Matiyu 10

Zang shonang kopi tu ziti ɓɔɔ Yeesɔ shɛ̃ɛrɛ ɓɛɛ

(Mar 3:13-19; Luk 6:12-16)

1A Yeesɔ ɓaa nyaa ka zang ɓɔɔ ri mantɛ vuu ka bii ɓiɓɛ ɓɔɔ ri kopi tu ziti ɓɛɛ, nɛɛ ri arɛ. A á ri naa suru shi kpang nwangsɛnang, nɛɛ zɔ̃ng kɔnang piti masɛnang, nɛɛ vuu ɓɔɔ palɛ zang ka bii nandon.

2Zang kopi tu ziti ɓɔɔ Yeesɔ shong ri, zang ɓaa nung ɓarɛ nɛɛ, Siman ɓɔɔ zang ti ɓaa wu nɛɛ Bituru ɓɛɛ. Wukɔ tĩng shɔɔnang, nɛɛ jaa niiɓɛ Anduru, a ɓɔɔ Yakub jaa Zebedi nɛɛ jaa niiɓɛ Yɔhana, 3nɛɛ Filibu, nɛɛ Batolomi, nɛɛ Tooma, nɛɛ Matiyu ɓɔɔ ta saka tipi ɓɛɛ, nɛɛ Yakub jaa Alifaya, nɛɛ Tadayu, 4nɛɛ Siman ɓɔɔ kasɛ nɛɛ tipi ɓarɛ wu gbãayu nɛɛ knti kpang ɓɛɛ, nɛɛ Yahuda Isikariyoti ɓɔɔ nyɔ yuu Yeesɔ, ka naa zang ɓɔɔ ri kasɛ ruu Yeesɔ kpang ɓɛɛ.

Ruu ɓɔɔ Yeesɔ kɔɔ zang ɓɔɔ wu shong ɓɛɛ

(Mar 6:7-13; Luk 9:1-6)

5A Yeesɔ shong zang kopi tu ziti keɓe kati. Kɔɔ ri tɔɔ, “Nɔɔ daa ka nɔng zang ɓɔɔ ri zang Yahudi kpang kɔ shɛ̃ɛning. Nɔ́ɔ ti daa gari zang Samariya gbete kpang. 6Nɔɔ daa ka bii zang Isirela ɓɔɔ ri ning gbalang katɔ kɔ shɛ̃ɛning. 7Nɔɔ nɛɛ daa kana, nɔɔ kɔɔ zang Ruu Laa nɛɛ, ‘Kpanti roonang Laa a naabm tɔ.’ 8Nɔ́ɔ ti masɛ zang kɔnang, nɛɛ zang ɓɔɔ vuu bii shaa ri katɔ ɓɛɛ. Nɔ́ɔ ti wisi zang ɓɔɔ ri vɔ katɔ paa. Nɔ́ɔ ti nwangsɛ suru shi kpang. Nɔɔ tà waati, nɔɔ á zang doo waati kɔ. 9Nɔ́ɔ daa nɛɛ saka ka baajaa kpang. 10Nɔ́ɔ ti tuu duku nɛɛ fɔ̃ɔrɔ nɛɛ koodoo, a ɓɔɔ labalang ka naa kpang. Ka ruu ɓɔɔ, zang sɔ̀ɔrɔ́ zang shonang doo ɓi katɔ ɓɛɛ.

11“Gari bang nɛɛ ɓɔɔ tɔkɔlɔng ɓɔɔ nɔɔ dàá kagn piti, nɔɔ hɛ̃ɛ nɔng shɔnzang tɔ̃ɔ ɓɔɔ kagn ɓɛɛ. Tɔ̀ɔ, nɔ́ɔ daa nwang ka gãa ɓiɓɛ, diki ɓɔɔ nɔɔ dɔ̃sɔ ka nɔng ɓɔɔgn ɓɛɛ, wu a nɛɛ mani. 12Nɔɔ nɛɛ daa kana yeti gãa, nɔɔ jee zang nyaa nɛɛ, ‘Nɔɔ nwáng tɔ̃ɔ.’ 13Zang gãa ri nɛɛ ta nɔɔ nɛɛ yeti gbete, naa nwáng ditɔ nɔngkɔ. A zang gãa nɛɛ ta nɔɔ nɛɛ yeti gbete kpang, naa nwáng nɔngkɔ kpang. 14Zang gãa nɛɛ gari ɓɔɔ ri nɛɛ bɛ̃ɛ nɔɔ nɛɛ nyaa ɓɔɔ nɔɔ rang piti, nɔɔ nɛɛ dɔ̃sɔ kaa gari ɓɔɔgn, nɔɔ waa zũng tapuru ɓɔɔ ka doo manɛ. (Nɔɔ kɔɔ ri nɛɛ, Ruu ɓuru hãa ɓi tɔɔgn nɛɛ nɔɔ kpang, tɔɔ nɔɔ daayi.) 15N kɔ̀ɔ́ nɔɔ ruu ɓɔɔ niizang kɔ nwani, ka diki ɓɔɔ Kpanti Laa naa jɛ̃ɛ zang ruu, jĩng dannang ɓarɛ naa ɓa ɓɔɔ zang gari Sɔɔdom nɛɛ Gomora katɔ.

