Matayɔ 4

Abɨa ukanyo Yeso

(Mak 1:12-13; Luk 4:1-13)

1Mbise ngiinanɨ, 'Ʉtʉma wɔɔ Tu ngua wʉ Asʉɓɨɨ wambʉsa nʉ Yeso akʉ 'ukengu aka ekoo ngia ɓɔ Abɨa umuɓaiso amati ʉ kanyo. 2Yeso ambʉtaa idyo amati ʉ makwaa makumi ɓʉgɨna, nuɓutu nʉ 'usoti kʉtaa. Kija a꞉kɔnɔ taa.

3Kʉ ɓwanɨ, Abɨa ambufaniso nayɔ kanyo, ambumusigio ɓɔ: « Ndʉ waɓio Mwana ʉ Asʉɓɨɨ, titio‑zʉ mukopi ngika ɓɔ kʉnɨtanaka mikati. »

4Yeso ambumutisio ɓɔ: « Amati ʉ Mubio kɔɔ Tu, ɓa꞉tɨndakɨa ɓɔ: ‹ Ʉɓɨɨ nguwʉ mombi wambʉkɔmʉ tʉkʉ akʉ moni kʉ idyo. Ɨkyɛmɨngana, wa akʉ moni kʉ muɓomu ngika kakʉɓʉa amati ʉ moni kʉ Asʉɓɨɨ. › »#Popoko Tung 8:3

5Mbise ngiinanɨ, Abɨa ambʉsa nʉ Yeso amati ʉ gʉlʉ ɔɔ Tu ngia ʉ Yɛlʉsalɛma. Nani, ambumumaiso akʉ mʉa wɔɔ ikongo, ekoo ʉ ɨkáa yɨ Asʉɓɨɨ. 6Gʉ ɛyɔ nayɔ ɓɔ: « Ndʉ waɓio Mwana ʉ Asʉɓɨɨ, bʉmbʉa‑zʉ wambijo ɛsɨ. Jʉ ɓa꞉tɨndakɨa amati ʉ Mubio ɓɔ: ‹ Asʉɓɨɨ a꞊titio ɓamalaika ngiɓangɔ ɓɔ ɓʉ꞊nazio akʉ lɨkɔndɔ ngilʉndaɓʉ, ambʉ 'ʉtɨndɨ nguʉsɔɔ wɔɔdʉanakɔmʉ akʉ ikopi. › »#Popoko Mʉm 91:11-12

7Yeso ambumutisio ɓɔ: « Ɓa꞉tɨndakɨa ɓata kʉ ɓɔ: ‹ Wɔɔkanyokɔmʉ Asʉɓɨɨ Makʉasɔɔ! › »#Popoko Tung 6:16

8Mbise ngiinanɨ, Abɨa ambʉsa ɓata nayɔ ekoo ʉ ɨkpangba yɛɛ ikongo nadɨndɨ. Ambʉmʉpana ɓʉngama ngiɓa ɓʉ ɨtaka kʉ iɓomu, nʉ ɨbɨba yɛngɔ kʉtaa. 9Ambumusigio ɓɔ: « Ndʉ wagbʉkʉmɨa nʉ muwuu apɛɛ asɛmɛ nɛmɛ kubibiso, ma꞊nanzo ɛɓɔ kʉ ɓuɓomu. »

10Gʉ Yeso nayɔ ɓɔ: « Sɨtanɨ! Ʉngwa aka! Jʉ ɓa꞉tɨndakɨa ɓɔ: ‹ Bibiso tʉkʉ Asʉɓɨɨ Makʉasɔɔ, nʉ mʉkyananakɨa tʉkʉ ɛyɔ kʉ nangana. › »#Popoko Tung 6:13

11Kija Abɨa a꞉sɨa Yeso, ɓamalaika ɓambʉka nayɔ kʉkyananakɨa.

Yeso ufaniso kuu ngiangɔ anʉ Galilaya

(Mak 1:14-15; Luk 4:14-15)

12Ati ngia Yeso a꞉kɔ‑ɔɔ ɓɔ ɓʉ꞉fa Yʉanɨ ngia i꞉nye ɓatiso ɓombi akʉ boloko fanɨ, ambʉsa yangɔ anʉ Galilaya. 13Ambʉʉngwa anʉ Najalɛtɛ, ambʉsa kuwulo tiga anʉ Kapelenaumu, anambamba ʉ yapuu yɨ Galilaya akʉ gɨpa ʉ Jabʉlɔnɨ nʉ gɨpa ʉ Nafutali.#4:13 Jabʉlɔnɨ nʉ Nafutali ya muno kapɨnɨ kʉ ɓanza kumi nʉ ɓapɨnɨ ngiɓa ɓʉ Ɨsalaɛlɛ. 14Ya꞉mbʉkyananakɨa tʉkʉ ɓwanɨ, kʉkpatanakɨa nʉ moni ngika ɨgbɛ Ɨsaya a꞉sigo jɛnɛ ɓɔ:

15« Gɨpa ʉ Jabʉlɔnɨ nʉ iya wʉ Nafutali,

nʉ wagba ngua wʉ ɨngbaa ngia yaasa

akʉ yapuu yɛɛ ɨja, amondu ʉ Yɔlɔdanɨ,

Galilaya, ɨkʉmbʉ yɨ ɓombi ngiɓa

ɓambʉkɔmʉ Ɓayuda!

