Matius 12
12
Ana-ana guru Yesus nopuputi wuli gando tempo eo Pentuua to Yahudi
(Mrk. 2:23-28; Luk. 6:1-5)
1Hangkani tempo, i eo Pentuua to Yahudi, Yesus hante ana-ana guru-Na noliu i bone gando. Ana-ana guru-Na nopuputi wuli gando pade laikonira apa naoro taira. 2Nampanaa lauria, bahangkua dua to Farisi nangulika Yesus, “Hilo, ana-ana guru-Mu nobabei to laipetagii tempo eo Pentuua.”
3 #
1Sam. 21:1-6
Naupawee Yesus nampahonoira, “Apa poma ibahami napa to laibabei Magau Daud ilodo? Tempo ee hia hante dohe-dohena naoro taira. 4Magau Daud nehua i rara Kemah Alatala, pade hia hante dohe-dohena nangkoni roti to laijuju hi Alatala, to kakonona moma mamala rakonira. To mamala mangkoni roti ee imam-imam aga.
5Apa poma ibahami i rara buku Taurat, ane tempo eo Pentuua, imam-imam to i rara Hou Alatala nobago motora i eo Pentuua, naupawee momara laiuli nahala? 6Ku'ulika komi, i hei naria to nelabi lako Hou Alatala. 7#Hos. 6:6 Ane ke laipahami patuju lolita Alatala to nanguli iwei, ‘To laipodota-Ku, ahi rarami hi hingka manuhiami, moma kurban to mijuju hi Aku,’ tantu ami moma komi mampahalai tauna to moma nahala. 8Apa Akumi Ana Manuhia. Aku muimi to nabaraka mampakatantu napa to mamala rababei i eo Pentuua.”
Yesus nampakauri tauna tempo eo Pentuua to Yahudi
(Mrk. 3:1-6; Luk. 6:6-11)
9Napu ee, neongkomi Yesus lako hee pade raumi i hou pepueara to Yahudi. 10I hou pepuea ee naria hadua tauna to namate hamika palena. Bahangkua dua tauna mingki mampali kahalaa Yesus. Etu pade nepekunera hi Hia, “Mamaladihawo mopakauri tauna tempo eo Pentuua?”
11Yesus nampahonoira, “Ane hadua lako hi komi naria hamaa bimbana nanawu i rara lowu tempo eo Pentuua, apa moma eo ee mui naongko'i bimbana ee mehuwu lako rara lowu? 12Bimba aga nobunu tuwuna, neparauli manuhia. Aji, mamala mobabei to nabelo tempo eo Pentuua.”
13Napu ee Yesus nangulika tauna to nadua ee, “Ulumi palemu.” Laiuluna mpuumi tauna ee palena. Lauparia naurimi palena, nahibali ewa palena to hamika.
14Napu ee nehuwuramo to Farisi ee, rau nolibu mampali dala bewa mampatehi Yesus.
Yesus batua Alatala
15Laincani-Na Yesus ane to Farisi noliwo mampatehi-'I, etu pade netibo-'Imi lako hee. Nadea tauna nantuku-'I, pade humawee to nohaki lako hi hira laipakauri-Na. 16Pade laitagi-Na mpuura bona nemo rakewora hi to ntanina nangkambelai hema-'I kakonona. 17Lauria nadupa nopaganai lolita Alatala to laiparata nabi Yesaya owi, iwei,
18 #
Yes. 42:1-4 “Hilo! Eimi batua-Ku to laipelihi-Ku,
to laipotowe-Ku pade to nampakagoe rara-Ku.
Kuwaika-'I mei Inoha-Ku,
pade Hia mei mangkarebai hi humawee tauna i dunia ane rarasaira mei bewa-'A noparenta hante kanoro-Ku.
19Hia mei moma-'I momebili pade moma-'I ngare-ngarena.
Moma-'I mei maria raepe mahombo pojarita-Na i dala-dala.
20Walo to natepalue moma'i Napakapui,
pade poindo to naora baana moma'i Napatehi#12:20 Pangengko rara ayat ei mamala rabatuani iwei: Moma Napakapui harumakaa tau-tauna to netowei, pade mabelo rara-Na hi hira to momami naria harumakaara.
duuna Nababei kanoro-Na noparenta ee mopabeta.
21Hia mei raharumakara tauna i humangkulili dunia.”
Yesus pade Beelzebul
(Mrk. 3:20-30; Luk. 11:14-23; 6:43-45)
22Napu ee, laikenirami hi Yesus hadua tauna to naburo pade nabobo habana laipehua anudaa. Yesus nampakauri'i hampena tauna ee namalami nenaa pade nojarita. 23Tau-tauna to i hee namangka purara nampahilo to laibabei Yesus, pade iulira, “Ba Hia eimidi muli Magau Daud to laitipa Alatala lako owi?”
24Naupawee, pangepera to Farisi lauria, iulirami, “Namala-'I nampopalai anudaa habana Beelzebul magau humawee heta, nampawaika-'I baraka.”
