Naiˍ htangˍ 4
4
Peˍtruˆ nae Yoˉhanˍ yaˉ yetˍ na naˉ jiˉ
1Peˍtruˆ nae Yoˉhanˍ yaˉ yetˍ changˉ ang byaˍ uiˍ na ang buinˉ tangˍ maˍ biˍ yao ca beu, yit pa rawˉ hek uiˉ nae ang buinˉ paˉ kyaˉ cawngˉ ang huiˍ na hawˍ naeˍ uiˉ luk suikˆ yinˍ cangˉ nae Saˍduˆkaeˉ uiˉ yaˉ yetˍ kawngˉ laˉ jiˉ. 2Yaˉ yetˍ changˉ ang byaˍ uiˍ na seungˍ maˍ yao ca beu, siˉ jiˉ uiˉ changˉ na Yeˍsuˆ piˉ teˍ laˉ laeˍ naeˍ lawng maˍ yao, yawng nuing ba hpiˉ hawngˉ jiˉ. 3Hingˉ pa nae, naiˍ htangˍ uiˍ na chu yao, muˍ hkiˍ vuingˉ ngangˉ luiˍ yao, saw hta beu tiˍ hkeu htawngˉ hkaoˉ veu lawngˉ nga jiˉ. 4Ang buinˉ tangˍ na ya kyaˍ jiˍ uiˉ changˉ ang byaˍ yumˉ saˉ laˉ jiˉ. Yumˉ saˉ naeˉ uiˉ changˉ kaˍ hpaˍ yaˍ aeˍ aeˍ ngaˍ hingˍ hu laˉ mawk ca laˉ jiˉ. 5Na seuˇ laˉ mae hkeu yao, Yuˉdaˆ changˉ ceuˉ beu awn hoˉ uiˉ nae ang huiˍ ang kaeˍ uiˍ, Camˉ lik ang hkiˍ saˍ laˉ uiˉ aˍ Yeˍruˆsaˍlaemˍ vengˍ veu cu hko lui lang jiˉ. 6Yit pa rawˉ hek ang kaeˍ Aˍnaˆ nae Kaˍyaˍhpaˆ, Yoˉhanˍ nae Aˍleˍsaˍduˆ, nae yit pa rawˉ hek ang kaeˍ beu ang ceuˉ ang cat uiˉ hkaˉ hko laˉ hko uiˉ muiˉ yawng kawngˉ htuˍ yaˍ laˉ mae hpawm lang ga jiˉ. 7Yawng tawngˍ naˍ veu naiˍ htangˍ yaˉ yetˍ na piˉ cung nga yao, Nawng ngaˍ ba ceuˉ tanˉ hkoˇ aˍ sangˍ beu ang maengˉ veu nae ningˉ kanˉ ningˉ na ha yaeˇ nae naˉ htamˉ jiˉ. 8Haeˉ mae beu, Peˍtruˆ nawˍ Ang hkawˍ laˉ ang seungˍ sangˉ yang kawngˉ htiˍ puing nae ca yao ha biˍ jiˍ yang, Iˉsaˍreˍlaˆ beu ang suingˉ nae awn hoˉ yaˍ mangˍ htiˍ baˍ yawng veuˉ, 9laˍ hkuiˍ ang siˉ htiˍ hu mangˉ na ang maenˍ ha biˍ yao, yang na aˉ mae taeng pyo biˍ yaeˉ nae uiˉ awˍ lawng miˉ nuing gaˉ yetˍ na naˉ laˍ baoˉ vaˍ, 10nawng hkaˉ hko laˉ hko nae Iˉsaˍreˍlaˆ changˉ uiˉ hkaˉ hko laˉ hko ningˉ na bae bu. Nawng laˍ kang htaˍ veu htaˍ siˍ yao siˉ kyaˉ veu piˉ teˍ laˉ laeˍ jiˍ Hpaˍcaoˍ mangˉ Naˍzaˍraet changˉ Yeˍsuˆ Hkritˆ beu ang maengˉ pa nae, changˉ ningˉ uiˉ hpa yat pyo laˉ yao, nawng tawngˍ naˍ veu cung yao ca ngaeˉ yaˇ. 11Yeˍsuˆ ningˉ maˇ yumˉ kawˉ naeˉ uiˉ changˉ paek taw jiˉ law ba hpeuˍ yao muiˉ, hao htaˍ che nae a yeˇ huiˍ nae uiˉ law ba hpeuˍ laˉ naeˉ. 12Nuingˉ chaˍ htaˍ nawtˆ Ang suingˉ hiˉ mangˉ beu ang maengˉ hingˉ caeˉ laˉ laeˍ yao gu na htaiˍ awkˍ taw naeˉ uiˉ htiˍ hu nae muiˉ baˍ ca nae yawng na ha biˍ jiˍ. 13Yawng ngaˍ Peˍtruˆ nae Yoˉhanˍ yaˉ yetˍ nuing ba hatˆ jiˉ hingˉ na myangˉ yao, pingˍ nyaˍ baˍ hkiˍ ang laiˍ baˍ henˍ myang nae uiˉ changˉ nae bae yao manˍ hko jiˉ. Yaˉ yetˍ Yeˍsuˆ kawngˉ ca saˍ myang jiˉ na yawng ya bae jiˉ. 14Hta yao muiˉ, hpa yat pyo laˉ laeˍ jiˍ mangˉ ngaˍ naiˍ htangˍ uiˍ kawngˉ htuˍ yaˍ laˉ mae cung yao ca naeˉ na myangˉ yao, yawng ngaˍ aˉ mae yao muiˉ baˍ hteng laeˍ hkiˍ. 15Haeˉ mae yao, naiˍ htangˍ uiˍ na tiˍ hkaoˍ hpawm lang kyaˉ veu ca yao piˉ awkˍ taw aengˉ yao, yawng tawˉ yawng ningˉ mae sing lang cat lang jiˉ. 16Changˉ nyiˍ hu yaˉ yetˍ na aˉ mae ha naeˇ. Yawng pa nae yao, manˍ kyaˍ naˍ mek laetˆ hkaˍ naˍ htiˍ lumˍ taw laˉ jiˉ na Yeˍruˆsaˍlaemˍ vengˍ changˉ uiˉ muiˉ myangˉ hko byaˇ. Gu hteng laeˍ yao muiˉ baˍ kaˍ taw laˇ nae sing lang ga jiˉ. 17Hta yao muiˉ, changˉ uiˉ hkaoˉ veu awˍ lawng ningˉ ya caeˉ nae baˍ ya pya aengˉ naeˉ uiˉ saˍ laiˍ, yaˉ yetˍ nyiˍ hu na Yeˍsuˆ ang maengˉ veu cuˉ yao htiˍ cangˍ aˍ sangˍ na muiˉ ang buinˉ tangˍ baˍ maˍ laeˍ biˍ jo nae saˍ tiˍ piˍ seu nae sing lang ga jiˉ. 18Hingˉ nawngˍ veu, naiˍ htangˍ uiˍ na haoˉ awngˉ nga langˉ laeˍ yao, Ang suingˉ Yeˍsuˆ beu ang maengˉ na cuˉ yao htiˍ cangˍ seungˍ maˍ naeˍ uiˉ laˍ laˍ baˍ ha laeˍ jo nae aˉ mingˍ piˍ jiˍ. 19Hta yao muiˉ, Peˍtruˆ nae Yoˉhanˍ yaˉ yetˍ aˍ, Gu aˍ Ang suingˉ Hpaˍcaoˍ beu ciˍ tangˍ hingˍ na naˉ ceuˉ laˍ. Baˍ baoˇ, nawng beu ciˍ tangˍ hingˍ na naˉ ceuˉ laˍ. Ang suingˉ Hpaˍcaoˍ tawngˍ naˍ veu aˍ sangˍ beu ciˍ tangˍ hingˍ na naˉ ceuˉ nae, nawng muiˉ ciˍ chae laˍ hu. 20Gaˉ yetˍ aˍ myangˉ jiˉ bae jiˉ kanˉ uiˉ na baˍ maˍ baˍ upˍ nae baˍ ca taw nae tawpˍ laeˍ jiˍ. 21Haeˉ mae yao, yawng ngaˍ Peˍtruˆ nae Yoˉhanˍ yaˉ yetˍ na htiˍ cangˍ haengˍ nae saˍ tiˍ piˍ laeˍ yao awkˍ taw aengˉ jiˉ. Changˉ ang byaˍ uiˍ hpeuˍ laˉ jiˉ kanˉ hingˉ veu tanˉ hkoˉ hingˉ na chiˍ mawng yao hpawm lang kyaˉ veu, changˉ ang huiˍ kaeˍ uiˍ naiˍ htangˍ uiˍ na htiˍ ceuˍ nae muiˉ baˍ hkanˍ baˍ chuiˍ yaˍ. 22Manˍ kyaˍ naˍ mek laek hkaˍ naˍ pa nae hpa yat pyo jiˉ mangˉ beu a sak yangˍ hanˍ cheˍ piˍ canˉ laˉ mawk hkeu jiˉ.
