Mateo 4

Hin tinokso hi Jesus

(Marcos 1:12-13; Lucas 4:1-13)

1Bi-sa hi Jesus ay intandoro nin Ispirito nan Dios nin mako ha disyirto para toksowon na ya ni Satanas. 2Lolog nan itaw ni Jesus ay nagsakripisyo yan kay nangan ha loob nin a-pat a polo a awlo tan yabi. Pa-makayari odti ay masyado yay nan mabitil. 3Tongwa, nakalato hi Satanas para toksowon na ya. “No talagan Anak na kan Dios,” wana kona, “gaw-on mon pa-mangan odtin bawbato.” 4Kay na ya hinonol ni Jesus, nokay wanan in-obat kona, “Nakasolat ha Masanton Kasolatan,

‘Ambo bongat ha pa-mangan mabyay a tawo,

Nokay kailangan na syimpri a balang halita nan Dios.’”

5Bi-sa inawit ni Satanas hi Jesus ha Masagradon Syodad Jerusalem, ta itaw na ya pina-dong ha pinakatoktok nin timplo nan Dios. 6Bi-sa wanay naman koni Jesus, “No talagan Anak na kan Dios, magdadabo ka. Total, wana ha Masanton Kasolatan,

‘Ipabantayan na kan Dios konlan aw-anghil na.’

tan

‘Alalayan la ka,

Pigaw ni ayi mo kot kay mitiro ha bato.’”

7Wanan in-obat ni Jesus kona, “Potog orin, balo ta wanay namaot ha Masanton Kasolatan,

‘Ando mo hobokon a kapangyarian nan Dios a Katawan.’”

8Bi-sa inawit na yay naman ni Satanas ha toktok nin a-say na-pakata-gay a bakil, ta impatamolaw na konay halban kawkaarian iti ha mondo tan yay kagandawan nin yadti. 9Bi-sa wana koni Jesus, “Halban ya-rin ay ibi ko komo, no manalimokor ka tan somamba kongko.”

10Kot wani Jesus kona, “Paka-dayo ka, Satanas, ta wana ha Masanton Kasolatan,

‘Sambawon moy Dios a Katawan mo

Tan hiyan bongat a pagsirbiwan mo.’”

11Kanya imbati na ya ni Satanas. Bi-sa main aw-anghil a nako koni Jesus ta sinirbiwan la ya.

Nag-ompisan nangaral hi Jesus ha Galilea

(Marcos 1:14-15; Lucas 4:14-15)

12Hin na-tandaan ni Jesus a impriso hi Juan Bautista, norong ya ha probinsyan Galilea. 13Kay ya nagpirmi ha sarili nan babalin Nazaret ta nako ya ni-wan ha babalin Capernaum. Yadtin babali ay iti ha liglig nin Alindayat Galilea tan madani namaot ha logar Zabulon tan Neftali. 14Ha pa-mi-wan ni Jesus itaw ay pinomtog yay impabalita nan Dios koni Propita Isaias hin yadtaw, a wanan nakasolat,

15“Yay lawlogar a anha-wayan Zabulon tan Neftali

Ay madani ha Alindayat Galilea, ha dobali nin Kabatwan Jordan.

Hakop ot yadti nin probinsyan Galilea, kot main anan ampi-wan nin ambo Israelita.

16Hilay tawtawo itaw ay pa-hal ampi-wan ha karobloman bana ha kawkasalanan la.

Ampamagka hilay na komon ha kamatyan nin homin panganggawan a kaparosawan,

Kot na-hawangan ot a main lan kaisipan

Ta nakalato ana yay ampamin hawang konla.”

17Paibat hin ya-rin a panaon [a ni-wan hi Jesus ha Capernaum] ay nag-ompisa yan nangaral. Wanan an-ipangaral, “Mi-pangombabali kamoy na tan bokotan moyoy kawkasalanan moyo ta madani nay nan ipa-kit Dios a pa-mag-ari na.”

Hilay o-nan a-pat a disipolos ni Jesus

(Marcos 1:16-20; Lucas 5:1-11)

18Ninghan, hin anlalako hi Jesus ha liglig Alindayat Galilea, main yan na-kit loway mitalakaka, hi Simon a hina-wayan Pedro hin bandan hoyot tan yay ali na a hi Andres. Ampanglala hila hin ya-rin ta maninilay hila. 19Wani Jesus konla, “Homonol kamo kongko ta gaw-on katamon pa-hal ma-nilay nin tawo [para tompol hila kongko].” 20Tampol lan in-inapat a lala la ta hinomonol hila kona.

21Ha pa-magpatoloy nan kala-lalako ni Jesus, na-kit nay lowa ot a mitalakaka a hila ni Santiago tan hi Juan, a awa-nak ni Zebedeo. Itaw hilay mita-talaama ha baloto ta an-ayomawon lay aw-ikot la. Hina-wayan anamaot ni Jesus odtin mitalakaka. 22Kanya antimano imbati lay baloto la, pati tatay la ta hinomonol hilay namaot kona.

Pangangaral tan pa-maabig ni Jesus

(Lucas 6:17-19)

23Hawanin, nako hi Jesus ha halban lawlogar nin probinsyan Galilea, ta nangaral ya ha sawsinagoga a ampagsambawan la. Impangaral na yay Labah a Balita tongkol ha pa-mag-ari nan Dios, tan pinaabig nay namaot a tawtawo ha halban klasin mawmasakit tan dawdipirinsya la. 24Bana ha ka-paka-ngap a gawgawa na, nibantog ya pati ha intiron Siria. Hawanin, inawit lan tawtawo koni Jesus hilay halban tawon main nangasasari a mawmasakit tan dawdoka a angkalayam, pati hilay nilooban nin dawdoka a ispirito, hilay ansompongon nin pa-ma-paghon tan hilay pawparalitiko. Kanya halban la ay pinaabig na. 25Kanya maski man ayti ya mako hi Jesus, golpin tawoy ampaki-ki-ka kona. Hila-rin a tawtawo ay main ibat ha Galilea a probinsya na, main anamaot ibat ha Decapolis, ha Jerusalem, Judea tan ha baytan nin Kabatwan Jordan.

सध्या निवडलेले:

Mateo 4: xsb

ठळक

सामायिक करा

कॉपी करा