16Ɓombi ngiɓa ɓaakyɨa amati umomo,

ɓa꞉na wanga wɔɔ ʉja nadɨndɨ,

ekoo ʉ ɓombi ngiɓa ɓa꞉wulo nani amati ʉ ɨkʉmbʉ,

iɓa ɓa꞉fanɨa amati ʉ igyiɓi yɨ ingyo,

wanga wɔɔ ʉja wa꞉ɓwanɨa‑ɛɛ ɓwanɨaa. »#Popoko Ɨsa 9:1-2

17Kʉʉngwa tʉkʉ ati ngiinanɨ, Yeso ambufaniso ɓɨakɨa ɨsaʉ yɨ Asʉɓɨɨ ɓɔ: « Nicheni mɨtʉma ngiindɛnʉ, jʉ Ɓʉngama ngiɓa ɓa ekoo ʉ ɓisi, ɓa tiga kʉ tinene! »

Yeso ufaniso kʉchwa ɓakpataka ngiɓangɔ

(Mak 1:16-20; Luk 5:1-11)

18Ati ngia Yeso i꞉nye tiga‑ɔɔ kʉɓaa anambamba ʉ yapuu yɛɛ ɨja ngia yɨ Galilaya, ambʉna ɓombi ɓɔɔ ɓʉfɛ sipe ɓapɨnɨ: ɔɔ Simoni iya i꞉nye ino nga yɛmɔ ɓɔ Pɛtɛlɔ, nʉ manye Andelea. Ɛɓɔ ɓapɨnɨ kʉ ɓuɓomu ɓi꞉nye kuno mɨkaʉ amati yapuu yɛɛ ɨja.

19Yeso ambuɓusigio ɓɔ: « Nakpateni! Maninu kʉnitanakiso tiga ɓombi ɓɔɔ ɓʉhatɛ ɓombi, kʉndʉ iya ni꞉nye fa pongo‑ɔɔ sipe. » 20Kʉ nɨma ngiinanɨ, ɓambʉsɨa mɨkaʉ ngiindaɓʉ, ɓambufaniso nayɔ kpata.

21Iya Yeso a꞉sɨngana nʉ kɨnda nʉpɛɛ, ambʉna ɓata ɓombi nga ɓɔmɔ ɓɔɔ ɓʉfɛ sipe ɓapɨnɨ: ɔɔ Yakɔbɔ nʉ manye Yʉanɨ, ɓana ɓʉ Zɛbɛdayɔ. Ɛɓɔ ɓapɨnɨ kʉ ɓuɓomu ɓi꞉nye amati ɨngbɔɔ ɨzɔ nʉ ɔɔ ɨsɛ ʉndaɓʉ Jɛbɛdayɔ, ɓi꞉nyeni kʉtambanaka mɨkaʉ ngiindaɓʉ. Kija Yeso a꞉ɓusoko. 22Kʉ nɨma ngiinanɨ ɓambʉsɨa ɨngbɔɔ, ɓambʉsɨa ɨsɛ ʉndaɓʉ kʉ sɨaa, ɓambufaniso nayɔ kpata.

Yeso akʉpanɨa nʉ hiiso ɓombi ɓʉ ɓakwisikiso

(Luk 6:17-19)

23Kija Yeso i꞉nye tiga kʉɓaɓaka amati ʉ gɨpa ʉ Galilaya kʉ 'uɓomu. I꞉nye kumunio amati ʉ lɨkáa lʉ nɨta ngila lʉ Ɓayuda, kʉɓɨakɨa ɓombi Ɨsaʉ yɛɛ Iɗo yɨ Ɓʉngama ngiɓa ɓa ekoo ʉ ɓisi. I꞉nye naɓɔ kuhiiso mɨgbʉ yɨ ɓakwisikiso, nʉ jʉnganaka kʉ di di di.

24Uduɓa nguangɔ wambʉndanaka amati ʉ ɨkʉmbʉ yɨ Silia kʉ iɓomu. Ɓambʉka nʉ ɓombi kʉ ɓuɓomu ngiɓa ɓi꞉nye nʉ ɓakwisikiso, mɨgbʉ yɛngɔ kʉ di di di apɛɛ angɔ. Ati ʉndaɓʉ, yi꞉nye nʉ ɓombi ngiɓa ɓakwisikiso ɓi꞉nye ɓʉɓʉɓaeni tiga angu nadɨndɨ. Ɓombi ɓʉ mɨtʉma yɨ ɓabɨa, nʉ iɓa ɓʉ lapiki‑piki, nʉ ɓajakɛsɨ ɓi꞉nye kʉ ananɨ. Kija Yeso a꞉ɓuhiiso tʉkʉ kʉ ɓuɓomu ɓʉ gba. 25Kʉ ɓwanɨ, ungbutu wʉ ɓombi ɓaja nadɨndɨ wi꞉nye nayɔ tii tʉkʉ kʉkpata. Ɓi꞉nye ʉngwa akʉ gɨpa ʉ Galilaya, wʉ Dekapoli, nʉ Yudɛa, nʉ gʉlʉ ʉ Yelusalɛma, nʉ amondu ʉ ɗei ʉ Yɔlɔdanɨ.

सध्या निवडलेले:

Matayɔ 4: BudKoya

ठळक

सामायिक करा

कॉपी करा