MATIU 8
8
Chisɔsi‑a mɔ kaima dɔndɔ baun
(Maki 1:40-45; Duku 5:12-16)
1Mbɛ Chisɔsi yii‑a kɔnkɔɛ chɛ a. A yii‑a kɛn, mbɛ mɔ fanka wa bea‑a a fɛ. 2Mbɛ a yen ko, kamin dɔndɔ, gbandi yama bɔen ni min gboo gbɛɛ ma, a na‑a Chisɔsi tena. Mbɛ a‑a a kumbai gbangban a chen kɔɔ, a ɔ, “Fa, ni a a di i ye, e kun fan i ni n baun.”
3Mbɛ Chisɔsi‑a a boo a ta, mbɛ a tu‑a kamin chɛ a. Mbɛ a ɔ, “I baun koe a di n ye. Baun gbɛ sanche.” Mbɛ a ya kɔɔɛ a, gbandi chɛ baun‑da kamin chɛ ma. 4Mbɛ Chisɔsi‑a a fɔ a ye, a ɔ, “I ma koe chɛ ɔ yian mɔ ɔ mɔ a, chɛɛ ta dɔndɔ gbe mɔɛ chɛ tena, min mbe mmɔ tɛ ɔ Yataa a, a ni i ma fɛn. Mbɛ i‑a yasi chɛ bɔ nɔ Yataa tena, yɔ sawa, Yataa‑a min be Mosisi ma, a‑a a fɔ buɛ min dɔ. Chɛ an mbe a ɔ yian‑da mɔ ɔ mɔ a, mbɛ i baun‑da.”
Soya mɔɛ dan‑da Chisɔsi a gbeden
(Duku 7:1-10)
5Mbɛ Chisɔsi ta‑a Kapanaun duu ɔ. Soya gbakoo dɔndɔ ni wan nɔ, min ka‑a Domi chɛnyɛ ɔ. Soya chɛmɛ dɔndɔ an fan ni a kɔɔ. Chisɔsi ni kɛn don‑da nɔ, a na‑a wan Chisɔsi tena, disa ɔ. 6Mbɛ a ɔ, “Fa, n 'na bɔi denɛ yen ko sa ɔ chenɛ a, a namaaenɛ ɛ, ɛ tɔɔya‑a gbeden sofa a.”
7Mbɛ Chisɔsi ɔ a ma, “Mɔ ɛ ta‑a wan, n ni a a baun.”
8Chɛɛ soya gbakoo chɛ ɔ, “Fa, i ma ta n baa. A mu min na, mɔ a tenden ma n na i don koe a n 'na chenɛ a. Chɛɛ i da a kuiɛ a ben dechee, n 'na bɔi denɛ ɛ baun‑da wan. 9A mu min na, n fandi gbu wɛɛ, n mbe mɔɛ n fan 'na gbasaya kɔɔ, n bɛɛ soya n mbe wan n kɔɔ. N mbe a fɔ wan dɔndɔ ye, n dɔ, ‘Ta,’ mbɛ a ta‑a. N mbe a fɔ wan dɔndɔ wɛɛ ma, n dɔ, ‘Na,’ mbɛ a na‑a. Mbɛ n‑na a fɔ n 'na bɔi denɛ ma, n dɔ, ‘Chɛ ma,’ mbɛ a‑a a ma.”
10Chisɔsi tɛnɛ‑a wan a a, bai chɛ a min koe a. Mbɛ a‑a a fɔ fanka wa chɛ ma, min ni a sɔ tena a fɛ, a ɔ, “N ni a ma din wo tena, mbɛ kɛn gba, n ma mɔ bonda chɛ yen nin bɛ Isɔɛɛ mɔɛ n gbɛɛ tɛ ɔ, min danden mu ka n na. 11Ka wɛ n mbe tea fɔ wo ye. Mɔ sɛsɛ dɔ mende nu, an mbe na‑a wan a ka dunya chɛ gbɛɛ ɔ. An mbe si‑a wan kaina dɔndɔɛ, an bɛ Ebeami a, a basan Aisaki an fea Chekɔpi a, an ni daunɛ chɛ Yataa 'a mansaya kɔɔ. 12A tima chɛ a, Isɔɛɛ mɔɛ n sɛsɛ, kaina ɔ bɛnden ni miin ko a Yataa 'a mansaya kɔɔ, an na ɛ dɛ‑a wan baa ma, pimbi pimbi ɔ. An mbe ma‑a kaina di chɛ‑a, a basan an nyinɛ a daunɛ a tɔɔya a.” 13Mbɛ Chisɔsi‑a a fɔ soya gbakoo chɛ ye, a ɔ, “Yɛ i waa chenɛ a. Ɛ ma‑a wan, yɔ i danden mu buɛ min dɔ a a.” Mbɛ a yɛ‑a.
