Tourat 1: Foyda Nama 25
25
Bibi Katurar goro Hozrot Ibrahim (a:)or ḳandan
1Ibrahime Katura namor aro eḳzon beṭire bia ḳorsla. 2Tan feṭo Zimron, Zokshon, Modan, Madian, Zishboḳ ar Shuhar zonom oisil. 3Shaba ar Dodan oila Zokshonor aolad. Ashuri, Loṭushi, Liummi oḳol oila Dodanor aolad. 4Madianor aolad oila Oifa, Efor, Honuk, Obid ar Ildaya. Era hoḳol-u Katurar aolad. 5Ibrahime tan hoḳolta Isʼhakre dilaila. 6Oile tain zinda taḳte-u, tan heshor biar aolad oḳolre-o alga alga dan ḳoria, erare Isʼhakor loge na rakia fubedi, fubor desho faṭai dila.
Hozrot Ibrahim (a:)or inteḳal ar ḳoybor
7Ibrahim eḳ-sho fosottoir boros basila, Allae tane otodinor hayati disla. 8Tain murobbi oia furafur buṛa boyosho inteḳal ḳorla, ar tan baf-dadar gese gia azila. 9Heshe tan fua Ismail ar Isʼhake Momri ṭaunor fubedi, Hiṭṭi Shuhoror fua Ifrunor zomir Moḳfela-guhat, tanre dafon ḳorla. 10I zomiḳan tain Hiṭṭi oḳlor ges tone loisla. Ono-u tan bibi Sayrare ar tane dafon ḳora oise. 11Ibrahimor moutor bade Allae tan fua Isʼhakre borkot nazil ḳorla. Tain Ber-Lohoy-Ruir gese roita.
Hozrot Ismail (a:)or inteḳal ar ḳandan
12Ou oilo Ismailor ḳandanor boyan. Bibi Sayrar bandi Mishori Hazerar feṭo Ibrahimor fua Ismailor zonom oisil. 13Ou oilo Ismailor aolador nam ar gusṭir boyan. Tan boṛo fuar nam Nabaut, bade Ḳaedar, Odbel, Mibsom, 14Mishma, Duma, Masa, 15Hodod, Tema, Ziṭur, Nafish ar Ḳedoma. 16Ismailor ou barozon fua asla baro gusṭir shordar. Tarar namor laḳan hi gau ar tambu bisail zagar-o ou nam oisil. 17Ismailor hayat eḳ-sho shaṛtish boros asil, heshe tain mara gela ar tan baf-dadar gese gelagi. 18Hobila tone Ashiriar bae Mishoror samnor Shur forzonto tan aolad oḳol roita. Ismaile tan hoḳol baiaintor galabae roar zaga faila.
Hozrot Isʼhak (a:) ar tan bai Shek Ish
19Ou oilo Ibrahimor fua Isʼhakor ḳandan-nama. Ibrahimor goro Isʼhakor zonom oilo. 20Isʼhake sallish boros boyosho tan mamur goror boin Rebekare anaia bia ḳorla. Rebeka oila Foddon-Iram deshor Orami Botuelor fuṛi, Orami Labonor boin. 21Tan bou niaoladi asla gotike, Isʼhake Mabudor gese dua ḳorla. Mabude tan dua kobul ḳorla, ar Rebekar feṭo hurutta ailo. 22Bade feṭor bitre huruttae loṛa-soṛa ḳorat lagla. Ou tain ḳoila, “Amar feṭo ila lager ḳene?” Ḳaron zanar lagi tain Mabudor gese dua ḳorla. 23Mabude tanre ḳoila, “Tumar feṭo duiṭa zati ase, feṭo tone-u tara dui bongsho oia foyda oiba. Eḳ bongsho tone aroḳ bongsho shoktiala oibo, ar boṛogue hurugur kezmot ḳorbo.” 24Hurutta foydar bala deḳoin, hasau tan feṭo zuṛor fua. 25Foyla zar zonom oilo he lal rongor ar tar shorilo foshomi kafṛor laḳan rumae bora. Tar nam raḳla Ish [mani, ruma-ala]. 26Bade Ishʼor faor murat dori tar bair zonom oilo, er nam raḳla Iakub [mani, faot dorra]. Isʼhakor shaiṭ boros boyosho era zuṛe foyda oila.
27Ou fuain boṛo oar bade Ish kub bala shikari ar morubumit faḳaora oila, oile Iakub asla nirai-zirai, tain tambut taḳta. 28Shikaror gust moza lagto ḳori Isʼhake Ishʼre maya ḳorta, ar Rebekae Iakubre maya ḳorta.
29Eḳdin Iakube ḍail randisoin, ou shomoy tan boṛo bai Ish morubumi taki feṭor buke kub ḳator oia aila, aia huru bai Iakubre ḳoila, 30“Baire, amar kub buk lagse. Te ou rongil, rongil ota amare feṭ bori kaite de.” Ou ḳotar lagi tan siṛ laglo Idum [mani, rongil]. 31Iakube ḳoila, “Taile boṛo bai oar malikana, tumi aiz amar gese besilao.” 32Ishe ḳoila, “Deḳo, amar zan bar oizar, ar boṛo bair malikanadi ar kita ḳortam?” 33Iakube ḳoila, “Age tumi amar gese ḳosom ḳoro.” Ou Ishe ḳosom ḳoria boṛo bai oar malikana Iakubor gese besilaila. 34Bade Iakube Ishʼre ḍail ar ruṭi kaite dila. Ḳaoa-daoa ḳoria tain uṭia gelagi. Ou laḳan Ishe boṛo fua oar kunu dam-u raḳla na.
सध्या निवडलेले:
Tourat 1: Foyda Nama 25: sylL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Ahle Kitab Society. All rights reserved.