Tourat 1: Foeda Nama 12
12
Hozrot Abram [Ibrahim] (a:)or soforor hukum
1Bade Mabude Abramre formaila, “Tumi tumar nizor desh, ḳesh-kuṭum, ar babaiti biṭa-maṭi saṛia ami ze desh deḳaimu hou desho zao. 2Tumar maz taki ami bout boṛo eḳ zati foyda ḳormu. Tumare rohom-borkot dimu. Ami tumare boṛo ijjoti banaimu, ar tumar usillae asta duniar manshe rohom-borkot faiba. 3Ar huno, tumare zara dua diba, ami Allae tarare rohom-borkot dimu, oile zara tumare boddua diba, ami tarare lannot dimu. Duniar hoḳol zatie tumar usillae rohom-borkot faiba.”
4Mabudor hukum moto-u Abram bar oigela, tan batiza Lut-o tan loge gela. Haran ṭaun falaia zaoar shomoy Abramor boyosh asil fosottoir boros. 5Tan bibi Sara ar batiza Lutre loia tain bar oila. Hoḳol mal-samana loia ar ze gulam oḳolre tain-tain Haran elaḳat faisla tarare loia Kenan desho zaita ḳori roana dila. Heshe hono gia fosla. 6Kenanor mazedi zaite zaite Abram Shikimo aia Murir elon gasor gese ziraila. I shomoy Kenani oḳol hou desho boshot ḳorta. 7Mabude Abramre doroshon dia ḳoila, i deshḳan ami tumar oarishre dilaimu. Abramre zein deḳa dila, hou Mabudor name tain hono ek kurbani kana banaila. 8Hon taki tain Betel ṭaunor fubedi faṛi elaḳat aguai gela, gia foisme Betel fube Oy ṭaunor mazḳano tain tambu gaṛila. Mabudor name tain ino ek kurbani kana banaila ar Mabudor nam loila. 9Bade tain hin taki horte horte Negeb namor douknor morubumir baedi gelagi.
Hozrot Ibrahim (a:) Mishor desho gela
10I shomoy Kenan desho nidan deḳa dilo. I nidan kub ḳoṭin oae, Abrame musafir oia Mishor desho gelagi. 11Mishoror ḳandat aia Abrame tan bibi Sarare ḳoila, “Huno, ami zani tumi kub shundori. 12Tumi zebla Mishori oḳlor souko foṛbae, teu tara buzbo tumi amar bou, ar tumare rakia amare kun ḳorilibo. 13Erlagi koio, tumi amar boin. Ete tumar lagi amar bala oibo, ar amare basaia raḳbo.” 14Abram Mishoro aia harle Mishoror manshe deḳla Sara kub shundori. 15Mishoror bashsha Feraunor guia oḳole tane dekia Feraunor gese gia tan tarif ḳoria boutta ḳoila. Ar Sarare razbaṛir bitre neoa oilo. 16Sarar lagi Feraune Abramre maya ḳorta lagla. Tain Abramre bout goru-sagol, gada-gadi, uṭ, ar bandi-gulam ufohar dila.
17Oile Bibi Sarar lagi Mabude Feraun ar tar baṛir hoḳol manshor maze besheba bemar foyda ḳorla. 18Teu Feraune Abramre nia zikaila, “Afne amar loge ita kita ḳorla? Tanre ḳene afnar bou na ḳoia 19boin ḳoila? Ar ami to tanre bia ḳorar lagi neoaislam. Ein to afnar bibi, ene loia afne in taki hori zaukkagi.” 20Ou ḳota ḳoia Feraune tan manshore hukum ḳorla, ar tara Abramor hoḳol mal-samana shoho tane ar tan bibire bidae ḳori dila.
सध्या निवडलेले:
Tourat 1: Foeda Nama 12: sylL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Ahle Kitab Society. All rights reserved.