Mateo 3

Ndo Juan Bautista nichja ndo chijnie ndo Dio

(Mr. 1:1-8; Lc. 3:1-9, 15-17; Jn. 1:19-28)

1Nchakon meꞌe ndo Juan Bautista kuiji ndo ti jii ijna̱ nchese nunte Judea, ntiꞌa nichja ndo chijnie ndo Dio 2#Mt. 4:17; Mr. 1:15.*ko jaꞌin nichja ndo:

―Ikjan titikaonnta ndo Dio ixi ó tuinxin tsonoxin juachaxien ndo.

3Ndo Juan, meꞌe ndo tsindachro ndo Isaías:

Tée naa sen tuyako ti jii ijna̱:

“Nchekonchjiannta chaꞌo tsi̱ꞌxi̱n Ncháina

ko nchenataoxinnta chaꞌo.”

4Ko manta jitsáa ndo Juan Bautista tsikonchjianxin chjuen kucamello ko naa tju̱a̱ jingatoxin ndo. Ko ti bajine ndo jeoxón kuxruꞌa ko tsjeen kunoa, kuntajie. 5Ko bakiji chujni Jerusalén ko ni Judea ko kueya chujni tjajna ste ngandeꞌe inda Jordán ko bakiꞌen na̱ ti kuandachro ndo. 6Ko kuachronga na̱ ti ndakoꞌa juincheꞌe na̱ ngajin ndo Dio ko tjumeꞌe ndo Juan bikitée ndo na̱ ti jii ndajitinga ndatinꞌin Jordán.

7 # Mt. 12:34; 23:33. *Ko bikon ndo Juan ixi kueya xi fariseo ko xi saduceo kuiji xa ixi tjaun na̱ tsikitée xa kaxon, méxin, ndachro ndo:

―Jaꞌanta tsikachrjenixinnta kunchee, ¿ngisen ntatjunta satsingeꞌenta juañaue ndo Dio ti ó tuinxin tsi̱i̱? 8Xrokonda ixi nduaxin tsjakonta ixi ó ti jian rincheꞌenta ko titikaonnta Ncháina.#3:8 Ncháina Señor Ncháina Jesús o̱ Ncháina Dio 9#Jn. 8:33.*Ko xrondachroꞌanta ixi kuachrjenixinnta ndo Abraham ko jaña sinchejiénta asáanta ixi janꞌan ntatjunta ixi ixro jiꞌi chao ndo Dio sinchéña ndo chujni tsachrjenixin ndo Abraham. 10#Mt. 7:19.*Ko jacha ó jichónꞌen jacha xrochrijinxin nueꞌe nta̱yua ixi kain nta̱a̱ tajonꞌa itu jian xrokonda xrochrijin nta̱a̱ ko xroche nta̱a̱. 11Ko nduaxin tjakonta ixi juincheniꞌanta ti ndakoꞌa juincheꞌenta ko janꞌan inda bikitéexinta. Ko ícha tjumeꞌe tsi̱i̱ inaa ndo ícha tetuanꞌan, ko janꞌan tikinixinnaꞌi tsikiꞌan katée ndo, ko jeꞌe ndo tsikitéxinnta ndo Espíritue ndo Dio ko xroꞌi. 12Ko jeꞌe ndo ó jitikaꞌo ndo kachrintue ndo tsjenduaxin ndo noatrigo ko tsinchexin ndo no ti xineno ko tsakeꞌe ndo noa ti jii ntaneꞌto ko xineno tsjaaka ndo xineno, ko xroꞌi meꞌe naiꞌa tsanga xroꞌi.

Xranchi bikitée ndo Jesús

(Mr. 1:9-11; Lc. 3:21-22)

13Ndo Jesús kui̱xi̱n ndo nunte Galilea ko kuiji ndo ti jii ndajitinga ndatinꞌin Jordán ti jii ndo Juan Bautista ixi tsikitée ndo Jesús. 14Ko ndo Juan tjaunꞌa ndo tsikitée ndo ndo Jesús ko jaꞌin ndachro ndo:

―Xrokonda jaꞌanta tsikiténinta janꞌan, ko jaꞌanta tjiꞌinta ngajin ixi janꞌan tsikitéenta.

15Ko ndo Jesús juatingíexin ndo:

―Jaña xrokonda sincheꞌena jai, ixi jaña tsitikaonna kain ti kuetuanꞌan ndo Dio.

Meꞌe ndo Juan kuitikaon ndo. 16Ko ndo Jesús bikitée ndo, tuinxin xenduaxin ndo inda ko meꞌe xitjeꞌe̱ ngajní#3:16 ngajní cielo ko bikon ndo Espíritue ndo Dio xingajin xranchi naa kuntúá ko bakeꞌe ngataꞌa ndo. 17#Mt. 12:18; 17:5; Mr. 1:11; Lc. 9:35.*Ko tuinxin kuinꞌenni naa tée séen kui̱xi̱n ngajní ko ndachro:

―Jiꞌin chjanꞌna tsango tjuaꞌa ko juaxruxin ritjén ngajin xjan.

सध्या निवडलेले:

Mateo 3: ppsNT

ठळक

सामायिक करा

कॉपी करा