Matayo 11

Yowani Mubatisayi átuma ebanafunzi bai era mwa Yesu

(Luk 7:18-35)

1Ábere Yesu era amálaa kubura ebanafunzi* bai ekumi na babiri ei myasi, era kutenga mwe'chi chisiki. Era kuya mwa misi ye'Kalilaya áenda ákangirisa ne'kuhubanganyisa ebandu eMwasi Mubuya-buya.

2Mwe'si suku, Yowani Mubatisayi ábaa àminyirwe mwa buroko. Era kûmva engulu ye'myasi era Kirisito* énjire áira. Bushi no'ku, era kutuma bauma mwa banafunzi* bai, 3era kubabura mbu: «Muyáa kubusa Yesu mbu: ‹Eri u'no'yu ola wabáa wěmire kubaha, nesi tulínjiraa unji?›» 4Yesu nai mbu: «Muyáa kubura Yowani bya mwomvíre ne'kuchilorera'ko: 5Ebauta bálola, ne'birema byáenda, ne'babenzi-benzi bálamisibwa, ne'basuru bômva, ne'bafu bénjire bômwoka, ne'bakene bénjire báhubanganyisibwa eMwasi Mubuya-buya. 6Aáhanyirwe emundu ola utákaese ebwemeresi bwai ku'nyono!»

Yesu áteta era luulu sa Yowani Mubatisayi

7Mango abu banafunzi* ba Yowani bábaa bera bàchiumaa, Yesu era kutangirisa ábura eluamba lwe'bandu bushi ne'myasi ya Yowani mbu: «Chi mwayáa kutangula mwa buyeye*? Eri lusheke lwa lwabáa lwêkibwa-ekibwa ne'chusi? Nânga! 8Kasi chi mwayáa kutangula? Eri mundu ola wabáa wěmbese njimba sa sikomire? Nânga! Si ba bénde bémbala enjimba sikomire batúla mwa nyumba se'bami! 9Rero! Chi mwayáa kutangula kasi? Eri murebi*? Nechi! Nábabura kwa àli murebi*, si kanji àrenzise emurebi*. 10Bushi Yowani i'no'yu i'eMaanjiko Mabuya-buya matúla màtechire era luulu sai mbu:

‹Nàtumire endumwa yanyi ikuhondorere,

chasiya ikukunganyisise enjira.› #11:10 Somaa Malaki 3:1.

11«Kubinali, nábabura kwa mwa butala boshi mùtafura kuba mundu ola ùrenzise Yowani Mubatisayi. Si chiro bacha, ola ulí mueke mwa Bwami bo'kwa nguba, imukulu-kulu kumurenza. 12Kutengera esuku sa Yowani Mubatisayi ábaa énjire áhubanganyisa ebandu eChinwa cha Ongo kuikira lwarero, ebandu bénjire bálwisa eBwami bo'kwa nguba. Obu Bwami, endwali si sénjire sáereka kusimba'bo kwa misi. 13Ei myasi yoshi yátetwaa mwa Mwaso wa Musa ne'barebi boshi kuikira kwa suku sa Yowani. 14Rero, ei myasi akaba mùngemerera'i, muményereraa kwa emurebi* Eliya ola bátetaa kwa akábaha, i'Yowani. 15Ola wète matwi, ǒmvaa!»

16Yesu era kuteta kanji mbu: «Ebandu be'sine suku, nyìngabahuhanya na chiye? Bàli nga bana ba běkese mwe'soko bábanjirana etushembe mbu:

17‹Twàbaomberaa engoma, si mùtasinaa!

Kanji twàbêmbiraa enyimbo se'chiriyo si mùtaliraa!›

18«Bushi Yowani mango àbahaa, abáa aténjire álya atánamwa. Ebandu bera kunde báteta mbu asímbirwe na bihwasi. 19Nyi Mwana we'Mundu nanyi mango naíkaa, nabáa nénjire nálya ne'kumwa. Ebandu bera kunde báteta mbu: ‹Mulólaa! Ono mundu i'ndàrenza kalyo, àli na mutamisi! Kanji àli mwira we'bafuchisi be'mbarata ne'banji bakosi be'mabi!› Si chiro bacha, ebwenge bwa Ongo bwénjire bwánalorekana'ko kurengera emirimo yai.»

Emisi era yánanaa kwêmerera Yesu

(Luk 10:13-15)

20Era nyuma se'bi, Yesu era kutangirisa ákaliira emisi era áiraa mu bisomerano binene busese, bushi besha'mo batábindulaa emyanya yabo ibi. Era kuteta mbu: 21«Buanya ku woyo u'musi we'Korasini! Na buanya ku woyo u'musi we'Betesaita! Bushi nàiraa bisomerano mwa ndanda senyu. Ebi bisomerano, akaba nyìngabiirire mwa musi we'Tiro, ne'we'Sitona, besha mwe'i misi beke bàngěmbere mira embweka na kwâkaba elufufu, kwa kulosa kwa bàbindukire kutenga mwa bibi byabo. 22Rero nábabura kwa elusuku lwa Ongo akáchinjibusa ebandu, mwabo mukáchinjibusibwa busese kurenza besha mwa musi we'Tiro ne'we'Sitona.

23«Nao u'musi we'Kaperinaumu, eri wáanyisa mbu ungérusibwa kuikira kwa nguba? Bitábe bacha! Kwândaasibwa ku'ungândaasibwa kuikira ekusimu. Bushi ebisomerano bya byàiribwaa era mwao akaba bìngairibwe mwa musi we'Sotomo, oyu musi àngabere anáchiri'o kuikira lwarero. 24Bushi no'ku, nábabura kwa elusuku lwa Ongo akáchinjibusa ebandu, woyo ukáchinjibusibwa busese kurenza besha Sotomo!»

Yesu átonga Ongo

(Luk 10:21-22)

25Mwe'si suku, Yesu era kuteta kanji mbu: «Ongo Tata, woyo u'Ena enguba ne'butala! Nákutonga bushi ene myasi wáibishaa ebandu be'bwenge na ba bàsomire. Si waíbihulire ebana batoto. 26Nechi Tata! Ebi byoshi binátenganyire ne'kuhonda kwao.

27«Tata ányeresise byoshi mira. Kutali mundu ola wìshi eMwana kureka Tata yeine, nesi kutáli ola wìshi Tata kureka eMwana yeine na chira mundu ola oyu Mwana áhonda alóse Tata.»

Ekutamukira era mwa Yesu

28«Muboshi mu'mwálibuka ne'misio isito, mubáhaa ene mwanyi, nanyi nyingábatamusa. 29Mundaa mwányitunda na kunde mwákulikira emyasi nénjire nábakangirisa, bushi nyeke nyitúla murembu, na wamuchima mulomvu. Mukáira bacha, mungátamuka. 30Ekukulikira emyasi yanyi kutakoochire, ne'musio ola nyingáběsa nao àtasitoire.»

सध्या निवडलेले:

Matayo 11: tbt

ठळक

सामायिक करा

कॉपी करा