Matius 2
2
Yale sip nimi yubu sia lenne sembe ero yalameka
1Yesus mangaro yabiog li eneko Herodes Yudea so'oag wamek nimi sembe yubu sia lenne wamog. As Betlehem Yudea mog so'oag wamog as anekoag Yesus mangaro yabiog. Yesus mangap taogpa, imberea tibogto el urop nang heng walelingkirobag siba Yerusalem yaek. 2Yaekti nimi wamek nimiag hailamsiekti, “Me wendog mangaro yabionge Yahudi nimi sembe yubu sia lenne talul me eneko tala mangaro paiamang? Eldi imberea heng walelingkirobag sip ikil ingkioba ibobori, el kipto omekanep yaap,” aro nimiag ambatto hailamsiek.
3Wene aro hailamsiekpa, yubu nene ka'ebaogti, Yudea nimi sembe yubu sia lenne Herodes poneko babe, as Yerusalem wamek nimi babe wana ophag aro lo'om seek. 4Wana ophag aro seneraglamogti, memnang Allah sembe palirop nang sikini yaboap, Musari yubu amohirop nangap Herodesti poloro wimbahiog. Poloro wimbahiogti hailamsiogti, “Kristus poneko tala siba mangaro yabinep?” aro haibahiog.
5Wene aro haibahiogpa sindina, “Allah yubu silimu tiplamog nimiri, ‘As Betlehem Yudea so'oag agha mangaro yabilul,’ aro mome toro pibog. Mangaro yabinepne nene sembe mome toro pibog nena,
6‘As Betlehem an Yehuda so'oag as wamlamne
anag agha nari nimi Israel nimi taneko saelba uhinepne lag taleri, yae paia ulamsilul.
Ane sembe Yehuda so'oag nimi sembe saelba uhirop nang nusamag wamlamne,
an ologne wamlam kom,’
aro mome toro pibog,” seek.#Mikha 5:1
7Wene aro ambarekne ka'ebaogti, Herodes ponekori imberea tibogto el urop nang taneko wangman leplap agha yopsiog. Yopsiogti hailamsiogti, “Et sum agha imberea aneko taptona lag taoba ibom?” aro haibahiog.
8Wene aro haibahiogti, “A'un as Betlehem pimundi, lelekto elapmundi, me ane iplulom. Ipmun tanena, nanag babe yubu ambatnumun andarina, nari babe omekel pinun,” aro ambatsiog.
9-10Wene aro yubu sia lenne Herodesti ambatsiogpa piek. Palamekti tilamekpa, imberea sindi heng walelingkirobag siba iamek imberea aneko wamog. Ibekti yeng maikno uahiogpa, imberea aneko nelepto palamek. Imberea aneko samen menangal palamogpa, palameka imberea me aneko paiamekag paplobol piog. 11Me aneko paiamek aeag piekti kemelamekti, me anekoap ilin Mariaap ipsiek. Ipsiekti sindi yabu sanukto u amupto pulingkina me eneko kipto omekaek. Kipto omeklamekti, sindi wali-waliaba pabieka taneko, “Tatsukap,” aro lobarekto me eneko tamag leng-leng aroba emasap, mhong song walia tamnebaap, kal wea song walingeap taneko pibek.#2:11 Kal wea song walinge aneko si mur wamog. Samenag nimiri nimi teptoba anam so'oag sikna komag, “Song mali taleag,” aro mur neneag agha nimi teptoba webekti, so'oag sikek (Yohanes 19:39). 12Pibekti piek aghana, lenda mabekne pere agha Allahri, “Herodesag samoro peheng kom,” aro wembahiog. Ane sembe ina orange toman agha sikindinge mog so'oag samoro piek.
