UGenesisi 9
9
Isivumelwano SikaNkulunkulu LoNowa
1UNkulunkulu wambusisa uNowa lamadodana akhe wathi kubo, “Zalanani lande ngobunengi ligcwalise umhlaba. 2Zizalesaba zibe lovalo ngani zonke izinyamazana zomhlaba, lazozonke izinyoni zemoyeni, lezinanakazana ezihuquzela emhlabathini, kanye lenhlanzi zonke zolwandle; ziphiwe ezandleni zakho. 3Yonke into ephilayo lenyakazayo izakuba yikudla kuwe. Njengalokhu ngalipha izihlahla eziluhlaza, manje sengilipha yonke into.
4Kodwa lingadli inyama ilegazi lokuphila phakathi kwayo. 5Njalo igazi lokuphila kwenu ngizafuna impendulo ngalo, ngizafuna impendulo kuyo yonke inyamazana. Njalo emuntwini wonke ngizafuna ukwazi ngempilo yomzalwane wakhe.
6Loba ngubani ochitha igazi lomuntu,
igazi lakhe lizachithwa ngumuntu;
ngoba ngomfanekiso kaNkulunkulu,
uNkulunkulu umenzile umuntu.
7Mayelana lani, zalanani lande ngobunengi; yandani emhlabeni libe banengi.”
8UNkulunkulu wasesithi kuNowa lakumadodana akhe ayelawo: 9“Manje sengimisa isivumelwano sami lani lezizukulwane zenu ezilandelayo 10lasosonke isidalwa esiphilayo esasilawe, izinyoni, izifuyo lezinyamazana zeganga, zonke lezo ezaphuma lani emkhunjini, sonke isidalwa esiphilayo emhlabeni. 11Ngiyasimisa isivumelwano sami lani: Kakusoze njalo impilo yonke iqunywe ngamanzi kazamcolo; kakusoze njalo kube lozamcolo ozabhubhisa umhlaba.”
12UNkulunkulu wathi, “Lesi yisiboniso sesivumelwano engisenzayo phakathi kwami lani lasosonke isidalwa esiphilayo elilaso, isivumelwano sezizukulwane zonke ezizayo: 13Sengibeke umchilowamakhosikazi wami emayezini, wona uzakuba yisiboniso sesivumelwano phakathi kwami lomhlaba. 14Kuzakuthi nxa ngiletha amayezi phezu komhlaba besekuvela umchilowamakhosikazi emayezini, 15ngizakhumbula isivumelwano sami phakathi kwami lani lazozonke izidalwa eziphilayo ezemihlobo yonke. Kakusoze njalo lanini amanzi abe yisikhukhula esizabhubhisa impilo. 16Kuzakuthi nxa kungavela umchilowamakhosikazi emayezini ngizawubona besengikhumbula isivumelwano saphakade phakathi kukaNkulunkulu lezidalwa zonke eziphilayo ezemihlobo yonke emhlabeni.”
17UNkulunkulu wasesithi kuNowa, “Lesi yisiboniso sesivumelwano esengisimisile phakathi kwami lakho konke okuphilayo emhlabeni.”
Amadodana KaNowa
18Amadodana kaNowa aphuma emkhunjini ayengoShemu, uHamu loJafethi. (UHamu wayenguyise kaKhenani.) 19La ayeyiwo amadodana amathathu kaNowa, kuwo kwadabuka abantu abasabalala emhlabeni wonke.
20UNowa, indoda yomhlabathi, wasuka wahlanyela isivini. 21Wathi esenathe iwayini lakhona, wadakwa walala enqunu phakathi kwethente lakhe. 22UHamu, uyise kaKhenani, wabona ubunqunu bukayise wasetshela abafowabo phandle. 23Kodwa uShemu loJafethi bathatha isivunulo basiphosela emahlombe abo; bangena behamba nyovane bamboza ubunqunu bukayise. Ubuso babo babukhangele emuva ukuze bangaboni ubunqunu bukayise.
24Kwathi uNowa esevukile selehlile iwayini wezwa ngokwakwenziwe kuye yindodana yakhe encane kulamanye, 25wathi,
“Uqalekisiwe uKhenani!
Isigqili esizakuba phansi
kubafowabo.”
26Wabuya wathi njalo,
“Udumo kalube kuThixo, uNkulunkulu kaShemu!
Sengathi uKhenani angaba yisigqili sikaShemu.
27Sengathi uNkulunkulu angaqhelisa indawo kaJafethi;
sengathi uJafethi angahlala emathenteni kaShemu,
njalo sengathi uKhenani angaba yisichaka sakhe.”
28Ngemva kukazamcolo uNowa waphila okweminyaka engamakhulu amathathu lamatshumi amahlanu (350). 29UNowa waphila okweminyaka engamakhulu ayisificamunwemunye lamatshumi amahlanu (950) isiyonke, wasesifa.
सध्या निवडलेले:
UGenesisi 9: BEN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
IBhayibhili Elingcwele LesiNdebele™ BEN™
© 2003, 2006, 2022 Biblica, Inc.
Lisetshenziswe ngokusemthethweni. Wonke amalungelo agodliwe emhlabeni jikelele.
Ndebele Contemporary Bible™ BEN™
Copyright © 2003, 2006, 2022 by Biblica, Inc.
Used with permission. All rights reserved worldwide.