Luk 14
14
Zisɔs akʉs ɔnʉl wʉ awaŋgɛ kɛ ife yɛyeŋena
1Kɛ ife ɛmɔ yɛyeŋena Zisɔs aza kɛ ɛyaana ɔyɛ kɛ itimbe iyɛ ɔkʉnʉl ɔmɔ wʉ vɛ Falasi. Vɛnʉl vɛ ɔ̂lɛ fini ɔpɛma asi kɛ ɔn ase cuwee. 2Kayele sigh ga, ɔnʉl ɔmɔ wʉ akasɛ nɛ avo ana âmɛla, ava kɛ nɔnʉn. 3Asɔ Zisɔs afii vɛ Falasi nɛ vɛnʉl vɛ otee obe vɛ ɔ̂lɛ fini ala, “Obe wasɛ agɔl ala ɔ̃kʉsʉ ɔnʉl wʉ awaŋgɛ kɛ ife yɛyeŋena aka agɔl ga?” 4Kpa ɔŋgwa ɔn kɛlɛ sweŋ. Asɔ, agba ɔnʉl wɔɔ kɛ ovo, akʉs ɔn saŋ ade ɔn ala õkule zaa.
5Saŋ Zisɔs afii vo ala, “Ɔnda wunu wʉ alɛ nɛ wanɛ akasɛ nɛ agund, ɛnɛ ikil yɛ agba kɛ ifel, nɛ áka-timbe simi ɔn ɛpʉmb kɛ ife yɛyeŋena ga?” 6Ɔmɔ akol ɔmanɛ kɛɛ vákaŋɛ ga.
Zisɔs ate ndalɛsɛ vɛnʉl vápɛma ayʉlʉ avo kɛ ɛyaŋ
7Ɔkambɛlɛ wʉ Zisɔs âyeni ndalɛsɛ vɛnʉl vɛ ozindivi, vɛ ɔbɛ vo kɛ ɛyɔsʉ, ɔcɔw kɛ ici iyɛ vakʉ ɛnʉlʉ iyɛ vácaal, atɛfa vo ɛkan yee. 8“Ɔkambɛlɛ wʉ ɔnʉl abɛ we kɛ ituŋunu ɛna iyɛ ɛyɔsʉ, x-waza-caala kɛ ici iyɛ vakʉ ga, kici yɛ kpidi ga nɛ âbɛ kpaa ɔnʉl wʉ ɔkʉvʉ ɔnavɛ ofo vumbuvu. 9Ikil yɛ kalɛ asɔ, nɛ ɔnʉl wʉ abɛ anu wɔɔ, nɛ áva-kaŋɛ nawe ala, ‘Na ɔnʉl wee ɛkɔnʉghʉ kuŋgughu.’ Saŋ pu nɛ icwe, nɛ kálɛ aŋgiee kɛlɛ wʉ owe ɛnɛ wáza-caal kɛ oci wʉdaŋ. 10Asɔ ɔkambɛlɛ wʉ ɔnʉl abɛ we kɛ ituŋunu ɛna, kâsɛva nɛ wʉ́za-caal kɛlɛ kɛ oci wʉ ɔgba kɔ saŋ ofo, ndalɛsɛ ɔkambɛlɛ wʉ ɔnʉl wʉ abɛ we ava, nɛ ákaŋɛ nawe ala, ‘Ɔciam wamɛ, yʉmʉ za kɔ kɛ oci wʉ vakʉ.’ Saŋ nɛ wʉ́kol icivili kɛ asi ayɛ vɛnʉl omwem vɛ nɛcaal ɔlʉŋgʉ kɛ ituŋunu. 11Kici yɛ ɔmɔnɛmɔ wʉ akond ɔmɛnɛ ɔna kɛ ago, nɛ ósen nɔnʉn kɛ ɛyaŋ, nɛ ɔn wʉ asen ɔmɛnɛ ɔna kɛ ɛyaŋ, nɛ ókond ɔn kɛ ago.”
