Matius 12
12
Tomwat Farisyar rabangal ror Yesus fali Ni manglartar rkarya na ler Sanari
12:1-8
(Mrk. 2:23-28; Luk. 6:1-5)
1Na ler sa e, Yesus nor Ni manglartar rmpan ralyole let gandum. Ma lere ne nbal tomwat Yahudyar nir ler Sanari. Noak ma rmpan rof lete ne e Ni manglartar ramlafar mpa rtikar gandum ma rane.#Ul. 23:25 2Tomwat Farisyar ketnir rsalan farane, sir rfalak ber Yesus, “No mswalan Nim manglartar a ne, sir rlangas tetetkar ma Ratu nal ber Musa ne ma rkarya na ler Sanari.” 3Nempa Yesus nfalak, “Ali kmi to mbyaca na Kitap Lelerap dalam na safe ma rai Daud nose noak ma i nor ni tomwatar ramlafar e?#1Sam. 21:1-6 4Sir rti Ratu Ni befak dalam ma ral roti ma tomwatar rsompe ber Ratu ne lo ma rane. Safo nof tetetak agame e sir to bise ma rane roti ne, lan mangsompar. Boloka farane to tomwate fen lese ma nfasale sir a na ngrie ne.#Im. 24:9 5Ma kmi mifai nbal na tetetkar ma luryain e Ratu nal ber Musa ne nfalak feti, mangsompar rkarya na Ratu Ni Das Silai na ler Sanari. Sir rose farane iane feti sir rlangas tetetkar a ne lo, nempa Ratu to nfasale sir.#Bil. 28:9-10 6Yakw kfwalak ber a kmi: Ni botuan e Ratu Ni Das silai ne silai, nempa na ye tomwatar sa ma silai i a nlengan nof a ne nbal. 7Na Kitap Lelerap dalam rarengi feti: Tomwatar ma rfatutu nir lolompang ber tomwat walyetar, sir a ne ma rafsenange dalangw nlengan nof ma rloik nir snyompar ber Yakw. Mpa farlan mkyaul myal ngribatnir a ne isiny, botuan feti keta to mfyasale tomwatar ma to nir sal.#Hos. 6:6; Mat. 9:13 8Fali Yakw, Tomwate Anaky Ningw kuase ma ktwetak safe ma tomwatar bise rose nre to bise rose na ler Sanari.”
Yesus nafngamone tomwat sa ma limany balisyae namlukut na ler Sanari
12:9-14
(Mrk. 3:1-6; Luk. 6:6-11)
9Mpene Yesus nti a ntate ain a ne ma nti tomwat Yahudyar nir das sampayang. 10Na iano tomwat sa ma limany fian namlukut. Ma tomwatar ketnir rmpeang ma ranriak Yesus Ni sale, mpa renrat I, “Kit bise ma tafngamone tomwatar na ler Sanari e?” 11Nempa Yesus nfalak ber sir, “Farlan nof a kmi ye tomwatar sa ni domba nfufw far meloke dalam na ler Sanari, botuan feti keta domba nruany a ne nareke ma nfair i a nma das nre!#Luk. 14:5 12Ma tomwate ubany nlengan nof domba! Mpa farlan tose ngamone ma tulung tomwatar na ler Sanari iane to tlangas tetetkar nre!” 13Mpe Yesus nfalak ber tomwate ma limany fian namlukut a ne, “Mkwonrar limam!” Ne tomwate ne nkonrar limany, ma nangamon desar farlan limany balisyae. 14Mpe tomwat Farisyar rti a rtate das sampayang a ne, ma rabut sir ma rsayak ma rfen Yesus.
Yesus ye ma neluk Ratu Ni mangkaryae
12:15-21
15Nempa Yesus nafai tomwat Farisyar a ne nir andaun yatkar mpa I nti a ntate ain a ne. Ma tomwatar yadin rlarat I. Ne I nafngamone sir ma rafanas a ne nof nir maningkyar. 16Nempa Yesus nose nteri sir ma rasaur na I ber tomwatar walyetar. 17I nose farane nema nafdiat na safe ma nabi Yesaya nfalak na Kitap Lelerap dalam farye,
18“I ye Ningw Mangkaryae ma kfwil I lo.
I ye ma kwamis resi I ma nafsenange dalangw;
Yakw kal Ningw Smwangtany ber I, ma nafwibar ber tomwatar na saryamprene feti keta kukun sir kor malonri.
