Lukas 14

Minomali' si Yisus so Runat Pongintoronan

1-2Ido Runat Pongintoronan, minian si Yisus mongokan so waloi nu ido wowaidon nu lobuw Parisi. Mobio yo sono dii si Yisus ido koyuwan pinolowon. Inatag si Yisus monoyinu nu lobuw-i nu momali' ka Iyo nu lobuw morosakit ko' dai. 3Mongoduato yo si Yisus so moomontuduk nu Ukum ni Musa om lobuw Parisi ri nu, “Kowasa ya ka momali' nu lobuw so Runat Pongintoronan?” koo.

4Dai ya sinumambut nosiro. Kuyuti yo sono ni Yisus longon nu lobuw pinolowon iiri, om polii yo Niyo om poulio yo. 5Nopupus iri, mutongaro yo si Yisus so nosiro nu, “Bang oratu anak intawa pongayam muyu so porigi nu Runat Pongintoronan, sopulan muyu ya ko' dai?” koo si Yisus.#Mat 12:11

6Dai nosiro nokosambut nu tinangar Niyo iiri.

Lobuw musimpangkat poboba'on nu Kinoringan

7Pagka nosiou ni Yisus kiawi' tombuoi-i momili' nu oogoman owarong, musolig-soligo yo sono Iyo so nosiro nu, 8“Bang soginaan kou poian so rami-rami muontun, adang-o momili' nu oogoman owarong, so' kalu monogina po iyo nu lobuw opangkat po ko' kou, 9om lobuw minonogina so ikau iiri dai lumoga' nai so ikau om mutangar nu, ‘Itu yo po inogoman mu tu, sinodia' yo suat so iyo,’ koo lobuw minonogina so ikau oono. Om moiyu'an ko sono ong kopinda ko so oogoman oraai-o. 10Nga bang soginaan ko nu lobuw, ogom-o so oogoman oraai-o. Posimaidan-a lobuw songapan nu waloi oono lumoga' nai so ikau om mutangar nu, ‘Oo lakitu, tuui ko mogom so oogoman owarong tu,’ koo. Bang soko ono, oorumat ko so tiningkuangon nu tombuoi wokon-o.#Pon 25:6-7 11Isai musimpangkat, poboba'on nu Kinoringan, om isai musimbaba', popongkaton nu Kinoringan,” koo si Yisus.#Mat 23:12; Luk 18:14

12Mutongaro po si Yisus so lobuw minonogina so Iyo ri nu, “Bang monogina ko nu lobuw nu mongokan-ngokan, okon ko kouna'an mu no ya, intawa kosusulodan mu intawa ombaloi mu ya ongo kokaya no su soginaan mu, so' sumuli' sono nosiro monogina so ikau pookan. Indadi ogonti'an-a sono nipookan-okan mu no om dai ko osuli'an nu Kinoringan. 13Nga bang monogina ko nu lobuw nu mongokan-ngokan, ono su soginaan mu lobuw omiskin om d'ado onu-onu ooyangan nisuli' so ikau pookan. Soginaa yo lobuw kakung, bolou om kimai. 14Bang soko ono waalon mu, borokatan ko nu Kinoringan, so' lobuw oono dai kosuli' nu koworongan mu no. Suli'an-a nu Kinoringan koworongan mu no iya nu pongoluli'an-o Niyo nu lobuw poimaid kiat so pinotoyan,” koo si Yisus.

Salig-salig suat so rami-rami maayo

(Mat 22:1-10)

15Mutongaro yo sono ido tombuoi nokorongou nu tinangar ni Yisus nu, “Osanang-o lobuw kourung mongokan so tiningkuangon nu Kinoringan ong mogkuasa Iyo soko raja,” koo.

