Kucangtsi 26
26
Ishaku ti Uwa-wu Rebeka Ru yi Gerar
1Kiye wune, rimenn pu uten pangma ti rimenn pu kiye Ibrahim. Ama Ishaku ru yi Gerar uwog Abimeleki, Ukwe ti Filisti. 2Yaweh tso risu-wu uwog Ishaku, u ri baa, “Si-fu yi uten Ejib be. Som ti uten ti ame u tatso fu. 3Som uten wune. Ame u te fu ta tetso, u nde fu itinyang. Ikyaen ti, ame u sa meme riben wune na fu ti rishi-fu, u kumunn unju ti yer-m ti ame yer te itse-fu Ibrahim. 4Ame u nda rishi-fu mbae jwunn, u jwunn pangma aswer ti ta apupwen. Ame u nda ba meme riben wune. Meme ande ti utense u tu itinyang ru ye uwog-ba. 5Ikyaen imi Ibrahim fxen ira-m, u ye su ira ti ame ri te wu. Awu ye su icwe-m, u nde wande ti kusen ti fwa-m, u putsa iken ti kwen-m.”
6Ikyaen yine Ishaku som ti Gerar. 7Kiye ti ande ba atang rang wu ira risu uwa-wu, awu ri baa, “Awu si mbiya-m,” ikyaen ti, awu ku kyen ikyenricwu ti awu u ri baa, Rebeka na si uwa-wu. Awu ku kab baa, ande ti uten atang na u wen wu risu Rebeka, ikyaen ti awu waen unda timambe. 8Ti Ishaku som atang uwae kiye yang-yi, Abimeleki Ukwe Filisti sae ayib ruye kiye kusog-wu, u sae Ishaku ku fung uwa-wu Rebeka. 9Tiri, Abimeleki kunn Ishaku, u ri baa, “Unda wu ne si uwa-fu. Imi ti nde afu ri baa, awu na si mbiya-fu?” Ishaku ri te wu baa, “Ame tang ti ame a ri baa, awu na si uwa-m, ame u shanum ti unyang-m ikyaen-wu.” 10Abimeleki ri baa, “Ayine si imi ti afu nde te ti? A baa unde iki na nae te pu wu uwa-fu, afu ú shir ira titibi si pu fu ati.” 11Ikyaen yine Abimeleki fa ande kusen baa, “Unde ti a ndeshi unde wune, ko uwa-wu, unde wu u tu kang iticwu.”
12Ishaku tom ritom usang wu, ama u bunn wuci ko timambe. Yaweh nde wu tinyang, 13awu kafe unde ti rifunn. Awu tu rifunn ko pu ku fufa ama u kafe unde ti rifunn tiyang. 14Awu si te iwen ti indag ti apyi ko timambe, ama ande ti Filisti ku tsinn wu kitsinn. 15Ikyaen yine, ande ti Filisti byangkyi meme kukwae ambyi ti apyi itse-wu Ibrahim mum kiye ti awu ta ti unyang, ama u kwae isa, u njikyi yi. 16Ama Abimeleki ri te Ishaku baa, “Nwunn uten-ti ike, be afu kpag skeb pu fu ati.” 17Ikyaen yine, Ishaku nwunn, u ka sim afug-wu yi kubxab ti Gerar, u nae atang. 18Ama Ishaku kwae nyang ribung yi ti a mum kiye ti itse-wu Ibrahim ta ti unyang. Ribung yi, ande ti Filisti njikyi yi isim ti Ibrahim cwu pu wu. Ama Ishaku kunn yi ti rinyi ti itse-wu fa yi ti kucang.
19Amaa kiye ti apyi Ishaku mum uwae kubxab atang, u ka tu isatsub ti ku kyeb tso riben, 20ande ti ku shi asinn na Gerar nwunn kutxwa ti txwa ti ande ti ku shi asinn na Ishaku risu ribung wu baa, “Ribung wune si ana-ti.” Ikyaen yine a ku kunn ribung wu baa, Eseg. Imbyi Eseg baa, kutxwa.
21Aba mum kyi ribung tishe, ama ande ba ba ku txwa kyi kutxwa risu-yi cwucwo. Ikyaen ayine Ishaku kunn ribung wu baa, Sitina. Imbyi Sitina baa, kufúm. 22Awu nwunn kyi u ka mum ribung tishe, ama unde iki mbub-wu unju cwucwo be. Awu fa rinyi-wu baa, Rehoboti, ti ku tatso baa, “Tine Yaweh nda pu wu ati riyae, ati u ru risu riben wune.” 23Awu nwunn atang, u tso yi Beyersheba. 24Utitang wu, Yaweh tatso risu-wu uwog Ishaku, u ri baa, “Ame si Rimam na itse-fu Ibrahim. Kyen-fu ikyenricwu be, ame te fu ta tetso. Ame u nde fu itinyang. Rishi-fu u mbae jwunn, u jwunn timambe, ikyaen na upyi-m Ibrahim.” 25Ishaku mbye kuta atang, u ku fen Yaweh. Atang awu sim afug, ama apyi-wu bag ku mum ribung tishe.
Ishaku ti Abimeleki Sī Unju Tetso
26Kiye wune Abimeleki, ti Ahuza, unde ti ku myae ira te wu, ti Fikoli, Ukwe rika-wu, nwunn Gerar ru yi uwog Ishaku. 27Ishaku rang ba baa, “Imi ti pu ni ba uwog-m? Si-yi ani ti pyir-m, u rwae shag m be a.”
28Aba ri baa, “Ati nung pu ti paenine baa, Yaweh na te fu na ta tetso. Ikyaen yine, ati kab baa, ayi na nyang ti ti na u te fu sī unju tetso, u ben uben. 29Ben uben baa, afu na u nde-fu ati itibi be, pangma ti ati nde-ti afu ira titibi be, u tē fu ru ti unju tinyang. Tine, Yaweh nde pu wu afu itinyang.” 30Tiri Ishaku nde ukwab na ba, aba ci u ngwa. 31Ti ucwefam kiskinn, ande ba si unju te uben ti ben te Ishaku. Ishaku tē ba ti unju tinyang, ama aba ru-ba.
32Ti usir wu, apyi Ishaku ba ri te wu ira risu ribung ti aba ku mum baa, “Ati tu pu ti ambyi.” 33Awu kunn ribung wu baa, Shiba. Ne iken ti nde aba kunn rinyi uten atang baa, Beyersheba#26:33 Imbyi Beyersheba si Rubung Uben ti Ben. ba sang ti yaka ne.
34Kiye ti Esuwa nde asang mae ifaen, awu mbe anyisu anda ti Hiti ifaen ti rinyi-ba si Judit, umbae Beyeri ti Basemati umbae Elon. 35Anda ba shir utob ti byir na Ishaku ti Rebeka, si-yi ti ti ri be.
सध्या निवडलेले:
Kucangtsi 26: kubNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Wycliffe Bible Translators, Inc. and
© The Nigeria Bible Translation Trust 1995, 2017