Luk 8
8
Okevi vɛ ɔlʉŋwa Zisɔs
1Ikil yɛ vɛnalɛvɛ yee vîyeli, Zisɔs azend ɔswaŋɛ nɛ ɔswaŋɛ, iyɛboona nɛ iyɛcɔɔ, kɛ ɛvɔlana ɔtɛlɛ wʉsɛɛ wʉ Ɔtʉlʉ vɛ Ofilikpamɛ. Acɛnda ana likwoŋ nɛ afaalɛ alɛ nɔnʉn, 2nɛ okevi vedivi vɛ Zisɔs âkʉsʉ vo vawaŋgɛ nɛ vɛ âsimi mʉndʉ vacɔcɔ vɛ ɔ̂nyɔlʉ vo. Ɔlɛ: Malia (wʉ âsime kɛ Madala) wʉ Zisɔs âsimi ɔn mʉndʉ vacɔcɔ ɔtaŋɛnɔfaalɛ, 3Zʉwana okeyi wʉ Cʉza (Cʉza ɛnɛ alɛ-lɛ itoghu kɛɛ ɛwanda ɛnalɛvɛ yɛ Mɛfʉwa Helod), Susana, nɛ vɛnʉl vedivi cɛŋ vɛ okpende Zisɔs nɛ vɛnʉl vɛ oyeghe nɔnʉn kɛ akpa avo.
Ɛkan yɛ ɔnʉl wʉ ataa asaŋgɛ
4Vɛnʉl ɔvaa kɛ nɛ Zisɔs vɛ osime kɛ ɔswaŋ nɛ ɔswaŋ. Ɔkambɛlɛ wʉ ɔ̂zwaŋɛ ɛyɛŋgɛ iyɛboona, Zisɔs atɛfa vo ɛkan yee: 5“Ɔnʉl ɔmɔ alɛ-yalɛ kɛ ɛkʉŋʉ ɛna wʉ áza-ta asaŋgɛ. Sɛ ataa zaa, asaŋgɛ ayidi agba kɛ ɔwa, vɛnʉl owoo nyanda anɛ, ɛ̈nʉnʉ igbeli ya caca. 6Ayidi agba kɛ ɛyaŋ iyɛ ɛlɛ nɛ ɔvasɛ. Wʉ âmendi, awuse, akwo kici yɛ âkolu ɛzɔl ga. 7Asaŋgɛ ayidi agba kɛ ɛyaŋ iyɛ ɛlɛ nɛ asaŋa. Asaŋa anel ɔlʉŋgʉ nɛ asaŋgɛ, akɔnd yɛva anɛ. 8Asaŋgɛ ayidi agba kɛ ɛyaŋ iyɛsɛɛ. Amend sime, azialɛ afo asaŋgɛ ayɛ ɔ̂ta ɛkambɛlɛ ati ataŋɛn.”
Ikil yɛ Zisɔs atɛfa kule ɛkan yee, avɔl navo gbaŋgaŋ ala, “Ɔmɔnɛmɔ wʉ alɛ nɛ atʉŋʉ ayaŋgwana, nɛ áŋgwa.”
Zisɔs avɔl itind yɛ ɛkan yee
9Vɛnʉl vɛ oyeghe nɛ Zisɔs ofii ɔn ala, “Itind yɛ ɛkan yee kɛlɛ ala naa?” 10Akaŋɛ navo ala, “Kɛlɛ kɛ nɛ anu ɛnɛ Ofilikpamɛ ɔ̂na ɛyana ala nácil vɛnalɛvɛ yɛnyaghɛ yɛ Ɔtʉlʉ ɔnavɛ. Kpa kɛ nɛ vɛnʉl vedivi, mɛtɔwa kɛlɛ akanɛ ndalɛsɛ,
“‘Masɛ oyene kpa, nɛ ɔmɔ átii ɔmanɛ ga.
Masɛ ɔtambɛla kpa, nɛ ɔmɔ áŋgwa ga.’
