MATEO 14
14
Bix quíimic Juan Bautista
(Mc 6.14-29; Lc 9.7-9)
1Ti' le kiino'obo' Herodes, u jalachil Galileae', tu yu'ubaj u péectzilil Jesús, 2ca tu ya'alaj ti' le máaxo'ob yano'ob tu yicnalo': Leti'e' Juan Bautista máax dzo'oc u ca'a púut cuxtal ti' le quíimilo'. Le o'olal yaan le nojoch páajtalil ti'o'.
3Tumen Herodese' tu beetaj u ma'achal Juane' ca j ka'axe' ca j bisa'ab kalbil. Tu beetaj lela' tu yo'olal Herodías u yatan Felipe u sucu'un, 4tumen Juane' tu ya'alaj ti' Herodese': Ma' unaj a watantiqui'.
5Herodese' u káat ca'ach u quíims Juan, ba'ale' sajac ti' le máaco'obo', tumen tuláacal máac tucultique' Juane' jun túul aj bóobat. 6Ba'ale' Herodese' tu kinbesaj u kiin u kaaba', ti' le kiino' u x ch'upul paal Herodíase' jóok okot tu táan le u'ula'obo', lela' jach utzji tu yich Herodese', 7ca tu ya'alaj ti': quin jala'ach séebchi'tic je'el in dzáic teech je'el ba'alac ca a káate'. 8Leti' túune', cu dzo'ocol u tzol xiquinta'al tumen u maamae' ca tu ya'alaj ti' Herodes: Dzáa teen u pool Juan Bautista ti' jun p'éel plato.
9Lela' tu beetaj u okom óolta'al ajaw Herodes, ba'ale' tu yo'olal tu jalach t'aantaj ti', yéetel u'uya'ab xan tumen u yu'ulabo'obe', tu ya'alaj ca dza'abac ti'. 10Tu túuxtaj túun cúul ch'actbil u pool Juan te j tu'ux kala'ano'; 11cu dzo'ocole' ca j taasa'ab ti' jun p'éel platoe' ca j dza'ab ti' le x ch'úupalo', leti' túune' tu kubaj ti' u maama.
12J kucho'ob túun u j tzaypacho'ob Juane' ca tu bisajo'ob u wíinclile' ca tu mucajo'ob; cu dzo'ocole' j bino'obe' ca tu ya'alajo'ob ti' Jesús.
Jesuse' cu tzéentic cinco mil máaco'ob
(Mc 6.30-44; Lc 9.10-17; Jn 6.1-14)
13Le ca tu yojéeltaj Jesús le péectzila', j luk te'elo', j ooc ti' jun p'éel cheeme' ca j bin tu juunal tac jun p'éel cúuchil jun páayil. Ba'ale' ojéelta'ab tumen le máaco'obo', ca jóoko'ob ti' le caajo'obo' u ti'al u bino'ob xíimbalil tac tu'ux cu bin leti'. 14Le ca jóok Jesús ti' le cheemo' tu yilaj yaan ya'abcach máaco'ob te'elo', ca tu ch'a'aj óotzilil ti'ob, ca tu dzaj u toj óolal le koja'ano'ob tu taasajo'obo'. 15Tumen táan u yáakabtale' u aj canbalo'ob Jesuse' j taalo'obe' ca tu ya'alajo'ob ti': Táan u yáakabtal cu dzo'ocole' mix máac caja'an ti' le cúuchila'. Utzil túuxt le máaco'ob u ti'al ca xi'ico'ob ti' le cajtalilo'ob u máano'ob ba'al u jaanto'obo'.
16Jesuse' tu ya'alaj ti'ob: Ma' kabéet u bino'obi', dza'ex te'ex ba'al u jaanto'ob.
17Leti'obe' tu núucajo'ob ti': yaan to'on chéen cinco waaj yéetel ca'a túul cay.
18Jesuse' tu ya'alaj ti'ob: Taase'ex ten waye'.
