Matyu 4
4
Satan Jesus Kisi Fiyen
(Mak 1:12, 13; Luk 4:1-13)
1Anĩ bure fele di, Awa Uur Jesus itonẽ di, gerere tuan ile, Satanem kisi fiyen. 2Ĩ kuri ibodon, naa foti bõ foti bure fele di, ĩ naũ fen. 3Kisi fiyẽya tamo Satan, ĩ bun wõ ye fen, irokenen, “Õ Negur Naal ouf are, meein enidi urõ di, bret falei fediyouf.”
4Jesus Satan aiten yalen, “Negur nẽ Itotoya bun eig ye irok, ‘Tamo bretem dogol to mata ifenẽf, sã, od ganan Negur sigor bun isif anim mata ifenẽf.’#Diuteronomi 8:3 ”
5Age fe di, Satan Jesus yale irou, fateul taun Jerusalem irou iselen, an tempel fõ soko ilun bagai inenẽ ifaren. 6Satan iron, “Õ Negur Naal ouf are, ogo ufũ urã. Ere nigin, Negur nẽ Itotoya bun eig ye irok,
“‘Negur õ nigin yogon engel ari fedi di,
idi õ imedim ololon daleyõf,
age dife di, õ yẽ meein takam to itutu ouf.’#Sam 91:11, 12 ”
7Jesus Satan aiten yale iron, “Negur nẽ Itotoya taka buneg eig ye irok, ‘Odug ogon Negur kisi fiya bun to unenẽf.’#Diuteronomi 6:16 ”
8Baban, Satan Jesus yale irou, arei odug ilun biya isel fen, teneub enei nẽ tano ganan, nedi biya fiya adok ifelnen. 9Satan iron, “Enidi ganan aya afonõf, õ wageun bobou wo, selu wabiyouf are.”
10Jesus Satan irokenen, “Satan, utorna ule! Ere nigin, Negur nẽ Itotoya bun eig ye irok, ‘Odug ogon Negur seli wabi fen, ĩ dogol aruna walouf.’#Diuteronomi 6:13 ”
11Age ye di, Satan Jesus itornẽ ile di, engel disi Jesus aruna dalen.
Jesus Biya Od Wogõya Gariya Inon
(Mak 1:14, 15; Luk 4:14, 15)
12Jesus mogo, Jon kalabus ibodon anĩ karĩ ye fen, kel Galili distrik ilen. 13Jesus Nasaret taun itor ile, Kapenaum taun ibodon, Kapenaum are Galili daliyou sirin, Sebulun Naptali ado idi neid teneub akor bun ibodon. 14Od profet Asaia eig ye wogõ yen anĩ kisi falauf nigin, agef wõ yen,
15“Sebulun nẽ teneub, Naptali nẽ teneub,
are naab maaĩwõ ileyan, Jordan naan sitakã,
Galili distrik haiden Israel sã anidi dibodok nẽ,
16tamo kayau gugum bun difaren,
idi lalan odug dilen,
tamo kayau laa teneub ado laa nẽ buri bun dibodon
idi bun lalan iran.”#Asaia 9:1, 2
17Sain anĩ bunem ilen anĩ, Jesus biya od wogõya gariya inon, “Wauĩ falei gei, ere nigin, saa tano mogo melsak.”
Jesus In Dõ Fiya Tar Uyulil Iweignẽdin
(Mak 1:16-20; Luk 5:1-11)
18Jesus Galili daliyou yeri iyok isil fen, mala iran uru tura ado iledin, Simon yana taka Pita, yogon tura Endru ado. Idi maaĩ daliyoun kakãg diran, ere nigin, idi gau yaleya tamo. 19Jesus iron, “Usig, aya dõ wiyag len, aya ã tamo gei fiya tamo aneneĩf.” 20Kaisã bagai, idi neid kakãg folõ difel fen, Jesus dõ difen.
21Anenem iyok ile fen, Jesus baban mala iran uru tura ado iledin, Jems Sebedi ne naal, yogon tura Jon ado. Idi waag bun nedi temeid Sebedi geid kakãg madur difedif dibodon. Jesus disiyouf nigin iweignẽdin. 22Kaisã bagai, temeid waag ado ditor ken, Jesus dõ difen.
Jesus Dagi Adodo El Fedin
(Luk 6:17-19)
23Jesus Galili distrik akor anĩ adok iyo ken, Juda neid uub fõ bun od ifelneĩd, saa tano ne biya od anĩ wogõ fedin, agef fen, tamo kayau atun dagi fire fire ado ilõyabidiya adok el fedin. 24Ĩ nigin od anĩ, Siria teneub ganan bun iyokelen, age fe di, tamo kayau idi, dagi taka taka adodo anidi ganan Jesus wagen guri difeid, disin, idi darau odug biya adodo, idi kaa sesen adodo, idi mir adodo, idi bouweid ilolaisidiya anĩ, Jesus el fedin. 25Guru fiya odug, Galili temeleid, Dekapolis#4:25 Anĩ nẽ gariya, Ten Taun. temeleid, Jerusalem temeleid, Judia teneub ado Jordan naan sitakã teneub akor anĩ ganan tamo kayau Jesus dõ difen.
सध्या निवडलेले:
Matyu 4: dad
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc. All rights reserved.