A sin, a 'a bɔi den chɛ baun‑da wan bai chɛ fɔ tima a.
Chisɔsi‑a mɔ sɛsɛ n na baun
(Maki 1:29-34; Duku 4:38-41)
14Mbɛ Chisɔsi ta‑a Pita 'a chenɛ a. A don‑da kɛn chen chɛ a, a‑a Pita 'a musu de tan fan sa ɔ sofa ma, chima bɔndenɛ ɛ a ma. 15Mbɛ Chisɔsi tu‑a a boo a, mbɛ chima gbandi chɛ bɔ‑a musu chɛ gboo ɔ. Mbɛ a‑a a kɔɔ sɔ, mbɛ a‑a daun fenɛ be Chisɔsi ma, a daun koe a.
16A tee bea chɛ ma, an na‑a wan mɔ sɛsɛ a Chisɔsi tena, nyina yama ni miin fɛ. Chisɔsi da a bai‑a a ma wan, nyina yama chɛ n ka‑a mɔɛ chɛ n fɛ. A yɛ to, a‑a mɔɛ tɔɛ chɛ n na baun fan, miin gbandienɛ ni. 17A 'a mɔ baun buɛ chɛ, a na‑a a ma wan, Yataa 'a gbonka chɛ mɔɛ Aisaya na‑a min fɔ suun, a bɔ‑a a a. Aisaya na‑a a fɔ wan, a ɔ, “A‑a mmɔ bɔ wan mmɔ 'a gbandi n gbɛɛ ɔ.”
Chisɔsi‑a bai sa, a si a sɔ koe ma a fɛ
(Duku 9:57-62)
18Tima dɔndɔ a, Chisɔsi‑a fanka wa yen fan a 'a tindanɛ. Mbɛ a‑a a fɔ a fɛ denɛ n ma, a ɔ, an ni yii wa chɛ tɛ tindi dɔndɔɛ ma. 19Mbɛ Chu n 'na sawa kan mɔ dɔndɔ na‑a a tena, mbɛ a ɔ, “Ticha, n ma bɛndenɛ mu bea koe a i fɛ kan kɔ kan, e ta‑a kaina min.”
20Mbɛ Chisɔsi ɔ, “Sonɛ n mbe fia ɔ, soe n boo ɔ, a sin konde n bɛɛ nyanɛ n mbe. Chɛɛ kaina kan kɔ kan mbe ee n boo ɔ, n fan, Mɔ Gbu 'a Denɛ, n mbe n gbɛnku kaina n ni n suin.”
21Mbɛ kaminɛ dɔndɔɛ min ni a fɛ mɔɛ a, a‑a a fɔ Chisɔsi ye, a ɔ, “Mansa, fa fa‑a. A ma n ni yɛ pɛn, n ni a tɔn.”
22Chɛɛ Chisɔsi‑a a fɔ wan a wɛɛ ye, a ɔ, “Bea n fɛ. Mɔɛ miin mbe yɔ mɔ faenɛ nu, an to nɔ, an ni an 'na mɔ faenɛ n tɔn.”
