Génesis 2
2
1Suꞌva ni̱nu súkún jín ñɨ̱vɨ́, jín nɨꞌɨ ya̱ íyó nu̱u̱nꞌ‑u vá. 2Sáá nkenta ki̱vɨ̱ꞌ uxáꞌ, ya̱ nsi̱jínu Ndiosíꞌ tiñu ya̱ nsa̱ꞌá re̱ꞌ, jee ntu̱náꞌ nsáꞌá re̱ꞌ ka̱ꞌ ki̱vɨ̱ꞌ yukuán chi nna̱jia̱ví re̱ꞌ. 3Saájee nsa̱ꞌá Ndiosíꞌ ya̱ ki̱vɨ̱ꞌ uxáꞌ kuvi ya̱ váꞌa nu̱u̱nꞌ rá ñɨvɨ jee nsa̱ꞌá sɨ́ɨ́n re̱ꞌ maa kuvi‑i ki̱vɨ̱ꞌ ííꞌ, chi ki̱vɨ̱ꞌ vá nna̱jia̱ví re̱ꞌ, ntu̱náꞌ nsáꞌá re̱ꞌ ka̱ꞌ tiñu nsa̱ꞌá re̱ꞌ sáá nsi̱kɨ́koo re̱ꞌ nɨꞌɨ. 4Tu̱ꞌun yaꞌá ví ya̱ nkaꞌanꞌ jie̱ꞌe̱ꞌ súkún jín ñɨ̱vɨ́ sáá nkenta ña̱ko̱o ráa sáá nsa̱ꞌá Ndiosíꞌ maa.
Adán jín Eva
Sáá nsa̱ꞌá I̱toꞌoꞌ‑ó Ndiosíꞌ ñɨ̱vɨ́ jín súkún, 5jee ntiáꞌan koo ku̱ꞌu̱ꞌ #2:5 Áxí kachiꞌ‑ó: tataꞌ sáꞌá. nu̱u̱nꞌ ñu̱ꞌún jee ntiáꞌan taꞌviꞌ ya̱va̱ꞌ líꞌí, chi I̱toꞌoꞌ‑ó Ndiosíꞌ ntiáꞌan sikúun re̱ꞌ sa̱vi̱ꞌ nu̱u̱nꞌ ñu̱ꞌún, ni ntiáꞌan koo ni ɨɨn ya̱ satíñú maa. 6Soo kéne nute #2:6 Áxí káchíꞌ‑ó: néne yo̱ko̱ꞌ nute. nu̱u̱nꞌ ñu̱ꞌún, jee jiéténuun‑u nɨꞌɨ nu̱u̱nꞌ ñu̱ꞌún. 7Saájee jín ti̱ka̱cha̱a̱ꞌ ñuꞌun nsa̱ꞌá I̱toꞌoꞌ‑ó Ndiosíꞌ ɨɨn ñɨvɨ. Jee ntivɨꞌ ta̱chi̱ꞌ re̱ꞌ i̱xti̱nꞌ ñɨvɨ vá jín yo̱ko̱yuꞌú re̱ꞌ ya̱ stekúꞌ‑u ñɨvɨ vá, jee nkenta kúvi ñɨvɨ vá ɨɨn ya̱ tékúꞌ.
8Jee nu̱u̱nꞌ ñu̱ꞌún naní Edén ntee I̱toꞌoꞌ‑ó Ndiosíꞌ ɨɨn nu̱u̱nꞌ viiꞌ víꞌí íyó nsa̱ꞌá re̱ꞌ. Káá Edén ichi kénta nka̱niiꞌ jee yukuán ña̱na̱ka re̱ꞌ ñɨvɨ nsa̱ꞌá re̱ꞌ. 9Jee I̱toꞌoꞌ‑ó Ndiosíꞌ nxta̱ꞌvíꞌ nu̱u̱nꞌ ñu̱ꞌún nɨꞌɨ nu̱u̱nꞌ yutun ya̱ viiꞌ túvi, jín ya̱ jiáꞌa ya̱ váꞌa kajiꞌ. Suni ma̱ꞌñú ñuꞌun vá nu̱u̱nꞌ viiꞌ víꞌí íyó ñani re̱ꞌ ɨɨn yutun ya̱ sáꞌá‑a ya̱ kutekuꞌ ñɨvɨ nɨ́ɨ́nkání. Jee ñani re̱ꞌ yukuán ɨɨn yutun ya̱ sáꞌá‑a ya̱ kuniꞌ ñɨvɨ ya̱ váꞌa jín ya̱ niváꞌa. 10Jee nu̱u̱nꞌ Edén kéne ɨɨn nute káꞌnú ya̱ jiéténuun‑u nute nu̱u̱nꞌ ñu̱ꞌún nu̱u̱nꞌ viiꞌ víꞌí íyó ya̱ nsa̱ꞌá Ndiosíꞌ. Jee jiáꞌa‑a yukuán nátasáva‑a ku̱mi̱ꞌ nute káꞌnú. 11Súví ɨɨn rá naꞌá nute káꞌnú yaꞌá nkuvi Pisón. Nute káꞌnú yaꞌá ví ya̱ chúꞌun ku̱té‑e #2:11 Áxí kachiꞌ‑ó: jíkónúun‑u nu̱u̱nꞌ nɨꞌɨ ñuꞌun ñuunꞌ. nɨꞌɨ ñuꞌun ñuunꞌ naní Havila, nu̱u̱nꞌ íyó ka̱a kuáán yɨ́yáꞌvi víꞌí naní oro. 12Jee oro va̱ꞌa kúvi ya̱ kéne ñuunꞌ yukuán. Suni yukuán íyó su̱jie xikoꞌ jiávi̱xi̱ꞌ yɨ́yáꞌvi naní bedelio. Jee suni íyó yu̱u̱ꞌ xiñúꞌ yɨ́yáꞌvi naní ónice. 13Súví naꞌá uvíꞌ nute káꞌnú yaꞌá nkuvi Gihón. Nute káꞌnú yaꞌá ví ya̱ chúꞌun ku̱té‑e nɨꞌɨ ñuunꞌ naní Cus. 14Jee súví naꞌá uníꞌ nute káꞌnú yaꞌá ví Tigris. #2:14 Tu̱ꞌun hebreo káchíꞌ: Hidekel. Nute káꞌnú yaꞌá ví ya̱ jiáꞌa ichi kénta nka̱niiꞌ ñuunꞌ Asiria. Jee nute káꞌnú kúmíꞌ ví Éufrates.