11“Ɛkan yee itind ɛna ɛnɛ ɛlɛ yee: ɛsaŋgɛ yee kɛlɛ ɛmʉ iyɛ Ofilikpamɛ. 12Asaŋgɛ ayɛ agba kɛ ɔwa, ayɛ kɛlɛ vɛnʉl vɛ ɔŋgwa ɛmʉ iyɛ Ofilikpamɛ, nɛ ɔkʉ wʉ mɛkpe ava-yel vo, nɛ ɔmɔ áwa ɛsɛma kɛ nɛ Ofilikpamɛ ndalɛsɛ ɔ́wal vo ga. 13Asaŋgɛ ayɛ agba kɛ ɛyaŋ iyɛ ɛlɛ nɛ ɔvasɛ, ateē kɛlɛ vɛnʉl vɛ ɔŋgwa ɛmʉ iyɛ Ofilikpamɛ nɛ vɛsɛghana. Kpa ndalɛsɛ ɔkɛma ɛsalɛ ga, nɛ awa-ɛsɛma ovo kɛ ɛmʉ iyɛ Ofilikpamɛ nɛ asivi ga, saŋ nɛ ɔkambɛlɛ wʉ mɛsol ava, nɛ ɔ́gba azime. 14Asaŋgɛ ayɛ agba kɛ asaŋa ateē kɛlɛ vɛnʉl vɛ ɔŋgwa ɛmʉ iyɛ Ofilikpamɛ, kpa sɛ ɔza isi nɛ ɛyɛma, nɛ vɛnalɛvɛ yɛsɛɛ yɛ fan ɔtalɛ wee vɛ́kʉʉl simi ɛmʉ iyɔɔ kɛ asɛma avo, ndalɛsɛ ɔmɔ vo ánel nɛ ákɛma wʉ áyumwe aduŋgu ga. 15Asaŋgɛ ayɛ agba kɛ ɛyaŋ iyɛsɛɛ, ayɛ kɛlɛ vɛnʉl vɛ ɔŋgwa ɛmʉ iyɛ Ofilikpamɛ, nɛ ɔ́gbaal ɛnɛ nɛ ɛsɛma ɛmɔɔ nɛ ɛsɛghanavɛ. Nɛ ɛ́nyɔl vo gbaŋ, nɛ ɔ́nyɛl ɛsɛma, nɛ óyumwe aduŋgu.
Ɛkan yɛ ɔtʉlʉka
16“Ɔmɔ amaŋgā ɔtʉlʉka, nɛ áŋgiee yel ɔn kɛ ite akasɛ nɛ áwa ɔn kɛ ɛtɔ ɛnaŋgɛ ga. Kpa ɔvɛlā ɔn kɛlɛ fɛ oci ɔna, ndalɛsɛ vɛ ɔnyɔla vaa nɛ óyen ɔmʉsʉ. 17Kici yɛ ɔmanɛ ɔmɔnɛmɔ kanyaghɛghɛ kásime kɛ agbaŋgaŋ keŋ, masɛ ɔmanɛ ɔmɔnɛmɔ kɛɛ oyili kásime kenini, nɛ vɛnʉl ócil. 18Asɔ pɛma nini atʉŋʉ cuwee sɛ nɛtambɛla, kici yɛ kɛ nɔnʉn wʉ âkol ye, vákɛ-pe ɔn cɛŋ; kpa kɛ nɔnʉn wʉ aka-lɛ nako ga, nɛ ɔ́gbaal masɛ kacɔɔ kɛɛ ates ala ɔn awʉ nako.”
Itumu yɛ Zisɔs yɛcɛb
19Ɛŋgwan nɛ ɔvɔnɛŋgwanɛ vɛ Zisɔs ɔva iyenena ɔn, kpa ɔmɔ abɛ obi kɛ oci wʉ alɛ ga kici yɛ ɛyɛŋgɛ iyɛ ɛnʉlʉ iyɛboona. 20Saŋ ɔnʉl wudi avɔl Zisɔs ala, “Ɛŋgwan wuwu nɛ ɔvɔnɛŋgwanɛ vumbuvu avɛ ocoolenavɛ kɛ ɔswaŋ, oliye váyen we.”
21Kpa Zisɔs agɔl navo omwem ala, “Ɛŋgwan wamɛ nɛ ɔvɔnɛŋgwanɛ vambɛvɛ kɛlɛ ɔmɔnɛmɔ wʉ aŋgwa ɛmʉ iyɛ Ofilikpamɛ saŋ ayele ɔmanɛ kɛɛ ɛkaŋɛ.”
