Jon 21
21
E Iesu i turot tetek mais a kakak a asaerla
1Lamur e Iesu i turot ulak tetek anuna kakak a asaerla tumo na hang a puka tasi Tiberias. A utna ne i hanot larne: 2E Saimon Pita pa e Tomas, di atongi otleng mang a Kasang, pa e Natanael a te Kana miting na papar Galili, pa naur a nat e Sebedi, pa ning naur otleng tagun a kakak a asaerla, la kes taum. 3Pa e Saimon Pita i atai la mange, “Ar han, ar migei uben.” La kelesi mange, “Dala taum.” La kas ana mon pa la han. Ika ana morom ning, bel la dat pas ta sis.
4Ana kobot ning ot, e Iesu i tur tumo korot latasi, ika a kakak a asaerla bel la oroi lalani mang e Iesu. 5Pa e Iesu i deken la mange, “Kakakla, mulo dat pas ot al sis?” La puai mang, “Belal.” 6E Iesu i atai la mange, “Mulor minggen a uben ana ris a sot a kumulo, sur mulor dat pas al sis.” Pa la minggeni larning i atai la. Pa la datdat panan a uben, anasa ka bukus ana sisla. 7A kaklik asasaer ning e Iesu i katnani, i atai e Pita mange, “A Leklek ot numo!” Ning e Saimon Pita i longori mang a Leklek, i pipis ulak pas a kaen ning i paksen tari, pa i sirok uting latasi. 8A kakak a asaer la mur ana mon utumo latasi. Pa la dat purum a uben ning i bukus ana sisla, anasa bel la kes bakbak kusun a hang, i arlar ka ona takai a mar a param.
9Ning la sot ana mon, la oroi a barang a iah taum ana sisla kaning onoi, pa la oroi otleng a bretla. 10E Iesu i atai la mange, “Mulor los al sis ute miting na sisla ning nokane mulo uben pasi.” 11Pa e Pita i kas ana mon, pa i dat purum a uben utumo latasi. I bukus ana tatatnan sis, a wawas onla i arlar ana takai a mar dilima na bonot pa pisir natol. La galis kol, ika a uben bel i taksilir. 12E Iesu i atai la mange, “Mulo han ute pa mulor hangan.” Bel tik tagun anuna kakak a asaerla i tolsot sur ir dekeni mang, “U esi?” La ka tasmani mang a Leklek ot ning. 13E Iesu i los pas a bret pa i tabar la ono, pa lamur i tabar la kale ana sis.
14Ka munatol na tuntunurot ne ane Iesu tetek anuna kakak a asaerla lamur ana kamkamtur anunai kusun a minat.
E Iesu i wunan e Pita
15Ning la ka hangan pas, e Iesu i deken e Saimon Pita mange, “Saimon, nat e Jon, u mang kol sur iau tanla ne?” I kelesi mange, “Momol, Leklek, u tasmani mang a mang sur u.” E Iesu i atai i mange, “Ur tabar anuk na tona sipsipla.”
16E Iesu i deken ulaki mange, “Saimon, nat e Jon, u mang kol sur iau?” I kelesi mange, “Momol, Leklek, u tasmani mang a mang sur u.” E Iesu i atai i mange, “Ur tai alar anuk na sipsipla.”
17Munatol onoi e Iesu i dekeni mange, “Saimon, nat e Jon, u mang sur iau?” E Pita i nuklingiri, anasa e Iesu ka dekeni munatol mang, “U mang sur iau?” I atai i mange, “Leklek, u tasman a ututnala rop. U tasmani mang a mang sur u.” E Iesu i atai i mange, “Ur tabar anuk na sipsipla.
18“A atong momoli tam, ning u barman, u ot u amermer pas u, pa u han ana pukna ning u mang sur ur han ia. Ika ning u ka bun, ur atostos naur a kum, pa tik masik ot ir amermer u, pa ir ben u ana pukna ning bel u mang sur ur han ia.” 19E Iesu i atongi larne, sur ir aslang a ngas a hinirua ning ir kibas e Pita. Ana nuna hinirua ning ir aleklek e God. Lamur i atai i mange, “Ur mur iau.”
E Pita i deken e Iesu o e Jon
20E Pita i talingir pa i oroi a kaklik asasaer ning e Iesu i katnani kaning i mur diau. Esaning i tan tar o e Iesu ning la hangan, pa i deken e Iesu mange, “Leklek, esi ma ir tuam tar u?” 21Ning e Pita i oroi, i deken e Iesu mange, “Leklek, mangmangasa ma a barsan ne?” 22E Iesu i kelesi mange, “Ning a mang sur ir laun tuk ning ar ulak, bel a utna anumi. Ika u, ur mur iau.” 23A warwara ne, i kamkamna sur ning a warwara otleng i han sarara tetek la ning la tortorot, mang a kaklik asasaer ne bel ir mat. Ika e Iesu bel i atongi mang bel ir mat, i atongi ka mange, “Ning a mang sur ir laun tuk ning ar ulak, bel a utna anumi.”
24A kaklik asasaer kane, i ning i warwara talapor ana ututnala ne, pa i tumus akesi. Pa dala tasmani mang anuna warwara talapor, i momol kol.
25E Iesu ka tol tar a galis a ututnala otleng. Ning dir tumus arop la, a nuki mang a rakrakan hanua bel i itna sur dir suah a bukla rop onoi.
सध्या निवडलेले:
Jon 21: lbb
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2019, Wycliffe Bible Translators, Inc. All rights reserved.
