Mateo 8
8
Mwene dikulu; Akida wa Kapernaum
1Na heyo viyahumuluke hakigongo, matinghanilo bwando wamkoleleza. 2Baho keza munhu mwene dikulu, kamgwila mavindi yolonga, “Mndewa, uhalonda, kodaha ku-mhonya.” 3Yesu kagolosa umkono, kamkwasa yolonga, “Novilonda, hona!” Mhunde dikulu jake dihona. 4Yesu kamulongela, “Lola, sikuumulongele munhu, bali genda na zako, ukamulagusile Mkulu wa Nhambiko, ulave vinhu vya nhosa kamba viyalagize Mose, viwe utango kumwawo!”
5Viyengile Kapernaumu, akida imonga kamwizila, kamuhembekeza yolonga, 6“Mndewa, nyakadala wangu katambalala mngʼanda, mtamu wa kuholola, kolumwa nghani.” 7Yesu kamulongela, “Nokwiza nimuhonye.” 8Aija akida kamwidika yolonga, “Mndewa, niye sivigesa gweye wingile muna ingʼanda yangu, bali longa mbuli yeka, na heyo nyakadala yangu kohona. 9Kilumbo na niye vino namunhu nikigwe muna ukulu, mwene minyalinyali hamigulu yangu. Nihamulongela ino, Chola, kochola; bule, Gweye izo, kokwiza; bule nyakadala wangu, Tenda vino, kotenda.” 10Yesu viyahulike hivo kakanganya, kawalongela waja wamkoleleze, “Amini nomulongelani, sinakona kugoga hakulu kamba kuno kwa munhu yoyose muwali Waisraeli. 11Na hiyo nomulongelani, kwiza bwando wokwiza, wolawa kulawilo wa zuwa na kuswelo wa zuwa, na hewo wokala hamonga na Abrahamu, Isaka na Yakobo muundewa wa Mulungu. 12Bali iwana wa undewa wokwasigwa mdiziza da kunze, kuko kondakuwe ndilo na kugegeda gameno.” 13Na heyo Yesu kamulongela ija akida, “Genda, na gawe kumwako kamba vugogile!” Na nyakadala wake kahona kipigiti kikija.
Mkwe wa Petro
14Avija Yesu viyavikile mngʼanda ya Petro, kamona mkwe yake Petro, mamo wa sano jake, katambalala mulusazi, mtamu wa lubahila. 15Kamkwasa mkono, lubahila luhona; kenuka kawasanghanila.
16Viivikile uchungulo, wamgalila bwando wene mizuka, kailava mizuka kwa longa jake, kawahonya wose wakalile wolumwa. 17Giladi divikizwe dija dilonga dilongigwe na Mlaguzi Yesaya yolonga:
“Mwenyecho kedikwa udodwa wetu,
kabili kaisola mitamu yetu.”
Wakolelezi womuwinza Yesu
18Na heyo Yesu viyawene matinghanilo bwando womzunguluka, kalagiza kuloka umwambu. 19Baho mwanafunzi imonga kamgendela kamulongela, “Mkulufunzi, nokukoleleza hosehose houchola.” 20Yesu kamulongela, “Vizongo wana mhango, na ndege wa uchana wana mvulu zawo, bali Mwana wa Munhu kabule hakusagamiza ditwi jake.”
21Iyagwe mumuja mwa wanahina zake kamulongela, “Mndewa, ndekesa tanhu ngende hazike tata wangu!” 22Komu Yesu kamulongela, “Ngholeleza; waleke wafile wazike wafile wayawo!”
Nyukwanyukwa mbahali
23Kengila mngalawa, wanahina zake wamkoleleza. 24Kulawila nyukwanyukwa kulu muna ibahali, kikomo ngalawa igubikwa na mtibuko wa gamazi; aheyo kakala yawasile muutulo. 25Wanahina wake wamgendela, wamulamsa wolonga, “Mndewa, tuhonye, todidimila!” 26Kawalongela, “Habali mkona woga, mweye wene nhamanilo ndodo?” Bahaja kenuka, kadikomhokela dibeho na ibahali, kukala tuulu. 27Waja iwanhu wakanganya walonga, “Yuno yali munhu wa vilihi, beho na bahali vyomwidika?”
Wene mizuka kwa Wagerasi
28Na heyo viyavikile umwambu mwisi ya Wagerasi, baho wanhu wabili wene mizuka wetinghanila nayo, wolawa kuna gamapanga, wagaga nghani; haduhu munhu yodaha kubita nzila hiyo. 29Avo watowa mizangi wolonga, “Tuna mbuli gani na gweye, Mwanage Mulungu? Chei kwiza kutugaza, hakinavika kikomo chetu?” 30Basi kutali na hewo kukala dale ja nguluwe bwando wodila. 31Ija imizuka wamuhembekeza wolonga, “Uhatulava, tuleke tugende tukengile muja mdidale ja nguluwe!” 32Kawalongela, “Gendeni”. Wamana kulawa, wawengila waja iwanguluwe; mhunde dale jose dihulumuka na mhiko kudigema mbahali, wafa mmazi.
33Wachunga nguluwe wakimbila, wagenda kudiwambo, wazibwililisa ziwawene zose, na zija za waja wene mizuka. 34Avo wambo jose walawa wagenda kumtinghanila Yesu; vuwamuwene, wamuhembekeza yasegele mwisi yawo.
सध्या निवडलेले:
Mateo 8: ZAM75
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
New Testament in Zaramo © United Bible Societies, 1975.
