Luk 24
24
Zisɔs asime kɛ ikund
1Nɛ odulu-dulu kɛ ife ivo yɛ ihee masaŋga, okevi vɔɔ oŋgiee iyili iyɛ iyuŋgwe sɛva iyɛ ôyeli, ɔza kɛ ikund iyɛ Zisɔs. 2Oyen ala okuul mʉwa nɛ igonu iyɛ icile uno wʉ ikundu. 3Kpa wʉ ɔ̂nyɔlʉ kini, ɔmɔ akol ɛkʉmʉ iyɛ Ɔkʉ Zisɔs ga. 4Wʉ ɔ̂lɛ kɛ ɛyaaŋana kɛ ɔmanɛ kiyee, saŋ fini okol ɔnʉmbʉsʉ ɔfaalɛ. Ɔwa akʉndʉ ayɛ ayama zaŋga-zaŋga, ɔlɛ ocoolenavɛ fɛ ɛfan ivo. 5Ɛyʉlʉ ɛcia vo kaka, oŋgule isi ivo kɛ ɛyaŋ. Vɛnʉl vɔɔ ofii vo ala, “Kâyel naa ɛnɛ nɛva-liye ɔnʉl wʉyɛma kan nɛ vakwoonavɛ? 6Zisɔs awʉ fan ga, âsime kɛ ikund. Tesi nini ndalɛsɛ âvɔlʉ wʉ âlɛ tɔ nɛ anu kɛ Galili ala, 7‘Vána Wanɛ wʉ Ɔnʉlʉ kɛ avo ayɛ vɛnʉl vacɔcɔ keŋ, nɛ ɔ́mand ɔn kɛ ɔkʉnʉ, saŋ kɛ afe ataalɛ nɛ ásime kɛ ikund.’” 8Saŋ otes ɔmanɛ kɛɛ alɛ-vɔlʉ vo.
9Wʉ ôkiili va kɛ ikund, ɔvɔl vɛnalɛvɛ yee vimem kɛ nɛ acɛnda likwoŋ nɛ ɔmɔɔ, nɛ vɛnʉl omwem vɛ oyeghe nɔnʉn. 10Kɛlɛ Malia wʉ asime kɛ Madala, Zʉwana, Malia ɛŋgwan wʉ Zemis, nɛ vedivi vɛ ɔ̂lɛ navo, ɛnɛ ɔ̂vɔlʉ acɛnda ayɛ Zisɔs ɔmanɛmanɛ kɛɛ âyeli. 11Kpa ɔmɔ agɔl ɔmanɛ kɛɛ okevi vee ɔ̂vɔlʉ vo ga, kici yɛ kâyeli itoghu kɛ navo ga. 12Kpa Pita amʉwa ɛsɛla, azowulu za kɛ ikund, ndalɛsɛ ɔn aza-yen. Wʉ âbi kini, aŋgul, ayen kɛ atɛŋ, kpa ayen cas kɛlɛ otuwulu wʉ olimbe ɛkʉmʉ iyɛ Zisɔs. Saŋ akiil nɛ ɛyaaŋanavɛ kɛ ɛsɛma kɛ ɔmanɛ kɛɛ âyeli.
Vɛnʉl ɔfaalɛ oyen Zisɔs kɛ ɔwa wʉ Ɛmayɔs
13Kɛ ife ɛnayɔɔ, vɛnʉl ɔfaalɛ vɛ oyeghe nɛ Zisɔs, ozende zaa kɛ ɔswaŋ wʉ ɔyɛla ala Ɛmayɔs. Ɛmayɔs ânel masɛ vɔmal ɔtaŋɛnɔfaalɛ nɛ kɛ Zelusalem. 14Ndalɛsɛ ôzende zaa, ɔlɛ kɛ ɛtɔwana nɛ valindi kɛ ɔmanɛmanɛ kɛɛ âyeli. 15Wʉ ɔ̂lɛ kɛ ɛwaana ɔkagh wee, Zisɔs ɔn ɛŋga akol vo, ozende zaa ɔlʉŋgʉ. 16Kpa Ofilikpamɛ oyel ɔmɔ akɛvɛ ɔn ga.
17Afii vo ala, “Ɔkagh wʉ fɛna nɛwaa zaa ɔlʉŋgʉ, sɛnɛ nɛzende zaa?”
Osune kɔlaŋ kici yɛ ɛyʉlʉ îkwo vo kaka. 18Saŋ ɔnʉl vo ɔmɔ wʉ agɔla ala Klopas agɔl nɔnʉn ala, “Owe ocon ɛnɛ wʉlɛ ɔnʉl wʉ ozindi fan Zelusalem, wʉ aka-ŋgwa vɛnalɛvɛ yɛ viyel kini kɛ afe ayee ga?”