Jĩng dannang ɓɔɔ a ka tĩng ɓɛɛ

(Mar 13:9-13; Luk 21:12-19)

16“Kãntang keɓe, n shong nɔɔ naa mɛ̀ɛrɛ́ ka teteng zaa wisi. Ka ruu nɔngkɔ, nɔɔ zũng katɔ naa sɔkɔ, nɔɔ ti nwang zang tɔ̃ɔ naa koro ɓɔɔ palɛ zang vuu ɓi kpang ɓɛɛ. 17Nɔɔ gãng jĩng kagn, ka ruu ɓɔɔ, zang naa yi nɔɔ ditɔ, zang daa nɛɛ nɔɔ ka tĩng zang ɓɔɔ ri jɛ̃ɛ zang ruu ɓɛɛ, ri ti naa nyɔ nɔɔ nɛɛ gbãa ka gãa zɔɔ kpalɛnang ɓarɛ. 18Zang ti naa gɔ̃ nɔɔ, zang daa nɔng ka tĩng rɛɛ gɔmna nɛɛ rɛɛ Kpanti, ka ruu mɛɛ. Nɔɔ ti naa rǎng ri yee Laa ditɔ nɛɛ zang ɓarɛ nandon. 19Zang nɛɛ daa tɔ nɛɛ nɔɔ, nɔ́ɔ rɛ̃rɛ naa ɓɔɔ nɔɔ daa kasɛ zang nyaa, nɛɛ vuu ɓɔɔ nɔɔ daa kɔɔ ɓɛɛ kpang. Ka ruu ɓɔɔ, Kpanti Laa naa a nɔɔ ruu ɓɔɔ nɔɔ kɔɔ ditɔ ka laa kaɓa ɓɛɛ. 20Nɔkɔ daa rang yee kpang, ɓi Suru Daa manɛ kɔ daa rang nɛɛ nyaa manɛ.

21“Shɔnzang ti naa a zang ɓeezung ditɔ, zang nyɔ vɔrɔ. Daa jaa ti naa a zang jaa ɓiɓɛ ditɔ zang nyɔ vɔrɔ. Wujɛ ri ti naa shíi varɛ ditɔ nɛɛ daa ɓarɛ, ri ti a zang daa ɓarɛ, zang nyɔ vɔrɔ. 22Zang piti ri naa bɛ̃ɛ nɔɔ ditɔ, ka ruu nung mɛɛ. Shɔnzang ɓɔɔ nɛɛ mã danggn sasak, wukɔ naa wɔrɛ. 23Zang nɛɛ dang nɔɔ jĩng kana ka gari gbete, nɔɔ yurɛ nɔ́ɔ daa ka gari ɓɔɔgn. N kɔɔ nɔɔ ruu ɓɔɔ niizang kɔ nwani Jaa Shɔnzang naa arɛ, bɛ̀ɛ́ nɔɔ hangsɛ nyaa shonang manɛ palɛnang gn gari zang Isirela nandon kpang.

24“Zang ɓɔɔ mantɛ vuu, ɓa zang ɓɔɔ tusu wu vuu kpang. Zang shonang ti ɓa dabang gãa ɓiɓɛ kpang. 25A zang ɓɔɔ mantɛ vuu ka bii zang, nɛ̀ɛ́ nwàng naa zang ɓɔɔ tusu wu vuu, wukɔ tɔ̃ɔ. Zang shonang nɛɛ ti nwáng tɔ naa dabang gãa ɓiɓɛ wukɔ tɔ̃ɔ. Naa zang ɓàa zang bang gãa nɛɛ Bahazabu, kpanti suru shi kpang, zang naa ɓáa zang ɓɔɔ ka gãa ɓiɓɛ ɓi ka biya? (Ɓɔ̀ɔ́ ɓarɛ naa ɓá ɓɔɔ ɓiɓɛ ɓi katɔ.)

Zang ɓɔɔ nɔɔ káa vɔrɔ ɓiɓɛ ɓɛɛ

(Luk 12:2-7)