Zisɔs akes okumbwe
22Ife ɛmɔ Zisɔs akaŋɛ nɛ vɛnʉl vɛ oyeghe nɔnʉn ala, “Sɛ̃kalɛ za ɛzɔl iyikɔ.” Asɔ, ɔnyɔl kɛ ɛkpand, ohee ɔmʉwa. 23Sɛ ɔkala zaa, Zisɔs awo mɛnyam. Wʉ âlɛ tɔ kɛ mɛnya, okumbwe wʉtavana ahee iyelena kɛ ɛzɔl yɔɔ, kaka ɛkpandɛghɛ ivoghu kɛnɔŋga wʉ kipiili, asɔ ɔlɛ kɛ oceŋini wʉboona.
24Asɔ ɔza-lil ɔn, ɔkaŋɛ nɔnʉn ala, “Ɔkʉ, Ɔkʉ, sɛpiilē zaā.”
Amʉwa ɛsɛla, alʉwa nɛ okumbwe nɛ ɛzɔl yɛ ɛmgbʉwa yɔɔ. Okumbwe ade, oci ɔmɔnɛmɔ ɔyʉŋgʉlʉ. 25Saŋ afii vɛnʉl vɛ oyeghe nɔnʉn ala, “Awa-ɛsɛma wunu ye?”
Kɛ ɛyʉlʉ iyɛciaana nɛ ɛyaaŋanavɛ ofii valindi ala, “Otu ɔnʉlʉ wʉ fɛna ɔlɛ wee? Alʉwā nɛ okumbwe nɛ ɛzɔl, kpaa nɛ vɛ́ŋgwa ɔn?”
Zisɔs akʉs ɔnʉl wʉ alɛ nɛ mʉndʉ vɛ ɛyan
26Saŋ ɔnaf obi kɛ ɛyaŋ iyɛ vɛ Gelasa wʉ ɔlɛ ilife iyikɔ ikil yɛ wʉcoolu kan Galili. 27Ikil yɛ Zisɔs asime kɛ ɛkpand, ɔnʉl ɔmɔ wʉ asime kɛ ɔswaŋ wʉ ɔtalɛ wɔɔ wʉ alɛ nɛ mʉndʉ vɛ ɛyan, asime va kol ɔn. Anyʉm-anyʉm, ɔnʉl wee ama-waa okuu ga, ama-caa kpaa kɛ itimbe ga, kpa acaa kɛlɛ kɛ akund. 28Ikil yɛ âyeni Zisɔs, akoo gbaŋ, aza kɛ nɔnʉn, aŋgul anu ɛyaŋ kɛ isi ɛnaghɛ, akoo gbaŋ ala, “Zisɔs, Wanɛ wʉ Ofilikpamɛ wʉ obo ofo, ini wʉliye kan namɛ? Mɛkɔl uno nawe, x-wanaa mɛ ɛcian ga.” 29Akaŋɛ asɔ kici yɛ Zisɔs âna ye obe ala mʉndʉ vacɔcɔ vɔɔ õsime kɛ ɛyʉl iyɛ ɔnʉl wɔɔ. Ɛkambɛlɛ cɛŋ kɛ azime, mʉndʉ vɔɔ ɔkɔla ɔn, masɛ ɔpɛma vɛnʉl vawandanavɛ, ɛnɛ ɔkɔnd ɔn nɛ iyisili nɛ ɔkambɛ, kpa nɛ ákes, nɛ mʉndʉ vɔɔ óŋgiee mʉwa nɔnʉn kɛ owemi.
30Zisɔs afii ɔn ala, “Ite iyuwu ala ɔnda?”
Saŋ avɔl ala, “Savɛ-cɛŋ,” kici yɛ mʉndʉ vɛ ɛyan ɔ̂nyɔlʉ ɔn kɛ ɛyʉl kɛ cɛŋ. 31Saŋ ɔkɔl uno nɔnʉn ocimbil ala x-atɛma vo kɛ ɛya kɛɛ ɔwaa mʉndʉ vacɔcɔ ga.