12Saŋ Zisɔs akaŋɛ nɛ ɔnʉl wʉ âbɛ ɔn wɔɔ ala, “Ife yidi wʉla wábɛ vɛnʉl kɛ ituŋunu, nɛ ɔ́ya ɔyɛ nawe, x-wabɛɛ vaciam nɛ ɔvɔnɛŋgwanɛ vumbuvu ga. x-Wabɛɛ ɔcʉmbʉlʉ owuwu akasɛ vɛnʉl vɛ aŋgɔlʉvʉ vɛ nɛlɛ valindi ga. Ikil yɛ wʉyel asɔ, nɛ vo kpaa ɔ́kɛ-bɛ we kɛ ivo, yan-sa ɔkɔl we akɔɔ. 13Asɔ ɔkambɛlɛ wʉ wʉla wábɛ vɛnʉl kɛ ituŋunu, bɛ vɛnʉl vɛ ɛcianɛvɛ, vɛ ogusuw, vɛwan, nɛ vapilesi, 14saŋ nɛ wʉ́yen ndalɛsɛ Ofilikpamɛ ócowu we. Masɛ itu ɛnʉlʉ iyɔɔ ɛ̃bɛ ɛkɔl we akɔɔ ayuwu ga, kpa nɛ Ofilikpamɛ ɔ́kɔl we kɛ ife yɛ vɛnʉl vasɛɛvɛ vásime kɛ ikund.”
Ɛkan yɛ ituŋunu iyɛboona
15Ɔkambɛlɛ wʉ ɔnʉl wudi wʉ ayaa ɔyɛ nɔnʉn âŋgwa asɔ, akaŋɛ nɛ Zisɔs ala, “Vicowenavɛ ayɛ kɛ nɔnʉn wʉ áya ɔyɛ kɛ ituŋunu iyɛ kɛ Ɔtʉlʉ vɛ Ofilikpamɛ.” 16Zisɔs akaŋɛ nɔnʉn ala, “Ɔnʉl ɔmɔ alɛ-yeli ituŋunu iyɛboona, saŋ abɛ vɛnʉl vɛ ozindivi cɛŋ. 17Wʉ ɔ̂malɛ kule ɔmanɛmanɛ, atɛma pe vɛnʉl ɔnavɛ vɛ ɔtʉmʉ ala ɔ̃vɔlʉ vɛnʉl vɛ ɔn abɛ ala, ‘Va nini aŋgiee, kici yɛ ɔmanɛmanɛ kâkɛma wʉ ituŋunu íhee.’
18“Kpa vo omwem ohee ɛnaana atindi ayɛ ɔmɔ ábɛ nɛ ɔ́va ga. Wʉ isi-isi wɔɔ avɔl nɛ ɔnʉl wʉ ɔtʉmʉ wɔɔ ala, ‘Mɛ̂kʉnda ɔfɛnda wʉfeŋi teneŋ, kasɛva nɛ mɛ́za-yen keŋ. Mɛkɔl uno, kpɛnɛ-gɔlʉ itind ɛyamɛ.’
19“Owudi avɔl ala, ‘Mɛ̂kʉnda anʉmʉ-agundu likwoŋ ayayelena ɔtʉmʉ. Aŋgiee mawʉ kɛ ɔwa, mɛliyē máza-sol anɛ. Kpɛnɛ-gɔlʉ itind ɛyamɛ.’
20“Owudi pe kpaa akaŋɛ ala, ‘Mɛ̂yɔs okeyi teneŋ. Asɔ máma-bɛ mɛ́va ga.’
21“Asɔ ɔnʉl wʉ ɔtʉmʉ wɔɔ akiil va vɔl ɔkʉnʉl ɔna ɔmanɛmanɛ. Ɛsɛma ɛcɔ ɔn kaka, saŋ atɛma ɔnʉl ɔna wʉ ɔtʉmʉ ala, ãza ŋgʉla-ŋgʉla kɛ ɛwa iyɛboona nɛ kɛ ɛfal iyɛ atimbe iyɛ ɔswaŋɛ, nɛ ábɛ va nɛ vɛnʉl vɛ ɛcianɛvɛ, vɛ ogusuw, vapilesi nɛ vɛwan.
22“Aza-va, saŋ ayɛla ɔn ala, ‘Ɔkʉnʉl, mɛ̂yeli ye sɛ wʉkaŋɛ, kpa oci awʉ tɔ.’
