Mataio 7
7
Vaze Mazao Sauꞌa rae Ago Noꞌi
(Luka 6:37-38, 41-42)
1Badiꞌaꞌa zaꞌe sauꞌa azaḡa rae mene ziꞌeteꞌe uratine, vaze mazao sauꞌa azaḡa rae ago zoꞌi. 2Mazaḡa zaeꞌa ḡau ꞌahoga moneo vaze mazao sauꞌa rae reine, eꞌe moneo Badiꞌaꞌa zuni zaꞌe sauꞌa reꞌuma. Zaꞌa vaze mazao nagini haḡaine, Badiꞌaꞌa zae mazao ꞌouge haḡaiꞌuma.
3Ḡaꞌe nabugo ubumao beꞌa dinunuḡa ḡianeꞌohe. Rehano nougadu ḡae ubumao beꞌa gado ireḡa mene ḡianeꞌohe? 4Ḡae ubumaḡo beꞌa gado ireḡa ꞌeꞌe rehano, ḡaꞌe negoḡo mazao ꞌahige raꞌohe, raenaꞌa, 'Negohe, ubumaḡo beꞌa dinunu eꞌe mae vaḡinihi.' 5Ḡa, zama guhi vazeḡa, ibite geno ḡae ubumao gado ireḡa eꞌe mae vaḡinoꞌi. Ebu ḡaꞌa faine ehamanadu negoḡo ubuma mazaonoꞌo dinunuḡa mae vaḡiniꞌuma.
6Ḡau zaḡoḡa ḡuni ago hanoꞌi. ꞌOugine ze vaetadu zae vihoziꞌuma. Zae hadi manomano aba zamao ago feunoꞌi. ꞌOugine, zeꞌe oda hina edene ḡuzuhiꞌuma.#7.6 Hugaꞌe, 'Badiꞌa ḡoere mene igiꞌeteꞌe azaḡa mazao ago barebare ihozoꞌi.'
Badiꞌa Mazao Umidoꞌi
(Luka 11:9-13)
7Za nagini uratoꞌidene, Badiꞌa mazao umidoꞌi, ꞌougine ziniꞌuma. Za nagini vaḡoꞌidene, Badiꞌa mazao umidoꞌi, ꞌougine hidiꞌuma. Badiꞌaꞌa danazoga uratine, ibihetao toketokeroꞌi, ꞌougine ibiheta vavaoziniꞌuma. 8Iniuꞌa umidine haꞌuma, iniuꞌa vaḡine hidiꞌuma ebu iniuꞌa toketokerine ibiheta vavaohaꞌuma.
9Zae boꞌaḡano iniuꞌa ubugaꞌa beredi umidine hadi haꞌumahe? 10Ebu aneꞌa ḡozone umidine, mohe haꞌumahe? 11Zaꞌe sauꞌa azaḡa rehano, ḡau manomano ubudeze zenoga urateꞌohe. Eꞌe teige, zae Moze, adureo radiuꞌetaꞌaꞌe, ane mazao umideꞌeteꞌe azaḡa hube hune ḡau manoḡa ziniꞌuma. 12Eꞌanoꞌo vazeꞌa zae mazao haḡai manoḡa haḡaeꞌeteꞌe uratoꞌidene, zae zuni zeḡe mazao haḡai manoḡa haḡaoꞌi. ꞌAdiꞌe Mose goro ḡoeꞌa zu peroveta azaḡaniꞌa ihoziroteꞌe ḡoeꞌa raꞌohe.
Ibiheta Kokosiḡa
(Luka 13:24)
13Ibiheta kokosiḡano diuḡoꞌi. Mazaḡa runeo diuḡiteꞌe ibiḡa ibihetaḡaꞌe rafaḡa zu boro, eꞌanoꞌo eꞌe ibiḡano diuḡeꞌeteꞌe azaḡaꞌe ḡehaḡa. 14U ḡabone tuḡutuḡu diuḡeꞌeteꞌe ibiḡa ibihetaḡaꞌe kokosiḡa zu eꞌe ibiḡano onamogaꞌe riḡa, eꞌanoꞌo eꞌe ibiḡano diuḡeꞌeteꞌe azaḡaꞌe tahiḡa.