32Ɛ̈kʉlavɛ ɛ̂yalɛ fɛ ɛfan iyɛ ɔgʉ ɔmɔ ase lemineŋ, ɛyaa fini. Asɔ mʉndʉ vɛ ɛyan vɔɔ ɔkɔl uno nɛ Zisɔs ala ãkpɛnɛ-de nɛ vo ɔ́nyɔl kɛ ɛ̈kʉlavɛ iyɔɔ. Saŋ Zisɔs ana vo ɛyana. 33Ikil yɛ mʉndʉ vɛ ɛyan vɔɔ osime kɛ ɛyʉl iyɛ ɔnʉl wɔɔ, ɔnyɔl kɛ ɛ̈kʉlavɛ iyɔɔ, izowulu wo kɛ ɛzwaŋ yɛ ɛlɛ kɛ okulu ɛzɔlʉ, ɛgba kwo kɛ ɛzɔl.
34Ikil yɛ vɛnʉl vɛ ɔwanda ɛ̈kʉlavɛ vɔɔ ôyeni ɔmanɛ kɛɛ kâyeli, ɔmʉwa zowu, ɔza-vɔl kɛ ɔswaŋ wʉboona nɛ iyɛcɔcɔ iyɛ ɛlɛ fini, ɔmanɛmanɛ kɛɛ âyeli. 35Asɔ vɛnʉl osime kɛ ɛswaŋ ivo, nɛ azowu ndalɛsɛ váyen ɔmanɛ kɛɛ âyeli. Ikil yɛ ôbi kɛ nɛ Zisɔs, okol ɔnʉl wʉ mʉndʉ vɛ ɛyan osime ɔn kɛ ɛyʉl wɔɔ ɔcaalana fɛ nɛ Zisɔs nɛ akʉndʉ kɛ ɛyʉl, nɛ itoghu ɛnaghɛ cambɛlaŋ; ɛyʉlʉ ɛcia vo. 36Saŋ vɛnʉl vɛ ôyeni ɔmanɛ kɛɛ âyeli, ɔvɔl vo ndalɛsɛ Zisɔs âkʉsʉ ɔnʉl wʉ mʉndʉ vɛ ɛyan ɔ̂nyɔlʉ ɔn wɔɔ. 37Saŋ vɛnʉl omwem vɛ kɛ ɛyaŋ iyɛ vɛ Gelasa ɔkaŋɛ nɛ Zisɔs ala ãmʉwa za, nɛ ãde vo, kici yɛ ɛyʉlʉ ɛcia vo kaka. Asɔ Zisɔs anyɔl ɛkpandɛghɛ, amʉwa.
38Ɔnʉl wʉ ɔ̂walɛ ɔn kɛ ɔtavɛ vɛ mʉndʉ vɛ ɛyan wɔɔ alɛ-kɔlʉ uno ala ãde nɛ ɔn álʉŋwa ɔn. Kpa Zisɔs akʉŋgʉsʉ ɔn, akaŋɛ ala, 39“Kiil kɛ ɔswaŋ owuwu, nɛ wʉ́za-vɔl ɔmanɛ kɛɛ Ofilikpamɛ ôyeli we.” Saŋ amʉwa, azend oci ɔmɔnɛmɔ fɛ ɔswaŋ wɔɔ, ɛvɔlana ɔmanɛ kɛɛ Zisɔs âyeli ɔn.
Zisɔs akʉs okeyi, alil wanɛ wʉ Zailus
40Ɔkambɛlɛ wʉ Zisɔs âkiili ilife iyikan Galili, ɛyɛŋgɛ iyɛ ɛnʉlʉ ɛgbaal ɔn, kici yɛ ɔ̂kʉla ye ɔn. 41Saŋ ɔnʉmbʉsʉ ɔmɔ wʉ agɔla ite ala Zailus, ɔkʉnʉl wʉ kɛ ɛca iyɛ vɛ Zu fɛ ɔswaŋ wɔɔ, ava-ŋgul kɛ isi kɛɛ Zisɔs. Akɔl uno nɔnʉn ala nɛ ãza kɛ itimbe ɛna, 42kici yɛ wanɛ ɔna wʉ okeyi cas wʉ alɛ masɛ anyʉmʉ likwoŋ nɛ afaalɛ akwoō zaā.