19I keta to nbangal tomwatar nre liriny mengarat sir,
ma tomwatar to rdengar liriny na srat dalmir a nbal.
20I keta nafkoran tomwatar ma ralele Ratu ror lan dalmir tubun,
iane farlan tomwate ma to nfat kalin bunge nof tenany, boloka naplai lo.
Iane feleles a nbal farlan tomwate ma to nfen damar boloka damar a ne idak marumat.
Mpa keta I nkarya dedesar terik ma Ratu ntetak tomwatar nir ngriar a ne nor malonri.
21Mpa keta nusar monuk na saryamprene ye rtikloi ma ralele I.”#Yes. 42:1-4
Yesus Ni kuase nlengan nof Beelzebul
12:22-37
(Mrk. 3:20-30; Luk. 11:14-23; 6:43-45)
22Na ler sa e, tomwatar ror tomwatar sa ber Yesus. Tomwate ne smwangat yatak nsung i nwayat ma matnir a rabol ma namomou. Mpe Yesus nafngamone i nwayat ma bise natanuk ma nakeban. 23Mpe tomwatar yadin ma ramin iane rampriang ma rfalak, “Nre kete I ye rai Daud empuny ma luryain e Ratu nyoding I a ne.” 24Nempa noak ma tomwat Farisyar rdengar farane sir rfalak, “Tomwate ye nal Beelzebul ni kuase ma natian smwangat yatkar. Beelzebul a ne smwangat yatkar nir ulun.”#Mat. 9:34; 10:25 25Nempa Yesus nafai nir andanwar mpa nfalak ber sir, “Farlan tomwatar ma ramin ain faretar sa rakes rasam sir keta ain farete ne namsos. Ma feleles a nbal farlan tomwatar ma ramin kotar sa nre das dalmir sa dedesar ma raale sir, keta to dalmir lese lo nwayat ma rakes rasam sir. 26Feleles a nbal farlan smwangat yatkar nir ulun natian smwangat yatkar sa nof nir ain farete, iane feti sir raale rbali sir. Nwayat ma keta ain farete ne namsos. 27Kmi mfyalak feti Yakw kal Beelzebul ni kuase la kutian kalin smwangat yatkar. Mpa farlan farane mir manglartar ral ise ni kuase la ratian smwangat yatkar. Ma nof safe ma mir manglartar rose ne, iane nfatutu feti safe ma mfyalak na Yakw ne sale. 28Nempa Yakw kutian smwangat yatkar kor Ratu Ni kuase. Ma iane nfatutu feti Ratu ntabw ma nfarete neluk Rai na twalelenmir lo. 29Farlan tomwatar sa nti tomwat makornar sa ni das, ma nose ma nal ni kabanir, ka i nkete baluan tomwate ne fuky, betno bise nal ni kabanir. 30Ise ma to nlarat Yakw, iane nbangal Yakw. Ma ise ma to ntulung Yakw na Ningw karyayar, iane nafyatak Ningw karyayar!”#Mrk. 9:40 31Iane nwayat ma Yakw kfwalak ber a kmi, “Ratu keta nlure tomwatar ma rarikan I ma rose sal safe-safe motak. Nempa farlan sir rarikan Ratu Smwangtany e keta I to nlure desar sir. 32Tomwate ma narikan Yakw, Tomwate Anaky keta Ratu nlure ni salar. Nempa farlan nfalak ngribatnir sa motak ma nbangal Ratu Smwangtany e keta Ratu to nlure desar i, na lere ye ma na lere ma nma ne.#Luk. 12:10
33Yesus nfalak, farlan kit tsalan katutnwar sa ma natrump e nangafel, keta bunir a rangafel. Ma farlan katutnwar sa natrump e to nangafel keta bunir to rangafel a nbal. Fali kit tafai feti katutun ma nangafel ma to nangafel a ne nof ma tsalan bunir.#Mat. 7:20; Luk. 6:44 34Hei tomwat yatkar a kmi. Kmi ye dalmir a rayatak mpa keta to bise ma mfyalak kabain ngamonar. Fali safe ma mfyalak a ne, iane nof dalmir.#Mat. 3:7; 15:18; 23:33; Luk. 3:7; 6:45 35Tomwat ngamone keta nfalak lan ngribatin ngamonar fali ndaun lan kabain ngamonar. Ma tomwat yatak keta nfalak lan ngribatin yatkar fali ndaun lan kabain yatkar. 36Mpa mdyengar fen ngamone safe ma kfwalak ye, nait ni tewat ma Ratu ntetak tomwatar nir ngriar, na lere ne keta tomwatar mpane ka rabare ngribatin yatkar monuk ma rfalak a ne na Ratu sounlury. 37Fali nof mir ngribatnir a ne keta Ratu ntetak feti I nukun a kmi nre nafdiat a kmi.”
