लुका 23
23
येसु पिलातस्ओ अ़बुदा अ़खात्ताओ
मत्ति २७:१-२,११-१४; मर्कुस १५:१-५; युहन्ना १८:२८-३८
1खोन्किना मोचि झारा म़पुवालोन्ता, खोन्कि रोमि हाङ्काचि कामु पिलातस्एदा येसु अ़खात्ता। 2मोचिआ खोक्को ओवात्नि ह़त्मा अ़पुक्ता: “ओ म़नाआ ना आन्काओ रावाचि थेम्माखान्मा मुङुचिओ आन्कान्का धिरुम्का। तोक्पोहाङ कैसर छोत्मादोत्ओ दाम्दुछाङ मान्छोन्दानुम्नि ओसाआ अ़लोन्येन्का, खो ‘ख्रिस्तनिओ हाङ’नि लोनानान्चिन।”
3खोन्किना पिलातस्आ येसु सेनु, “दि खाना यहुदिचिओ अ़चुहाङ ओ?” येसुआ अ़लासालोवा, “खानानिन्ङा खोवात्नि त़य़ङिन्युङ्सिन म़ल़क।”
4खोन्किना पिलातस्आ मुलो काब़क्पाचि खोन्कि म़ना मुक्लाचि लोचि, “अ़ङ्का ओ म़नाएदा ह़त्मायु य़ङ दित्छाङ मान्धित्ङा।”
5मेन मोचि क़न्नान्चिन्सा म़य़ङा, “ओसाआ झारा यहुदियादा चिन्याङ्सा म़नाचि अ़चुचोङ्माङ काइसुखात्तुङुचि। खोक्कोसाआ गालिल्दाङ्का पुङ्सुकि ओदातारि तालायुङ्सा।”
येसु हेरोद्ओ अ़बुदा अ़खात्ताओ
6पिलातस्आ ओ य़ङ एनुकि सेनुचि, “दि ओ गालिल्दाओ म़ना ओ?” 7येसु हेरोद हाङ मुवाङाओ धिखाहुप्दाओ म़नानि सिन्तुकि पिलातस्आ खोक्को हेरोद्एया खात्मेत्तुचि। मोन्हिदा हेरोद्छाङ यरुसलेम्दाङा युङाङा।
8येसु खाकि हेरोद्ओ अ़न्नुनु अ़ऩङानुवा। देकिनालो मोसाआ बुयादाङ्का येसु तुप्मानि मिनाङा। मोसाआ येसुओ अ़चुतुक्वादा एनुयुङ्सुङुओसा “अ़क्चित म़दोम्दाओ काचि अ़मुओ खाङ्मा तोक्तुङ हे?”नि मिनाङा। 9मोसाआ ब़द्धे सेन्मायु य़ङ्चि सेनु, मेन येसुआ मोसोओ अ़य़ङ मान्लाअ़दा। 10मुलो काब़क्पाचि खोन्कि मोसाओ अ़य़ङ्हुप काचिन्पाचि मोदा म़एवाकि क़न्नान्चिन्सा लाहि पाक्मा अ़पुक्ता। 11खोन्किना हेरोद खोन्कि अ़रात्खामिचिआ येसु अ़सुङ्ता खोन्कि अ़चुसाया अ़पेप्ता। खोन्किना हाङ्आ हुम्मायु खान्नुओ बोप्खु येसु अ़हुप्ता खोन्कि पिलातस्एदा अ़लासाखाइसा। 12बुया हेरोद खोन्कि पिलातस ङेङ-ङेङ्चि ओ, मेन मो लेन मोचि लासातोङाचि।
येसु सेत्मा दन्दा अ़मुवा
मत्ति २७:१५-२६; मर्कुस १५:६-१५; युहन्ना १८:३९–१९:१६
13खोन्किना पिलातस्आ मुलो काब़क्पाचि, बुसुवाचि खोन्कि रुमिपाङ्मिचि अ़क्नि बुत्तुचिकि लोचि, 14“ओसाआ रोम हेन्कोप्ओ अ़देङ्सालाप्पादा म़नाचि थेन्तुङुचि निकिना खानानिन्आ ओ म़ना अ़ङ्काएदा त़तारुम। मेन एनानुम, ओ आम्नुओ बुदाङा सेनुङ्चिउङ, मेन खानानिन्आ त़पाक्तुम्ओ खाक्कोछाङ ह़त्मायु य़ङ अ़ङ्का ओएदा मान्धित्ङा। 15हेरोद्आछाङ ह़त्मायु य़ङ दित्छाङ मान्धित्दोकि ओक्को आन्कान्एदाङा लासुबाइसुयुङ्सु। एनानुम, ओसाआ स़माओ दन्दा तोक्मायु दित्छाङ अ़त्लो काचि मान्मुयुक्तु। 16खोन्ओसा हान अ़ङ्का य़हुप पाक्तुङ खोन्किना ओक्को लेरुङ्खाइसुङ।” 17[काक्माखात्मा चानुचाओ ग़रिदा मोचिओ निम्पाङ पिलातस्आ अ़क्छा छेक्ताङाओ म़ना लेत्प़सामुङुचि।]#२३:१७ ओदा म़याक्याङ्ओ य़ङ्चि खाखाक्को बुयाओ छाप्लाखाचिदा मात्द़ङ।
18मेन मोचि झारा अ़क्धुवा पात्याङ्सा म़य़ङा, “ओ म़ना सेत्माङादोत, आन्कान्का बारब्बा लेत्निप़नि!” 19बारब्बा येरुसलेम सहरादा हेन्कोप्ओ अ़देङ्सालाप्पादा ङेन मुवा खोन्कि म़ना सेराओसा छेक्खाखिम्दा छेक्तायुङ्सा। 20येसु लेत्मानि मिनाकि पिलातस्आ हान्छाङ यायोक प़चि। 21मेन मोचि ओवात्नि य़ङ्याङ्सा म़पारायुङ्सा, “मो क्रुस्दा ख़न्तासेरानुम! मो क्रुस्दा ख़न्तासेरानुम!”
22खोन्किना सुम्कादुओदु पिलातस्आ लासुलोचि, “देकि? दि ओ म़नाआ अ़त्लो काचि मुयुङ्सु कि? अ़ङ्का ना ओसाआ स़मा दन्दा तोक्मायु खाक्कोछाङ फिसुओ य़ङ मान्धित्ङा। खोन्ओसा अ़ङ्का य़हुप पाक्तुङ्कि लेरुङ्खाइसुङ।”
23मेन म़नाचिआ “खोक्को क्रुस्दा ख़न्माङादोत!”नि क़न्नान्चिन्सा म़पाराकि अ़दोरा। खोन्कि मोचिओ अ़चुय़ङ्आ पिलातस्ओ अ़मिन्मा सारु। 24खोन्ओसा पिलातस्आ मोचिआ अ़दोराओ य़ङ याङ्नाप़नानिन्नेनि लोचि। 25हेन्कोप्ओ देङ्सालाप्पादा म़नाचि थेन्तुचिकि म़नाचि सेरुचिओसा छेक्खादा अ़छेक्ताङाओ म़नाचिआ अ़दोराओवात्निङा खोसाआ बारब्बा लेत्तुप़चि। खोन्कि येसु मोचिओ अ़चुताकावा मुमा निकिना प़लाउचि।
येसु क्रुस्दा अ़ख़न्ताओ
मत्ति २७:३२-४४; मर्कुस १५:२१-३२; युहन्ना १९:१७-२७
26मोचिआ येसु मोदाङ्का अ़खात्ताङाहिदा तेन्दाङ्का बानाङाओ कुरेनिदाओ सिमोन अ़ऩङ मुवाङाओ म़ना अ़लावा खोन्कि येसुओ अ़चुक्रुस खुन्अ़मेत्ता खोन्कि येसुओ अ़चुदेङ-देङ कोन्अ़मेत्ता। 27म़नाचिओ अ़धिवाङ अ़लोकाआ येसु त़ङ्मा अ़पुक्ता। मोचिएदा अ़चुकोङ्कोम धात्याङ्सा ओत्ओत्ओत्वा म़खावाङाओ मेत्छामाचिछाङ म़याआङा। 28मेन मोचि ह्यात्नि म़हुसान्चिन्कि येसुआ म़लोचि, “यरुसलेम्ओ अ़छा मेत्छामाचिओ, अ़ङ्को निकि मान्खाप्दानिन। खानानिन आप्पिओ निकिना खोन्कि आम्नुओ छाचिओ निकि खावानिन। 29देकिनालो मोवाको लेन्चि म़ता, मोन्हिदा म़नाचि म़य़ङ, ‘छा मान्तोक्कादा मेत्छामाचि खोन्कि बुक मान्खुन्कादा साकोङ्वाचि खोन्किना नुवासि मान्दुङ्कादामा मेत्छामाचि आलाङ्मिओ!’ 30मोन्ग़रि मोचिआ भ़ऱचि ‘आन्काओ दुङ्दा धा!’ खोन्कि अ़घ़न्चेङ्वाचि ‘आन्कान्का भुक्नि!’नि लोमा म़पुक्तुचि। 31अ़चिवाङ स़ङ्ताङ्वाको अ़ङ्काछाङ म़नाचिआ ओवात्नि ऩमुङानालो छोवाओ स़ङ्ताङ्वाको हेवामिचि निनाम्हाङ्आ देम च़लोक दन्दा म़मुचि?”
32मोचिआ ह़वाङ अ़त्लो काच़चिछाङ येसुएनान अ़क्नि सेत्सि म़खात्तुचि। 33मोचि ताङ्खोयोक्वानि लोवाङाओदा म़तालाकि मोदा म़नाचिआ येसु क्रुस्दा अ़ख़न्ता। खोन्कि अ़क्नि मो अ़त्लो काच़चिदाङ्का अ़क्छा खोक्कोसोओ अ़चुचुप्ताङ्लिप्पा खोन्कि अ़क्छा अ़चुबेङ्साङ्लिप्पा क्रुस्दा म़ख़न्तुचि।
34खोन्किना येसु म़य़ङा, “आपो, ओचि लेत्तापुवानुम्च़म। देकिनालो ओचि दे म़च़याङ, ओचिआ ऩसिन्तुन्योन।” खोन्कि रात्खामिचि होरा म़पाआ खोन्कि खोक्कोसोओ अ़चुतित्चि अ़हासा।
35म़नाचि म़एवाकि अ़चोआयुङ्साङा खोन्कि यहुदि बुसुवाचिआ सुङ्याङ्सा अ़लोवा, “ओसाआ निचि ना लेइसुचि। ओ निनाम्हाङ्आ छेन्तुओ कालेन्पा ख्रिस्त हाङ ओनालो आप्पिछाङ लेन्नान्चिन्ने।” 36रात्खामिचिआछाङ खोक्कोसोओ अ़चुच़क्दा म़खाराकि सुन्ताङाओ अङ्गुरा माङ्वा प़याङ्सा अ़सुङ्ता। 37खोन्कि मोचिआ अ़लोवा, “खाना यहुदिचिओ अ़चुहाङ ओनालो खाना आप्पि लेइसान्चिन।” 38खोक्कोसोओ अ़चुताङ छोङ्दु “ओ यहुदिचिओ अ़चुहाङ ओ”नि फ़लेक्दा अ़छाप्ताओ याआङा।
39क्रुस्दा ख़न्माय़ङ अ़त्लोकाच़चिएदाङ्का अ़क्छाआ येसुओ अ़साया पेप्याङ्सा लो, “दि खाना ख्रिस्त माआङ? खाना आप्पि खोन्कि आन्काच्याछाङ लेन्नि।”
40मेन नि अ़त्लोकाच़पाआ रेन्याङ्सा लो, “खानाछाङ मो दन्दादाङा त़छुक्तायुङ्सा। खोन्नुछाङ निनाम्हाङ्एदा आम्क़मा अ़कात्निनिन? 41मोचिआ आन्काचि तोङ्लो दन्दा ऩप़चिङ्चि। आन्काचि ना आन्चुओ काचिओ अ़खान्मा अ़सिवा तोक्चुङ्चु, मेन ओ म़नाआ ना दित्छाङ अ़त्लो काचि मान्मुयुक।” 42खोन्किना मोसाआ येसु लो, “येसु, खानानिन हाङ त़लिसिन्कि त़य़न्हिदा अ़ङ्काछाङ मित्नि।”
43खोन्कि येसुआ मो लो, “अ़नुछ्या अ़ङ्का खाना लोना, आय़ङा खाना अ़ङ्काएनान निनाम्मादु त़युङ!”
येसु म़सुवाओ
मत्ति २७:४५-५६; मर्कुस १५:३३-४१; युहन्ना १९:२८-३०
44-45नाम्ओ अ़छुवाक्ङा चुक्ताखारा आप्फात अ़खोलेन्ओ बारकाकोम्दाङ्का सुम्काकोम साङातारि झारा हेन्कोप्दा कुन्चियाधेक्धेक लिसा। खोन्कि निनाम्हाङ ब़क्खाखिम्ओ अ़थेम्खातित ह्वाधाङ लिसालो रेआखारा। 46खोन्किना येसु अ़धिवाङ य़ङ्आ म़पाराकि म़य़ङा, “आपो, अ़ङ्का अ़ङ्लावा आम्नुओ छुक्दा पाक्नाङ्नानिन।” ओन म़य़ङाकि खोक्कोसोओ अ़चुसाक्मा खारा।
47ओवात्नि लिसाओ झारा अ़खाकि रात्खामिचिओ अ़चुकप्तानाआ ओवात्नि य़ङ्याङ्सा निनाम्हाङ्ओ अ़चुऩङ लोङ्सु: “अ़नुछ्याङा ओ म़ना ना साम्योक्मि मुवाङा!” 48खा-खाङ्सि म़कोवान्चिन्ओ झारा म़नाचिआ मोवात्नि लिसाओ अ़खाकि अ़चुमिन्मा चाअ़त्साकि अ़चुकोङ्कोम मोक्याङ्सा म़लासाखारा। 49येसु कासिन्चि खोन्कि गालिल्याङ्का अ़त़ङ्ताबात्ताओ मेत्छामाचिआ अ़थाया म़एवाकि मोवात्नि लिसाङाओ अ़खायाक्ता।
येसु अ़खुम्ताओ
मत्ति २७:५७-६१; मर्कुस १५:४२-४७; युहन्ना १९:३८-४२
50योसेफ अ़ऩङ मुवाङाओ अ़क्छा अ़नुवाक खोन्कि साम्योक्मि युङाङा। खो धियायोक्खादाओ पाङ्कातोक म़नाछाङ ओ। 51धियायोक्खादाओ म़नाचिआ येसु सेत्मा अ़चुयायोक खोन्कि अ़चुकाचिदा खो मान्काङ्युक्ता। खो यहुदिचिओ अ़चुधितेन अरिमाथियादाओ म़ना ओ, खोन्कि खोसाआ निनाम्हाङ्ओ अ़चुहाङ्होन ताङाओ हुङुङु। 52खो पिलातस्एया खाराकि येसुओ अ़चुस़पोक दोरु। 53खोन्किना खोक्कोसोओ अ़चुस़पोक धान्तु, खोन्कि अ़नुवाक तित्आ फेप्तुकि लुङ्छ़ङ अ़क़प्ताकि अ़मुवायुङ्साओ अ़क्तात एप्मादा युङ्सु। मोदा बुया साङ्छाङ मान्युङ्अ़युक्ता। 54मो लेन सावातोम्खा-लेन्ओ निकि चुम्मान्चिन्ओ लेन ओ, खोन्किना #२३:५४ अ़चुसावातोम्खा-लेन वाङ्मा : यहुदिचिओ अ़चुच़माथाङ्मादा नाम लुन्खात्दाङ्का अ़ऩङ्वा लेन खिप्मा अ़पुङ। अ़चुसावातोम्खा-लेन वाङ्मा मुवाङा।
55गालिल्याङ्का येसुएनान अ़क्नि म़बानाओ मेत्छामाचि योसेफ्ओ अ़देङ-अ़देङ म़खाराकि मो एप्मा खोन्कि मो हुत्दा येसुओ अ़चुस़पोक देत्नि युङ्सुङुओ अ़खा। 56खोन्किना मोचि म़लासाखाराकि नाम्म़नुवाङाओ सुङ्चि खोन्कि नाम्म़नुवाङाओ आक्वाचि येसुओ अ़चुस़पोक्दा पाक्मा निकि म़चुम्सुचि। मेन सावातोम्खा-लेन्दा य़ङ्हुप्आ लोमाय़ङ्वात्नि सावा म़तोम्सा।
सध्या निवडलेले:
लुका 23: bap
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Wycliffe Bible Translators, Inc. All rights reserved.