Ndalɛsɛ Zisɔs âzaa kɛ ɔwa, ɛyɛŋgɛ ɛnʉlʉ iyɛ ɛlʉŋwa ɔn, ɛmambɛlɛ ɔn kaka ama-lɛ masɛ nɛ ɔwaa wʉ ayeŋ ɛfɛŋga ga. 43Okeyi wudi alɛ fini wʉ awaŋgɛ wʉ agɔmbʉ aza ɔn ɛyʉl anyʉmʉ likwoŋ nɛ afaalɛ, acɔ ɔmanɛmanɛ kɛɛ âlɛ nako, kpa ɔmɔ abɛ ɔkʉs ɔn ga. 44Azend va kɛ izime yɛ Zisɔs, apel ɔgʉndʉ wʉ okuu ɔna, saŋ ɔkambɛlɛ ɔnawɔɔ agɔmbʉ anayɔɔ akes.
45Zisɔs afii ala, “Ɔnda ɛnɛ apel mɛ?”
Ikil yɛ ɔmɔnɛmɔ wʉ alɛ fini atɛna ala kɛlɛ ɔn ga, Pita akaŋɛ nɔnʉn ala, “Ɔkʉ, icene wʉ ɛnʉlʉ wee agambɛlɛ we, anyɛla we, kpa nɛ wʉfiye wʉla, ‘Ɔnda apel mɛ?’”
46Kpa Zisɔs akaŋɛ nɔnʉn ala, “Ɔmɔ ɔnʉl apel mɛ kɛ akpʉkpʉ, kici yɛ mɛ̂ŋgwa ɔtavɛ vakʉsanavɛ osime kan ɛyʉlʉ ɛyamɛ.”
47Ɔkambɛlɛ wʉ okeyi ɔnawɔɔ âcili aŋgiee ala ɔwaa ɔma-lɛ wʉ ɔn áyel ga, ava nɛ ɛkɛlakas, saŋ aŋgul kɛ isi kɛɛ Zisɔs, avɔl gbaŋgaŋ kɛ isi kɛɛ vɛnʉl omwem ɔmanɛ kɛɛ âyeli saŋ ɔn apel Zisɔs, nɛ ndalɛsɛ ɔn akʉna ɛpʉmb. 48Zisɔs akaŋɛ nɔnʉn ala, “Wanɛ wamɛ, awa-ɛsɛma wuwu âkʉs we. Zaa makun.”
49Ndalɛsɛ Zisɔs alɛ tɔ ɛtɔwana, ɔnʉl ɔmɔ ava wʉ asime kɛ itimbe iyɛ Zailus, ɔkʉnʉl wʉ kɛ ɛca wɔɔ. Avɔl nɛ Zailus ala, “Wanɛ wuwu wʉ okeyi âkwo. x-Wama-zaa ɔkʉnʉl ɛyʉl ga.”
50Ikil yɛ Zisɔs âŋgwa asɔ, akaŋɛ nɛ Zailus ala, “x-Waciaa ga, wa kɛlɛ ɛsɛma cas nɛ wanɛ wuwu ákʉna.”
51Wʉ âbi kɛ itimbe iyɛ Zailus, agɔl ala ɔmɔnɛmɔ ãnyɔlʉ kɛ itimbe ga, cas kɛlɛ Pita, Zɔnɛ, Zemis nɛ ɛŋgwan nɛ ɛziavɛ vɛ wanɛ wɔɔ. 52Ndalɛsɛ itimbe îyivi nɛ vɛnʉl vɛ ɔliaa wanɛ wee, ɔsiaala kɛ ɛyaŋ, Zisɔs akaŋɛ navo ala, “Yʉŋgʉlʉ nini! Âkwo ga, awʉ kɛ mɛnya.”
53Kpa ikil yɛ ɔ̂ŋgwa asɔ, owo kɛlɛ iseena ɔn, kici yɛ ôcili ye ŋgɛ-ŋgɛ ala âkwo. 54Kpa agba ɔn ovoghu, avɔl ala, “Wanɛ wamɛ, mʉwa ɛsɛla.” 55Mʉndʉ ɔna akɛlɛ-nyɔl ɔn kɛ ɛyʉl, amʉwa ɛsɛla ɔkambɛlɛ ɔnawɔɔ. Saŋ Zisɔs avɔl navo ala õlii ɔn ɔmanɛ, nɛ áya. 56Kayaaŋɛ ɛŋgwan nɛ ɛziavɛ vɛ wanɛ wee, kpa Zisɔs ana obe ala ɔmɔ x-avɔla ɔmɔnɛmɔ ɔmanɛ kɛɛ ayel ga.
सध्या निवडलेले:
Luk 8: Iceve-Maci
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©️2024 Luke Initiative for Scripture Translation
