Matius 11
11
1Nahudupi Yesus nampaboha hampulu rodua ana guru-Na, neongkomi lako hee rau mopatudu pade mangkarebai Kareba Belo i ngata-ngata ntanina po'ohaara to Yahudi.
Yesus pade Yohanes to Pediu
(Luk. 7:18-35)
2Bula Yohanes to Pediu i rara tarungku, laiepenami kareba nangkambelai napa to laibabei Kristus. Lauparia, laituduna bahangkua dua ana guruna rau nampekune Yesus iwei, 3“Ikomidi Magau to Pepakahalama to laitipa Alatala, ba to ntaninadi kipopea?”
4Nehono Yesus, “Panculimo komi pade kewoka'i Yohanes napa to laiepemi pade laihilomi. 5Tauna to naburo nenaa, to napungku nomako, to nohaki kusta nauri, to nawongo ne'epe, to namate laipakatuwu nculi, pade hi tauna to nakahiahi laikewoka Kareba Belo. 6Norahi mpuura tauna to naroho moto peparahayara hi Aku.”
7Nanculirapa ana guru Yohanes ee, nojaritami Yesus nangkambelai Yohanes hi todea, iuli-Na, “Napa to rau hilomi i tongo mpada to nabai? Rau komi nampahilo rumpu to laitawiri ngolu rau tumai? 8Aji, napa to rau hilomi? Rau komi nampahilo tauna to nampake waru to nahuli? Tauna to nampake waru to nahuli, po'ohaana i hou magau. 9Ane moma wee, napa patujumi rau? Nampahilo nabi? Ane etu, nakono hi komi. Naupawee Ku'ulika komi, neliupi Yohanes ee lako nabi. 10#Mal. 3:1Apa nangkambelai Yohanes naria laitulihi rara Buku to Nagaha, iwei,
‘Hilo, Aku nantudu huro-Ku nampoilodoka-Ko,
hia mei mopahadia dala to Mupomakoi.’
11Mpuu-mpuu Ku'ulika komi, moma hema haduaa to laiote bangkele i dunia ei neliu pobununa i tingoo Alatala lako Yohanes to Pediu. Naupawee tauna to moma nobunu gaga i rara poparentaa Alatala neliupi pobununa lako Yohanes. 12Hinungkai Yohanes to Pediu nopamula bagona duu ei mai, tauna to naheke nampaewa pade mingki mampadagi poparentaa Alatala. 13Apa buku Taurat pade humawee nabi lako owi duuna karata Yohanes, noparata peboha Alatala nangkambelai napa to kana madupa. 14#Mal. 4:5Miparahaya ba moma, kakonona to laitulihi rara Buku to Nagaha ane Elia mei marata nculi, Yohanes eemi to laipatujuna, apa hia ewa Elia. 15Hema to natalingaa, epe belo to iuli-Ku lauria.
16Kurapaika hante napa tauna to natuwu tempo ei? Hira ee mai ewa ngana to noncuna i pasar pade nangulika dohe-dohera iwei,
17‘Laitawui kami tulali hi komi bona magoe komi,
naupawee moma komi noence.
Laipoulia kami ulia kamatea bona majuu rarami,
naupawee moma komi nakeo.’
18Apa narata'i Yohanes, moma'i nangkoni ba nanginu. Tauna to natuwu tempo ei nangulika'i laipehua anudaa. 19Naupawee, Ana Manuhia narata, Hia nangkoni bo nanginu. Tauna to natuwu tempo ei nangulika-'I, ‘Hilo! Tauna ei nadea pangkoni-Na pade nadea panginu-Na. Hia nampobale to peduhu paja pade tauna to nadoha.’ Naupawee, noto Alatala laihilo lako ingku humawee tauna to nantuku-'I.”
Yesus nangkamaro tauna i bahangkua ngata to Yahudi
(Luk. 10:13-15)
20Napu ee nopamulami Yesus nangkamaro todea i ngata-ngata to momara nancoro lako dohara, bo i ngata-ngata eemi nadea laibabei-Na hangu hangaa to nepakahera. 21Yesus nanguli, “Mahilakamo komi to Khorazim! Mahilakamo komi to Betsaida! Apa ane ke i ngata Tirus pade Sidon laibabei hangu hangaa to nepakahera ewa to laibabei hi komi, naupa momara to Yahudi, bela nahaeramo nampake waru to laipake tempo kamatea halaku tanda ane nancororamo lako dohara. 22Ku'ulika komi, tempo eo pobotuhia mei, mangaapi pehuku to ratarimara to Tirus pade to Sidon lako pehuku to mitarima.
23Pade komi to Kapernaum! Iulimi komi, raongko rau i huruga komi mei? Moma! Kana rapopanau rau i Po'ohaara to Mate komi! Apa ane ke i ngata Sodom laibabei hangu hangaa to nepakahera ewa to laibabei hi komi, natantumi ngata Sodom ee mariadipi duu ei. 24Naupawee Ku'ulika komi, tempo eo pobotuhia, mangaapi pehuku to ratarimara to Sodom owi lako pehuku to mitarima.”
Pebawai Yesus
(Luk. 10:21-22)
25Tempo ee nohambayami Yesus, “Nosukuru-'A hi Iko, Tuama-Ku, Pue langi bo dunia, habana humaweena lauria laipopalerui-Mu hi tauna to nataualu bo to naria hikolara, naupawee laikewoka-Mu hi hira to moma naria hikolara. 26Apa ewa eemi to laipodota-Mu, Tuama.”
27Napu nohambaya, iuli-Na mui Yesus hi todea to naria i hee, “Hangu hangaa laiwaika-Na Aku purami Tuama-Ku. Moma hema haduaa to nangincani hema Ana Alatala, wuwu Alatala Tuama aga to nangincani. Pade moma hema haduaa nangincani Tuama, wuwu Ana Alatala aga to nangincani, pade hema-hema to Napodota Nakewoka nangkambelai hema Tuama.
28Maimo komi hi Aku humaweemi to nalenge pade to nantomo pangkolomi, bona Kuwaika komi kasanaa rara. 29Kolomi pangkolo to laipakoloi-Ku komi pade pegurumo komi hi Aku apa naolu pangkeni-Ku pade moma-'A nahombo, bona mirata kasanaa rara. 30Pangkolo to laipakoloi-Ku komi ee, naraha laikolo pade moma nantomo.”
सध्या निवडलेले:
Matius 11: MYL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
