लुका 19

येसु खोन्‍कि जखायस

1येसु यरिहोदा म़तालाकि मो सहराहुत्‌दाओ लाम लियाङ्‌सा म़खाराङा। 2मोदा अ़क्‍छा जखायस अ़ऩङ मुवाङाओ म़ना युङाङा। खो दाम्‍दु कालात्‍चिओ अ़चुमुलो खोन्‍कि कातोक म़ना मुवाङा। 3“येसु साङ ए खा?”निकि जखायस खाङ्‌मा सुवाङा, मेन म़ना मुक्‍लाचिआ अ़इप्‍ताओसा खोसाआ येसु खाङ्‌मा मान्‍तोक्‌दो। देकिनालो खो दुन्‍ताङा। 4खोन्‌ओसा जखायस येसु खाङ्‌सि बुया लोराखाराकि अ़क्‌तात वासिताङ्‌चोक्‌दु वाङा। देकिनालो येसु मो लाम लियाङ्‌सा खात्‍मा म़मुवाङा।

5येसु मो तेप्‌दा म़तादिसाकि धात्‍नि अ़खा, खोन्‍कि मो अ़लोवा, “जखायस, च़क्‍नि धान्‍तान्‍चिन देकिनालो आय़ अ़ङ्‌का आम्‍खिम्‌दा याक्‍मादोत।”

6खोन्‍किना जखायस च़क्‍नि धान्‍तान्‍चिन्‌कि अ़ऩङानुयाङ्‌सा अ़खिम्‌या येसु साऩङ्‌वा मेत्‍तु। 7म़नाचिआ ओ अ़खाकि झारा छुऩङ्‌वा मुमा अ़पुङ्‌सा, “येसु ना हेवामिओ अ़खिम्‌दा तावाङ लिसि म़खारायुङ्‌सा।”

8मेन जखायस पुवालोन्‍ताकि हाङ्‌पा लो, “हाङ्‌पो, खानुम! अ़ङ्‌का अ़ङ्‌चासुम, छेन्‍बिओ अ़क्‍धाङ मान्‍तोक्‍कादाचि प़ङ्‌च़ङ खोन्‍कि म़नाचिदाङ्‌का दियाकोनुछाङ सामाचि च़न्‍तुङ्‌युङ्‌सुङ्‌च़ङ्‌नालो अ़ङ्‌का मोसोओ चारकास़रो लासुङ्‌प़ङ्‌च़ङ।”

9खोन्‍कि येसुआ मो अ़लोवा, “अब्राहाम साकोङ्‌छ़ङ मुवाओवात्‍निङा ओ म़नाआछाङ साकोङ्‌छ़ङ मुवाओसा आय़ ओ खिम्‌दा लेन्‍मा तायुङ्‌सा। 10अ़ङ्‌का म़नाओ अ़छा ना म़माखाराओचि लाम्‍सि खोन्‍कि लेइसि ताङ्‌ओ।”

