Matthieu 4

Mebʉ́blá mé Yésʉs

(Marc 1.12-13; Luc 4.1-13)

1Sísǐm mé Nzyɛ̌m ntɔ̂ʼ tô e Yésʉs ɨ́ lʉá. Nye á tô e né gʉ̂ʼ ó, sɔ́ŋ meleme tó bóblo nyê. 2Nye nzě di gʉ̂ʼ melû mekám ménâ, abe e mede. Píe jɔʼ yaá ó nzâ nzě mɛ̂r nyê. 3Mbôblobʉr ntɔ̂ʼ pyâl gúmó Yésʉs á be yɨ́. Nye e né ó: «Yé bé go ó Mwân mé Nzyɛ̌m nó, lɛ́yɨ́ɨ́ mékóʼ mâʼ ó, mé líŋaa mede.»

4Yésʉs ntɔ̂ʼ lɛ́ɛ ó: «Yê cɛmá ɨ́ Mekaná mé Nzyɛ̌m ó: Mʉr, nyé abe e nkul etiʼě njɨ ɨ́ lɔ̌b méde mé omér. Nyě tiʼé ó, lɨ́ ekǎn lɨ́lɛ̂h dí epyâl ɨ́ num mé Nzyɛ̌m lɨ́. »

5Sɔ́ŋ meleme nzě nʉa nyê, nzě tô e né Yerʉ́zalɛm, nkana dí ti yɨ́. Nye nzě tyêl nyé ɨ́ mié mpáh Nzyɛ̌m kʉ́. 6Nye e né ó: «Yé bé go ó Mwân mé Nzyɛ̌m nó, lyáháa, ebě, yê cɛmá ó:

Ebě, nye ódwe bééngeles bé nkul ekamle e go ɨ́ menzɨ̌ mô mɨ́mɛ̂h.

Bé ónkɛ́ɛ gó ɨ́ mebó mɔ́ɔ́, lɨ́ esú ó kʉ̌ gô, wé ayɨ́ bɨm ébɔ̌ʼ lɨ́ ekóʼ. »

7Yésʉs nzě yala. Nye e né ó: «Heʼé! Ebě, yê cɛmá ntémé ó: “Ayɨ́ bóblǒ Dâ, dí Nzyɛ̌m gǒ nyá.”»

8Sɔ́ŋ meleme ntɔ̂ʼ báʼǎ nzě nʉa nyê, tô e né ɨ́ nkɛ̌l ecwɨ̂ʼ lé á be ɨ́ buú jaa kʉ́ lɨ́. Nye nzě lɛ̂ʼle nyé mesí mé sí mɨ́mɛ̂h, le okúm le ogbaa o mésí maá. 9Nye e né ó: «Gó ókúrwo sí, píʼe mpóm ɨ́ mpǒm nyǎm, dwe mé kûm nó, me ódwe gó bisá bîʼ bíbyɛ̂h.» 10Yésʉs ntɔ̂ʼ yala e né ó: «Sátan, duhaa mé ɨ́ mîh. Ebě, yê cɛmá ntémé ó:

“Dwéʼ Dâ, dí Nzyɛ̌m gǒ nyá, kûm.

Go e dwé dúu, njɨ nye omér.”»

11Píe tɨ̂ʼ ó sɔ́ŋ meleme á líʼe nye, tô yɨ́. Beéngeles nzě pyâl, bé ntɔ̂ʼ séa e Yésʉs.

Metááré mé syɛ́ɛ́ mé Yésʉs

(Marc 1.14-15; Luc 4.14-15)

12Yésʉs nzě jóʼǒ mpʉ bé á gbâ Yʉánɛs ɨ́ mbʉʼ yɨ́. Nye nzě báʼǎ tô ɨ́ sí Galilê. 13Nó nyé á duhǒ Nazarɛ̂t, ntɔ̂ʼ tó dǐ Kapernáʉm ɨ́ nkpâh mâŋ. Yé ó ɨ́ sí Zabulôn, bé e Nɛftalî. 14Yé á syɛ́ɛ nó ó, nye lóŋlaa lɔ́ɔ́ mé ngwíha milɔ̌b Ésayie. Nye á boo lɛ́ɛ ó:

15“Bʉr ó Zabulôn, bʉr ó Nɛftalî,

bɨ̌n ó dí nko mâŋ dí yɨ́.