Ire ebu Ire Maḡa
(Luka 6:43-44, 13:25-27)
15Ḡuriro peroveta azaḡa ḡianoꞌi. Ze mamoe naminamiḡa teige onaiꞌuma, rehano zeḡe zamaꞌe butu ḡuniḡa vihovihoḡa heuḡa. 16Ireꞌe maḡa horonadu nagi ireḡa ederiꞌuma. Vaini maḡaꞌe ire renogaꞌonoꞌo mene iniꞌohe zu figi maḡaꞌe ḡunu renogaꞌonoꞌo mene iniꞌohe. 17Eꞌe teige, ire manoḡa niduꞌaꞌe maḡa manoḡa iniꞌohe, u ire sauꞌaꞌe maḡa sauꞌa iniꞌohe. 18Ire manoḡaꞌe maḡa sauꞌa mene iniꞌohe, u ire sauꞌaꞌe maḡa manoḡa mene iniꞌohe. 19Maḡa manoḡa mene iniꞌeteꞌe ireḡa niduꞌaꞌe udi modeꞌohe ebu ire rogao hufi haoneꞌohe. 20Eꞌanoꞌo zeḡe haḡai horonadu zeꞌe vaze nagiḡa ederiꞌuma.
21Eḡe mazao, 'Zuhia Boro, Zuhia Boro,' rae huheꞌeteꞌe azaḡa mene niduꞌaꞌe Badiꞌaꞌa ibitoziniꞌuma. Rehano eḡe Mama, adureo radiuꞌeteꞌeꞌa urateꞌeteꞌe haḡaiḡa haḡaeꞌeteꞌe vazeḡaniꞌa daꞌo ibitohaꞌuma. 22Badiꞌa kota madaḡano, vaze ḡehaḡaniꞌa eḡe ihiꞌuma, raenaꞌa, 'Zuhiꞌa Boro, Zuhiꞌa Boro, emeꞌe ḡae nio Badiꞌa ḡoere ihozido, zu ḡae nio vine sauꞌa hegoze buzido zu ḡae nio gigiꞌa haḡaiḡa ḡehaḡa haḡaido'. 23ꞌOugine, eḡeꞌa dehene ziꞌuma, raenaꞌa, 'E zaꞌe mene ederiro. Za, haḡai sauꞌa azaḡa, eḡe mazaonoꞌo vaḡinoꞌi.'
Egadu Haḡaeꞌeteꞌe Azaḡa
(Luka 6:47-49)
24Eḡe ḡoere egadu haḡaeꞌeteꞌe vazeḡaꞌe huhuzaḡa. Aniꞌe vatava rana neḡa ogoraroteꞌe vazeḡa heuḡa. 25Iruguꞌa ruꞌanadu zobozoboꞌa bororarotene ebu zavara boroꞌa feuradu neḡa beirotene, eꞌe neḡaꞌe mene higaro, mazaḡa vatava rana ogoraro. 26U eḡe ḡoere egadu mene haḡaeꞌeteꞌe vazeḡaꞌe hahizaḡa. Aniꞌe niꞌuri rana neḡa ogoraroteꞌe vazeḡa heuḡa. 27Iruguꞌa ruanadu zobozoboꞌa bororarotene ebu zavara boroꞌa feuradu neḡa beirotene, eꞌe neḡa higau bauradu fatariro.”
28Iesuꞌa eꞌe ḡoeꞌa niduꞌa hauḡirotene, vaze ḡuḡuvaḡaniꞌa ane ihore uꞌano zaguzagaro. 29Mazaḡa Mose goro ḡoeꞌa ihozeꞌeteꞌe azaḡa teige mene ihoziro, rehano Badiꞌa gigiꞌa hina ihoziro.
सध्या निवडलेले:
Mataio 7: KSJ
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Wycliffe Bible Translators, INC.
