mbu: «Emu batebanyi! Isaya árebaa kanangana era luulu senyu mango áanjikaa mbu:
‹Bano bandu, kwa bieta ku bénde bánanyitunda.
Si emichima yabo itúla bure nanyi!
7Bushi ekunyera kwabo, kunátula kwa buha!
Ne'miomba* era bénde bákangirisa,
bandu bu bánaiíraa.›»#7:6-7 Somaa Isaya 29:13.
8Yesu era kunaendekera ábabura mbu: «Mwabo, mwénde mwáreka emiomba* ya Ongo, bushi ne'kukulikira emyanya era yáirwaa ne'bandu.»
9Kanji era kubabura mbu: «Kubinali, mùtemanga kureka emiomba* ya Ongo, bushi ne'kukulikira emyanya yenyu. 10Si mutúla mwìshi kwa Musa átetaa mbu: ‹Úndaa wátunda eho na nyoko.›#7:10 Somaa Kutenga 20:12; 21:17; Balawi 20:9; Bukengere 5:16. Kanji era kuteta mbu: ‹Ola wakámbire eshe nesi nyina, ěmire kwîchibwa.›#7:10 Somaa Kutenga 21:17; Balawi 20:9. 11Si mwabo, mwénde mwáteta kwa emundu ànganabura eshe nesi nyina mbu: ‹Bya nyìngakuasise nabi byàbere Koribani, kukuteta mbu byàtulirwe Ongo mira.› 12Rero mwa kuira bacha, mu mwénde mwânga emundu mbu àtaasaa eshe nesi nyina. 13Ei myanya bahokulu benyu bábarekeraa mango mwénjire mwákangirisanya'i, yánatuma mútalaa kwa Chinwa cha Ongo. Kanji mwénjire mwáira na inji myasi inene era ìri nge'i!»
Bya byénde byáira emundu kuba mubi
(Mat 15:10-20)
14Era nyuma se'bi, Yesu era kuhuba kwâmaala eluamba lwe'bandu, era kubabura mbu: «Muboshi munyûmvirisaa kubuya, muményerere ne'bine náhonda kubabura: 15Bya byénde byêngirira mwa mundu, atá bi byénde byámubika mwe'singa. Si bya byénde byámutenga'mo. [ 16Ola wète matwi me'kûmva, ǒmvaa!]»
17Chasinda, Yesu era kureka olu luamba lwe'bandu. Ábere era èngiriraa mwa nyumba, ebanafunzi* bai bera kumubusa mbu kute ku oyu muanyi àtechire. 18Nai mbu: «Nenyu mutanafuraa kubookala ebwenge? Si mutábukire kwa byoshi bya byénde byêngirira mwa mundu atá bi bìngatuma ába mubi! 19Bushi ebyera bìtengirira mwa muchima wai, si mwa bula mu byénde byáya, chasinda byánatenga'mo mwa kuya era chala.» Mwa kuteta bacha, Yesu ábaa álosa kwa ebiryo byoshi bìnganalibwa.
20Yesu era kuhuba kuteta mbu: «Bya byénde byáira emundu kuba mubi, bìri bya byénde byátenga mwa muchima wai. 21Bushi mwa muchima we'mundu mu mwénde mwátengera emianyisa ibi era yénde yátuma emundu áya mwa buhungu, no'mwa bwisi, no'mwa bwîchi, 22no'mwa lusingi, no'mwa buhuma-huma, ne'mungo, no'mwa butebanyi, ne'kuata myanya ibi, ne'mufula, ne'ngambo, ne'rume, ne'buuta. 23Amu mabi moshi, mwa muchima we'mundu mu ménde mánatenga, kanji mu ménde mánamuíra kuba mubi.»
Ebwemeresi bwe'Musuriyakasi
(Mat 15:21-28)
24Era nyuma se'bi, Yesu era kutenga aola, na áya mwa bimbi bye'musi we'Tiro. Era kwêngirira mu nyumba nguma, si atásimaa mbu ebandu baményaa kwa àli'mo. Si chiro bacha, oku kuchibisha kwai kutáalikanaa.
25Mwo'lu, mukasi muuma era kûmva engulu ya Yesu. Oyu mukasi, mwali wai ábaa asímbirwe ne'bihwasi. Unao-unao, era kwire áya kuchihunda mwa maulu ma Yesu. 26Oyu mukasi ábaa Mukirikikasi, mwesha mwa musi we'Foinikiya, mwa chio che'Suriya. Era kwéma Yesu mbu àmwâmbulira echihwasi cha chábaa chìri ku mwali wai.
27Si Yesu era kumwǎkula mbu: «Urékaa ebana běute tanga! Bushi kutakomire kutola ebiryo bye'bana na kubiuma engunda.» 28Wamukasi nai mbu: «Enawetu! Kubinali bacha. Si anabe ne'ngunda nasi, sénde sánalya ebukombo-kombo bwa bana bénde bátosanga kwa mesa.»
29Yesu kukwera kumubura mbu: «Bushi wǎkwire bacha, ufúlukaa kwa wao. Echi chihwasi chàtengire ku mwali wao mira.»
30Mango oyu mukasi áikaa kwa wai, era kubuana mwali wai àchilambikire kwa njingo, ne'cha chihwasi chàmutengire'ko mira.
Yesu álamya emusuru
31Era nyuma se'bi, Yesu era kutenga mwe'bi bimbi bye'musi we'Tiro. Era kurenga mwa musi we'Sitona na êrekera kwa lunda lwe'nyanja ye'Kalilaya, mwa chio che'Tekapoli.#7:31 Tekapoli: Kukuteta mbu: Chio cha misi ekumi. 32Bera kumuretera mundu muuma ola wábaa ùfire ematwi kanji ábaa mutefu-tefu. Bera kwéma Yesu mbu àmubikaa kwe'mino.
33Yesu era kwire ámukula mwa luamba lwe'bandu, na kuchifunda nai bure hicha. Chasinda, era kumubika emitoke mwa matwi, era kuchira-chira kwa mino na ámuuma kwa lulimi. 34Era kutumbikisa kwa nguba, na ábura oyu mundu na murenge munene mbu: «Efata!» (Kukuteta mbu: «Sibukalaa!») 35Unao-unao, ematwi mwo'la mundu kuna kusibukala. Ne'lulimi lwai nalo, kuna kubookala, na átangirisa áteta kubuya.
36Yesu era kuchichika ebandu kwa bàtaburaa mundu asibya kwo'yu mwasi. Si echera chitátumaa bátaéndekera báhandabanya'o mwa bandu. 37Ebandu bera kusanwa busese. Bera kunde báteta mbu: «Byoshi bya Yesu énjire áira, binákomire ngachi! Anabe ne'ba bafíre ematwi, énjire átuma bômva. Ne'basuru, énjire átuma báteta!»
सध्या निवडलेले:
Mariko 7: tbt
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2017 Wycliffe Bible Translators, Inc.