दस्‌कापाङ हारुक्‌चि प़माय़ङ फेक्‌वाओ दोय़ङ्‌ला

मत्‍ति २५:१४-३०

11मो म़नाचिआ ओ य़ङ्‌चि अ़एनाङाहिदा येसुआ मोचि अ़क्‌तात दोय़ङ्‌ला खाएत्‍मा म़पुक्‍तुचि। देकिनालो येसु यरुसलेम च़क्‌दा म़युङाङा, खोन्‍कि म़नाचिआ “निनाम्‍हाङ्‌ओ अ़चुहाङ्‌होन च़क्‍नि तामा मुयाङ”नि म़मिनाङा। 12खोन्‌ओसा येसुआ म़लोचि, “अ़क्‍छा अ़धुवा म़ना अ़हेन्‍कोप्‌दाओ हाङ मुमाओ पाङ तोक्‍सि अ़क्‌तात अ़थायाओ हेन्‍कोप्‌या खात्‍मा मुवाङा। 13खोन्‍किना मोसाआ दस्‌कापाङ अ़हारुक्‌चि बुत्‍तुचिकि अ़क्‍छा-अ़क्‍छा #१९:१३ अ़क सयेकालेन लेकाओ काचिलुङ फेक्‌वा : मुलो छाप्‍लाखादा अ़क मिनानि छाप्‍तायुङ्‌सा। अ़क सयेकालेन लेकाओ काचिलुङ फेक्‌वा प़चिकि मोचि लोचि, ‘अ़ङ्‌का लाङाताङातारि ओ फेक्‌वा याङानुम्‌कि ब़द्‍धे फेक्‌वा दुवाङानिन।’ 14मेन अ़हेन्‍कोप्‌दाओ म़नाचिआ मो ऩङाअ़छिराकि, ‘ओ म़नाआ आन्‍कान्‍काएदा हाङ्‌काचि मुओ आन्‍काओ ऩङाअ़नुनिन’नि य़ङ्‌सि मोचिआ अ़क रुहुप म़नाचि म़छुत्‍तुचि।

15 मेन हाङ मुमाओ पाङ तोक्‍तुकि मो म़ना अ़खिम्‌दा लासाता। खोसाआ फेक्‌वा प़चिओ अ़हारुक्‌चि खोएदा बुत्‍तुचि, खोन्‍कि फेक्‌वा प़चिओदाङ्‌का मोचिआ देम च़लोक फेक्‌वा अ़दुवानि सिन्‍मा लामाङा। 16बुयाओ अ़हारुक बानाकि लो, ‘हाङ्‌पो, खानानिन्‌आ त़प़निओ फेक्‌वाआ दस्‌काफेक च़लोक फेक्‌वा दुउङ्‌युङ्‌सुङ।’ 17खोन्‍कि हाङ्‌आ अ़हारुक लो, ‘त़छोसा, अ़नुवाक हारुक! खाना दस्‌कातात सहरादा पाङ्‌मुमा त़तोक्‍तु। देकिनालो खाना अ़चुप्‍पो काचिदा सोम्‍कुवामुमायु काचि त़मुवा।’

18 नि अ़हारुक ताकि लो, ‘हाङ्‌पो, खानानिन्‌आ त़प़निओ फेक्‌वाआ नि पाच्‌कालोक च़लोक फेक्‌वा दुउङ्‌युङ्‌सुङ।’ 19खोन्‍कि हाङ्‌आ मोछाङ लासुलो, ‘खाना पाच्‌कातात सहरादा पाङ्‌मुमा त़तोक्‍तु।’

20 खोन्‍किना नि अ़हारुक्‌छाङ ताकि लो, ‘हाङ्‌पो, आम्‍नुओ फेक्‌वा ओदा ओ। मो अ़ङ्‌का तित्‌ओ अ़धाङ्‌दा फेप्‍तुङ्‌कि कुम्‍सुङ्‌युङ्‌सुङ। 21देकिनालो खानानिन अ़ऱन्‍मिन्‌ओ म़ना त़याइन्‌येन। खोन्‌ओसा खानानिन्‌दाङ्‌का अ़ङ्‌क़माकारा। दि मान्‌युङ्‌त़दोम, मो खानानिन त़लामुम। दि मान्‌वेत्‍त़दोम, मो त़हेक्‍तुम।’

22 मोसोओ अ़हाङ्‌पाआ अ़हारुक लासुलो, ‘आम्‌य़ङ्‌आङा अ़ङ्‌का खाना छ़ङ्‌छेन्‍ना, खाना अ़अ़त्‍पा हारुक! दि मान्‌युङ्‌ङा, मो कालाम, खोन्‍कि दि मान्‌वेत्‌दोङ, मो काहेक अ़ङ्‌का अ़ऱन्‍मिन्‌ओ म़नानि त़मित्‍ङाङा? 23खोन्‍नालो देकि अ़ङ्‌फेक्‌वा छेन्‍बि युङ्‌खादा मान्‌युङ्‌त़दो? खाना मोवात्‍नि त़मुओ खाङ्‌दे अ़ङ्‌का लासाङ्‌ताङ्‌हिदा अ़ङ्‌फेक्‌वा अ़तेप्‍माएनान लासुङ तोक्‍तुङ्‌ओ।’ 24खोन्‍कि मोदा काएप म़नाचि हाङ्‌आ लोचि, ‘मोएदाङ्‌का अ़फेक्‌वा ङाप्‍तानुम खोन्‍कि साङ्‌एदा दस्‌काफेक युङ्‌याङ मो पुवानुम।’