Tomwat Farisyar rtak Yesus ma nose kabain mpasalan
12:38-42
(Luk. 11:29-32)
38Noak a ne mangaftutu Musa ni faretar ma tomwat Farisyar ketnir rfalak ber Yesus, “Tuangguru, kam mpeang ma msalan ma Ko mose kabain mpasalnar neluk faniak.”#Mat. 16:1; Mrk. 8:11; Luk. 11:16 39Nempa Yesus nfalak, “Tomwatar a kmi na are ye miyatak desar ma to mpyeang ma milele Ratu. Kmi mtyak Yakw ma kose kabain mpasalan ma neluk faniak nempa keta to kose fen lese nbal. Ma keta kmi msyalan lan kabain mpasalnar farlan na are nabi Yunus luryain a ne.#Mat. 16:4; Mrk. 8:12 40Luryain e nabi Yunus namin ian silai kampuny dalam doan lerar tel nronmar tel. Feleles a nbal farlan Yakw, Tomwate Anaky keta kumin kubur dalam, lerar tel nronmar tel.#Yun. 1:17 41Noak ma Ratu ntetak tomwatar nir ngriar keta tomwat Niniwar ma rmorip luryain a ne, ma tomwatar na are ye, raktem a rmorip a rbali. Nempa keta tomwat Niniwar rfasale tomwatar na are ye. Fali tomwat Niniwar a ne rtate nir salar, noak ma nabi Yunus nafwibar Ratu Ni ngribatnir ber sir. Ma lere ye tomwatar sa ma silai i a nlengan nof nabi Yunus namin ye, nempa kmi to mdyengar I!#Yun. 3:5 42Ma na lere ma Ratu ntetak tomwatar nir ngriar, rai bate nof trangan ma nmorip luryain a ne, ma tomwatar na are ye keta raktem a rmorip a rbali. Nempa keta rai bate ne nfasale tomwatar na are ye. Fali rai bate ne nma nof nus dodo desar ma ndengar rai Salomo ni anfai silai. Ma lere ye tomwatar sa ma silai I a nlengan nof rai Salomo namin ye, nempa kmi to mdyengar I!”#1Raj. 10:1-10; 2Taw. 9:1-12
Smwangat yatak ma nbie nof tomwatar sa bise ma nsung a nbali tomwate ne nbal
12:43-45
(Luk. 11:24-26)
43Yesus nfalak a nbal, “Farlan smwangat yatak nbie nof tomwatar sa, keta i nmpan a nlole nus mangretwar ma nanriak ain ma namin, nempa to ntungan. 44Ne i nfalak, ‘Ni ngafele e kbwali yakw far tomwate ma luryain e kswung i a ne.’ Ne smwangat yatak a ne nbali i ma nsalan tomwate ne farlan das kape ma rsoli rsere ma nanglerap ma rafyamping. 45Mpe nti burit ma ntar smwangtar itw ma rayatak a rlengan i. Sir rsung tomwate ne, mpa famudi e ni momorip ntafal ma nayatak a nlengan nof luryain a ne. Iane feleles a nbal farlan tomwat yatkar na are ye.”
Tomwatar ma rose rlarat Ratu Ni mpempeang sir a ne ma reluk Yesus Ni dasdalam
12:46-50
(Mrk. 3:31-35; Luk. 8:19-21)
46Noak ma Yesus lolone naftutu tomwat ngayadin e, Yesus enany ma wanir rma. Sir ramdir burit ma rareke ma ratanuk ror I. 47Mpe tomwatar sa nfalak ber Yesus, “Maken, anoi ma wamyar a ramin burit a no, sir rma ma rakmat Ko.” 48Nempa Yesus nfalak ber tomwate ne, “Ni botuan e Yakw enangw ma wangur a ne ber mpear?” 49Ne Yesus nfatutu Ni manglartar, betno nfalak, “Sir ye Yakw enangw ma wangur! 50Fali tomwatar ma rose rlarat Amangw ma namin surga ne Ni mpempeang, sir a ne ma reluk enangw, urangw ma waingw.”
सध्या निवडलेले:
Matius 12: YMD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