Yesus ili ilinap Mesir so'oag pieka
13Heng walelingkirobag siba yaek nang taneko sikiningeag samoro piekpa, Yusup lenda malamogpa, nu Saelba Uhiropne arukna imagne malaikat nhon elag lag taog. Lag taogti Yusupag ambarelamogti, “Herodesti me ane, ‘Omnun,’ aro ebanual. Ane sembe sekmendi, me aneap ilinap poa merero palapmendi, Mesir pululom. Mesir pina wapmunba, nari anag yubu nen ambatkene sum yalulom,” aro ambarog. 14Wene aro ambarogpa, inipna enekoag agha babe Yusup poneko pukogti, me anekoap ilinap poa lepsiogti, Mesir poa pihiog. 15Undo uro yabiogne sembe samenag nu Saelba Uhiropne ponekori eldi yubu silimu tiptop nimiag ambarogne sunsunum uro yabiog. Mesir pina wameka aneko Herodes anam teban komag Mesir so'oag agha ua ulamek. Ane sembe Allahri yubu lebogne, “Nari Name Mesira yopsi,” seogha ane sunsunup taog.#Hosea 11:1
As Betlehem mabo opsieka
16Imberea tibogto el urop nang taneko Herodesag nen saomban koma piekpa, “Na haing kumbaneong,” aro el taogti, wanaag bobo hai aropne yonge waelbaog. Herodes wanaag yonge waelbaogpa, sindi samenag, “Sumene sum imberea aneko ibubu,” aro ambarekne el taog. Ambarekne sunsunum uro ik etpare uro yabalamogne a'ilbaogti, nimi aruklamsiogti, “Me nengabo me as Betlehema babe, kanero wamangne babe, sin mangkahionga hengkun phende tao meap, nen amik mangkahiong meap ni opsululom,” aro nimi pogsiog. 17Undo uro yabiogne samenag Allahri yubu silimu tiptopne Yeremia poneko toman ambarogne sunsunum uro yabiog. Samenag mome toro pibog nena,
18“As si Rama#2:18 As si Rama - Samenag Babel nimiri Yahudi nimi luknubahiekti, haing sae kaupto, “Nuringe so'oag pabahukap,” aro ulamsiek. Anam pabahin komag Yahudi nimi poloro wimbahiekpa, as si Rama anekoag wana ikin uro engero wamekpa, Babel so'oag pabalamsiek. anekoag pinim kolomna aropneap,
yaghe aroba engeropneap ka'ebanep.
Raheldi elmabo#2:18 Raheldi elmabo - Israel, si nhon Yakub ponekori kel nhon si Rahel o'ona senelamogti, kel eneko tobog ane sembe, Israel nimiri, “Rahel nunin nubu kel wamla,” senelamek. “Raheldi elmabo sembe engerop,” aro mome tobog tanena, Yahudi nimiri mabo tebanepba, sikinin yabo engkanepne sembe mome tobog sembanep. sembe engeropba,
nimiri, ‘El wana aingnibaukap,’ seneba babe el karong.
‘Namabo ya'ag orog taang,’ aro engkanepne mo wamla,”
aro mome toro pibog.#Yeremia 31:15
Mog so'o Mesira samoro yaeka
19Yusup poneko Mesir wamogpa, Herodes poneko tebaog. Tebaogpa nu Saelba Uhiropne arukna imagne malaikat nhon Yusupag lenda toman nen lag taog. 20Lag taogti, malaikat anekori yubu lelamogti, “Sin, ‘Me aneko obukap,’ aro ulamong nimi taneko tebaong. Ane sembe sekmendi me anekoap ilinap samoro poa Israel so'oag pululam,” aro ambarog.
21Wene aro ambarogpa, Yusup poneko pukogti, me anekoap, ilin Maria kel enekoap poa lepsiogti, Israel so'oag samoro poa yahiog. 22Israel so'oag poa yahiog aghana, Yusup ponekori ka'elamogpa, “Herodes elme Arkhelaus ili lunumna Yudea mog so'oag nimi sembe yubu sia lenne waelbao,” aro wene seeka ka'ebaog. Ka'ebaogti Yudea so'oag panne sembe logti, nen lenda nhon mabog. Lenda malamogne toman wenerop yubu ka'ebaogti, Galilea mog so'oag piog. 23Aneko piogti, so'o anekoag as nhon sina Nazaret ua ulamog. Undo uro yabiogne toman agha Allahri samenag me eneko sembe el yubu silimu tiptop nang pere agha lebekne sunup taog. Sindi samenag mome toro pibek nena, “Nimiri el sembe, ‘Nazaretne,’ aro engero yabilul,” seeka sunsunum uro, uro yabiog.
सध्या निवडलेले:
Matius 2: kklKOS
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 (Active), Wycliffe Bible Translators, Inc. All rights reserved.