25Naupawee ncani-Na Yesus napa to laipekirira. Iulika-Nara, “Butu kamagaua to moma nahintuwu kana magaro, pade butu ngata ba to pohancou to moma nahintuwu, moma'i mantaha. 26Wee moto mui ane Magau Heta mampopalai heta-heta ntanina, hia nampaewa wotona moto. Ane iweedimi magaromi kamagauana. 27Komi nanguli Aku nampopalai anudaa hante baraka Beelzebul. Naupawee naria muira ana gurumi nampopalai anudaa. Ulika-'A, hante baraka hemara nampopalai anudaa? Apa moma hante baraka Alatala muirahawo nampopalai anudaa? Aji, to laibabeira ana gurumi motomi to nampahiloi ane peraimi etu nahala. 28Naupawee, ane Aku nampopalai anudaa hante baraka Inoha Alatala, kakonona nampakanoto ane nopamulami Alatala noparenta halaku Magau hi komi.
29Ane maria hadua tauna mehua rara hou tauna to naroho pade mingki mamparampaki gaguna, pamula-mulana to nababei, nahilu olu tauna to naroho ee pade narampakidi gaguna.
30Hema to moma nopahamika hi Aku, hia nampaewa-'A, pade hema to moma nantulungi-'A rara bago-Ku nangkeni tauna hi Alatala, hia nampakagero bago-Ku. 31Etumo, Ku'ulika komi, humawee doha pade pepopore hi manuhia namala ra'ampuni, naupawee hema to mampopore Inoha to Nagaha moma'i ra'ampuni. 32Ba hema-hema to manguli hangu hangaa mampopore Ana Manuhia, mamaladipi ra'ampuni. Naupawee ba hema-hema manguli to mampopore Inoha to Nagaha, moma'i ra'ampuni i dunia ei ba i dunia to ngkapurina mei.
33Ane hampuu kau laiulimi nabelo, nabelo mui wuana. Ane hampuu kau laiulimi nadaa, nadaa mui wuana. Apa hampuu kau laincani lako wuana. 34He, komi muli ule to narahua, bewa komi mamala manguli to nabelo bo rarami moto nadaa? Apa to laiuli i ngudu nehuwu lako rara. 35Tauna to nabelo, nanguli hangu hangaa to nabelo lako rarana to nabelo, naupawee tauna to nadaa nanguli hangu hangaa to nadaa lako rarana to nadaa. 36Ku'ulika komi, tempo eo pobotuhia mei, humawee tauna kana mangkolo pehuku habana butu baha to tabubua iulira. 37Apa, komi mei rapemakono bo rapetomahala mantuku napa to iulimi.”
Tanda Yunus
(Luk. 11:29-32)
38Tempo ee mai bahangkua dua to nataualu buku Taurat pade to Farisi nangulika Yesus, “Guru, mingki kihilo-Ko mobabei tanda to nepakahera, bona kincani ane mpuu-mpuu Alatala to nampahuro-Ko.”
39Naupawee laihonoi-Nara, “Tau-tauna to nadaa ingkura pade to moma natigu tempo ei namperapi tanda. Naupawee, moma maria tanda ntanina to Nawaikara Alatala, wuwu tanda to nadupa hi nabi Yunus owi aga to Nawaikara. 40Ewa Yunus no'oha i rara ntai bau bohe tolu eo tolu mengi, iwee moto mui Ana Manuhia kana mo'oha i rara ntana tolu eo tolu mengi.
41Tempo eo pobotuhia, to Niniwe mei matuwu nculi hingkani-ngkani hante komi to natuwu tempo ei. To Niniwe ee mei mampahalai pokaingkumi, apa nancororamo lako doha-dohara pangepera kareba to laiuli Yunus. Kakonona, i hei naria to nelabi lako Yunus.
42Tempo eo pobotuhia, magau bangkele lako tana Syeba mui mei matuwu nculi hingkani-ngkani hante komi to natuwu tempo ei. Magau bangkele ee mei mampahalai pokaingkumi, apa hia narata lako ka'awaana bona mangepe noto Magau Salomo. Kakonona i hei naria to nelabi lako Magau Salomo.”
Panculia anudaa
(Luk. 11:24-26)
43“Ane anudaa nehuwu lako hadua manuhia, hia mei rau modadao i kabangiana mampali po'ohaana. Naupawee, moma lairatana. 44Etu pade iulina, ‘Manculiki'a rau i hou to laipalahiku.’ Lauparia rau'imi pade lairatana hou ee naboo, nagaha bo nateaturu. 45Napu ee, raumi anudaa ee mai nampabawai papitu anudaa to ntanina to nelabipi kadaara lako hia pade nehuaramo i rara hou ee, no'oha i hee. Alaana, natetambaikimi kapepa iepe tauna ee mai lako to pamulana. Wee moto mui madupa hi komi to nadaa ingkumi tempo ei.”
Yesus pade ompi-ompi-Na
(Mrk. 3:31-35; Luk. 8:19-21)
46Bula Yesus nojarita hi tauna to nadea ee mai, narataramo tina-Na pade ompi-ompi-Na nokangkore i hawalikuna, mingki mampotomuka-'I. 47Lauparia, hadua tauna nangulika-'I, “Hilo, tina-Mu pade ompi-ompi-Mu hawalikuna eera ria, mingki mampotomuka-Ko.”
48Naupawee, Yesus nampahonoi tauna to noparata kareba ee, “Hema kakonona tina-Ku bo ompi-ompi-Ku?” 49Napu ee Yesus nantudo ana-ana guru-Na pade nanguli, “Eiramole tina-Ku pade ompi-ompi-Ku. 50Habana hema-hema to mampoingkuka to laipodota Tuama-Ku i huruga, hirami ompi-Ku balailo, hirami ompi-Ku bangkele pade hirami tina-Ku.”
सध्या निवडलेले:
Matius 12: MYL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
