Mattaayo 20
20
Hawweesi ꞌdooꞌdi gosi sabiib hil kahaaggicho miinsan
1“A mehe dakhi goobi Waakh a iꞌdi etoo gosi sabiib khabo. Maantoo baryo ka, irte ꞌdooꞌdi us kireesti gosiis hil kahaaggicho yowte. 2Inkoo icho chilimmeti eti orrahtoo hil haaggiche laguto iskadaageen ka, gos iergate.
3“Geeddi sahaꞌd seyyahti chirdeereet ka toro bahe, reeroo inti sokko ka iꞌdaanu toollo ꞌhele. 4Wihi us reera iyidah, ‘Atin laka nyaama goseeyki sabiib hil kahaaggicha amba wihi mujjume atin gutaa.’ 5ꞌDeerka reer irte.
“Sahaꞌd lihti maalimeet ichoow sahaꞌd saagaal laka toro irte reeroo leeyeede, icho laka irteene gos hil kahaaggicheen. 6Sahaꞌd tomon ichoow koow toro irte reeroo toollo ꞌhele, ‘A iꞌdoh maalinki nool iꞌdaanu itolossaan?’ worsate.
7“Wihi icho ilaabeen, ‘Et nah kireeste mele.’
“Wihi us icho iyidah, ‘Atin laka nyaama goseey hil kahaaggicha, amba mujjum atin gutaa.’
8“Chirri il gelebnowe ka, eti gos leh falfatiisti ween wahe wihi us iyidah, ‘Nyaame ꞌdooꞌdi hil haaggiche wahe, gut. Koloo la reeri an yomboka kireesde kasookhabo ichoowka ki an orey kireesde eleeli.’ 9ꞌDooꞌdi hil haaggicho sahaꞌd tomon ichoow koow lakireeste ebba chilimmeti eti orrahti nool hil haaggiche laguto, lagute. 10ꞌDeerka chirri ꞌdooꞌdi orey lakireeste yamiit, kol us buur ꞌhelo koogyahe. Iꞌdaasenyi ebba geeddi eti orrahtoo hil haaggicho laguto on icho laka lagute. 11Chirri icho chilimme khaatteen ka, eti gos leh leejaakheen. 12Wihi icho iyidaaheen, ‘Reera yomboka lakireeste sahaꞌddoo kalday hil haaggiche, ichoow nahi hol downe orrahe nah tuhum ekka nah gutte.’
13“Iꞌdaasenyi eti gos leh wihi us eti yeyyeedo ilaabe, ‘Eyꞌdo, daganso, an ma atin eyꞌdarin. Inno kootte chilimmeti eti orrahtoo hil haaggiche laguto ma iskadaagin a? 14Wihi wihiine khaadda irda. Wihi an ꞌdoono, ani on eti yomboka lasookireeste geeddi an atin siiche, icho laka siiche. 15Ma imuꞌdan a chaꞌan chilimmeteey iꞌdi an ꞌdoono adeeh? Ommos jeenteti an uur ꞌdabakh iahe kalꞌdarri ikhabtaan?’
16“ꞌDeerka ꞌdooꞌdi ꞌduboote ki oraat yateehe, ki oraat la ki ꞌduboot yateeh.”
Yeesso toro omoottiis koli seyyahnaatteet kayeyyeeda
(Marko 10:32-34, Luuka 18:31-34)
17Yeesso ilkerengeetti weene Yeerusaleem ikoraayi, abattitiisti tomon ichoow lammee ꞌdol iwahe, wihi us iyidah, 18“Inno ilkerengeetti weene Yeerusaleeme iꞌdulla, Ínam Aadam la ꞌdube lagoocha kuhaaniyyohi wewween ichoow tagaammeti amurre dahanohicho lagessa, icho la omoot igoochaan. 19Icho la dahanohi ꞌdooꞌdi Waakh igaran gessaane, lakachaarta, laajja ka doochaane, massalaaba kakaahaan. Ibeenki seyyahnaatteet ka omoot lakasookahcha.”
Yeesso wori enenyet liifalo ꞌdooꞌd abcha
(Marko 10:35-45)
20ꞌDeerka abar yeele Sebedaayo yeeletiche khabtaayi Yeesso itimiyye, ortiis ka jilbo il kaguꞌdubte ichehi wohoo liiyeelo ꞌdoontaa.
21Yeesso la wihi us worsate, “Mehe ꞌdoonta?”
Iche la iitatte, “Wihi an ꞌdoono, berri goobaah ka, yeeleteeyta lammee koo ankaahki miigeet siiche a orronti, koo la ankaahki gurro siiche a orronti.”
22Yeesso la wihi us icho iyidah, “Atin wihi atin daahtaan wihiche ma garattaan. Atin maanta kokkoobi sinayyoote an dowwanoha ka soodamo damin a tabuuꞌdiin?”
Wihi iche ilaabte, “A nabuuꞌd.”
23Yeesso la wihi us iyidah, “Rumanka, kokkoobeey a kadaantaane, iꞌdaasenyi eti ankeeyki miigeet ommos ankeeyki gurro orronti ani mee goocho. Meelassa a ti ꞌdooꞌdi Aabbaheey iyeele.”
24Abattiti addane tomone, chiꞌiche wahaas daagte ka, yeeletaas lammeenye isleedelatte kahollowte. 25Yeesso isiwahe, wihi us iyidah, “Saggi atin igarattaan u, weynaanti ꞌdooꞌdi Waakh igaran saggi suujenye ꞌdooꞌd idakhtaane toro ewweenkicho la wihi ꞌdooꞌd yeelo icheeka. 26Atin ka iꞌdaas mee. Eti tuummane goytiin ka weynaan ꞌdoono, falfatiin a yitaahe. 27Eti tuummane orey ꞌdoono la, bowꞌdatiin a yitaahe. 28Saggaas on u, Ínam Aadam ma imaatane ꞌdee enenyet usu ma ifalo, iꞌdaasenyi a yimiyye ꞌdee us ꞌdooꞌd ifala, rubeytiis diiba, ꞌdee enenyeti ittaawe mogti uskeelicho iguta.”
Yeesso et lamma indo laa samaacha
(Marko 10:46-52, Luuka 18:35-43)
29Chirra icho ilkerengeetti Yeeriko kabahaan ka, ururoo buure usu raahe. 30Reeroo lammeenye indo laa jit afiissa fiddiya, chirri us Yeessohi intaas leeyamiit daage ka, riire, “Kamur, Ínam Dawuud, uur nah isoonugleyso,” yidah.
31Urur la leejaakhe, “Gammadicha,” iyidah. Iꞌdaasenyi geeddi kootteet laka ꞌdirihiis riireene, “Kamur, Ínam Dawuud, uur nah isoonugleyso,” yidaaheen.
32Yeesso tolossate icho wahe, “Mehe atin iyeelo ꞌdoontaan?” worsate.
33Wihi icho ilaabeen, “Kamur, nahi il agarro ꞌdoonna.”
34Yeesso la uur isoonugleeste, indohicho ꞌdaare. Chirraas on il argeene usu raaheen.
सध्या निवडलेले:
Mattaayo 20: rel
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2018, Wycliffe Bible Translators, Inc. All rights reserved.
