Lukas 20

Musingkoduat-duat suat so kopogboya'an ni Yisus

(Mat 21:23-27; Mrk 11:27-33)

1Ido runat, minontuduk si Yisus om nopotuturan nu Abar Owarong so lobuw suang so natad nu Waloi Maayo nu Kinoringan. Lumogaa yo sono ongo wowaidon nu imam, moomontuduk nu Ukum om wowaidon nu lobuw Yaudi ri, 2om tongaro yo nosiro si Yisus nu, “Obari kai yo ong isai so kopogboya'an Mu momogos nu lobuw mudagang so natad nu Waloi Maayo nu Kinoringan tu. Isai minonuu' so Ikau popomaal nu ono?” koo nosiro.

3Sumombuto yo si Yisus nu, “Aku nga mongoduat-a so kou. Obari muyu Aku, 4ong isai so kopogboya'an ni Yuanis Moongodiu', Kinoringan ko' riniba?” koo si Yisus.

5Muupokato yo sono nosiro nu, “Onu gaam nisambut toko, so' bang tongaron toko nu, ‘kiat so Kinoringan,’ koo toko, sombutan Niyo nu, ‘Bang soko ono, nokuro su dai kou poimaid so si Yuanis?’ koo ono. 6Nga bang tongaron toko nu, ‘kiat so riniba,’ koo toko, tantu pilayon toko nu lobuw suang tu, so' nosiro kiawi' poimaid nu si Yuanis-o po poo'abar nu Kinoringan,” koo. 7Indadi sombuti ya sono nosiro nu, “Dai mai ya oilaan ong isai so kopogboya'an ni Yuanis oono,” koo nosiro.

8Mutongaro yo sono si Yisus nu, “Bang soko ono, aku nga dai ya paabar ong isai so kopogboya'an Ku momaal nu ono,” koo.

Salig-salig suat nu kolobuwan pinosiwaan nu tonoman nu anggur

(Mat 21:33-46; Mrk 12:1-12)

9Musolig-soligo yo si Yisus montuduk nu lobuw suang-i nu, “Ido koyuwan kitonoman nu anggur. Niposiwa sono niyo tonoman oono so tinu-tinu koyuwan, om minompanou so wonuo sondiang nu panou olaid.#Yis 5:1 10Nologa' yo po poongotu'an nu bua' nu anggur, monuuo yo songapan nu tonoman oono nu ido uripon niyo mian so pinosiwaan-i mongalap nu boogian niyo ri. Nga, linubak nai' nu pinosiwaan-i uripon-i om sinuu' pouli', d'ado onu-onu owit. 11Monuuo po songapan nu tonoman-i nu uripon niyo koduo ri, nga soko iri ya nu linubak-a nosiro maid nu pinurogaman om sinuu' nai' pouli' d'ado owit. 12Monuuo po songapan nu tonoman-i nu uripon niyo kotolu ri. Uripon iiri nga linubak-a nu pinosiwaan nu tonoman-i, om sinusub polabus kiat so tonoman-i. 13Mutongaro yo sono songapan nu tonoman-i so inawo nu, ‘Onu po sono gaam itu waalon ku? Suu'on ku ido yo anak ku kusoi dai koyuu'-yuu'an ku no, kalu iyo po su orumaton nosiro,’ koo. 14Nga, nosiou-o po nu pinosiwaan-i anak nu songapan nu tonoman nu anggur-i, mutotongar-tongaro yo sono nosiro nu, ‘Iyo yo su kopusaka nu tonoman iitu. Potoyo toko iyo, su' aalap toko pusaka niyo no,’ koo. 15Indadi goyato yo sono nosiro anak oono polabus kiat so tonoman-i om potoyo yo,” koo si Yisus.

Mongoduato yo si Yisus so kolobuwan-i nu, “Kuroon sono nu songapan nu tonoman nu anggur oono ongo pinosiwaan-i? 16Tantu iyo sono su lumoga', om momatoi so nosiro om niposiwa sono niyo so lobuw sondiang,” koo si Yisus.

