Акълова 11

11 къаьм

1Гьилла-макролас сайцӀорийа БетӀергьаллил рихарабла гей,

ахо йаᵸсалабацас гирийа Гьолцол йа̄цца.

2Букъа аьмаллил инжитлъи-гьаькъирлъи йиᵸхъос,

гьеренлъи-гьаьлимлъилал аᵸкъиллъи йоᵸкъос.

3Гьидела йакӀо йаᵸцо̄лъила ритӀухъабла сукӀоба кӀетӀа гьид бейажеш,

боважал ба̄хъаъцала̄ла хийанатлъила жуво̄лзу гьалаг бовагьца.

4БетӀергьаллис симо бӣйа водиъ, бечелъила комак боваъас,

ритӀухълъила хеллиъис тиса уьᵸхолча.

5ЙакӀо йаᵸцова сукӀос ритӀухълъила гьино биджи йо̄с,

лъаькъейа̄ аьдамлана гьидела кешлъила бувагъолца.

6Муъмин-сукӀола ритӀухълъила гьули хъосар о̄с,

хиянатабла аьдамла йакӀиъ гаьгьийа гьавали гьалаг бовагьца.

7Лъаькъейо сукӀо угъолъ, гьолцос зукъойо кул-къас аьдада бахъца,

гьинила къуват-жанлиъкьа̄ йиᵸхъал йакӀкьа гаьгьийо жо йолъона йеᵸкьеш.

8Муъмин-сукӀо балагьлиъис тиса уьᵸхош,

лъаькъейо сукӀо гьолцола мицаъ балагьлиъ кези ахъца.

9Капураблила сикӀа мадугьал угъолца,

Аллагь икъелцала илмола муъмин-сукӀо хъосар о̄с.

10Муъмин-сукӀокьа гьарзалъи-баркат кьодо йоᵸкъолъ,

шагьарзу рази бахъца, лъаькъейо сукӀо угъолъ, рохел бахъна, илӀелабас.

11Муъмилла̄ла баркатликьалакьа̄ шагьар машгьур бахъца,

лъаькъейа сукӀоба̄ла сикӀа̄ гьоло бугъолца.

12Аᵸкъло гаьччо сукӀо мадугьалликьа лъоᵸвас,

аᵸкъил сикӀо йиᵸцонна эчеш.

13Мицахъалли сукӀола аьдамла̄ш божилъи йугъолца,

божилъи гагьийа сукӀо балъголъи гьиниъ йохца.

14Насигьатла зовагъаъда халкъ пасад бахъца,

аᵸкъилла дӣсбалъийодола тушмалла̄кьас мокъоцас гьинкъи даьгьаб гей.

15СукӀоллабза гьинкьа кьодо сукӀос жо йохда гьолцо гьинилзу кешлъи йо̄с,

ко̄ йохна йаьже нилӀийолъи йатӀеэшлал гьинкъи гаьъа.

16ЙакӀо кӀетӀа ийодда̄ла аьдамлил кӀетӀо ца̄ᵸ-рец йиᵸхъос,

йакӀо чикейа бикинчийал гьоᵸс бечелъи йиᵸхъос.

17ЙакӀо кӀетӀа сукӀо гьинил пайда-хайир насиб бо̄с,

йакӀо чикейа сукӀо гьинкьа кьодо балагь кьисас.

18Кешлъилаъкьа̄ михъойо гьаьрамаб хайир божи гаьччо бахъца,

ритӀухълъи йиᵸжецала̄с муькъо тели йахъцалакьа божал ахъца.

19ЙакӀо йоᵸкъойо ритӀухъаб сукӀо чӀаго гьихлъос,

кешлъилагъой муьгъалӀ эᵸкьейал хел кьодо мокъос.

20ЙакӀиъ гьилла-макро гаьгьийо сукӀо БетӀергьаллил цӀодоло эгас,

йакӀо йаᵸцона уьᵸхо-аьᵸхейакьа Гьули рази ахъца.

21ЙакӀо йоᵸкъонна нисона йахъца чикейо сукӀо тамбигьлиъис эᵸццакаъаслӀо нисона,

амма муъмин-сукӀо хъосар ахъца.

22Кьухъийо, амма аᵸкъло-пикро гаьччо ийодда̄с аьдам, йеᵸлъейо йахъца

булӀила ма̄ᵸлъ мехелла меседлила кӀоьййалъ.

23Муъмилла̄ гьаьракат багъос гьоᵸс кӀетӀослъи йовал,

лъаькъейа сукӀоба̄ла бикье-баькьейолъила БетӀергьаллис симо бийиллис.

24Сид сукӀо ко̄ йеᵸцакӀна нилӀца садакъалил ниццас жо,

гьула̄зу гьолцос бечелъи жена телилъца,

бацосола ко̄ йилӀакъонна йохца – гьинил мискинлъилал.

25Сахаватаб сукӀос кӀетӀо оьмро бахъца,

бадлос оᵸх йоцӀилла сукӀосна оᵸх йоцца.

26Букъо багьа бахъаллъид баьба муьгъатта̄ цӀуми бо̄ва сукӀол халкъила наьъана ницца,

амма гьоло мисоцала сукӀола матӀакьа баркатлис мугьро бахъца.

27КӀетӀослъи йовал икье-аькьецас сукӀо ахъца Аллагьлиъкьа̄ баркат мизцас сукӀо,

амма кешлъи йиᵸзцала сукӀокьа кьодо кешлъи йоᵸкъос.

28Бечелъилал михъа̄ тил тухъилло сукӀо лӀийода̄ экца,

муъмин-сукӀола мицалъ боцӀийо кьоᵸва бахъца.

29Гьинис хъизан бугъоллал залӀо насиб йахъца,

аьбдаллилӀо нисода аᵸкъиллил лагълъи йовас.

30Муъмин-сукӀос аьмал оьмролаш хоьхо гей,

аᵸкъилабли сукӀо аьдамла̄ш йакӀода гьиндойда̄ кьисабас.

31Муъмин-сукӀол дунналликьа шапакъат михъос,

лъаькъейа сукӀоба̄нна мунагьла йовагьцала̄нна гьидел мехейо азаб-акъуба михъос.

सध्या निवडलेले:

Акълова 11: KapPROLUK

ठळक

सामायिक करा

कॉपी करा

तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन

Анкълова, Лукаबद्दल अधिक जाणून घ्या

Акълова 11