25 खोन्‍कि मोचिआ अ़लोवा, ‘हाङ्‌पो, खोएदा ना बुयाओङा दस्‌कातात युङ्‌याङ।’

26 अ़ङ्‌का खानानिन लोनानिन, ‘साङ्‌एदा युङ्‌याङ, मो च़लोक प़, खोन्‍कि मोएदा ब़द्‍धे लि। मेन साङ्‌एदा मात्‍द़ङ, मोएदा युङ्‌याङ्‌ओछाङ मोएदाङ्‌का अ़ङाप। 27मेन अ़ङ्‌का हाङ मुङाओ ऩङाकाछित मो अ़ङ्‌ङेङ्‌चि ओदा बात्‍तानुम्‍च़म, खोन्‍कि अ़ङ्‌बुदा सेरानुम्‍च़म!’”

येसु यरुसलेम्‌दा म़वाङाओ

मत्‍ति २१:१-११; मर्कुस ११:१-११; युहन्‍ना १२:१२-२९

28येसु ओ दोय़ङ्‌ला म़य़ङाचिआकि यरुसलेम्‌दुत्‍नि म़लोन्‍ता। 29येसु जैतुन भ़ऱनि लोवाङाओ बेथफागे खोन्‍कि बेथानियादा म़ताला। खोन्‍कि खोक्‍कोसाआ अ़चुकाखेङ्‌पाचिदाङ्‌का ह़वाङ ओवात्‍नि लोयाङ्‌सा म़छुत्‍तुखाइसुचि, 30“खानाचि मो ह्‍याक्‍को तेन्‌या खाराचि। तेन्‌दा त़ताचिलाचिङ्‌चिवा खानाचिआ साङ्‌आछाङ मान्‌युक्‌युक्‍तुओ अ़क्‌तात गधा छा छुम्‍सायुङ्‌साओ त़धित्‍चु। मो हुराचुकि ओदा बात्‍ताचु। 31खा-खाक्‍कोसाआ खानाचि ‘देकि त़हुत्‍चुङ्‌चु?’नि त़सेन्‍चिनालो ‘हाङ्‌पा ओ दोत्‌याङ’नि लोवाचु।”

32खोन्‍किना मो बुया म़खाइसुचिओ म़नाचि खाराचिकि येसुआ म़लोचिवात्‍निङा अ़क्‌तात गधा छा अ़धिराचु। 33मोचिआ गधा छा अ़हुराङाचुहिदा मो गधा छाओ अ़हाङ्‌पाआ मोचि सेनुचि, “खानाचिआ ओ गधा छा देकि त़हुत्‍चुङ्‌चु?”

34मोचिआ अ़लासालोवाचु, “हाङ्‌पा ओ दोत्‌याङ।”

35मोचिआ मो गधा छा येसुएदा अ़ताराचु, खोन्‍कि मोसोओ अ़दुङ्‌दु अ़चुतित्‌चि अ़थ़क्‍तापुवा, खोन्‍कि येसु मोसोओ अ़दुङ्‌दा युङ्‌अ़मेत्‍ता।

36येसु म़खाराङाहिदा म़नाचिआ अ़चुतित्‌चि म़हुरुचिकि लाम्‌दा अ़थ़क्‍तापुवा। 37येसु जैतुन भ़ऱओ य़न्‍पा लाम्‍च़क्‌दा म़तादिसाहिदा झारा अ़चुकाखेङ्‌पाचिआ आप्‍पि अ़खाओ झारा सावा काचिचि अ़मित्‍ताकि अ़चुऩङानुयाङ्‌सा निनाम्‍हाङ्‌ओ अ़चुऩङ चोन्‌याङ्‌सा अ़धिवो य़ङ्‌आ पात्‍मा अ़पुङ्‌सा।

