Акълова 9

9 къаьм

Аᵸкъиллъина аьнтлъина

1Аᵸкъиллъила гьинил билӀо йо̄йо,

гьолълъо билӀол алӀна гьем къаьлӀлӀо̄йо.

2Гьулиъ гьаьйман мухойо, гъино гитӀийо,

истӀоллийакьа кьодо кен гулло.

3Гьолълъо гъаьрабашла ме̄йо,

шагьарлила бишун гьоъова мицакьана мекьена:

4«Кьолла̄ сукӀоба, кӀаьйна муьхона, гугьу гьотта̄», – лӀо нисона илӀал.

Аᵸкъло гаьчча̄хъа аᵸкъиллъила нисойо:

5«ГьолӀоъ гугьна, диела истӀолийакьас баьбана муьхъа,

до гитӀийо гъинона хулӀа.

6Аьнтлъина йечаннегьна, бова миже оьмро,

аᵸкъло-насигьатлила гьидлакьа̄ мекье-гугь миже!»

7Йаьгь-ламус гаьччо сукӀо кантӀизи овал уьᵸхолъда,

гьолцоъкьа̄ йаьже йиᵸхъос,

лъаькъейо сукӀо кӀетӀа гьид оᵸкъолал уьᵸхолъда,

гьолцоъкьа̄ чикейо йаьже йиᵸхъос.

8Йаьгь-ламус гаьччо сукӀо кантӀизи ова̄къа –

гьолцол ми цӀодоло эгас;

аᵸкъилаб сукӀо кантӀизи ова – дибо къимат бо̄с.

9Аᵸкъилаблил аᵸкъло нилӀа – гьули йилӀазу аᵸкъилаб ахъас,

муъмин-сукӀо цӀодор ова – гьолцос лъай телилъас.

10БетӀергьан Аллагьлихъа гьичӀейолъи – аᵸкъиллъилас бигъа гей,

Кьодда̄л йакӀо нилӀийолъи – цӀодорлъи гей.

11Дӣдда̄ла – аᵸкъиллъиладда̄ла дибо оьмролаш водбо телибалъца,

дибо оьмро бихалолъца.

12Ми аᵸкъилаб зогъда, гьули аᵸкъиллъина дулзу пайдалил гей,

йаьгь-ламус гаьччо сукӀо ми зогъда гьолълъос акъуба-къарилъина дулзу гей.

13Аьнтлъи гей аᵸкъло гаьччо ийодда̄с аьдамлъийо жо,

йилӀа хъуй-гьайлиъ йахъцас, жу йохал йогъо гаьччо гьула̄зу аᵸкъло-лъай гаьччо аьдам.

14Аьнтлъи гьинила кавлила маьгьакьа гисда̄ къе̄на йечена,

шагьарлила бишун гьоъова мицакьана йеᵸкьена:

15-16«Кьолла̄ сукӀоба, кӀаьйна муьхона, гугьу гьотта̄», – лӀо нисона илӀеш гьолълъо гьинила гьид мекьецала аьдамла̄хъана,

гьула̄зу йаᵸкъойцӀова гьидлакьа̄ мекьецала сукӀоба̄хъана.

Аᵸкъло гаьчча̄хъа гьолълъо нисос:

17«Йуᵸцойо кен нийа̄ йахъца,

бегалечӀе муьхъийо баьбана гемояб бахъца», – лӀо.

18Кьолла̄ аьдамла̄л йикъаъас

аьнтлъила билӀоъ эᵸдобакда бувагъоцаслъи,

гьулиъ эᵸдобакийа̄на журжагьлила оᵸкьаъ гей.

सध्या निवडलेले:

Акълова 9: KapPROLUK

ठळक

सामायिक करा

कॉपी करा

तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन

Анкълова, Лукаबद्दल अधिक जाणून घ्या

Акълова 9