Jon 2
2
Ma lar kuyanga Kanak or nokoplarik hiyawu las li uri
1Niri lap am fri ishirik yanga Kanak ma lar nokoplarik hiyawu las limu ura. Urik Jisas nijava orhi Maria er nga orok simu ira. 2Urik Jisas nga ol orin tiyandari ma nga li mainhashirik limu ira. 3Am li lihi aha wain uku am mendek si narik Jisas nijava orhi si taha orin simu sawera, “Wain uku angop mendek nawa re.” 4Karem si mbarik ormu mbara, “Apmanuwa, anin sawewa hala. Lerawun a lakwa wolok nawa ambu sir.” #Jn 7:30; 8:20 5Karem or mbarik ol aka orok lerawun landari ma ondon simu sawera, “Os mbele las ji ukmbaha nor mba nahi, os or mbawa hom ji uka.”
6Urik sunja awu wasilaka 6-pelak aka orok lindari lir. Uku os awu ondok li tarmuri oso Avui Wasilakahi misokomek jivik li nakmbaha kumba tava lihin li yokokmbaha li eweshirik lindari lir. Awu ondo namtarmba namtarmbak uku si hojeri 100 litak nari lira. 7Urik Jisas lerawun landari ma ondon ormu sawera, “Uksemben awu ondok ji tarmungoroka.” Karem or mbarik ukun li tarmuhu li laharaha li ngororik awu ondo er limu hojerakora. 8Urik ormu sawera, “Uku kas ji tarmu laha ihi ma or akwan humasiri ma oton ji haka.” Urik uku kas li tarmuhu limu laha ira. 9Hako uku oso angop si tormblehe wain ukuk nari sir. Urik ma or akwan humasiri ma oto ormu aheyera. Or mbeek os li tarmuri mishin heyeri ambu ri. Lerawun landari ma ondo nom os li lari mishin heyeri lir. 10Urik akwan humasiri ma oto nokoplari ma oton or usharik or tarik ormu mbara, “Mberemhi tos ter mi uwa! Wain uku jivi menden mi nejereshihi terekare awan mas mi hawa. Nir mbeek erem ni unda ambu nir. Wain uku jivi menden masmas ni handa nir.”
11Jisas mbele las ma undahi ambu maifu mendek yanga Kana provins Galilik or uri kasira. Maintontlo os or uri karem. Or hiushama kwambu nga nanda ria. Oson or urik ol orin tiyandari ma ondo li heyehe limu mbara, “Ma toto kwambu ngashi ria.” 12Urik Jisas yanga Kana oson or halaha nijava orhi nga maha orhi nga ol orin tiyayandari ma nga yanga Kaperneamik limu layira. Uhu niri lal orok limu lira. #Mt 4:13
Jisas tempel akak ya nowen landari man or jila kriala ermberi
(Mt 21:12-13; Mk 11:15-17; Lk 19:45-46)
13Judama hiyawu wasilaka Pasovan li undari wolo am si nakurik si narik Jisas Jerusalemik ormu ira. #Kis 12:1-27 14Or ihi tempel aka inyi li washi aragondari mishi orok or layihi nor heyerik, ol ya nowen landari ma ondo orok lerawun limu lara. Lal sipsip, bulmakau, avi ondon li eweshinak ma li frungawukmbahan. Urik lal samba sambahi yan li lai hashihi Judamahi yan li lakmbahan. Uhu orok limu lira. 15Urik Jisas lirin or heyehe kuvu lal or laha ma ol orok liri ondo nga bulmakau, avi ondo nga or wakororik tempel aka oson li halaha limu talandulu ira. Uhu ya ondon or kru ermbehe teye ondo er nga ormu jilaruma laha ermbera. 16Uhu ol avi ondon lai ewerik li frungawuri ma ondon ormu mbara, “Avi jihi ondon ji laha ika! Jir Avui anhi aka toson ji uwak maket hom osmu nanduwa!” 17Karem urik ol orin tiyandari ma mashi las os Avui Wasilakahi jekambak maskop li kayehendarin indik limu hishira. Mashi oso karem, “An Avui anhi aka orhin a rupshi mendehe osonjik a funtlehavantlehe lerawun a landa nira.” #Sng 69:9
18Judama ondo os or urin li heyehe orin limu silira, “Mberem ushiwak mbele mbele ondon mi laha ermbendu? Os Avui Wasilaka lerawu oson mi lajehe or mbashirik mi rakahanda nahi, kolok mbele las ma undahi ambun mbanak si nanak ni heyehe nivai mba, Avui Wasilaka mbashirik tari ma toria.” 19Karem li mbarik ormu mbara, “Tempel aka toson ji tarvlashinak niri frijip fri ishinak indik a ukwa sir.” #Mt 26:61; 27:40 20Urik limu mbara, “Isha, tempel aka toso mbeek lewas li uri ambu sir te! Asama sihi li uri 46-pelak nari ol te! Hako mberem niri frijip fri ishinak indik toson mi ukwak mi mbandu?”
21Hako Jisas tempel aka os or mbari oso maome orhin or mbari sir. #1 Ko 6:19 22Undari osik Jisas indik or usahari wolo orok ol orin tiyandari ma ondo mashi os erem or mbarin indiyok li hishihi limu mbara, “Ome sira, mbele mbele ol profet ondo li mbari Jisasin li mbari sira.” Karem li mbaha orin wavu lihik limu ewera. Uhu mashi os Avui Wasilakahi jekambak li kayehendari oso er nga li hishihi limu tiyara. #Lk 24:6-8; Jn 12:16
Jisas mbele mbele os mahi sunguwavuk nandan heitakonda lir
23Jisas Pasova wolok Jerusalemik or lihi mbele mbele ol ma undahi ambu ondon or urik ma li heyehe limu mbara, “Ma roto Avui Wasilaka kamahanda ma ria.” #Jn 7:31 24-25Hako Jisas mashi os li mbari oson angop or heyeri sir. Or mbele mbele os mahi sunguwavuk nandan angop or heitakonda lir. Karem uri osik os orin wavu lihik li ewehe li mbari oson misiri ambu ri. Angop or heyeri lir, lir men suwambushikop mbari lir.
सध्या निवडलेले:
Jon 2: sim
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2005, Wycliffe Bible Translators, Inc.All rights reserved.
