MWANDUSO 5
5
Lukolo lwa Adamu
(1Vipig. 1:1-4)
1Uno uwo msululu wa lukolo lwa Adamu. Kipigiti Mulungu viyamulumbile munhu, kamulumba kamba viyali heyo mwenyego. 2Kawalumba mtwanzi na mbigalo, kawamoteza, na kawakema “Munhu.” 3Adamu viyakalile na milao mia na malongo madatu, kapata mwana mbigalo yalingile kamba heyo mwenyego, na heyo kamgwelela twaga dikemigwa Seti. 4Viyeshile kumulela Seti, Adamu kakala milao mia nane. Kapata wana wayagwe wakitwanzi na wakimbigalo 5na kadanganhika kipigiti viyakalile na milao mia tisa na malongo madatu.
6Seti viyakalile na milao mia na mitano, kamulela Enoshi. 7Viyeshile kumulela Enoshi, Seti kakala milao mia nane na saba. Kapata wana wayagwe wakitwanzi na wakimbigalo 8na kadanganhika kipigiti viyakalile na milao mia tisa na longo dimwe na mibili.
9Enoshi viyakalile na milao malongo tisa, kamulela Kenani. 10Viyeshile kumulela Kenani, Enoshi kakala milao mia nane na longo dimwe na mitano. Kapata wana wayagwe wakitwanzi na wakimbigalo 11na kadanganhika kipigiti viyakalile na milao mia tisa na mitano.
12Kenani viyakalile na milao malongo saba, kamulela Mahalaleli. 13Viyeshile kumulela Mahalaleli, Kenani kakala milao mia nane na malongo mane. Kapata wana wayagwe wakitwanzi na wakimbigalo 14na kadanganhika kipigiti viyakalile na milao mia tisa na longo dimwe.
15Mahalaleli viyakalile na milao malongo sita na matano, kamulela Yaledi. 16Viyeshile kumulela Yaledi, Mahalaleli kakala milao mia nane na malongo madatu. Kapata wana wayagwe wakitwanzi na wakimbigalo 17na kadanganhika kipigiti viyakalile na milao mia nane na malongo tisa na matano.
18Yaledi viyakalile na milao mia na malongo sita na mabili, kamulela Henoko. 19Viyeshile kumulela Henoko, Yaledi kakala milao mia nane. Kapata wana wayagwe wakitwanzi na wakimbigalo. 20Yaledi kadanganhika kipigiti viyakalile na milao mia tisa na malongo sita na mabili.
21Henoko viyakalile na milao malongo sita na matano, kamulela Metusela. 22Viyeshile kumulela Metusela, Henoko kakala mwende wa Mulungu mkipigiti cha milao mia ndatu na kapata wana wayagwe wakitwanzi na wakimbigalo. 23Henoko kakala milao mia ndatu na malongo sita na matano. 24Henoko kakala mwende wa Mulungu, abaho kayangayuka, kwavija Mulungu kamsola.
25Metusela viyakalile na milao mia na malongo manane na saba, kamulela Lameki. 26Viyeshile kumulela Lameki, Metusela kakala milao mia saba na malongo manane na mabili. Kapata wana wayagwe wakitwanzi na wakimbigalo 27na kadanganhika kipigiti viyakalile na milao mia tisa na malongo sita na tisa.
28Lameki viyakalile na milao mia na malongo manane na mabili, kamulela mwana mbigalo. 29Kamgwelela twaga dikemigwa Nuhu,#5:29 Mkieblania Nuhu nhegulo yake kuhozwa moyo. yolonga, “Mwana ino iyo yondayatuhoze imioyo muna isang'hano yetu ngaga ituisang'hana na makono getu muna iisi idukumizwe na MNDEWA.” 30Lameki viyeshile kumulela Nuhu, kakala milao mia tano na malongo tisa na matano. Kapata wana wayagwe wakitwanzi na wakimbigalo 31na kadanganhika kipigiti viyakalile na milao mia saba na malongo saba na saba.
32Nuhu viyeshile kuwa na milao mia tano, kawalela wana wadatu, waichanduso kakala Shemu, abaho Hamu, na hakimambukizo Yafeti.
सध्या निवडलेले:
MWANDUSO 5: Kizalamo
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators