Mateo 7
7
Indi Dapat Kita Magpanghusgar sa Iba
(Luc 6:37-42)
1Nagpadayon it pagturo si Jesus. Hambae nana, “Ayaw magpanghusgar agod indi man kamo paghusgaran it Dyos. 2Kon mauno ro inyong paghusgar sa inyong isigkapareho hay makaruyon man ro paghusgar it Dyos kinyo. Kon sa taeaksan ron, ro taeaksan nga inyong gin-gamit sa iba hay imaw man ro gamiton it Dyos kinyo. 3Ham-an it hakita nimo ro kaisot-isot nga puling it imong isigkapareho pero indi nimo mapan-uhan ro puling nga matsa tablon it bahoe sa imo mismo nga mata? 4Paalin ka makahambae sa imong isigkapareho nga ‘Abi, bue-on ko ro kaisot-isot nga puling sa imong mata’ pero ikaw ngani mismo hay may tablon sa imo nga mata? 5Eaom nimo hay mayad ka gid-ing! Bue-a anay ro tablon sa imong mata agod makakita ka it mayad bago mo bue-on ro puling ku imong isigkapareho.
6“Ayaw ninyo pagpilitan it turo ro sagrado nga mensahi it Dyos sa mga nagapadungoe, tungod pareho ron sanda it ayam nga gapang-angkit bisan taw-an mo it manamit nga pagkaon. Ag pareho man ron sanda it mga baboy nga eusakon eang nanda ro imong ginatao nga mga perlas.”
Dapat kita Magpangayo sa Dyos ku Atong mga Kinahangean
(Luc 11:9-13)
7Naghambae pa gid si Jesus, “Magpangayo kamo permi sa Dyos ku inyong kinahangeanon ag itao nana ron kinyo. Usuya ninyo permi kon ano ro inyong kinawaea ag buligan kamo nana nga makita ron. Panuktok kamo permi sa anang pwertahan ag buksan nana ron para kinyo. 8Dahil ro tanan nga nagapangayo hay makabaton, ro tanan nga nagausoy hay makakita ag ro tanan nga nagapanagbalay hay pagabuksan. 9Anong klasing ama ro gatao it bato sa anang unga kon mangayo imaw it tinapay? 10Ukon mangayo ra unga it isda hay taw-an na't-a it sawa? 11Kon kamo nga mga maeain#7:11 Ro buot hambaeon dikara ni Jesus hay bukon eang it ratong mga tawo ro maeain kundi napatungod ra sa tanan dahil ro tanan nga tawo iya sa kalibutan hay maeain sa mata it Dyos. hay nagatao ngani it manami sa inyong mga unga, mas kapin pa gid ro inyong Ama sa eangit. Itao nana ro mayad sa nagapangayo kana. 12Ngani himua sa imong isigkapareho ro tanan nga gusto nimo nga himuon nanda kimo. Ruyon ro buot hambaeon ku tanan nga una sa Sagrado nga Kasueatan it Dyos nga ginsueat ni Moises ag ku mga propeta.”
Ro Daywang Klasi nga Aeagyan
(Luc 13:24)
13Naghambae si Jesus, “Sueod kamo sa makitid nga pwertahan bukon it sa maeapad tungod ro pwertahan pasueod sa impyerno hay maeapad ag ro daean paadto idto hay maeumo ngani abo ro nagasueod sa pwertahan ngato. 14Pero ro pwertahan paadto sa kabuhi nga owa it katapusan hay makitid ag ro daean hay malisod, ngani sangkiri ro makakita ku aeagyan paadto idto.”