38“निनाम्‍हाङ्‌ओ अ़चुऩङ्‌दा म़ताओ हाङ निनाम्‍हाङ्‌आ आसिखा अ़प़ने! निनाम्‍मादु सेवाङ्‌नि लिने खोन्‍कि झारादाङ्‌का धानि निनाम्‍हाङ्‌ओ अ़चुऩङ लोङ्‌ने।”

39खोन्‍कि मुक्‍लादाओ खा-खाक्‍को फरिसिचिआ येसु अ़लोवा, “काचिन्‍पो, आम्‍नुओ काखेङ्‌चि रेन्‍तानुम्‍च़म।”

40मेन येसुआ म़लासुलोचि, “अ़ङ्‌का खानानिन लोनानिन, ओचि ऩपात्‍निन्‌नालो लुङ्‌ताक्‌चिआ पात्‍मा अ़पुङ।”

41येसु यरुसलेम च़क्‌दा म़तादिसाकि मो सहरा अ़खाकि मोसोओ निकि खाप्‌याङ्‌सा म़लोचि, 42“निनाम्‍हाङ्‌एनान देत्‍नि तोङ्‌मा ऱन निकिना खाना आय़नुछाङ त़सिन्‍तुओ खाङ्‌दे नुवाओ! मेन ओन्‍ग़रि मो य़ङ खाना तुप्‍मा मान्‍ऱत़युक्‍तु। 43खानाएदा ओवाको लेन्‌चि म़ता, आम्‍ङेङ्‌चिआ खाना झोम्‍मा निकि बाखाओ कुदारि अ़पाक, खोन्‍कि झारा दात्‍निदाङ्‌का ऩऱङ्‌कि ऩछेक। 44मोचिआ खाना खोन्‍कि खानाहुत्‌दाओ आम्‍छाचि बाखादा म़धाम्‍सुचिकि अ़क्‌तात लुङ्‌ताक्‌दुङ्‌दु नि लुङ्‌ताक्‌छाङ ऩछिरुन्‍दान। देकिनालो निनाम्‍हाङ खानाएदा म़ताओ ग़रि मान्‍सिन्‍त़दो।”

येसुआ निनाम्‍हाङ ब़क्‍खाखिम अ़सेङ्‌साओ

मत्‍ति २१:१२-१७; मर्कुस ११:१५-१९; युहन्‍ना २:१३-२२

45खोन्‍किना येसु निनाम्‍हाङ ब़क्‍खाखिम्‌दा म़वाङाकि काइन-काखित्‌चि ऱमाखान्‍मा म़पुक्‍तुचि। 46येसुआ मोचि म़लोचि, “साम्‍कालिन्‌दा ओवात्‍नि छाप्‍तायुङ्‌सा, ‘अ़ङ्‌खिम यामात्‍खा खिम लि।’ मेन खानानिन्‌आ ना ओ काङाप्‍खात्‌चिओ अ़चुबुक्‍ताङ त़मुम्‌युङ्‌सुम।”

47येसुआ लेन-लेन निनाम्‍हाङ ब़क्‍खाखिम्‌दा म़चिन्‍तुङुचि। मेन मुलो काब़क्‍पाचि, य़ङ्‌हुप काचिन्‍पाचिकिना म़नाचिओ अ़चुअ़धुवाचिआ खोक्‍को सेत्‍मा अ़लाप्‍ताङा। 48खोन्‍नुछाङ मोचिआ येसु सेत्‍माओ अ़लाम दित्‍छाङ मान्‍धित्‌अ़दा। देकिनालो झारा म़नाचि खोक्‍कोसोओ अ़चुय़ङ एन्‌याङ्‌सा खोक्‍कोएनान अ़क्‍नि म़युङायाक्‍ताङा।

सध्या निवडलेले:

लुका 19: bap

ठळक

सामायिक करा

कॉपी करा