Luk 24
24
Ia Jisas e mauri visu soha
(Matiu 28:1-10; Mak 16:1-8; Jon 20:1-10)
1Tana mohomoho putiputi tana chikainina na dani tana wiki#24:1 Tana nidira iju ira na Jiu Sande na chikainina dani tana wiki., ara laba na daki nira mara tahaa na oela sisihini tara vangaraua nia, mara dia tana baba. 2Mara ba haea te kelu choni noha na makara tara vongoa na baba nia. 3Mi tahuna tara sahe loera lalona na baba nia, mara teha na morosia na kokorana ia Jisas na Taovia. 4Tahuna tara tuu loera mara jijijo, mara taora loera mara ko tuu e ruka na tinoni lilihilodira te dadara na kalekokodira. 5Mara matahu mate na daki loera nia mara tao poruporu. Mara ko tuu tinoni koera mo ko kori vahai vaniloera na daki loera de, “?Na hua rongona amu mai lohamu na daia na tinoni te mamauri tana malenga ni tinoni te mate? 6Ia e teha noha toha de. E mauri visu soha. Kamu pada visua lohamu nina valagu ia te kori vanilohamu tahuna tamu toha kolu lohamu ia i Galili. Ia te kori vahai de, 7‘Na Dalena Tinoni ba kara sau vanira na tinoni sekoseko ma kara poha vuruna ia tana kros, mi tana tolunina dani ia ba ke mauri visu soha.’ ”
8Mi tahuna nia mara pada visua daki loera nina valagu ia Jisas, 9mara basiaa loera na baba nia mara visu. Mara kori potona visa na omea kode vanira na sangavulu chikai tinoni livurongo mi ira kesana tara toha tana tahu nia. 10Ma na daki loera tara koria na omea nia koi Meri na vangana ni Magdala, ma koi Joana, ma koi Meri na tinana ia Jemes, ma na daki nira laka kesana tara dia koluloera. 11Ma na tinoni livurongo nira nia ara teha na donua lodira kori daki loera nia, rongona tara padaa ira na daki loera nia ara valagu tugaleta. 12Ma ia Pita e tuu me chaku dia tana baba nia. Me choru sahe me hahae sahe tana baba nia, me morosi bamua na kaleko tara pulua ia Jisas tatana te totoha volo inge. Me visu mai i vera me tugaleta tana omea te laba nia.
Ia Jisas e duli kolukoera e ruka hana duli mara dia i Emeas
(Mak 16:12-13)
13Mi tana dani soha nia, ko ruka na vidadira hana duli nira ia Jisas ara ko dia tatana chikai na vera asana i Emeas. Ma na vasauana, tuu i Jerusalem me chau i Emeas, e tihilana ke sangavulu chikai na kilomita. 14Mi tana sala vata, mara ko vaikorihi koera tana rongona visa na omea kode tara vasangana laba nia. 15Tahuna tara ko vaikorihi koera i sala, me chaulikoera ia Jisas me duli kolukoera, 16ma ia God e teha talasangakoera koera na hae vagoana ia.
17Ma ia Jisas e gesukoera me kori vahai de, “?Na hua tamu ko valaguna kohamu tahuna amu ko diadia i sala?”
Mi koera ko tuu hotohoto tara ko sasahavi solehana tobakodira. 18Me chikai na vidakodira, ia Kleopas na asana, e gesuaa ia Jisas me kori vahai de, “?Ngeni ihoe tovosimu bamu na tinoni to toha i Jerusalem mo voo na omea nira tara vasangana laba tana tahu de inge?”
19Ma ia Jisas e gesukoera me kori vahai de, “?Na omea hua tara laba?”
Mara ko kori vahai koera de, “Na omea nira tara laba tatana ia Jisas ni Nasaret. Ia e chikai na propet te susuliha solehana nina valagu kolu na omea nira te agosia tana matana ia God mi tana matadira ira na tinoni. 20Ma nidira lehona nira ira na tinoni ni kere kolu kesana nida tinoni leholeho nira tara taria mara pedea mara labu matea tana kros. 21Mi kohami ami ko padaa ia nomu na tinoni ba ke vahanira ira na tinoni ni Israel kara toha manga. Me chikai laka na omea, ngeni de na tolunina dani tara laba na omea nira nia. 22Mi loera lakamu kesana daki tana lalomami hami ara mai vani taorahami hami. Ara dia loera tana baba tara livua ia Jisas tatana ngeni tana mohomoho, 23mara teha na haeana na kokorana ia Jisas. Mara visu mai loera mara koria tara morosia e ruka na enjol, mi koera tara ko kori vaniloera te mauri visu noha ia Jisas. 24Mara tuu kesana vidamami hami mara dia loera mara chau tana baba mara haea te vahai nomu tara koria na daki nira, mara teha nomu haea ia Jisas inge.”
25Ma ia Jisas e kori vahai vanikoera de, “!Kohamu amu ko bule! ?E vahai vei ko vu taha oka solehanaa kohamu na tutunina na omea tara koria ira na propet? 26Kohamu ko hanaa, ira ara koria na Mesaea ba ke vajangi savi leho luhi, kode ke vu toha tana nina marara leho.” 27Kode, ma ia Jisas e vinasa vanikoera na hua tara marea tana rongona tovosi ia, tatana visa na Mamare Tabu tuturiha tana nina buka ia Mosis me dia tana nidira mamare ira na propet.