23“Ɔkʉnʉl wɔɔ avɔl nɔnʉn ala, ‘Sime za kɛ ambɔnʉ ayaboona nɛ ayɛ kɛ owemi, nɛ wʉ́fɛŋgɛsɛ vo, nɛ ɔ́va, ndalɛsɛ itimbe ɛyamɛ íyiv. 24Mɛkaŋɛ nɛ anu mɛla, vɛnʉl vɛ ɛkianɛ mɛ̂bɛ vɔɔ, masɛ ɔnʉl ɔmɔɔ ámɔm ɔyɛ wʉ ituŋunu ɛyamɛ ga.’”
Ɛlɛɛna ɔnʉl wʉ ayeghe nɛ Zisɔs
25Imbule yɛboona îzende zaa nɛ Zisɔs. Afiil kɛ nɛnɛn, akaŋɛ ala, 26“Ikil yɛ ɔmɔnɛmɔ ava kan namɛ, saŋ aka-teŋg mɛ afo ɛziavɛ ɔna nɛ ɛŋgwan ɔna, okeyi ɔna nɛ ɔvɔnʉ ɔnavɛ, ɔvɔnɛŋgwanɛ vanʉmbʉsʉ nɛ vakevi, masɛ nɛ ɛyɛma ɛna ɛŋga ga, nɛ ábɛ nɛ álɛ ɔnʉl wʉ ayeghe namɛ ga. 27Masɛ ɔmɔnɛmɔ wʉ aka-bɛ agɔl ɛcian wʉ alʉŋwa mɛ ga, nɛ ábɛ nɛ álɛ ɔnʉl wʉ ayeghe namɛ ga.
28“Ɔnda wunu wʉ ikil yɛ aliye ala ɔn áma itimbe iyɛnelena, nɛ áka-mbaa nɛ ácaal kɛ ɛyaŋ, nɛ ávɔl ɛŋgɔl yɛ ɔn ácɔ, ndalɛsɛ áyen kasɛ ɛŋgɔl ɛna ɛ̂kɛma yɛ itimbe ɛna íkule ga? 29Ikil yɛ awa otiŋi saŋ alɛ wʉ áma-bɛ nɛ ákule itimbe ga, nɛ ɔmɔnɛmɔ wʉ ayen ɛnɛ, nɛ áyel ɔn icwe, 30nɛ ɔ́kaŋɛ ala, ‘Ɔnʉl wee alɛ-hee ɛmaana itimbe, kpa abɛ akule ɛnɛ ga!’
31“Ɔnda Mɛfʉwa ɛnɛ aliye ala ɔn ánɔŋg ɛtavɛ nɛ mɛfʉwa wudi, nɛ ácaal man kɛ ɛyaŋ, nɛ átes kasɛ ɔn ábɛ nɛ ánɔŋg ɛtavɛ yɔɔ nɛ vɛnʉl vɛ ɛta vɔtasɛn likwoŋ, nɛ áfo wʉ ava ɛtavɛ kɛ nɔnʉn nɛ vɛnʉl vɛ ɛta vɔtasɛn iti ga? 32Ikil yɛ aka-bɛ ga, nɛ átɛma vɛnʉl, nɛ ɔ́za-kɔl uno nɛ mɛfʉwa wudi wɔɔ kɛ ɔkambɛlɛ wʉ alɛ tɔ ɛlɛmb, nɛ áfii ɔmanɛ kɛɛ váyel ndalɛsɛ makun álɛ. 33Kɛlɛ asɔ ɛnɛ anu vɛ nɛka-sɛɛl ɔmanɛmanɛ kɛɛ nɛlɛ nako ga, nɛ nɛ́bɛ nɛ́lɛ ɔnʉl wʉ ayeghe namɛ ga.
Mɛkaŋɛmɛ mɛ mɛka-nyɛŋɛnɛ ga amɛ kɛ daŋ
34“Mɛkaŋɛmɛ mɛ̂sɛva, kpa ikil yɛ mɛyile ɔnyɛŋɛnanavɛ ɔnavɛ, nɛ mɛ́yel naa sɛnɛ mɛ́kɛ-nyɛŋɛn? 35Nɛ mɛ́ma-lɛ nɛ mɛkpend ga tutu. Nɛ ówule mise amise.
“Ɔnʉl wʉ alɛ nɛ atʉŋʉ ayaŋgwana, nɛ ãŋgwa.”
सध्या निवडलेले:
Luk 14: Iceve-Maci
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
©️2024 Luke Initiative for Scripture Translation