16Sumombuto yo si Yisus nu salig-salig nu, “Kuwai ido koyuwan minurami-rami maayo, om minonogina nu kolobuwan. 17Nologa' yo po rami-rami oono, suuo yo niyo kouriponan niyo ri pokoilo nu lobuw nosogina yo laid nu poianon so rami-rami oono nu, ‘Tuui kou yo. Nosodia' yo kiawi',’ koo. 18Nga, ido po soido nu lobuw nosogina yo laid oono mutangar nu, dai koian so rami-rami oono. Iri togna ri minutangar so kouriponan-i nu, ‘Koowoli ku ya nu tana', om subai oimpa' ku po. Mokimaap aku ya,’ koo. 19Wokon-i mutangar nu, ‘Koowoli ku ya opulu korabau, om subai oimpa' ku po. Mokimaap aku ya,’ koo. 20Om wokon-i mutangar nu, ‘Koontun ku ya, indadi dai aku po kopanou,’ koo. 21Pagka soko iri, mulio ya kouriponan-i paabar nu iri so tuan nosiro ri. Minungot sobana tuan oono om minutangar so uripon niyo ri nu, ‘Longkaso muyu yo, ian kou yo so lalan nu bandar tu om soginaa muyu lobuw omiskin, kimai, bolou om kakung,’ koo songapan nu rami-rami oono. 22Nokouli' kouriponan-i, mutongaro yo nosiro so tuan nosiro ri nu, ‘Oo tuan, minompanou kai yo nu suu' mu ri, nga kuwai po ogoman,’ koo. 23Mutongaro po tuan oono so kouriponan niyo ri nu, ‘Ian kou yo so kokompungan om soginaa muyu kiawi' lobuw pologa'. Moingin aku nu odasok waloi ku tu. 24Pokoilo aku so kou, ado ido koyuwan nu nosogina yo laid nu pologa'on, koirasa nu kookanan ku tu,’ koo tuan oono,” koo si Yisus.

Kosonsora'an nu lobuw mongowaid

so si Yisus

(Mat 10:37-38)

25Osuang lobuw maid-waid so si Yisus. Kumowiio yo sono Iyo mutangar so nosiro nu, 26“Lobuw mokiwowaid so Aku, subai osamod po s'Aku ko' ino amo niyo, kosusulodan niyo, anak sawo niyo, om iyo kondiri. Bang okon ko soko ono, dai iyo ourug nu mompomaid Ku.#Mat 10:37 27Isai dai olila' monimban nu salib niyo, ono yo tumaan sumonsara' so' poimaid so Aku, om maid nai' so Aku, dai ourug nu mompomaid Ku.#Mat 10:38; 16:24; Mrk 8:34; Luk 9:23

28Bang mokipopomuwaloi ido lobuw, mongiro-kiro po laid iyo ong komuro siin opakai, su' oilaan niyo nu kouma' ya ka siin niyo no ko' dai. 29So' bang kolandu om dai ya oopod, oyak-oyakan sono iyo nu lobuw, 30maid nu mutangar nu, ‘Lobuw oono monimpuun-a nu waloi, nga dai ya oopod niyo,’ koo.

31Bang ido raja kisoujar opulu noribu sampuw, om mokipopongolawan nu raja wokon nu kisoujar duo nopulu ribu sampuw, mongiro-kiro po laid raja oono nu kolawan-a ka nosiro ko' dai. 32Bang okiro-kiro yo niyo nu dai kolawan nosiro, dai po kologa' raja lowanon niyo no, monuu' sono iyo nu lobuw sumamung mokimuwarong nu raja oono. 33Soko ono ya pudi kou. D'ado ido so kou kowaid so Aku, ong dai ya powiliw nu onu-onu nosongapan niyo,” koo si Yisus.

Asin opalo

(Mat 5:13; Mrk 9:50)

34Mutongaro po si Yisus nu, “Asin-o sobana ko kikosudaan, nga, bang malo yo, dai yo sono mongot koimbagu, 35om d'ado yo kosudaan pudi nibaja so tonoman. Indadi owarong ong iada' ya. Bang kitolingo kou ya, rongowo muyu yo,” koo si Yisus.

सध्या निवडलेले:

Lukas 14: TomPWPgLgPn

ठळक

सामायिक करा

कॉपी करा