Lukah 17

Abi woluɗiya natou ana manaꞌu ta doku-jala

(Mat. 18:6-7, 21-22; Mrk. 9:42)

1Hi Yehu napanewi ta ana pahakoala-Na, “Enga eingu mahawitingu lapakung natou hina woluya na doku-jala, ʄiaɗinguka namohu natou nama hawiting. 2Jaka a eikanguka tou nama woluya hatou waling ɗama keri-Wa daɗi makullih na manninguna hina manaꞌu ta doku-jala, hi Alla enga hukunanya. Reihi kalunguya natou nou, apiinya watu buatu na kokuna ʄaka kaleꞌaya ta tahik nama maʄalung. 3Jiayak kaem magang wikimǃ

A eikanguka oaliʄaʄimu nama woluya nadoku-jala lahi ou, peakanya. Ana hariaɗing, denganaja ɗa doku-jalan. 4Ana pabitu wudakanguka hangi laɗɗu na oaliʄaʄimu ana woluya na doku-jala lahi ou, ʄaka ana pabitu wuda ʄellakanguka a aminya banikaga awinagu, mukaaya, ʄaka mudenganaja ɗa doku-jalan.

Witina na manni tetekkang

5Ɗa ana papaleawana ɗapanewi lahi Moiri Yehu, “Moiri Mupakullih gamaja ɗa manninguma.” 6Nagapiya hi Moiri, “A eikanguka manningumi laka nahameara ta watu-sesawi nama merrah, nyiami napiaku ami paleawaya na pingi ai ɓakul ya, ‘Maɓatung ʄaka hamula wikim ta tahik.’ Jiayaka na pingi ai nou, nakerigunya na pareahamu.”

Na ata napayeamanguh

7Hi Yehu napangalanya na panewina, “Da eimang hatou moiri ta joangami nama eingu atan nama kerang ta kahibu a da nama ʄawa beabu, na atan ana ɓalikaka wali pakerang, ‘May kam geaha angu’, da winamang. 8Jiaɗinguk winanya, ‘Hadiaga pa angugu. Mengaka nou muwaing koep mawarah ʄaka payeamaga pa angu pa inungu. Ak mengaɗing pa angu manga himu angu.’ 9Na ata nou napahalaku bolluhaka napareahan na moirin, waiwuk wina ʄellakaɗinya? Da winamanya. 10Touʄellana nyiami. Ami pahalakukahaka ngaladukaɗ na papareahanagimi, kawimi, “Nyiama ya atakaɗima; napataguma ʄiapaya napahalakuma.’’

Hi Yehu napateggahuha ɗama toum habuluha ɗa tou koaha

11Ta ɗalu halakuna ana hagang ta koata Yeruhalem, hi Yehu nalinoungu ta ɗira-tana loaɗa Hamaria ʄaka loaɗa Galilea. 12Ana tamakika ta mahangina na paraing, amija ɗama toum habuluh ɗa tou koaha. Hiɗa dedi dikirou 13ʄaka hiɗa kawulang, “Yehuǃ Moiriǃ Millakigama ati nyiama!”

14Na itakihaka hi Yehu, winaja, “Mi halakumi ta imam#17.14 Imam ʄiayak natou nama ta paɗuana hi Alla ʄaka na tourara. kaem patekanya na ihim.”

Tanga ta padua larangiha, mollahɗanyaka ɗa koahaɗa. 15Nama hatouna waling ɗa tou koaha, napeangu wikinaka ɗa koahan aɗa mollah, ɓalinanyaka lahi Yehu ana loɗu wuatu-haliya hi Alla. 16Tomaka ta hagana hi Yehu, karaɗananyaka waiwuka awinanya. Natou nou, tou Hamaria. 17Manga winaka hi Yehu, “Da toum habuluhɗim nama teggah? Bahajak ɗama tou mahiwah? 18Gahi ʄiapaya natou dama Yahudi nama ɓali, waiwu nama winanya hi Alla?” 19Manga winaka hi Yehu ta tou nou, “Kiɗiyay, ʄaka halakuyay. Kaɗang amu manni-Ga, ou muteggahu.”

Pirrang ana pakakanya napareaha-Na hi Alla

(Mat. 24:23-28, 37-41)

20Ɗama touma pirrah ɗa tou waling ta kaɓuangu Parihi ɗa patuturung lahi Yehu, pirrang a aminya hi Alla ana papareaha ʄaʄi Raja. Nagapiya hi Yehu, “Napareahana hi Alla anaʄaʄi Raja a aminya dana waimang tada napa ita tou, 21ka abi wina natou ana panewi, ‘May kaem itaya, ya einya napareahana hi Allaǃ’ A da, ‘Noulau einya napareahana hi Allaǃ’ Kaɗang hi Alla langa pareahanaka ta paɗuami.”