Bɨ̌n ó dí ɨ́ mipɨ̌n mí díbé Yɔrdên.

Bʉr ó Galilê, ɨ́ nko bʉ̂r o bíkûl e biloo dí edi yɨ́!

16Kúl bʉ̂r yé á be lɨ́ entima lɨ́ edúrʉ́ʉ́ yɨ́,

yɨ́ beě myɛ́n ɨ́ bwaʼbwaʼ.

Bʉr bé á be lɨ́ edi ɨ́ nkom nkom bá,

bɨ́ beě myɛ́n lɨ́ epan ɨ́ sí yɔ́ɔ́!”

17Táare ɨ́ jɔʼ yaá, Yésʉs nzě nyɛl étúno ó: «Túmáá gá mikoo e mebébe mɨ́n. Bɨ̌n a dwírá míléme, ebě, Dâ mû ó kúno etyêl Mpóʼo nyé ɨ́ sɔ́má yɨ́n.»

Ompʉ́n bé ésôʼ onâ

(Marc 1.16-20; Luc 5.1-11)

18Ɨ́ lʉ́ʉ́ dʉ́o, mpʉ̌ Yésʉs á be ɨ́ nkpâh máŋ mé Galilê yɨ́, nye nzě bee bʉ̂r obá. Bé á be ó Simon, bé dí ejébě Pétrus nyá, bé e mɨ́ɔɔ́ wé, André. Bé á be ó lɨ́ eguho méntám mɔ́ɔ́ ɨ́ mâŋ maá le edulo mê, ebě, bé á be ó ogwih o méntâm. 19Nye ntɔ̂ʼ lɛ́ɛ e bé ó: «Dúʼóó gá me; me ósâ ó, bɨ̌n díʼee odul o bʉ̂r.» 20Tyé e tyé yaá, bé ntɔ̂ʼ bîr méntám mɔ́ɔ́, dúŋɔɔ nyê. 21Nye nzě laa náǎ, ntɔ̂ʼ bee bwán mé Zebedê obá, Jacques, bé e mɨ́ɔɔ́ wé, Yʉánɛs. Bé á be ó ɨ́ byɛ̂l, bé e sɔ́ŋ wɔ́ɔ́ Zebedê, lɨ́ ekomlo méntâm. Nye ntɔ̂ʼ jébe bê. 22Tyé e tyé yaá, bé ntɔ̂ʼ mɔa, líʼɔɔ byɛ̂l wɔ́ɔ́ le sɔ́ŋ wɔ́ɔ́, ntɔ̂ʼ dúŋɔɔ nyê.

Yésʉs lɨ́ etiʼ mímbêl

(Luc 6.17-19)

23Nó ó Yésʉs á to le etye ɨ́ bigúmó bí sí Galilê bíbyɛ̂h, tô le edwe bʉ̂r milɛ́ʼlá ɨ́ mempáh mínjɨʼla, le etúnǒ Mbɨambɨa Lɔ́ɔ dí edumo e Mpóʼo mé Nzyɛ̌m wɨ́, le etiʼ bʉ̂r o b'á bíle mekpaa mɨ́mɛ̂h bá. Nye á si tiʼ bʉr o bídyɛ̂m bíbyɛ̂h tʉ́ŋlʉ̌ kúl bʉ̂r yé. 24Nó ó kûm nyé á nze myaŋla ɨ́ sí Sirî yɨ́yɛ̂h yɨ́. Bê nzě nze le mimbêl kwá nyé: baá bé á be lɨ́ ejaʼra le meswie le mekpaa mimbi mimbi bá, bʉr o méleme, mé á nzɨnzamra bá, baá bé á sîsile bʉ̂ʼ bá, le mimbʉ́mbʉ́ʼ. Nye nzě tiʼ bê. 25Mentumo me bʉ̂r, mé á be ó lɨ́ edûdu nyé duhǒ sí Galilê, bʉ́ʉ́ duhǒ sí Dekapôl, bâʼ duhǒ Yerʉ́zalɛm le sí Yʉ́da. Bʉ́ʉ́ duhǒ pɨ̌n díbé Yɔrdên kɔ́m nkɛ́ɛ́.

सध्या निवडलेले:

Matthieu 4: ozm

ठळक

सामायिक करा

कॉपी करा