Masayran Kon ro mga Manogturo ku Mensahi it Dyos hay Manogpataeang o Bukon Paagi sa Andang Buhat
(Luc 6:43-45)
15Naghambae si Jesus, “Mag-andam gid kamo sa mga nagapakuno-kuno nga mga manogturo ku mensahi it Dyos nga nagaadto kinyo. Nagapakuno-kuno sanda nga mga mabuot pareho it karnero pero mga mabangis gali pareho it mga bang-aw. 16Masayran ninyo kon ano gid sanda paagi sa andang buhat. Pareho sa kahoy nga makilaea ninyo paagi sa bunga. Aeang-aeang ma't-a nga makapu-pu ka it ubas sa kasiitan o makapu-pu ka it higera sa aroma. 17Ro manami nga kahoy hay nagabunga it manami pero ro masakiton nga kahoy hay bukon it sadyaan ro bunga. 18Indi magbunga it owa't sayod nga prutas ro manami nga kahoy ag indi man magbunga it manami ro masakiton nga kahoy. 19Ro tanan nga kahoy nga owa nagabunga it manami hay ginapukan ag ginagatong. 20Ngani makilaea ninyo kon ro manogturo ku mensahi it Dyos hay matuod o bukon paagi sa andang buhat.”
Ro mga Gahimo Eang ku Pagbuot it Dyos ro Ikatapoe sa Anang mga Sinakpan
(Luc 13:25-27)
21Naghambae si Jesus, “Bukon it tanan nga nagatawag kakon it Ginuo hay ikatapoe sa mga sinakpan it Dyos kundi rondato eang nga nagatuman ku pagbuot ku akon nga Ama sa eangit. 22Kon mag-abot eon ro adlaw it paghukom, abo ro magahambae kakon, ‘Ginuo, nagwali kami't mensahi it Dyos sa imong ngaean, bukon abi? Ro imo pa ngani nga ngaean ro among gin-gamit sa pagsuboe it mga demonyo ag sa paghimo it abo nga milagro.’ 23Pero prangkahon ko sanda, ‘Owa ko gid kamo ginkilan-a nga akong mga katawhan. Halin kamo iya, kamo nga perming nagabaliwala sa Kasuguan it Dyos!’ ”
Dapat Natong Pamatian ag Tumanon ro Ginaturo ni Jesus
(Luc 6:46-49)
24Nagpadayon si Jesus it pagturo, “Ngani tumana ninyo ro akong ginaturo ngara, ay ro tawo nga nagapamati ag nagatuman sa akon nga mga ginhambae hay pareho it maaeam nga tawo nga nagpatindog it baeay nga ro pundasyon hay nakabangot it mayad sa dalipi. 25Nag-uean dayon it mabaskog ag nagbaha ro suba ag gin-agyan it mabaskog nga sueog ro baeay ag ginhinampak it mabaskog nga hangin, pero owa rato matumba ay ro anang pundasyon hay nabangot it mayad sa dalipi. 26Pero ro tawo nga nagapamati ku akon nga mga ginaturo, ugaling owa man nagatuman kara hay matsa kaumangon nga nagpatindog it anang baeay nga owa nagkutkut it madaeom kundi ginpatindog eang nana rato sa baeas. 27Nag-uean dayon it mabaskog ag nagbaha ro suba. Gin-agyan dayon rato it mabaskog nga sueog ag ginhinampak it mabaskog nga hangin, ag natumba eagi rato ag nawasak gid.”
28Pagkatapos ni Jesus it turo ku tanan ngara hay hangawa rondatong kaabo nga mga tawo sa anang pagturo. 29Hangawa sanda tungod sigurado gid imaw ku kamatuuran nga anang ginaturo, bukon it pareho ku mga maestro it Kasuguan.#7:29 Ro mga maestro it Kasuguan abi hay nagatuead-tuead eang ku ginhambae ku mga hauna kanda nga maestro it Kasuguan.
सध्या निवडलेले:
Mateo 7: akl
ठळक
सामायिक करा
कॉपी करा
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fmr.png&w=128&q=75)
Want to have your highlights saved across all your devices? Sign up or sign in
2024 (Active) Wycliffe Bible Translators, Inc.