Chisɔsi‑a fia wa a gban yii wa a
(Maki 4:35-41; Duku 8:22-25)
23A tima chɛ a, Chisɔsi sɛ‑a wan dɛndɛ ɔ, mbɛ a fɛ denɛ n‑na a sɔ a fɛ nɔ. 24Mbɛ an bun‑da ta‑a. A yen ko, fia wa dɛgbɛ‑a a kuu sɔ bɔ‑a yii chɛ a, mbɛ an tima chɛ a, faagbaa ni wan dɛndɛ chɛ kun ma a to koe a yii ɔ. Chɛɛ fia chɛ ni kɛn bɔ tena, Chisɔsi ni sa ɔ chinɔɛ ɔ wan. 25Mbɛ a fɛ den chɛ n ta‑a a tena, mbɛ an‑na a a kunɛ. Mbɛ an dɔ, “Mansa, nn kun bɔ koe chɛ ɔ. Mmɔ yen ko to‑a yii ɔ.”
26Mbɛ Chisɔsi ɔ, “Fen chiandia e nɛ? Wo 'a danaya Yataa ko a, a dɔɔ.” Mbɛ a‑a a kɔɔ sɔ, a‑a yii chɛ, an fea fia a, min bɛɛ ni bɔ tena, a‑a an na gban. Mbɛ fia ɔ maun‑da don, mbɛ yii wɛɛ si‑a chidi.
27An fɛn gbɛɛ ni dɛndɛ chɛ ɔ, an da ɔ gbaa wan a si koe chɛ ma. Mbɛ an dɔ an nyɔn ma, “Fen kamin nyɔn sima mu chɛ a? Ɛ koe min fɔ fia wɛɛ yɛ, a basan yii a, an mbe ma.”
Chisɔsi‑a nyina yama n gbain kamin fea n fɛ
(Maki 5:1-20; Duku 8:26-39)
28Mbɛ an‑na yii chɛ tɛ Kadaa tanda ɔ, yii wa chɛ kaka dɔndɔɛ ma. Mbɛ kamin fea n na‑a Chisɔsi tan, miin na‑a bɔ fanɛ#8:28 Kadaa mɔɛ n ni an 'na mɔɛ n tɔn fanɛ a wan kɔnkɔɛ kaa ma. a bɛnkuɛ ɔ. Nyina yama an ni an fɛ, min ma chianden ni. Chɛ na‑a a ma wan, mɔɛ nii ben an tee na chia a. 29Mbɛ a yen ko, an‑na yee tɛ, an dɔ, “Yataa 'a denɛ, i toen mu i ni fen ma nn na? I na‑a nn na tɔɔya koe an na, tee chɛ ya ɔ, Yataa ɛ dunya chɛ gbɛmbo‑a tee min ma?”
30Kɔɛnya man sɛsɛ n ni wan nɔ, daun chɛ‑a, miin tena ɔ nii ma yansan. 31Mbɛ nyina yama chɛ n‑na Chisɔsi disa, an dɔ, “E nn gbain tena wan kamin chɛ n fɛ. Ni i‑a nn gbain, a ma nn ni bea kɔɛnya man chɛ n fɛ.”
32Mbɛ a ɔ, “Wo ta.” Mbɛ an ka‑a kamin chɛ n fɛ, mbɛ an ta‑a an bea‑a kɔɛnya chɛ n fɛ. A yen ko, kɔɛnya man chɛ n gbɛɛ ben‑da wan bui‑a, a ka kɔnkɔɛ chɛ kaa fɛ. An yii‑a wan an dɛ‑a yii ɔ, mbɛ an to‑a nɔ.
33Mbɛ mɔɛ chɛ nu, miin ni ka kɔɛnya chɛ n kun ma fɛn tena, an ben‑da bui‑a. An ta‑a duu ɔ, mbɛ an‑na a gbɛɛ ɔ yian, min chɛ‑a a ɔ. A yɛ to, min ma‑a kamin fea chɛ n na, nyina yama ni miin fɛ. 34Mbɛ a yen ko, mɔɛ miin gbɛɛ ni an duu chɛ ɔ, an na‑a Chisɔsi tan‑da. Mbɛ an‑na a yen kɛn, an‑na a disa, an dɔ, a ni bɔ an 'na tanda ɔ.
सध्या निवडलेले:
MATIU 8: KONONT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
New Testament in Kono © The Bible Society of Sierra Leone, 2006.