28Mara mai chau varangisia loera na vera i Emeas, ma ia Jisas e moro vahai te ba ke dia savaliu. 29Mi koera ko solo visua mara ko kori vahai vania de, “Ko mai mo ko toha kolukomami tana puti de. E maravia ke joku na aso.” Me dia ia me toha kolukoera.
30Me tohotuu kolukoera tana belabela ni hahani. Me tahaa na bred me kamaa ia God, kode me ngitia me tuturiha na sahakoera. 31Mi tana tahu nia, me vasangana marara na matakodira mara ko hae vagoa koera ia Jisas. Me tavonga ni sagava ia Jisas. 32Mara ko vaikorihi koera, “!Sa, e vahai na ruu te maragasia na mamaurikodada kohita tahuna te valagu kolukohita tinoni de taonia sala, me vinasaa na Mamare Tabu vanikohita kohita!”
33Mara ko tatuhuru chikai koera mara ko visu laka i Jerusalem. Mara ko ba haeloera na sangavulu chikai hana duli ia Jisas tara sai inge kolura loera kesana. 34Mi ira tara sai inge ara kori vanikoera mara kori vahai de, “!E mana, e mauri visu nomu na Taovia! Me lenga vania ia Saemon.”
35Mi tahuna nia, koera ara ko kori lakamua na omea te laba tahuna to ko diadia koera i Emeas, mara ko teha koera na hae vagoa na Taovia po e ngitia ia na bred tara onina loera na hahani.
Ia Jisas e laba lenga vanira hana duli nira
(Matiu 28:16-20; Mak 16:14-18; Jon 20:19-23; Aposol 1:6-8)
36Mi tahuna koera ko kokori vata, me mai laba lenga laka ia Jisas tana levuhadira ira me kori vahai vanira de, “Na rapo ke toha koluhamu.”
37Mi ira kode ara taora mara matahu mate, rongona tana papadadira ira ara morosia chikai na tarunga. 38Me kori vahai vanira de, “?Vahai vei amu matahu vahai sahata hamu ia, me laba na toba ruka tana tobamiu? 39Kamu morosia na limagu ma na tuagu, ma kamu ni hanaa inau kalavata de. Kamu chibeliu ma kamu ni hanaa inau tutuni nomu de. Na tarunga e teha na tamania na venesina ma na sulina, vahai tu tamania nau ia.”
40Me valagu kode ia, me tihisi lenga vanira na limana ma na tuana. 41Me seisuge tara morosia ira na vivilana tatana ia, mara teha ira na padaa siki tutunina kalavata ia, ma ia Jisas e gesuara me kori vahai de, “Kamu sahagua nau siki hahani.” 42Mara sau vania chikai meni busu ni cheche mahovo, 43me tahaa ia me hania tana matadira ira.
44Kode me kori vahai vanira ia de, “Visa kode na omea te laba vaniu nau u kori vanihamu nau tahuna tu toha koluhamu nau ia. Visa na omea tara marea ira te kaleu nau tana nina keja ia Mosis mi tana nidira mamare ira na propet, mi tana linge tabu nira ba kara laba lenga kode.”
45Me maragasia ia Jisas na tobadira ira kara ni pada manasana ira na Mamare Tabu. 46Me kori vahai vanira ia de, “Na omea nira de ara mare nohaa ira, ‘Na Mesaea ba ke vajangi savi me ke mate luhi, kode ke vu mauri visu tana tolunina dani. 47Mi tana asana na Mesaea nia, hamu ba kamu kori lenga vania visa na tinoni kara tuu pililiu me ke ni kori kenihua ia God hadira seko. Ma na saurongo nia ke laba luhi i Jerusalem, kode ke vu tangi talihu laba vanira e visa na tinoni kode tana pari de.’ 48Ma kamu dia hamu ma kamu kori lengaa na omea nira de vanira visa kode na tinoni. 49Minau ba ku sau mai vanihamu na Tarunga Tabu te kori nohaa Tohagu nau ke vanihamu. Ma kamu toha hamu tana vera leho de ma kamu pitua na susuliha ke vota i heven me ke sivohamu.”
Ia Jisas e dato i heven
(Mak 16:19-20; Aposol 1:9-11)
50Mi bukena mai laka, ma ia Jisas e udungira mara basiaa na vera leho nia, mara liu dia mara chau lilihina na vera i Betani. Me sau kaea ia na limana me nongia ia God ke sangara. 51Mi tahuna te nonginongi vata ia, me tu laba ia God me taha datoa ia i heven. 52Mi ira ara kama kaea ia, kode mara visu i Jerusalem kolu na mamahela leho tana tobadira. 53Mara teha laka ira na kode dia tana Vale Tabu Leho ma kara ni livu kaea ia God.
सध्या निवडलेले:
Luk 24: mln
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2024 (active), Wycliffe Bible Translators, Inc. All rights reserved