Norongou-o po nosiro iri, mutongaro yo nosiro nu, “Atuuk! Dai ya ong soko ono yo ukuman nu Kinoringan so kai,” koo.

17Siowi yo ni Yisus nosiro om mutongaro yo nu, “Subai ourug ono, so' ono yo su orati nu totongaron nokosurat so Buuk nu Kinoringan nu,

‘Iri watu niada' nu moomuwaloi,

oogot po nai' kosudaan

ko' kiawi' watu so waloi oono,’

koo ri.#Lgu 118:22 18Isai kootung so watu oono, orutus, om isai ootungan nu watu oono, osiliw nu awu,” koo si Yisus. 19Noilaan nu ongo moomontuduk nu Ukum om wowaidon nu imam-i nu nosiro yo su kinuan ni Yisus nu salig-salig Niyo ri, pokiookoman sono nosiro Iyo, nga lumaa' ya nosiro nu lobuw suang-i.

Musingkoduat-duat suat so mongobarai nu sukai

(Mat 22:15-22; Mrk 12:13-17)

20Pagka soko iri, minongindad-a ongo moomontuduk nu Ukum om wowaidon nu imam-i nu iya owarong kookom-okoman so si Yisus. Suapi yo sono nosiro tinu-tinu koyuwan popusingworong-worongon, om sinuu' popongoburunsut so si Yisus nu boroginis duduat, tayon ong oowit Iyo nosiro so gobonor nu Ruum mongodaawa. 21Duato yo sono si Yisus nu lobuw sinuapan iiri nu, “Oo Guru, oilaan mai nu obana ya kiawi' nituduk Mu oono. Oilaan mai ya nu dai Ko moominig, om ono-ono ya koinginan nu Kinoringan-o su nituduk Mu. 22Pagka soko ono, kowasa kai ka mongobarai nu sukai so Raja Maayo nu Ruum, ono yo Kaisar, ko' dai?” koo nosiro.

23Nga noilaan-o ni Yisus duduat nosiro iiri nu mongoburunsut-a so Iyo. Indadi, mutongaro yo Iyo nu, 24“Posiowo muyu Aku songkaping siin pirok,” koo. Posiowo yo sono Iyo nosiro nu siin. Mongoduato yo si Yisus nu, “Isai ka nokogambar so siin iitu om isai ngaran?” koo.

Sumombuto yo nosiro nu, “Gambar om ngaran nu Raja Maayo nu Ruum!” koo.

25Mutongaro yo sono si Yisus so nosiro nu, “Bang soko ono, taaki muyu yo so Raja Maayo nu Ruum onu mupatut songapan niyo, om taaki muyu yo so Kinoringan onu mupatut songapan nu Kinoringan!” koo.

26Dai ya sono noburunsutan nosiro si Yisus so tiningkuangon nu lobuw suang-i. Minodog-a nosiro noiranan nu nisambut Niyo ri.

Musingkoduat-duat suat nu koluli'an kiat so pinotoyan

(Mat 22:23-33; Mrk 12:18-27)

27Tinu-tinu lobuw Saduki linumoga' dii si Yisus. Nosiro yo po dai poimaid nu oluli'an lobuw minatoi ong wagu. Indadi, musinduat-duato yo nosiro so si Yisus nu,#P'rapan 23:8 28“Oo Guru, minonurat si Musa nu ukum iitu suat so toko nu, ‘Bang ido kusoi kisawo, om minatoi d'ado anak, subai ontunon nu sulod niyo no woinoi oono su' kisolusuk minatoi iiri,’ koo.#Pom 25:5 29Kuwai ya ono silaid turu kusoi sonsulod. Iri ongko ri kisawo yo, om minatoi iyo nu ado po anak. 30Indadi inontun sono woinoi iiri nu sulod koduo ri, 31om soko iri ya pudi kotolu ri sampai naawi' nosiro turu koyuwan nokoontun nu woinoi-i, nga insan ong ido anak om minatoi-o. 32Woinoi iiri nga minatoi-o sono. 33Indadi, bang ologa' runat pongoluli'an nu lobuw minatoi, isai sono gaam sawo nu woinoi iiri, so' kituru-turu sonsulod iiri nga nokoontun-a so iyo?” koo nosiro.