Nuing ba hatˆ laˉ naeˉ uiˉ saˍ laiˍ Hkritˆ yanˍ uiˍ ang buinˉ paˉ jiˉ
23Peˍtruˆ nae Yoˉhanˍ yaˉ yetˍ na poiˉ awkˍ luiˍ laeˍ yao, yawng yaˍ changˍ uiˉ kawngˉ aeˉ laeˍ yao, yit pa rawˉ hek ang huiˍ uiˍ nae changˉ ceuˉ uiˉ beu ang kaeˍ uiˍ hkai lang jiˉ na kyaˍ jiˍ uiˉ na upˍ kyaˍ laeˍ biˍ jiˍ. 24Hingˉ awˍ lawng na yaˍ kyaˍ beu yawng ngaˍ htuˍ yaˍ laˉ mae ang buinˉ paˉ jiˉ. Kaˉ hko laˉ hko htaˍ veu huiˍ mawng naeˉ Ang suingˉ mangˉ naˇ buingˍ htaˍ nuingˉ chaˍ nae chaˍ maeˍ langˍ ba nae hingˉ keung veu hkaˉ ca naeˉ uiˉ na peungˍ cawngˉ jiˉ Ang suingˉ mangˉ yaˇ. 25Naˇ Ang hkawˍ laˉ ang seungˍ sangˉ na cuˉ yao, nang beu yaˍ cenˍ gu beu a vangˉ Daˍvet beu miˍ tu veu ningˉ mae ciˍ jiˍ.
Ba ceuˉ ha yao Changˉ ceuˉ htiˍ baˍ uiˍ nuing ba inˍ chuiˍ chuiˉ laˍ naeˇ. Ba ceuˉ ha yao changˉ ang byaˍ uiˍ ang buinˉ baˍ ca nae uiˉ na kuitˆ yao vaˍ naeˇ. 26Lawˉ kiˍ beu ang suingˉ uiˉ aˍ Hpaˍcaoˍ na hteng caeˉ naeˉ nae haenˍ hangˉ jiˉ. Ang suingˉ poiˉ luiˍ jiˍ Meˍsiˆyaˆ mangˉ na muiˉ hteng yao paek taw naeˉ nae chawnˉ hko lang byaˇ nae Daˍvet ha biˍ jiˍ.