15Jee I̱toꞌoꞌ‑ó Ndiosíꞌ ña̱na̱ka re̱ꞌ ñɨvɨ vá nu̱u̱nꞌ ñu̱ꞌún nu̱u̱nꞌ viiꞌ víꞌí íyó ya̱ káá nu̱u̱nꞌ ñu̱ꞌún naní Edén, sáva satíñú‑u nu̱u̱nꞌ ñu̱ꞌún vá jee kumí‑i vá. 16Jee nta̱túníꞌ I̱toꞌoꞌ‑ó Ndiosíꞌ nu̱u̱nꞌ ñɨvɨ vá jee nkachiꞌ re̱ꞌ:
“Kuvi kajiꞌ nú rá vixíꞌ ntáká rá yutun nu̱u̱nꞌ ñu̱ꞌún. 17Soo koto yájíꞌ nú ya̱ vixíꞌ yutun ya̱ sáꞌá‑a ya̱ kuniꞌ ñɨvɨ ya̱ váꞌa jín ya̱ niváꞌa. Sáá kajiꞌ nú maa jee máá naáꞌ nijia ya̱ kuviꞌ nú”, nkachiꞌ re̱ꞌ nu̱u̱nꞌ ñɨvɨ vá.
18Jee nkachiꞌ I̱toꞌoꞌ‑ó Ndiosíꞌ: “Ntu váꞌa ya̱ kuneeꞌ métúꞌún ñɨvɨ. Saꞌá ni̱ꞌ ɨɨn ya̱ nuún íyó jín‑i ya̱ chineí táꞌán jín‑i.”
19Saájee ya ña̱tíñú I̱toꞌoꞌ‑ó Ndiosíꞌ ñuꞌun nsa̱ꞌá re̱ꞌ nta̱ká rá kitɨ íyó nu̱u̱nꞌ ñu̱ꞌún, jín rá kitɨ íyó chi̱yo̱ꞌ jíkó súkún. Jee ña̱na̱ka re̱ꞌ rátíꞌ nu̱u̱nꞌ ñɨvɨ vá, sáva kuniꞌ re̱ꞌ na̱sa sikúnání‑i súví rátíꞌ. Jee rá súví nsi̱kúnání ñɨvɨ vá rá kitɨ tékúꞌ, yukuán kúvi súví rátíꞌ. 20Jee nsi̱kúnání ñɨvɨ vá súví ntáká rá sa̱na̱ꞌ jín rá kitɨ chúchíyoꞌ íyó súkún jín nta̱ká rá kitɨ yúkú. Soo ntu nániꞌinꞌ ñɨvɨ vá ɨɨn ya̱ nuún íyó jín‑i ya̱ chineí maa. 21Jee I̱toꞌoꞌ‑ó Ndiosíꞌ nsi̱kúsúꞌ naanꞌ re̱ꞌ ñɨvɨ vá. Jee ni kíxíꞌ ñɨvɨ vá ntavaꞌ re̱ꞌ ɨɨn yɨkɨ íkáꞌ‑a. Jee nxi̱nákóko re̱ꞌ i̱ka̱ꞌ‑a. 22Jee jín yɨkɨ íkáꞌ ya̱ ntavaꞌ I̱toꞌoꞌ‑ó Ndiosíꞌ i̱ka̱ꞌ ñɨvɨ vá jee nsa̱ꞌá re̱ꞌ ɨɨn ñaꞌan, jee ña̱na̱ka re̱ꞌ ña nu̱u̱nꞌ ñɨvɨ vá. 23Jee nkachiꞌ ñɨvɨ vá:
Vitan jee yaꞌá ví yɨkɨ va̱ji yɨkɨ ni̱ꞌ,
jín ku̱ñu ya̱ kúvi ku̱ñu ni̱ꞌ.
Kuna̱ní ña ñaꞌan chi ntavaꞌ Ndiosíꞌ ña yɨkɨ íkáꞌ te̱e. #2:23 Tu̱ꞌun hebreo yaꞌá ya̱ kúníꞌ káchíꞌ ñaꞌan kúvi: ixa. Jee te̱e kúvi: ix.
24Saáva xinóo te̱e tátáꞌ re̱ꞌ jín nánáꞌ re̱ꞌ jee kutayú re̱ꞌ jín ñasɨ́ꞌɨ́ re̱ꞌ, jee ɨɨn ni kuvi núvíꞌ ráa kuéntáꞌ íyó ɨɨn yɨkɨkúñu ni. 25Jee íyó ñɨɨ́n ni núvíꞌ ráa, te̱e vá jín ñasɨ́ꞌɨ́ re̱ꞌ, jee ntu kúkanuun ráa.
सध्या निवडलेले:
Génesis 2: meh
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2022, Wycliffe Bible Translators, Inc. All rights reserved.