34Sumombuto yo si Yisus nu, “Kokusoyan om kowoinoyan so wonuo tu muontun, 35nga lobuw notaakan nu kowiawan so wonuo owagu om oluli'an kiat so pinotoyan, dai yo sono muontun. 36Nosiro yo po soko susuu'on nu Kinoringan, dai yo sono matoi koimbagu. Ourug nosiro nu anak nu Kinoringan so' linuli'an-o nosiro kiat so pinotoyan. 37Si Musa kondiri nopotarang nu oluli'an lobuw minatoi, so' minonurat iyo suat so sinupot kiapui, om sinupot kiapui iiri yo su Kinoringan. Om iningoranan niyo Tuhan oono nu, ‘Kinoringan uusaa'on ni Abraham, ni Isak, om ni Yakub,’ koo.#Kin 3:6 38Orati yo po nu tinangar iiri nga, Kinoringan oono uusaa'on nu lobuw miau, om okon ko uusaa'on nu lobuw minatoi-i, so' pudi ong minatoi koyuwan nu lobuw, miau-a atod niyo so surga. Indadi, kiawi' lobuw, miau-a so ponokodan nu Kinoringan,” koo si Yisus.

39Mutongaro yo sono tinu-tinu moomontuduk nu Ukum-i so si Yisus nu, “Oo Guru, owarong sobana sambut Mu oono,” koo. 40Indadi, dai yo sono kooku' lobuw Saduki ri mongoduat nu onu-onu ya so si Yisus.

Duduat suat so Raja Nijanji nu Kinoringan

(Mat 22:41-46; Mrk 12:35-37)

41Duato yo ni Yisus ongo moomontuduk nu Ukum-i nu, “Nokuro ka su tongaron nu lobuw nu, ‘Ono yo po Raja Nijanji nu Kinoringan oono, solusuk ni Raja Daud?’ koo nosiro. 42Ampa si Daud kondiri nokoputangar nu nokosurat so Buuk Lagu soko itu nu,

‘Minonuu' TUHAN Kinoringan

so Tuhan ku nu:

Ogom-o umpak so wanan Ku tu

maid so Aku mogkuasa,

43om kiawi' alod-alod Mu no

ipodoog Ku so Ikau,’

koo ri.#Lgu 110:1 44Si Daud kondiri nga monongTuhan-a nu Raja Nijanji nu Kinoringan oono, indadi opangkat po Iyo ko' si Daud,” koo si Yisus.

Mingat-ingat suat so moomontuduk nu Ukum

(Mat 23:1-36; Mrk 12:38-40)

45Tongaro yo ni Yisus mompomaid Niyo ri so tiningkuangon nu lobuw suang mongorongou so Iyo ri nu, 46“Ingat-ingat kou yo nu moomontuduk nu Ukum. Ototom nosiro manou-panou musabung nu mayat-gayat om mokiroyowon so pasar, om ototom mogom so oogoman owarong so waloi sosombooyangan om so rami-rami. 47Okalan nosiro ongo balu om solodan nu waloi. Mogdu'a nosiro nu olanggau om mokisiowon nu lobuw suang, pongolikup nu koraayan nosiro. Owogat sobana ukuman nu Kinoringan so nosiro. Owogat po ko' ukuman so lobuw wokon!” koo si Yisus.

सध्या निवडलेले:

Lukas 20: TomPWPgLgPn

ठळक

सामायिक करा

कॉपी करा