19Afii vo ala, “Vɛnalɛvɛ yɛ fɛna?”
Ɔgɔl nɔnʉn ala, “Vɛnalɛvɛ yɛ viyel nɛ Zisɔs wʉ kɛ Nazalet. Âlɛ kɛ ɔnʉl wʉ atɔwa kici yɛ Ofilikpamɛ. Ɛmʉ ɛna nɛ vɛnalɛvɛ yɛ âyele vɛ̂lɛ nɛ ɔtavɛ kɛ isi kɛɛ Ofilikpamɛ nɛ vɛnʉl omwem. 20Kpa vakʉ vɛ ɔsala Ofilikpamɛ nɛ vakʉ vasɛvɛ, ɔ̂na ala ɔ̃yɛva ɔn, ɔ̃mandɛ ɔn kɛ ɔkʉnʉ. 21Asu, sɛlɛ-tese asu ala kɛlɛ ɔn ɛnɛ alɛ Klais wʉ áva-wal Iselel. Masɛ asɔ, ɛnya wee kɛlɛ afe ataalɛ wʉ vɛnalɛvɛ yee viyel. 22Pe fini, okevi vasɛvɛ vedivi ɔ̂vɔl ɔmanɛ kɛɛ acia asu ɛyʉlʉ. Ɔ̂za kɛ ikund ɛnya nɛ odulu-dulu, 23kpa ɔmɔ âkol kɛ ɛkʉmʉ ɛna ga. Ɛnɛ ɔva-vɔl asu ala, vo ôyen vɔzɛnda-gbalgbal vɛ Ofilikpamɛ, vɛ ɔkaŋɛ navo ala awʉ ɔyɛma. 24Vɛnʉl vɛ kɛ ɔlʉŋgʉ ɔwasɛ vedivi ɔza kɛ ikund, ɛnɛ okol ɔmanɛmanɛ kɛ ndalɛsɛ okevi vɔɔ ɔ̂vɔlʉ; kacɛb ɔmɔ âyen ɔn ga.”
25Akaŋɛ navo ala, “Ini nɛgba azɔwʉ ase? Ini kayul anu ɛwaana ɛsɛma kɛ vɛnalɛ vimem yɛ vɛnʉl vɛ ɔtɔwa kici yɛ Ofilikpamɛ ɔsaŋgɛ? 26Nɛcil anu ala Klais wee áya ɛcian keŋ, sɛ nɛ ányɔl kɛ ɔtʉlʉ ɔnavɛ vaboonavɛ ga?” 27Saŋ avɔl vo vɛnalɛvɛ imem yɛ kɛ Oŋgwe wʉ Ofilikpamɛ yɛ kɛ ito ɛnaghɛ, hee nɛ vɛnalɛvɛ yɛ Mosis nɛ vɛnʉl vɛ ɔtɔwa kici yɛ Ofilikpamɛ omwem ɔlɛ-saŋgɛ.
28Ndalɛsɛ ôbii zaa kɛ ɔswaŋ wʉ ɔ̂zaa, Zisɔs ayel ndalɛ ɔn azaā ɛlɛmb. 29Kpa ɔkɔl uno nɔnʉn ala, “Ca nɛ asu, kici yɛ ayeŋi âbi kule ye. Kɛ ase cɔɔ nɛ ɛyaŋgɛ íkule.” Asɔ aza-nyɔl, wʉ áca navo.
30Ndalɛsɛ ɔ̂caalɛ ɛyaŋ wʉ váya ɔyɛ, Zisɔs atɛŋɛ ɛkandɛghɛ, atɛfa Ofilikpamɛ, avine ko, anaa vo. 31Saŋ asi avo avuu, ocil aŋgiee ala kɛlɛ ɔn, ayile vo kɛ asi. 32Ofii valindi ala, “Wʉ̂tes sɛ ɛkianɛ kâsɛva asu kɛ asɛma kaka, wʉ âtɔwa nɛ asu kɛ ɔwa, nɛ wʉ âte asu Oŋgwe wʉ Ofilikpamɛ?”
33Ɔmʉwa ɛsɛla ɛpʉmb, okiil za kɛ Zelusalem. Wʉ ôbi kini, okol acɛnda likwoŋ nɛ ɔmɔɔ nɛ vɛnʉl vɛ ɔlɛ navo, sɛ ɔ̂zwaŋɛ ocici, 34ɔtɔwa ala, “Kâcɛb, Ɔkʉ Zisɔs âsime kɛ ikund, âte ɔmɛnɛ ɔna kɛ nɛ Saimʉn.” 35Saŋ vafaalɛ kpaa, ɔvɔl ɔmanɛ kɛɛ kâyeli kɛ ɔwa, nɛ ndalɛsɛ vo ɔkɛvɛ ala kɛ Zisɔs kɛlɛ wʉ âpavɛ ɛkandɛghɛ.