19Tu túuxtaj túun ca culac le máaco'ob tu yóokol le su'uco'. Cu dzo'ocole' tu ch'a'aj tu kab le cinco waajo' yéetel le ca'a túul cayo', tu líiksaj u yich ca'ane' ca tu nib óoltaj Jajal Dios, tu xet'aj túun le waajo' ca tu dzaj ti' u aj canbalo'ob, leti'ob túune' ca tu t'oxajo'ob ichil le máaco'obo'. 20Tuláacal jaano'ob tac ca na'ajchajo'ob, cu dzo'ocole' tu chupajo'ob doce xaaco'ob yéetel le u xéexet'al j p'áato'. 21Le máaxo'ob jaano'obo' míin cinco mil máaco'ob, ma' xoca'an ichilo'ob le co'olelo'ob mix le paalalo'obo'.
Jesuse' cu xíimbal yóokol ja'
(Mc 6.45-52; Jn 6.16-21)
22Cu dzo'ocole' Jesuse' tu beetaj u yocol u aj canbalo'ob ti' le cheemo' u ti'al ca xi'ico'ob táanil tac tu táanxel tzéelil le ka'anabo', ca'aliquil táan u yutzil túuxtic le máaco'obo'. 23Cu dzo'ocol u yutzil túuxtico'obe', Jesuse' j na'ac payalchi' tu juunal te j pu'uco'. Le ca j áakabchaje' Jesuse' láili' tu juunal yanil te'elo', 24ca'aliquil le cheemo' dzo'oc u kuchul chúumuc ka'anab. U cuclil le ja'o' táan u ja'ajadzicubáa ti' le cheemo' tumen le iiko' actáan ti'ob u taal. 25Táan u taal u sáastale' ca tu nadzajubáa Jesús ti'ob táan u xíimbal yóokol le ja'o'. 26Le aj canbalo'obo', le ca tu yilajo'ob táan u xíimbal tu yóokol le ja'o', sajacchajo'ob; tu yo'olal u sajaquilo'obe' ca tu yawtajo'ob yéete sajquil ¡Juntúul ja'asajóol!
27Ba'ale' j t'a'ano'ob tumen Jesuse' ca j a'ala'ab ti'ob: ¡Yanac a wóole'ex; teen, ma' a ch'a'ique'ex sajaquil!
28Pedro túune' j t'aanaje' ca tu ya'alaj ti': Yuumtzil wa teche', a'al teen ca xi'iquen tu yóokol le ja' tac tu'ux yanecho'.
29Jesuse' tu ya'alaj ti': Co'oten. Jóok túun Pedro ti' le cheemo' ca jo'op' u xíimbal tu yóokol le ja'o' u ti'al u binbal tac tu'ux yaan Jesús. 30Ba'ale' le ca tu yilaj le ka'amcach iiko', sajacchaji; ca jo'op' u búulule', tu yawtaj: ¡Toqueni', Yuumtzil!
31Tu séeblaquil j ma'ach tu kab tumen Jesuse' ca j a'ala'ab ti': ¡Jach jun p'íit a wocsaj óolal! ¿Ba'ax ten ca'a p'éelchaj a tuucul?
32Le ca j na'aco'ob te j cheemo', jéedz le iiko'. 33Le máaxo'ob yano'ob te j cheemo' xolajo'ob tu táan Jesuse' ca tu ya'alajo'ob: ¡Tu jaajil teche' u Paalech Yuum Jajal Dios!
Jesuse' cu dzáic toj óolal ti' dze'edzec Getnasaretilo'ob
(Mc 6.53-56)
34Tu ch'acto'ob le ka'anabo' ca j kucho'ob tu lu'umil Genesaret. 35Le ca j kaj óolta'ab Jesús tumen u cajnáalilo'ob le cúuchilo', tu t'i'it'besajo'ob u péectzilil ti' tuláacal le lu'umo'. Ca j taasa'ab tuláacal le máaxo'ob koja'ano'ob tac tu'ux yaan Jesuso'. 36Tu káat óoltajo'ob ti' ca u cha'a u péedzkabtico'ob quex chéen u chi' u nook; tuláacal le máaxo'ob tu pedzkabtajo'obo', utzchajo'ob.
सध्या निवडलेले:
MATEO 14: YUA04Ev
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Maya de YucatánTumben Nupt'an NT © Sociedad Bíblica de Mexico, 2004.