27Nang cheˉ yuˉ jiˉ nang beu yaˍ cenˍ ang seungˍ sangˉ Yeˍsuˆ na haenˉ lang naeˉ uiˉ saˍ laiˍ, ang suingˉ Heˍrot nae ang suingˉ Poˍtiˆ Piˉlatˆ, Changˉ ceuˉ htiˍ baˍ uiˍ nae, Iˉsaˍreˍlaˆ changˉ ceuˉ uiˉ ta ta, vengˍ ningˍ hkaoˉ veu maˉ manˉ hpawm lang yao ca jiˉ. 28Hkaw taeˉ beu nae nang beu aˍ loˍ hkaoˍ veu kuitˆ chae yao, ningˉ mae hkaˉ hko laˉ hko hpeuˍ laˉ biˍ naeˍ nae uiˉ kanˉ na hpya kangˍ naeˍ uiˉ saˍ laiˍ yawng ningˉ mae hpawm lang jiˉ yaˇ. 29Ang suingˉ Hpaˍcaoˍ veuˉ, ya muiˉ yawng hkanˍ yaˍ laˍ naeˍ hingˉ na hu myangˉ luiˍ lao, nang beu yaˍ cenˍ uiˍ na ang buinˉ tangˍ hingˍ nuing ba hatˆ naeˉ hkaoˉ veu maˍ taw naeˉ uiˉ aˉ hkvangˍ piˍ lao. 30Changˉ uiˉ beu hpa yat uiˉ pyo hkiˍ naeˍ uiˉ saˍ laiˍ Ang suingˉ nang beu laˍ puˍ hingˍ kang nga lao, Ang suingˉ mangˉ beu yaˍ cenˍ ang seungˍ sangˉ Yeˍsuˆ ang maengˉ hkaoˉ veu naˍ mek laek hkaˍ naˍ manˍ kyaˍ uiˍ piˉ myangˉ lao nae yawng ang buinˉ paˉ jiˉ. 31Haeˉ mae ang buinˉ paˉ peunˉ yao, yawng cu lang kyaˉ hingˉ uin an laˉ jiˉ. Yawng ngaˍ Ang hkawˍ laˉ ang seungˍ sangˉ nae puing kawˉ yao Hpaˍcaoˍ beu ang buinˉ tangˍ na nuing ba hatˆ hatˆ nae maˍ jiˍ.
Ang keungˍ hkaˉ ca naeˉ uiˉ na htuˍ yaˍ laˉ mae caiˍ yaˍ jiˍ
32Yumˉ naeˉ saˉ naeˉ uiˉ yawng ngaˍ nuing ba htiˍ suiˍ laˍ mae chiˉ yao, aˍ sangˍ na baˍ upˍ hkaˍ tawng beu ang keungˍ uiˍ na ga keungˍ nae baˍ ciˍ. Ang keungˍ kawˉ uiˉ hkaˉ hko laˉ hko uiˉ aˍ tuing naiˍ beu ang keungˍ hpeuˍ byaˇ nae chiˉ jiˉ. 33Naiˍ htangˍ uiˍ Ang suingˉ Yeˍsuˆ teˍ laˉ laeˍ jiˍ awˍ lawng hingˉ na tanˉ hkoˉ huiˍ sutˆ nae sak seˍ hkamˉ jiˉ. Ang suingˉ Hpaˍcaoˍ nawˍ yawng htaˍ veu ang buinˉ lap sawngˍ ang byaˍ piˍ luiˍ jiˍ. 34Yawng hkaoˉ veu changˉ ang saˍ baeˍ htiˍ hu nae muiˉ baˍ ca. Yawng ngaˍ naˍ uiˍ, yumˉ uiˉ ca naeˉ changˉ uiˉ aˍ yawng beu ang keungˍ kawˉ uiˉ na kawngˍ kaˍ yao ya jiˉ hpuˉ hingˉ uiˉ na hanˉ na langˉ yao, 35naiˍ htangˍ uiˍ na piˍ laˉ jiˉ. Hingˉ nawngˍ veu naiˍ htangˍ uiˉ aˍ changˉ uiˉ saˍ baeˍ naeˍ hingˉ na hu yao peungˍ biˍ jiˍ.
36Haeˉ mae beu, Kuˇpaˉruˆ cunˉ veu keutˆ yaˍ lui jiˉ Leˍviˆ changˉ, Yoˉsaep nae maengˉ jiˉ uiˉ changˉ htiˍ hu ang ca. Naiˍ htangˍ uiˍ yang na ang maengˉ ang suiˍ Baˍnaˍbaˆ nae maengˉ biˍ jiˍ. Baˍnaˍbaˆ nae maengˉ jiˉ a tekˆ paeˍ hingˉ ngaˍ, kaˍ piˍ naeˍ mangˉ nae haoˉ naeˉ ha siˉ naeˉ yaˇ. 37Yaˇ yang beu naˍ hingˍ na kawngˍ ngaˍ yao hpuˉ hingˉ hanˉ na langˉ yao naiˍ htangˍ uiˍ na piˍ laˉ jiˉ.
सध्या निवडलेले:
Naiˍ htangˍ 4: pyy
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2022, Wycliffe Bible Translators, Inc. All rights reserved.