Zisɔs asime kɛ nɛ vɛnʉl vɛ oyeghe nɔnʉn
36Wʉ ɔ̂lɛ tɔ kɛ ɛtɔwana ɔmanɛ wee, Zisɔs ɔn ɛŋga asime kɛ imbule ivo, akaŋɛ navo ala, “Makun ãlɛ nɛ anu.”
37Onyiŋgil, ɛyʉlʉ ɛcia vo kaka, otes ala vo oyenē kɛlɛ oku-yaŋ. 38Afii vo ala, “Ini nɛciaa? Ini nɛyaaŋa? 39Yene nini kan avo ayamɛ nɛ akasɛ. Kɛlɛ ɛmɛ ɛŋga. Peli mɛ nɛ nɛ́kɛvɛ anu ala mawʉ kɛ oku-yaŋ ga. Oku-yaŋ alɛɛ̄ nɛ ɛnyam-yʉl nɛ akife, ndalɛsɛ nɛyen mɛlɛ nanɛnɛ ase ga.”
40Wʉ akaŋɛ asɔ, ate vo avo ana nɛ akasɛ. 41Kakɛma ɔmɔ vo ga, kici yɛ ɔsɛgha, ɔyaaŋɛ kpaa. Afii vo ala, “Navɛ fan nɛ ɔmanɛ kayaanaghɛ?” 42Ɔna ɔn ɔpavɛ wʉ ɛcɛmbɛ yɛŋwaghana. 43Agbaal, aya kɛ isi ivoghu.
44Saŋ akaŋɛ navo ala, “Ase ɛnɛ mɛlɛ-vɔlʉ nɛ anu, wʉ mɛ̂lɛ tɔ nɛ anu mɛla, ɔmanɛmanɛ kɛɛ ɔsaŋgɛ kɛ ito kaŋgɛghɛ kɛ Oŋgwe wʉ Ofilikpamɛ keŋ-keŋ káva-lɛ cɛb. Ɔ̂saŋgɛ kɛ voŋgwe vɛ Mosis nɛ vɛ vɛnʉl vɛ ɔtɔwa kici yɛ Ofilikpamɛ, nɛ kɛ wʉ Aciamɛ.”
45Saŋ ayel itoghu ivoghu kivuu, sɛ vácil vɛnalɛvɛ yɛ kɛ Oŋgwe wʉ Ofilikpamɛ. 46Akaŋɛ navo ala, “Ɔmanɛ kɛɛ ɔlɛ-saŋgɛ ɛnɛ kalɛ kiyee: Klais wɔɔ áya ɛcian, nɛ ákwo, nɛ ásime kɛ oku kɛ afe ataalɛ. 47Nɛ vɛnʉl ɔ́za kɛ ɛyaŋ ɛmɔnɛmɔ hee kɛ ɔswaŋ wʉ Zelusalem, nɛ ɔ́vɔl ɔtɛlɛ wee kɛ ite ɛna, ala Ofilikpamɛ ógife vɛnʉl omwem vɛ ɔsɛɛl ɛcɔcɔɔ ivo. 48Anu ɛnɛ nálɛ atisi kɛ vɛnalɛ yee. 49Mátɛma anu mʉndʉ wʉ ɛziavɛ wamɛ âkesi anyɛ nɛ anu. Asɔ lɛ nini kɛ Zelusalem, kaka nɛ mʉndʉ ásen na anu ɔtavɛ.”
Zisɔs akiil za kɛ ɔtalɛ-atʉlʉ
50Wʉ Zisɔs âsime za navo kɛ ɔswaŋ wʉ ɔyɛla ala Betani, akond avo ana kɛ ago, aveli ala Ofilikpamɛ õcowu vo. 51Wʉ âlɛ tɔ kɛ ivelena, Ofilikpamɛ ɔtɛŋɛ ɔn fɛ navo, ɔmʉwa nɔnʉn kɛ ago kɛ ɔtalɛ-atʉlʉ. 52Saŋ ocivili ɔn, okiil za kɛ Zelusalem nɛ ɛsɛghanavɛ yɛboonavɛ. 53Ɔ̂lɛɛ kɛ Ɛca iyɛ Ofilikpamɛ ife ɔmɔnɛmɔ kɛ icivilena ɔn.
सध्या निवडलेले:
Luk 24: Iceve-Maci
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©️2024 Luke Initiative for Scripture Translation