26“Ka ruu nɔngkɔ, nɔɔ kaa vɔrɔ ɓarɛ kpang. Vuu ɓɔɔ zang palɛ, a zang màkɛ̀ piti, Laa naa nwangsɛ ditɔ. Ruu ɓɔɔ zang ti kɔɔ nɛɛ nwĩiri, zang naa tãa ditɔ nandon. 27Vuu ɓɔɔ n kɔɔ nɔɔ nɛɛ nwĩiri, nɔɔ dita, nɔɔ daa nwangsɛ ka dalɛ. Ɓɔɔ n ti ɓɔɔlɔ nɔɔ nyaa katɔ, nɔɔ ti daa váng ka yuu gãa nɔɔ kɔɔ zang. 28Nɔ́ɔ kaa vɔrɔ zang ɓɔɔ ri nyɔ gãmpãng bii, a ri zunung ɓɔɔ ri nyɔ suru bii kpang ɓɛɛ kpang. Nɔɔ Kaa vɔrɔ Kpanti Laa ɓɔɔ nyɔ gãmpãng bii nɛɛ suru bii piti, ka nɔng ɓɔɔ waa ning ɓi jong kpang ɓɛɛ. 29Zang màlɛ́ jaaning tɔkɔsisi wu ziti kɔpɔ gbete kpang ya? A naa Daa manɛ nɛɛ kasɛ katɔ kpang ɓɔɔ vɔ kagn ka teteng ɓarɛ gbete kpang. 30Nɔɔ zi ta, Laa gã̀ suuyuu manɛ kɔ ka yuu ɓee, ɓi katɔ nandon. 31Ka ruu nɔngkɔ, nɔ́ɔ kaa vɔrɔ kpang, ka ruu ɓɔɔ nɔɔ ɓa tɔkɔsisi ɓɔɔ dɔɔli katɔ ɓɛɛ.

Rúu tùurù yusɛ̃ɛ ka ruu Yeesɔ kpang

(Luk 12:8-9)

32“Naa zang ɓɔɔ kɔɔ ka tĩng zang nɛɛ wu zang mɛɛ, n ti naa kɔɔ doo nɔngkɔ ka tĩng daa mɛɛ ɓɔɔ ka lapa, nɛɛ wu zang mɛɛ. 33A naa shɔnzang ɓɔɔ nɛɛ laa nyaa mɛɛ ka nɔng zang, n ti naa laa nyaa ɓiɓɛ doo nɔngkɔ ka tĩng Daa mɛɛ ɓɔɔ ka lapa ɓɛɛ.”

Vuu ɓɔɔ Yeesɔ atɛ ɓɛɛ

(Luk 12:51-53; 14:26-27)

34“Nɔ́ɔ tɔɔ kpang nɛɛ n arɛ, nɛɛ tɔ̀ɔ, nɔɔ nwang ka nɛɛ zɔɔ tɔ̃ɔ ka koo keɓe kpang. N à m zang basɛnang kɔ jong.

35“N arɛ, nɛɛ n naa,

kpaa m yuu daa jaa kɔ jong

nɛɛ jaa ɓiɓɛ ɓɔɔ varɛ,

zang soro nɛɛ niiɓɛ.

Ń ti kpaa shɔngkpeng ɓɔɔ soro yuu nɛɛ ɓeekpeng ɓɔɔ soro.

36Zang ɓɔɔ ri ka yeti gãa zang,

rikɔ naa raa zang ɓɔɔ ri shing jĩng nɛɛ wu kpang kaa jong.

37“Shɔnzang ɓɔɔ kasɛ ruu diiɓɛ, kɔ niiɓɛ, ɓá ɓɔɔ wu kasɛ m katɔ, daa naa ɓɔɔ wu dũng m kpang. Zang ɓɔɔ ti kasɛ ruu jaa ɓiɓɛ ɓɔɔ varɛ kɔ ɓɔɔ soro, ɓá ɓɔɔ wu kasɛ m, daa naa ɓɔɔ wu dũng m kpang. 38Zang ɓɔɔ nɛɛ kasɛ nɛɛ wu dang jĩng ka ruu mɛɛ kpang, daa naa ɓɔɔ wu dũng m kpang. 39Zang ɓɔɔ nɛɛ kasɛ ruu suru bii ɓiɓɛ, walɛ ɓi kpang. A zang ɓɔɔ mãlɛ́ yuu ɓiɓɛ ka ruu nung mɛɛ, wukɔ naa wàlɛ́ jong.”

Vuu ɓɔɔ Kpanti Laa shìng zang ɓɔɔ ri dũng wu ɓɛɛ

(Mar 9:41)

40“Zang ɓɔɔ ri nɛɛ tà nɔɔ, ri ta ɓi nkɔ. Zang ɓɔɔ nɛɛ tà m, ta ɓi zang ɓɔɔ shong m ɓɛɛ. 41Zang ɓɔɔ nɛɛ ta zang nyaa shonang Làa, ka ruu ɓɔɔ, wu ɓi zang nyaa shonang Laa, ti naa ta ɓi doo vuu ɓɔɔ Laa shing zang nyaa shonang ɓiɓɛ kɔ. Zang ɓɔɔ nɛɛ ta zang tɔ̃ɔ ka ruu ɓɔɔ, wu ɓi zang tɔ̃ɔ, ti naa ta ɓi doo vuu ɓɔɔ Laa shing zang tɔ̃ɔ kɔ. 42N kɔɔ nɔɔ ruu ɓɔɔ niizang kɔ nwani, zang piti ɓɔɔ a jaa gbete ka teteng wujɛ seseere keɓe mii valabm, ka ruu ɓɔɔ, jaa keɓe mantɛ vuu ka bii mɛɛ ɓɛɛ, zang kaɓa naa ta vuu tɔ̃ɔ ɓɔɔ Laa shing wu ɓɛɛ katɔ.”

सध्या निवडलेले:

Matiyu 10: mzmNT

ठळक

सामायिक करा

कॉपी करा