22Namengaka nou hi Yehu winaja ta ana pahakoala-Na, “Einya na rahin baar nyiami ami kalauranya pa itaya nama hangina na laɗɗu waling ta laɗɗu-laɗɗuna a aminya na Ana Tourara, awim. Jiaɗinguka dami piakumangu pa itaya. 23Jaka ɗa tou enga winagimi, ‘Patetinya, ya einya na Ana Touraraǃ’ A da ‘Noulau einya na Ana Tourara!’ Abi mi halakumangu ʄaka abi mi pakerimangu. 24Kaɗang atomakayaka na rahi aminya na Ana Tourara, nahameara-noungu ta kaɓalla nama kawalik ta awang napa itaɗa ɗa tou ta haguꞌul pinu-tana. 25Jiaɗinguka na Ana Tourara napaɗa moulnyaha na matu-matu mawilla, ʄaka daɗa kaamaya ɗa tou dalar ya. 26Jaka nahameara-noungu na morikuɗa ɗa tou hanaɗuga ta dalarun hi nabi Nuh, touʄellana na morikuɗa ɗa tou ɗama naɗinya na rahi aminya na Ana Touraraː 27ɗa tou ʄiapaya na doareng angu-inunguɗ, ɗawolu laaɗ-araweiɗa, toupangalaɗaka lapakung ta laɗɗu rahi tamana hi nabi Nuh ta teana ɓakul.#17.27 Na teana ɓakul nou, akatutukayak na malaina hangahu tilumbultilu dapana, na luaruna ɗuambulu ɗubba dapan, ʄaka na jagana habulutilu dapana. Manga aminyaka na wiwa ana pamohu bolluha ɗa tou. 28Ta laɗɗu rahi ami-Ga meara ʄellana gananya namaʄaʄi ta dalaruna hi Lot. Ɗa tou ɗa angu ɗa inung, ɗa hii ɗa ɗagang, ɗa rawing, ʄaka ɗa wolu ummaɗ. 29Jiaɗinguka ana louhunguka hi Lot waling ta koata Hodom, ta laɗɗu nou ʄella napurung na api balearang waling ta awang nama pamohu bolluha ɗa tou. 30Tounouʄellana na morikuɗa ɗa tou ta rahina hi Alla ana patekanya na Ana Tourara ta ngaladukaɗa ɗa tourara.

31Ta rahi nou a eikanguka tou nama eingu ta lenang, abi ɗatamakangu aɗa ɗekiha ɗa ngawuɗa ta roungu umma. Tounouʄellana ɗa tou ɗama ta kahibuh abi ɗaɓalika ta umma. 32Mi namuyah gananya namaʄaʄi ta araweina#17.32 Kejadian 19:26 ; Na arweina hi Lot hina maeti anaʄaʄi mahing kaɗang ɗunna dana kerimaya na pareahana hi Alla. Ɗunna nagilak ana patetinya na koata Hodom, kaɗang na namu oatah ɗahapoatin. hi Lot! 33Gearakak nama paʄurunya ana karawaya na morikuna ta pinu-tana ya, enga namarobanya na morik malodung. Jiaɗinguka gearakak nama maroba morikuna ta pinu-tana, enga na kollinya na morik malodung. 34Mirangu pakalunya napatiki-Gu: Ta rahi ami-Ga, eija ɗama tou maɗuaha ɗa juɗa ta mahangina na padoungu, nama hatouna enga na idiya hi Alla ʄaka nama hatouna napadungaya. 35Tou maɗuaha ɗa mawinni ɗama ɓai pari, nama hatouna enga na idiya hi Alla ʄaka nama hatouna napadungaya. [36Eija tou maɗua ɗama tanga kerangu ta kahibu, nama hatouna enga na idiya hi Alla ʄaka nama hatou ʄellana napadungaya.”]

37Ɗa ana pahakoala-Na hi Yehu ɗapatutur, “Bayaka anaʄaʄi noung Moiri?”

Hi Yehu nagapiha, “Bayanya pingi pa einya nama maet wouwu, enga kawoti hounguɗ ɗa mawurung ɗama angu mawou.” Baaru meara ʄellana toung Nyouwa a amiga, Nyouwa daku kaɓunimanya na amiga, ʄiaɗinguk ngaladukan natou enga na ita ʄaka napeanya.

सध्या निवडलेले:

Lukah 17: wnk

ठळक

सामायिक करा

कॉपी करा